PWANDIKISHA’SHI okwete kutambuka mu eshinda mwi mufito ku kyolwa kya bufuku. Sunga byekala’shi nguba bapu kwisha kipindji na kupona, topusha bu muntu bashimina nya, mwanda we na elampi di na kaalo ke bukopo mu masa mobe. Nsaa ywedimunyika paashi, omono kalolo kintu kyoso ki pepi nobe. Na dingi nsaa ywedimunyika kumpala, etaata dyadyo adimunyika eshinda dywende mpa na ku mbalo i kula.

Mu mushindo umune, Bible e nka bu dino elampi. Nka bu byatudi bebileshe mu miisambo ibashala, Eyi dy’Efile Mukulu ndilombene kwitukwasha bwatudya kupudisha myanda yatudi nayo binobino kumpala kwetu​—myanda yatukwete kufumankana nayo mu uno ndumbulwilo e myanda ibukopo. Anka Bible temena nka penda papa nya. Etumunyikila dingi bwa nshalelo eetu a mu mafuku aafiki, na bino abitupa mushindo wa kumona na kulonda eshinda aditutwala ku muloo wa ikalaika. (Misambo 119:105) Mu mushindo kinyi?

Tubande kutala mishindo ibidi yabetupa lukulupilo lwibuwa mu Bible pabitale nshelelo eetu a mu mafuku afiki: 1 Etukwasha bwa kwikala na muloo mu nshalelo, na 2 etulongyesha byatudi balombene kwikala mu kipwano kya ikalaika na Mupangi eetu.

Bible etupa elango dibuwa aditukwasha bwatudya kunyingiila myanda yetu, anka ta mwikale bu mukanda autusha penda bukwashi nya. Pamutwe pa kwitukankamika bwatudya kwimena pa myanda yetu’twe banabene, Bible etulongyesha bwatudya kuuka’shi mu muwa wetu kwi ingi myanda i na muulo kukila myanda ayitusankisha na myanda ayitukalakasha atwe banabene. Su tubakitshi byabya ngi twikale na muloo mu nshalelo eetu.

Bu kileshesho, banda kutala dino eyi dya kulonda dya mu Bible: “Muloo wa kupaana ngukile wa kupeebwa.” (Bikitshino 20:35, Kilombeeno kipya 2014) We kunangushena bibopushishe pabodi mukwashe muntu e mu dikyenga dya kintu kampanda su? Sunga pabodi mwate nsaa ya kuteemesha kuuku’obe badi akulungula  myanda i mwishimba dyaye? Twe mupushe namu bu’be bakitshi kintu kibuwa sunga ki na muulo pa kukwasha mungi muntu bwa’shi ekale bibuwa su?

Atupushaa muloo wibungi nsaa yatupa muntu kintu kushi kutengyela’shi etwalwishe. Ungi mufundji bambile’shi: “Bi bukopo bwa’shi okwashe bangi bantu kushi kupeta namu bibungi kukila bibopana—we kupeta bino anka su bopana kushi binangu bya’shi bakwalwishe.” Kadi nsaa yatupa bangi bantu​—bikishekishe baaba bashi na mushindo wa kwitwalwisha—atupete bwedi. Atuuku’shi kwi bangi be na myanda ikile yetu. Kushi mpaka, atufubu pamune na Mupangi eetu nabene, amonaa bino bikitshino bya kalolo bu bintu byabamwiyapusha. (Nkindji 19:17) Ataa myanda yoso yatukitshina bantu babofule na muulo, na etulaa’shi aketwalwisha pa kwitupa muwa wa ikalaika mu mpaladiso pa nsenga—wikale bu lukulupilo lwa muloo lwa mu mafuku aafiki!​—Misambo 37:29; Luka 14:12-14. *

Kya kumpala, Bible etulongyesha’shi twi balombene kupeta muloo wa binyibinyi mu muwa wetu nsaa yatulangwila Efile Mukulu a binyibinyi, Yehowa. Eyi dyaye aditukankamika bwatudya kumupa ntumbo, kinemo, na kumukookyela mwanda mmwibilombene. (Mulungudi 12:13; Kibafumbwilwe 4:11) Nsaa yatukitshi bino, atukitshi kintu akitukaanyisha ngofu: Atusankisha Mupangi eetu. Kushi mpaka, etulungula’shi: “Ikala sha binangu . . . eshimba dyande disangale.” (Nkindji 27:11) Banda kwela binangu—​nsaa yatwata bitshibilo bya binangu bimeene mu mayi a kulonda e mu Bible, atusankisha eshimba dya Nshetu sha kifulo e mwiyilu. Bwakinyi? Mwanda etupasukila na akumina’shi twikale bibuwa atwe banabene nsaa yatulondo bukunkushi bwaye. (Yeeshaya 48:17, 18) Eyendo, muloo bukata kinyi watudi balombene kupeta nsaa yatulangwila Nfumu a eyilu na nsenga na kwikala na nshalelo amusangasha?

Bible etulongyesha dingi bwatudya kwikala mu bukuuku na Mupangi eetu. Bifundwe abyakula’shi, “Efubwileeyi kwi Efile Mukulu, byabya aye namu efubwila peepi nenu.” (Shake 4:8) Ingi nsaa twi kwikala na mpaka na kwiyipusha su kwi mushindo binyibinyi wa kwikala kuuku a Mupangi sha bukome boso. Anka Bible etushinkamisha’shi su ‘tubakimbi Efile Mukulu, twi balombene kumusokola,’ mwanda ‘te kula na ooso a kwatudi’ nya. (Bikitshino 17:27) Elango dya mu Bible dya kwikala kuuku a Efile Mukulu di na muulo bwatudya kwikala na nshalelo e buwa mu mafuku aafiki. Mu mushindo kinyi?

Banda kutala uno mwanda: Sunga twekitshisha naminyi, muntu su ngumune a kwatudi ta mulombene kusuuka lufu lwikale mwishikwayi netu a nfudiilo nya. (1 Beena-Kodinda 15:26) Anka, Efile Mukulu nga ikalaika. Ta mulombene kufwa, na akumina’shi bakuuku baye bekale na muwa wa ikalaika. Ku bukwashi bwa ano mayi apeela kadi e buwa aalondo, Bible etulungula akikumina Yehowa bwa’shi bantu boso abamukimbi: “Bekale na muuwa mu mafuku ooso (sunga bwa ikalaika).”​—Misambo 22:26.

We kwikala mu buno bukuuku bwa ikalaika n’Efile Mukulu naminyi? Tungunuka na kulonga bwa kumuuka ku bukwashi bwa Bible, Eyi dyaye. (Yowano 17:3; 2 Timote 3:16) Mutekye bwa’shi akukwashe bodya kupusha Bifundwe. Bible etushikamisha’shi su tubantungunuka binyibinyi na “kuteka Efile Mukulu” binangu, aketupa byanka. * (Shake 1:5) Akupu, ekitshishe bodya kutumikila myanda yolongo, welekyele bwa’shi Eyi dy’Efile Mukulu dikumunyikye bu elampi “adimunyika ku ngwa [yoobe]” na bu ‘etaata adikutooshesha eshinda [dyoobe]’​—kubanga binobino na bwa ikalaika.​—Misambo 119:105.