Kutuula myanda ayitungu pa mbalo ya kumpala. Bible etulanga bwa “kushinguula kikile byooso ku buuwa.” (Bena-Fidipe 1:10) Kita liste a myanda ya kukita i na muulo ukata sunga ayitungu kukita bukidibukidi sunga yooso pamune, na kushi kuluba shi mwanda wa muulo ukata​—bu kileshesho kuula kwa bya kudia​—wi kwikala shi tautungu kwiukita bukidibukidi. Na dingi mwanda aumweka shi autungu kukita bukidibukidi​—bu kileshesho kutala emisio obe a TV kubanga ku mbangilo​—ngulombeene kwikala tawi na muulo. *

Nangushena kumpala. Mukanda wa Mulungudi 10:10 awamba shi “Su kyaamo kyaapwa maashi, su taabanoono maashi aakyo, abikyebe bukome bwi misuusa ibidi.” Verse akumbasha dingi shi: “Tudingi ngi atupetesha muntu kipeta kibuwa.” Akitulongyesha kinyi? Noona kabengyele koobe ka mu kifwanyi po’be kulumbuula myanda kumpala bwashi obeshe kutumika kalolo na nsaa yoobe. Tuula ku mbwipi sunga ku kukasha myanda ishi na muulo, ikwete penda nkudia nsaa na bukome boobe. Su bomono shi bopete nsaa mwanda bopudisha mudimo obe bukidi, bwakinyi twe mulombeene kubanga kukita mwanda wekeele mulumbuule bwa kukita kunyima? Kwela bainangu kumpala, akukukwasha bwa kupeta bipeta bibuwa, anka bu muntu sha binangu anoono kabengyele kaaye.

Pelepesha nshalelo obe. Longa bya kupela kukita myanda ishi na muulo sunga ikwete penda nkudia nsaa. Myanda ikile bungi ya kukita na ma rendez-vous akile bungi ngalombeene nkukalakasha mu binangu na kushimisha muloo obe.

Kwalusha myanda kumongo na kukutwa kwa kitshibilo. “Atala lupapi taamyaaminaa, atala makumbi taanweyaa.” (Mulungudi 11:4) Kyabitulongyesha? Kwalushanga myanda kumongo ngifi a nsaa na a bipeta bibuwa. Mudimi ayindjila shi myanda yooso ikale ipwidikye pangi te n’efuku dyakunu sunga kumbula nya. Bi mumune, pangi twi kutadiila ingi myanda yatushy’abauku byayikitshika kwitukutshisha kwata bitshibilo bya muulo. Sunga shi twi kumona shi abitungu twindjile pa nsa nguba atuuku kalolo myanda yooso bwa kwata kitshibilo. Bwashi twikale bashinkamishe, kumpala kwa kwata bitshibilo bikata abitungu kukimbuula na kwela binangu bwa kusangula akitungu kukita. Nkindji 14:15 amba shi: “Muntu mudimukye eeyipushaa kwende.” Kadi eyendo shi mu bitshibilo bibungi mwi mpa na myanda yatushi balombeene kuuka byayikidika.​—Mulungudi 11:6.

Kukishakisha. Shake 3:17 amba shi “Binangu bya mwiyilu . . . Mbya butaale.” Eyendo, kukimba kwashi myanda ikitshikye kalolo kakile kwi na muulo! Kadi, ingi nsaa, twi kwiyelela bitungo bikile bukopo abifikye mu kwitutshimbisha pangi mu kwitukutshisha kobesha. Bu kileshesho, muntu kwete kulonga ludimi lupya, abitungu aukye abanga kwakula na bilema, akulupile shi alongyela pa bino bilema. Muntu sha kukishakisha, akyebe kulwila kwishimba pa kukwandjikisha shi akula na bilema​—bino binangu mbilombeene kumukutshisha kwenda kumpala. Mbikile buwa kwikala na nkatshinkatshi pabitale myanda yatukulupila! Nkindji 11:2 amba shi “Beeyishe ngi baasha-binangu.” Na dingi, beyishe tabeyataa na muulo ukile nya na mbalombeene kwisepa.

Kinkatshinkatshi pabitale mudimo na kukisha kapapi. “Bibuwa bwa mpudi y’eyaasa yuule na diikisha pee maasa abidi a mufubo, a kubinga kwa lupapi.” (Mulungudi 4:6) Bantu bakolwe mudimo abesumina bikuba bya “maasa abidi a mufubo.” Tabe na nsaa sunga bukome bwa kukita ingi myanda. Muntu sha lulengu namu, akumiina kutuula “maasa abidi a mufubo” mu kwikisha na alwisha nsaa yaaye ya muulo. Bible etulungula bwa kwikala na nkatshinkatshi: kutumika ngofu na kusangeela bipeta byao. Kuno kusangala nyi “kipeebwa ky’Efile Mukulu.”​—Mulungudi 5:18.

Totupilwanga tulo. Mufundji umune a Bible bambile shi: “Neewola ndaale.” (Misambo 4:8) Bantu bakulu bebungi abitungu balaale nsaa mwanda tuloo twibakwashe ku mbidi, mu binangu na mu mutwe. Pabitale mutwe, nsaa ya tulo nsaa ya muulo mwanda ayikwasha bwashi binangu tabipalakananga na kusangisha myanda ayitungu kulamiina, na kutwasha bwa kulamiina myanda. Kukutwa kwa tulo akukutshisha muntu kulonga kalolo, nkulombeene kukitshisha masaku, bilema na kwikasha muntu nsaa yooso na nsungu.

Ata mpango yobesha kukumbasha. “Lumonyi lwa meeso ndukile kusaanasaana kwa mala muulo.” (Mulungudi 6:9) Kyabitulongyesha? Muntu sha binangu tatadila shi malaka aaye akunkusha muwa waye nya, bikishekishe malaka a bintu byashi mulombeene kupeta. Byabya, talondaa nsaa yooso bintu byabalesha bwa kupana sunga kukimba mabasa nya. Kadi, alongo bya kusangeela bintu byobesha kupeta​—“lumonyi lwa meso” aaye.

Taluula myanda yota na muulo. Myanda yota na muulo ngi ayikukwasha bwa kuuka kintu ibuwa, ki na muulo, na kya kutudila eshimba. Su muwa oobe nyi mushidi, myanda yota na muulo nyibakimbi kukuma kwi mushidi. Byabya, myanda ibuwa yota na muulo ayikukwasha bwa kusangula myanda ya kutuula pa mbalo ya kumpala mu muwa oobe na kutumika kalolo na nsaa yoobe nsaa yooso na n’efuku dyooso. Nkunyi kodya kupeta ino myanda ibuwa ayitungu kwata na muulo? Bantu bebungi abeyikimbi mu Bible, na abamonaa shi nyi mbinangu bikile byooso.​—Nkindji 2:6, 7.

Kifulo kikale kintu kiobe kyota na muulo ukile. Bena-Kolose 3:14 amba shi kifulo “nyi akibungu mu bumune bulombanyiine.” Tatwi balombeene kwikala na muloo sunga kwipusha mwishimba shi tatwi mu masaku su twakuta kifulo, bikishekishe mu kifuko. Bantu ababepuula uno mwanda, pangi abatuulu kukimba kwa mmono na mudimo wabo kumpala, bakwete kwipana ku bintu bisha kwibapa muloo. Oolo, nyi bwakinyi Bible alesha shi kifulo nyi kintu kya muulo ukile bukata, na mwikitemune misango nkama.​—1 Bena-Kodinda 13:1-3; 1 Yowano 4:8.

Ikala na nsaa ya kukumbasha nkalo yoobe ya mu kikudi. Mwana mulume umune atwitanyina bu Geoff baadi mwibakile mukashi sha kifulo, babaadi na bana babidi basha muloo, na bakuuku bebuwa, na baadi na mudimo wibuwa bu munganga mukwashi. Kadi, mudimo waaye ubaadi nsaa yooso aumufwisha mu kumona bantu abakyengye na mikumbo na kufwa. Belele luno lukonko: “Bi nyi bibaadi abitungu shi muwa wa bantu wikale?” Akupu, dingi efuku, babadikile ingi mikanda ayipatuula Bible itushe Batemwe ba Yehowa na aye nkupeta myaluulo ibuwa.

Geoff bapatulwile mukashi aaye na bana baaye myanda ibaadi alongo, na ino myanda ibaadi ibasangashe. Bino bibaadi bikwashe kifuko bwa kubanga eshinda dya mu kikudi dibaadi dilongamishe nshalelo abo na kwibakwasha bwa kutumika kalolo na nsaa yabo. Kulonga kwabo kwa Bible kubaadi kwibape lukulupilo lwa muwa wa looso mu nsenga ipya mushy’amwikala myanda ya kubungi lupapi sunga makyenga.​—Kibafumbwilwe 21:3, 4.

Mwanda wa Geoff awitutentekyesha mayi a Yesu Kidishitu, pabambile shi: “Baa-sha-mwabi mbalanda kwishimba.” (Mateo 5:3) Okumiina kwikala na yoobe nsaa ya kukumbasha nkalo yobe ya mu kikudi? Bwa kwakula kalolo, takwi ungi mushindo wa kutumika na nsaa ulombeene nkupa binangu bya kulongamisha, kushi penda nshalelo obe a kwifuku n’efuku, kadi muwa obe ushima.