Nandi mutundule akikapu kukutua kua kululama

Muisambo wa Ursula Menne

Kubanga kala natentekiesha’shi, naadi nka na lukalo luashi bantu boso bekale abebakitshina mianda na kululama. Luno lukalo nyi lubaadi lungishishe mu lukano lua kutunduka nguba kua Allemagne. Kuakua nyi kunadi mupete lualulo pabitale mianda ya kukutua kululama. Ntemesheyi nenulondele.

NEMUTANDIKUE mu kipua kia 1922 mu Allemagne, mu kibundi kia Halle, takudi bipua 1200 kasha bapua kuibaka kibundi kia Halle. Kibundi kia Halle ki kula kua bilometre 200 pankatshi pa kuushi na kupona nguba ku’eumbo dia Berlin, Halle nyi nkimune kia ku bibundi bibabangile kipuilo kia ba Protestan. Mukuetu mukashi Käthe baadi mutandikue mu 1923. Papa baadi musalayi. Mama baadi ayimbi mu mianda ya teyatre.

Mianda inaadi mumone kui Papa nyi ibampele lukalo lui bukopo lua kulumbula mianda ya kukutua kululama. Papa pabakatukile busalayi baadi mufungule makashinyi. Bu bikale’shi bakidiya baye be bungi babaadi balanda, papa baadi ebapusha lusa na kuibapa bintu bia mabasa. Ubaadi muanda wi buwa, anka bino bibaadi bimufikishe mu kupona, makuta aaye oso aapua. Uno muanda ubaadi ufumankane na papa ubaadi undongieshe’shi, kukimba bia kulumbula mianda ya kukutua kululama kui bukopo ngofu kukila biakumueka ku meeso. Kadi su nsongua ena lukalo lua kukita muanda kampanda abikalaa bukopo buashi ashintuule binangu biaye.

Bu bibaadi nyinami auku miya ya ngono ngofu, baadi muituleshe na Käthe bia kuyimba na kusha. Ami na Käthe pabatudi tu ki bana bakinga, tubaadi na nshalelo e buwa biabia​—bi baadi bino mpa na mu kipua kia 1939.

Makienga ababanga

Panapuile kalasa ka sekondere, natuelele ku kilongielo kia balongaa bia kusha masha, kuakua nyi kunaadi mulongie masha abetanyina bu Ausdruckstanz (masha aalesha abipusha muntu), Mary Wigman nyi baadi mulongieshi. Baadi auku kalolo ano masha aalesha abipusha muntu, na bibaadi abitungu’shi yawa ashi atuushe mpushisho kampanda. Naadi dingi mukite mudimo wa kushinga mpetshi. Naadi na muloo mu bipua bia ku busongua buande na naadi mulongie mianda i bungi. Anka mu 1939 ngoshi yakabidi ya nsenga ishima ibaadi ibangie. Mu 1941 undi muanda wa malua ubaadi ukitshikie, papa bafuile na mukumbo wa tuberculose.

Ngoshi ayifuishaa makienga e bungi. Sunga mbibandi na bipua 17, nadi mupuandikishe’shi nsenga ibafiki ku nfudilo. Naadi mumone mpa na bantu bende nkumo ba muiumbo abakuatshika ku muteo wa bena Nazi. Kunyima bintu bibaadi bishimine, bantu babaadi bafue na bintu bi bungi bibaadi biluile. Nshibo yetu ibaadi iluile ngofu pabaadi bombe muikupoone, na babaadi bayipe bantu be bungi ba mu kifuko kietu.

Pabaadi papue yaaya ngoshi mu 1945, ami na mama na Käthe, tubaadi tuki bashale mu kibundi kia Halle. Mu aa mafuku naadi ku dibaka na naadi na muana nsonguakashi, kadi dibaka diande dibaadi na nkalakashi. Kunfudilo a bioso tubaadi bepeleene, na naadi nakimbi bia kupudisha nkalo yande na ya muana ande, bua kuiyikumbasha naadi nashi na kukita mudimo wa kushinga mpetshi.

Kunyima kua ngoshi, babaadi batshibuule Allemange mu bipindi binanka, na mbulamatadi a Union soviétique nyi baadi akunkusha eumbo dietu. Kubanga nka paapa tubekele atue boso mushi mua matalua a ba koministe. Mu 1949, kipindi kia kutunduka nguka kua ellemagne kubatudi bashale, kibafikile bu République démocratique allemande (RDA).

Nshalelo mu kumunana kua ba koministe

Mu biabia bipua mama babangile kukumba ngofu na badi muntekie bua kuenda mu kumukuasha. Napetele mudimo wa mu biro ku mbulamatadi a muiumbo dietu. Mu aa mafuku nafumankene na bena kalasa babaadi abakitshi muabu moso bua kukaka binangu bia bantu ku mianda ya kukutua kululama ibaadi ayikitshika. Bu kileshesho, babaadi babingie ungi nsongua ku université penda muanda washi nshaye baadi mu kisaka kia bena Nazi. Naadi namuuku kalolo muanda tubaadi atuyimbi naaye pamune. Naadi neyipusha’shi, buakinyi yawa nsongua baadi akiengie bua mianda ibaadi nshaye mukite? Nadi muipane dingi ngofu mu kiakia kisaka kia bena kalasa babaadi abatomboka, na naadi muate kitshibilo kia kuenda nabo mu ma mbalo e bantu bebungi nsaa yabakuete kutomboka. Ungi musango naadi mpa na mutuule ma trakte mu ma bitenta bia nshibo ya tribinale.

Ngoshi inaadi naalu pabitale kukutua kua kululama, ibanyingile dingi ngofu, pabaabadi bampe mudimo wa bu sekretere mu komite a kukimba butaale mu kibundi. Ungi musango, bua mianda ya politike, komite baadi mulumbule bua kutumina ungi muntu mukulu a ku Allemagne a kupona nguba mikanda i na mianda ya madimi ya ba koministe, bua’shi bamone kia kumufunda nakio. Bu bibaadi yaya mianda ya kukutua kua kululama inkalakashe, naadi mufuamishe yaya mikanda mu biro biande. Biabia, tababaadi bamutumine yanka nya.

“Muntu baadi mukile bubi a mu mbalo ibatudi” baadi mumpe lukulupilo

Mu mueshi wa kasamombo mu kipua kia 1951, bana balume babidi babatuelele mu biro bandungula’shi: “Tubafiki bua kukukuata.” Babayile nami mu lukano luabetanyina bu Roter Ochse, sunga bu Red Ox. Kunyima kua kipua kimune, babaadi banfunde’shi nkuete kukutshina mbulamatadi mianda ibubi. Ungi mulongi baadi munfunde kui ba koministe ba kutunduka kua Allemagne, na kui bampulushi’shi nnanyi baadi mutuule ma trakte ku tumiladi. Tababaadi bansambishe na kululama nya, muanda muntu sunga ngumune tabaadi mutemeshe binadi nangakula. Babaadi bantshibile bipua bisamombo mu lukano. Mu aa mafuku nambangile kukumba, abo nkuntula mu lupitalo lua mu lukano pamune na bangi bana bakashi bafikie ku 40. Kunyima kuami kumona baaba bantu boso babaadi benyongole, nambangile kuela misaase. Nansukile, ami nkubanga kukupila makofi ku kiibi.

Ungi mulami a lukano bangipuishe’shi “Okiebe kinyi?”

Naadi muele musaase’shi “Nakiebe kutuka muno, ntule sunga mbalo ya pa bupenka, kadi ontushe namu muno!” Anka, tabaadi mumpushishe nya. Kunyima kua kapindi, namuene ungi muana mukashi baadi muilekene na bantu boso. Baadi amueneka’shi e na butaale. Biabia, nadi mushale pepi naye.

Bandunguile’shi “Su boshala pepi nami, abitungu wekale mudimukie,” ami nkukaanya ngofu. Akupu, bandunguile dingi’shi: “Bangi abamono’shi ami ne muntu mubi mukile bantu boso ino mbalo yatudi muanda ne Temue a Yehowa.”

Mu aa mafuku, ntanguukanga’shi abamonaa ba Temue ba Yehowa bu beshikuanyi ba ba koministe nya. Kadi kiangukanga pabibatale nkia’shi, balongi ba Bible babidi (bibaadi abayitanyina ba Temue ba Yehowa kala) babaadi abafiki mukutala papa pankiangikalanga mukinga. Nadi mutentekieshe bibaadi papa muakule’shi “Balongi ba Bible mbantu bebuwa!”

Panaadi mufumankane na yawa muana mukashi abetanyina bu Berta Brüggemeier, naadi mudile. Namulunguile’shi “Ndongieshe namu mianda ya Yehowa.” Kubanga nka paapa, tubaadi bakishe naye nsaa ibungi pamune, na misango ibungi tubaadi atuisamba mianda ya mu Bible. Naadi mulongie’shi Yehowa nyi Efile Mukulu a kifulo, a kululama na a butaale. Ami nkulonga dingi’shi Efile Mukulu akakatusha mianda yoso ibubi yabadi bafuishe kui bantu babi. Misambo 37:10, 11 amba’shi: “Kapindi n’aka, taakwikala mubi dimo . . . Beeyishe naamu, abapyaana nsenga, abasangeela mu butaale bw’eyendo.”

Kutuuka kuande kua mu lukano na kuenda kupona nguba kua Allemagne

Mu kipua kia 1956, babaadi bantushe mu lukano kunyima kuami kukita penda bipua bitano. Mafuku atano kunyima kuabo kumposola, nansukile mu République démocratique allemande (RDA) ami nkuenda kupona nguba kua Allemagne. Mu aa mafuku naadi na bana bande bakashi babidi, Hannelore na Sabine, ami nkuenda nabo. Kuakua nyi kubatudi bayipee dibaka dietu, na ami nkuimonena dingi na ba Temue ba Yehowa. Panaadi nende na kulonga Bible, namuene’shi abitungu nshintuule mianda ibungi bua’shi nshalelo ande epushene na miiya ya Yehowa. Naadi mushintuule nshalelo ande, ami nkubatshishibua mu kipua kia 1958.

Kunyima, naadi muiyibakishene na ungi Temue a Yehowa​—Klaus Menne. Ami na Klaus tubaadi mu dibaka dibuwa bukile, na tuibatande bana babidi, Benjamin na Tabia. Muanda wa malua, Klaus baadi mufue mu masaku takudi bipua bifikie ku 20, na mpa na na lelo uno ne mushale bu mukashi kilele. Kadi lukulupilo lua lusangukilo na kuuka’shi bafue abasanguka mu Mpaladiso abimpaa bukome. (Luka 23:43; Bikitshino 24:15) Dingi, kumona bana bande boso bananka abafubila Yehowa akunyingisha ngofu.

Kulonga kuande kua Bible nkunkuashe bua kumona’shi nka penda Yehowa nyi mulombene kufuisha kululama kua binyibinyi. Mu kuilekena na bantu, Yehowa atalulaa mianda yetu yoso, mpa na mushindo watudi bakule; ino mianda tayikambaa kumueneka ku meso a bantu. Kino kiukilo nkimpe butaale, bikishekishe nsaa yammono sunga yabankitshina mianda ya kukutua kululama. Mukanda wa Mulungudi 5:8 awamba’shi: ‘Su mwiumbo omono sha bulanda mupombeshwe, bwolokye na bululame bilwishwe, tabasukinga kino kintu, mwanda, kuunundu kwa muntu mukata, akutala mungi mukata, dingi kuunundu kwabo, kwi mwibakile booso bukata.’ Yawa ‘Mwibakile booso bukata’ nyi Mupangi etu. Bena Ebelu 4:13 amba’shi: “Na ta kwi kipangwa su nkimune kifwame kumpala kwaye, anka bintu bioso bi muswa na bi patooka ku meeso kwa yawa atudi n’aye mwanda.”

Kutentekiesha mianda ipue kukitshika takudi bipua bikile pa 90

Ingi nsaa bantu abangipushaa bibaadi nshalelo mu kipungo kibaadi bena Nazi sunga ba koministe abakunkusha. Nshalelo tabaadi mubofule nya. Yaya mbulamatadi, mpa na mbulamatadi yoso ya bana ba bantu ayishinkamisha’shi bantu ta mbalombene kuikunkusha abo banabene nya. Bino abiakula Bible mbi’eyendo: ‘Bangi mbatonte ben’abo na kwibamwesha malwa.’​—Mulungudi 8:9, EMM.

Panadi nsongua tanguukile mianda ibungi, nadi nakumina’shi bakunkushi bakite mianda na kululama. Kadi binobino nauku mianda ibungi. Anka penda Mupangi etu nyi mulombene kutula kululama kua binyibinyi pa nsenga. Akebikitshi p’akakatusha bantu boso be bubi pe nsenga, na kupa muan’aye Yesu Kidishitu bufumu bua kukunkusha pa nsenga, aye atuulaa nkalo ya bangi bantu kumpala kua yaye. Bible akula pabitale Yesu’shi: “We mufule bululame, obe nkupela bubi.” (Bena-Ebelu 1:9) Ne na lutumbu lukata bu bibaadi Efile Mukulu mungitanyine kui uno Nfumu ebuwa na mululame, mu bukunkushi buaye nankekala na muwa wa looso!

[Foto]

Ami na bana bande bakashi, Hannelore na Sabine kunyima kuatue kufiki mu Allemagne a kupona nguba

[Foto]

Lelo uno, ami na muana ande Benjamin na mukashi aye Sandra