Mbadiko 22:1-41
22 Akupu bena Isalele bababangile luendo na bashala mu kabaaka ka Moabe ketalene na Yeriko, bushiya bua Yordane.
2 Balake muana a Zipore bamuene bioso bibaadi Isalele mukite bena Amore,
3 na Moabe nkupusha moo ngofu muanda wa muilo, pa muanda ubaadi bungi bukile; binyibinyi Moabe nkupusha moo pa muanda wa bena Isalele.
4 Biabia Moabe nkulungula bakulu ba Madiane’shi: “Binobino kano kakongie akadi bioso bituifunyishe, nka bu ngombe adi lubishi lui mu mafuba.”
Balake muana a Zipore nyi baadi nfumu a Moabe mu aa mafuku.
5 Aye nkutuma mikiendi kui Balame muana a Beore ku Petore, e ku bukunkula bua Muela* muiumbo diaye dia butandua. Aye nkumuitanyisha nkuakula’shi: “Tala! Kui muilo utuukie mu Ejipitu. Ngupuute panundu pa nsenga, na ngushale witalene nami.
6 Binobino, fika namu na ongielele uno muilo mulua, muanda wi bukome kunkila. Pangi ne mulombene kuiutshokola na kuiubinga mu ino nsenga, muanda nauku kalolo’shi yawa oso welela miabi, edibua miabi na yawa oso wele mulua edibua mulua.”
7 Biabia bakulu ba Moabe na bakulu ba Madiane nkubanga luendo na efuto dia lubuko mu maasa aabo na nkuenda kui Balame, nkumulungula mukandu wa Balake.
8 Nyi aye nkuibalungula’shi: “Lalayi pano, na nenulungula eyi dioso adindungula Yehowa.” Biabia ba nfumu ba Moabe nkushala na Balame.
9 Akupu Efile Mukulu nkufika kui Balame na nkumuipusha’shi: “Bano bantu be nobe mbananyi?”
10 Balame nkualula Efile Mukulu a binyibinyi’shi: “Balake muana a Zipore, nfumu a Moabe nyi bantumina mukandu’shi,
11 ‘Tala! muilo utuukie mu Ejipitu ngupuute panundu pa nsenga. Binobino fika weungielele mulua. Pangi nekobesha kulua nao na kuiubinga.’”
12 Anka Efile Mukulu nkulungula Balame’shi: “T’abitungu wende nabo, t’abitungu wele wawa muilo mulua, muanda nguedibue miabi.”
13 Balame nkubuuka ku namashika na nkulungula ba nfumu ba Balake’shi: “Ndayi mu nsenga yenu, muanda Yehowa bapele nenda nenu.”
14 Biabia ba nfumu ba Moabe nkubanga luendo na nkualukiila kui Balake, nkumulungula’shi: “Balame bapele kufika netu.”
15 Anka Balake nkutuma dingi ba nfumu be bungi bukile na ba kinemo kikata kukila ba kisaka kia kumpala.
16 Abo nkufika kui Balame na nkumulungula’shi: “Balake muana a Zipore bakula’shi, ‘Totadilanga namu kintu su nkimune kikukutshishue bua kufika kuandi,
17 muanda nakupa kinemo kikata na nakitshi kioso kiondungula bua kukita. Biabia, fika namu ongielele uno muilo mulua.’”
18 Anka Balame nkualula bafubi ba Balake’shi: “Sunga Balake ampa nshibo yaye iuule na kiamo kia arja na ôlo, ntshi mulombene kukita kintu su nkimune kikutuene n’eyi dia Yehowa Efile Mukulu ande, biakikala kipeela sunga kikata.
19 Anka bandayi kushala pano dingi buno bufuku bua’shi nguukie kingi kintu akindungula Yehowa.”
20 Akupu Efile Mukulu nkufika kui Balame bufuku na nkumulungula’shi: “Su bano bantu babafiki mukukuitanyisha, enda nabo. Anka we mulombene kuakula nka penda mayi ankulungula bua kuakula.”
21 Biabia Balame nkubuuka ku namashika, nkuadisha kishalelo pa mpunda* aaye na nkuenda na ba nfumu ba Moabe.
22 Anka nsungu y’Efile Mukulu nkuteemba muanda baadi ende, na muikeyilu a Yehowa nkuimana muishinda bua kumukutshishua kuenda. Balame baadi mukaamine ku mpunda aaye na bafubi baye babidi babaadi naye.
23 Mpunda pa bamuene muikeyilu a Yehowa mmuimane muishinda na lupete lua ngoshi muiyasa diaye, batompele kukatuka muishinda bua kuenda mu kisuku. Anka Balame babangile kukupila mpunda bua kumualusha muishinda.
24 Akupu muikeyilu a Yehowa nkuimana mu kashinda kapeela pankatshi pa mafuba abidi a nfinyo, kekale na midimba ya mabue mpese yoso ibidi.
25 Mpunda pa bamuene muikeyilu a Yehowa, babangile kuifina ku mudimba na aye nkufikiina luao lua Balame ku mudimba, na Balame nkubanga dingi kumukupila.
26 Muikeyilu a Yehowa nkukila dingi kumpala na nkuimana mu mbalo ipeela ngofu ishibaadi na mushindo wa kuenda ku mboko ibalume sunga ku mboko ibakashi.
27 Mpunda pa bamuene muikeyilu a Yehowa, baladile paashi Balame mushale panundu paye, biabia Balame bakuatshile nsungu na aye nkutungunuka na kukupila mpunda na mukombo waye.
28 Nfudiilo a bioso, Yehowa nkuakusha* mpunda na mpunda nkulungula Balame’shi: “Nakukitshi kinyi bua’shi onkupile ino misusa isatu?”
29 Balame nkualula mpunda’shi: “Pa muanda bommono ku bisumanga. Su nadia kuikala na lupete muiyasa diande, nadia nkuipa!”
30 Akupu mpunda nkulungula Balame’shi: “Ntshi mpunda oobe odi mukaamine munda mua muwa oobe oso mpa na lelo uno su? Tandi mukukite dimo bino su?” Aye nkualula’shi: “Nya!”
31 Nyi Yehowa nkubuula meso a Balame, na aye nkumona muikeyilu a Yehowa mmuimane muishinda na lupete lua ngoshi muiyasa diaye. Mususa umune aye nkuinama na nkukupila mpala yaye paashi.
32 Akupu muikeyilu a Yehowa nkumulungula’shi: “Buakinyi bokupila mpunda oobe ino misusa isatu? Tala! Ami nabene nafiki mu nkukutshishua kuenda, muanda eshinda diobe ndikutuene na kikiebe ki’eshimba diande.
33 Mpunda ekeele mummone na batompo nkunyikumba ino misuusa isatu. Puandikisha’shi tabaadia kuikala munyikumbe! Nadia nkuipaa na naleka mpunda na muwa.”
34 Balame nkulungula muikeyilu a Yehowa’shi: “Nakitshi muluisho, muanda ntanguukanga’shi nnobe ekeele muimane muishinda bua kufumankana nami. Binobino, su bi bubi ku meso kobe, nalukiila.”
35 Anka muikeyilu a Yehowa nkulungula Balame’shi: “Nda na bano bantu, kadi wakule nka penda mayi a nkulungula.” Biabia Balame nkutungunuka na kuenda na ba nfumu ba Balake.
36 Pabaadi Balake mupushe’shi Balame bafiki, batuukile musuusa umune mu kufumankana naye ku kibundi kia Moabe ki ku bukunkula bua Arnone ku mikalo ya yaaya nsenga.
37 Balake nkulungula Balame’shi: “Ntshikeele mu kuitanyishe? Buakinyi tuekeele mufikie kuandi? Opuandikishanga’shi ntshi mulombene nkupa kinemo kikata?”
38 Balame nkualula Balake’shi: “Bi buwa, binobino binafiki kodi’bi. Anka abantadiila bua kuakula muanda kampanda su? Nakula nka penda mayi aele Efile Mukulu mukanua muande.”
39 Biabia Balame nkuenda na Balake na abo nkufika ku Kiriate-ushote.
40 Balake nkulambula ngombe na mikooko na nkutumina Balame na ba nfumu babaadi naye ndambo.
41 Ku namashika Balake nkuata Balame na nkukaamina naye ku Bamote-baale; bua’shi amone muilo oso.
Mayi e mushi mwesaki
^ Abimueneka bu Efrate.
^ Kish ku kish. “mpunda mukashi.”
^ Kish ku kish. “nkubuula mukanua mua mpunda mukashi.”
