Mukanda kui Bena Ebelu 1:1-14
1 Mu mafuku a kala, Efile Mukulu baadi muisambe na ba nkambua betu ku bukuashi bua batemuki misango ibungi na mu mishindo ilekenelekene.
2 Binobino ku nfudiilo kua ano mafuku, mmuisambe netu ku bukuashi bua Muana, aadi mutuule bu mpianyi a bintu bioso, na bapangile bintu bioso* ku bukuashi buaye.
3 Alesha ntumbo y’Efile Mukulu na, nkifuanyi ki’Efile Mukulu kia binyibinyi na, anyingisha bintu bioso ku bukuashi bu’eyi diaye dia bukome. Kunyima kua’ye kuitutoosha ku miluisho yetu, bashalele ku mboko ibalume ya yawa Mukile bukata e kunundu kua bioso muiyilu.
4 Na aye nkufika kunundu kua mikeyilu muanda baadi mupiane eshina dikile aabo ku buwa.
5 Bu kileshesho, mmuikeyilu kinyi atababaalunguile kui Efile Mukulu’shi: “Obe we muana ande; na lelo uno nafiki nshobe”? Na dingi’shi: “Nakekala nshaye, na aye akekala muana ande”?
6 Anka p’akatumu dingi Muana aye mbedi pa nsenga ishadibue amba’shi: “Mikeyilu yoso y’Efile Mukulu imuinamine.”*
7 Dingi Efile Mukulu akula pabitale mikeyilu’shi: “Ayikasha mikeyilu yaye bu bikudi na bafubi baye* bu ndimi ya kaalo.”
8 Anka pabitale Muana akula’shi: “Efile Mukulu ndupuna nsulu* lobe bua loso, na mukombo wa Bufumu bobe mmukombo wa kululama.
9 Bodi mufule kululama na, oshikua kuipaa kua miiya. Nyi buakinyi Efile Mukulu, aye muikale Efile Mukulu oobe, baadi mukupongoluele muimu wa muloo kukila benobe.”
10 Na: “Kubanga nka ku mbangilo, obe Muanana bodi mupangie kitako kia nsenga, n’eyilu mmudimo wa ku maasa oobe.
11 Abikashimina, anka obe okashaala kuanka; abikaluila nka bu bilamba,
12 Okebifungu nka bu ekotshi, nka bu kilamba, abakebishintuula. Anka obe we nka mumune, na bipua biobe t’abikafiki ku nfudiilo.”
13 Anka mpabitale muikeyilu kinyi atabalunguile’shi: “Shala ku mboko yande ibalume mpa na pa nkatuulu beshikuanyi bobe bu kiashino kia ngua yobe”?
14 Boso ta mbekale bikudi bua mufubo wa kishila,* babadi batume bua kufubila baaba abakapete kipandilo?
Mayi e mushi mwesaki
^ Sunga “uno ndumbuluilo.”
^ Sunga “imuleshe kanemo.”
^ Sunga “bantu abakuasha bangi.”
^ Sunga “nkuasa a bufumu.”
^ Sunga “bua mudimo wa kukuasha bantu.”
