Yesu nyi muikale nfumu a kakongye ka bena Kidishitu. (Bena-Efeso 5:23) Lelo uno, kukatukila muiyilu, Yesu kuete kukunkusha balongi baye be pa nsenga, ku bukuashi bua ‘mpika a lulamato na mudimukye.’ (Badika Mateo 24:45.) Bu biababadi bamutule kui Yesu nabene, yawa ‘mpika’ e na matalua a kuata bitshibilo kampanda. Anka abitungu yawa ‘mpika’ atungunukie na kuikala na lulamato kui Kidishitu na kufubila bakuabo na Kidishitu. Kadi yawa mpika nnanyi? Na mbikunyi bietupasukilaa lelo uno?

1. ‘Mpika a lulamato na mudimukye’ nnanyi?

Misango ibungi Yehowa afubishaa muana mulume umune sunga kasaka ka bana balume bua kukunkusha muilo waye. (Malakii 2:7; Bena-Ebelu 1:1) Kunyima kua lufu lua Yesu, batumibua na bakulu ba mu Yelushalema, babadi abakunkusha. (Bikitshino 15:2) Mu mushindo umune lelo uno, kasaka kapela ka bakulu kakuete kukunkusha. Abeketamina bu Kasaka ka Bakunkushi-Bakulu ka ba Temwe ba Yehowa. Kakuete kutusha bidibua bia mu kikudi na kukunkusha mudimo wa bulungudi. Kano kasaka, nyi ‘Mpika a lulamato na mudimukye abadi batuule kui [Yesu].’ (Mateo 24:45, Kilombeno kipya 2014) Boso bena Kasaka ka Bakunkushi-Bakulu mbena Kidishitu bedibue muimu, be na lukulupilo lua nkamunana na Kidishitu mu Bufumu buaye muilu, kunyima kua lufu luabo pano pa nsenga.

2. Mpika a lulamato kuete kutusha biakudia kinyi bia mu kukidi?

Yesu bakuile’shi, mpika a lulamato badi na kia “kupa [bakwabo bena Kidishitu] bidibwa byabo pa nsaa ilombane.” (Mateo 24:45b) Nka bu abitukuashaa bidibua bia ku mbidi bua kushala na mbidi bukome, bidibua bia mu kikudi namu, malongiesha a mu Eyi di’Efile Mukulu, aetupa bukome buatudi nabo lukalo bua kushala na lulamato kui Yehowa na kukumbasha mudimo wabadi betupe kui Yesu. (1 Timote 4:6) Atupetaa biabia bidibua bia mu kikudi mu bisangilo, mu bikongeno bia bifunda na bia mafuku asatu, mu mikanda ayipatuula Bible na mu ma video aetukuasha bua kupusha kikiebe ki’eshimba di’Efile Mukulu na kunyingisha kipuano kietu naye.

 TUKIMBUULE BOSO

3. Abitungu muilo wa Yehowa wikale ulumbulue

Ku bukunkushi bua Yesu, Kasaka ka Bakunkushi-Bakulu kakuete kulumbula mudimo wa ba Temwe ba Yehowa. Yesu badi akunkusha bena Kidishitu ba mu siekele a kumpala mu mushindo umune. Tala VIDEO.

Badika 1 Bena-Kodinda 14:33, 40, akupu nuisambile luno lukonko alulondo:

• Ino verse ayilesha naminyi’shi, Yehowa akumina’shi ba Temwe baye bekale balumbulue?

4. Mpika a lulamato kuete kulumbula mudimo wetu wa bulungudi

Bulungudi bubadi mudimo wi na muulo ukata ubadi aukitshi bena Kidishitu ba mu siekele a kumpala. Badika Bikitshino 8:14, 25, akupu nuisambile ino nkonko ayilondo:

• Munkatshi mua bena Kidishitu ba mu siekele a kumpala, nnanyi badi akunkusha mudimo wa bulungudi?

• Mpyele na Yowano, babakitshine kinyi pababapetele buludiki kui bakuabo batumibua?

Bulungudi mmudimo wi na muulo ukata wabakuete kulumbula kui Kasaka ka Bakunkushi-Bakulu. Tala VIDEO.

 Yesu badi mushimikie kasele pa muulo wi nao bulungudi. Badika Maako 13:10, akupu nuisambile ino nkonko ayilondo:

• Buakinyi mudimo wa bulungudi wi na muulo ukata kui Kasaka ka Bakunkushi-Bakulu?

• Buakinyi tui na lukalo lua ‘mpika a lulamato na mudimukye’ bua kulumbula uno mudimo mu nsenga ishima?

5. Mpika a lulamato kuete kuitupa buludiki

Kasaka ka Bakunkushi-Bakulu kakuete kupa bena Kidishitu buludiki mu nsenga ishima. Akataa bitshibilo naminyi pabitale buludiki bua kutusha? Tutale bibadi abibikitshi Kasaka ka Bakunkushi-Bakulu ka bena Kidishitu ba mu siekele a kumpala. Badika Bikitshino 15:1, 2, akupu nuisambile ino nkonko ayilondo:

• Mmuanda kinyi ubatushishe kuikakena munkatshi mua bena Kidishitu ba mu siekele a kumpala?

• Mpoolo, Barnabase na bangi, babadi bende kui ba nnanyi bua kupudisha uno muanda?

Badika Bikitshino 15:12-18, 23-29, akupu nuisambile luno lunkonko alulondo:

• Kumpala kua kuata kitshibilo, nkinyi kibakitshine Kasaka ka Bakunkushi-Bakulu ka mu siekele a kumpala bua kukimba buludiki bu’Efile Mukulu pabitale wawa muanda?​—Tala verse 12, 15, na 28.

Badika Bikitshino 15:30, 31 na 16:4, 5, akupu nuisambile ino nkonko ayilondo:

• Bena Kidishitu ba mu siekele a kumpala, babakitshine naminyi pababapetele buludiki bubatushishe kasaka ka bakunkushi-bakulu?

• Yehowa badi muelele kukokiela kuabo miabi naminyi?

Badika 2 Timote 3:16 na Shake 1:5, akupu nuisambile ino nkonko ayilondo:

• Lelo uno, nkunyi akukimbaa Kasaka ka Bakunkushi-Bakulu buludiki nsaa yakaata bitshibilo?

 MU KIKOSO

Kasaka ka Bakunkushi-Bakulu nyi ‘mpika a lulamato na mudimukye’ abadi batule kui Kidishitu. Kakuete kutusha buludiki na bidibua bia mu kikudi kui bena Kidishitu ba mu nsenga ishima.

Kuambuula

• Nnanyi mutuule ‘mpika a lulamato na mudimukye’?

• Kasaka ka Bakunkushi-Bakulu kakuete kuitupasukila naminyi?

• Okumina’shi Kasaka ka Bakunkushi-Bakulu nyi ‘mpika a lulamato na mudimukye’ su?