DILONGIESHA 31

Bufumu bu’Efile Mukulu nkinyi?

TEEMESHA MU

Mukandu wi mu Bible nguimene pa Bufumu bu’Efile Mukulu. Yehowa akafubisha buno Bufumu bua kulombasha mpango yaye ya ku kibangilo pa bitale nsenga. Bufumu bu’Efile Mukulu nkinyi? Atuku naminyi’shi bukuete kumunana? Mbupue kukita kinyi? Na abukakitshi kinyi? Dino dilongiesha na angi abidi aalondo aakalula ku ino nkonko.

1. Bufumu bu’Efile nkinyi, na Mfumu abo nnanyi?

Bufumu bu’Efile nyi mbulamatadi abadi batule kui Yehowa. Mfumu abo Yesu Kidishitu, kuete kumunana muiyilu. (Mateo 4:17; Yowano 18:36) Bible akula pabitale Yesu’shi: ‘Akabikala loso . . . bu Mfumu.’ (Luka 1:32, 33) Bu bi Yesu Mfumu a Bufumu bu’Efile Mukulu, akamunana pa nsenga yoso ishima.

2. Mba nnanyi abakamunana na Yesu?

Yesu takamunana bupenka nya. Bantu ba “kisamba kioso, na edimi dioso, na muilo n’eumbo dioso . . . abakamunana pa nsenga.” (Kibafumbwilwe 5:9, 10, Kilombeno kipya 2014) Mbantu bungi kinyi abakamunana na Kidishitu? Kubanga pabafikile Yesu pa nsenga, midiyo ya bena Kidishitu mbafikie balongi baye. Kadi nka penda bantu 144 000 nyi abakamunana na Yesu muiyilu. (Badika Kibafumbwilwe 14:1-4.) Bangi bena Kidishitu boso abakashala pa nsenga abakakunkushibua na buabua Bufumu.—Misambo 37:29.

3. Bufumu bu’Efile Mukulu mbukile mbulamatadi ya bantu naminyi?

Sunga biekala’shi apakunkusha bantu abatompaa kukita mianda i buwa, ta be na bukome bua kukita bioso biabakumina nya. Abebapianaa kui bangi bakunkushi bashi na binangu bia kukuasha bantu. Anka, Yesu Mfumu a Bufumu bu’Efile Mukulu, ta bakamupiana kui ungi muntu nya. Efile muntule “bufumu bushyabukalwishibwa.” (Ndanyele 2:44) Yesu akamunana pa nsenga yoso ishima, na takekala na ntondo. E na kifulo, kalolo, na kululama, na akalongiesha bantu bua kuikitshishena mianda nka mu wawa mushindo umune.—Badika Yeeshaya 11:9.

TUKIMBUULE BOSO

Tutale buakinyi Bufumu bu’Efile Mukulu bui buwa kukila mbulamatadi ya bantu.

4. Mbulamatadi e bukome akamunu pa nsenga ishima

Yesu Kidishitu e na bukome kukila bangi ba mfumu boso. Badika Mateo 28:18, akupu nuisambile luno lukonko alulondo:

Matalua a Yesu ngakile a bakunkushi ba bantu naminyi?

Mbulamatadi ya bantu ayishintulukaa, na mfumu oso akunkushaa penda kapindi ka nsenga. Tui kuamba naminyi bua Bufumu bu’Efile Mukulu? Badika Ndanyele 7:14, akupu nuisambile ino nkonko ailondo:

Buakinyi abisankisha pa kuuka’shi Bufumu bu’Efile Mukulu “tabukabutulua”?
Buakinyi abisankisha pa kuuka’shi abukakunkusha pa nsenga ishima?

5. Mbulamatadi ya bantu abakeyipiana

Buakinyi abitungu’shi Bufumu bu’Efile bupiane mbulamatadi ya bantu? Tala VIDEO, akupu nuisambile luno lukonko alulondo.

VIDEO: Bufumu bw’Efile Mukulu nkinyi?—Kapindi (1:41)

Bukunkushi bua bana ba bantu mbutushe bipeta kinyi?

Badika Mulungudi 8:9, akupu nuisambile ino nkonko ailondo:

Onangushena’shi Bufumu bu’Efile bui kupiana bua bana ba bantu su? Buakinyi wamba biabia?

6. Mukunkushi a Bufumu bu’Efile Mukulu aketupushisha

Muanda Mfumu etu Yesu, badi bu muntu, e “kufwambuka neetu mu kubofula kwetu.” (Bena-Ebelu 4:15) Yehowa musangule bantu bakashi na balume basha lulamato 144 000 abakamunana na Yesu bua kukunkusha “bantu ba bisamba byoso, na ba ndjimi yoso, na ba milo yoso mpa na ba maumbo oso.”—Kibafumbwilwe 5:9.

Kuka’shi Yesu na b’akamunana nabo abauku bi nshalelo a bu muntu abikunyingisha su? Buakinyi wamba biabia?

Yehowa musangule balume na bakashi ba tubila toso bua kumunana na Yesu

7. Bufumu bu’Efile Mukulu bui na miya ikile buwa

Mbulamatadi elaa miya bua kukuasha na kukaluila bantu. Na Bufumu bu’Efile namu bui na miya aitungu’shi bantu be muanka beilonde. Badika 1 Bena-Kodinda 6:9-11, akupu nuisambile ino nkonko ailondo:

Omono’shi nsenga i kuikala naminyi su bantu boso abakokiela miya y’Efile Mukulu? a
Omono’shi Yehowa e na kabingilo ka kuelela bantu be mu Bufumu buaye miya ya kulonda su? Buakinyi wamba biabia?
Nkinyi akilesha’shi bantu basha balondo ino miya be kushintuluka?—Tala verse 11.