Kui Filemone 1:1-25
1 Ami Mpoolo muina lukano pa muanda wa Nkidishitu Yesu, na mukuetu Timote, kui Filemone mufubi netu mufudibue,
2 na kui mukuetu mukashi Afia, kui Arshipe musalayi netu na kui kakongie akebungilaa mu nshibo yobe:
3 Kalolo na butaale abifiki kui Efile Mukulu Yaya na Muanana Yesu Nkidishitu bikale nenu.
4 Natumbulaa Efile Mukulu misango yoso pankutemuna mu nteko yande,
5 bu biantungunuka na kupusha pabitale lukumiino na kifulo kiodi nakio bua Muanana Yesu na bua beselele boso.
6 Natekie bua’shi lukumiino lui nalo bangi na lodi naalo, lukutakule bua kushinguula kintu kioso kibuwa kiatudi nakio ku bukuashi bua Nkidishitu.
7 Muanda naadi mupete muloo wibungi na naadi musambibue, panaadi mupushe abaakula bua kifulo kiobe, muanda mukuetu, mashimba a beselele abaadi anyingishibue ku bukuashi bobe.
8 Nyi buakinyi, sunga biekala’shi ne na bulungantu bua kuakula mu kuipushena na Nkidishitu bua kukutumina eyi bodia kukita kiakia kilombane,
9 nankusendeela pa muanda wa kifulo kiodi nakio, bu biabidi’shi ami Mpoolo ne muntu mukulu, na dingi ne mu lukano binobino pa muanda wa Nkidishitu Yesu.
10 Nankusendeela bua muan’ande Onesime andi mufikie bu nshaye pano pandi mu lukano.*
11 Kumpala tabaadi na muulo kodi, anka pano e na muulo kodi na kuandi.
12 Namualusha kodi aye andi mufule ngofu.
13 Nadia kumulama kuno bua’shi aate mbalo yobe bua kunkuasha mu mafuku andi mu lukano pa muanda wa mukandu wibuwa.
14 Kadi ntankumiina kukita muanda su ngumune kushi mu kukumiina kobe, bua’shi muanda wibuwa ookitshi, tawikalanga bu w’abakukitshisha pa bukopo, kadi bikale bu mu kukumiina kobe.
15 Pangi nyi buakinyi baadi musuukie bua kapindi kapeela* bua’shi omupete dingi bua loso,
16 kushi dingi bu mpika, anka bu mukile mpika, bu mukuetu a kifulo, bikishekishe kuandi, kadi mmufudibue’nyi ngofu kodi, ku mbidi na mu Muanana.
17 Biabia su ongata bu kuuku oobe, omukuukile na kalolo koso nka bu bibodia kunkuukila ami.
18 Dingi su mmukukitshine muanda wibubi sunga’shi e nobe ebasa, edibadikie bu diande’mi.
19 Ami Mpoolo nafundu n’eyasa diande’mi nabene’shi, nakafutu diadia ebasa kushi kukutentekiesha’shi mpa n’obe namu we na ebasa diande dia muwa oobe.
20 Oolo mukuetu, nkuashe namu mu uno muanda mu kuipushena na Muanana; sankisha eshimba diande mu kuipushena na Nkidishitu.
21 Ne mushinkamishe’shi okitshi biabia biankutekie, nyi buakinyi nakufundila muukie’shi okakitshi bikile mpa na binakulungula.
22 Dingi ondumbuluile mbalo yandia kushala, muanda nakulupila’shi ku bukuashi bua nteko yenu abakangalusha kuanudi.*
23 Epafrase muina lukano nami, mu buumune na Nkidishitu Yesu akutumina mioyo,
24 mpa na Maako, Aristakuse, Demase na Luka bafubi nami abakutumina mioyo.
25 Kalolo ka Muanana Yesu Nkidishitu kekale na kinangu kianukuete kulesha.
Mayi e mushi mwesaki
^ Kish ku kish. “mu nkano.”
^ Kish ku kish. “nguba umune.”
^ Sunga “kumpoosola pa muanda wenu.”
