Etulondele namu bibaadi nshelelo obe ku bukinga.

Nemutandibue mu Italie mu kipua kia 1943. Ami na bakuetu balume na bakashi tuibakudile mu ka musoko kapela, mubadi papa adimi na kukita mudimo wa mabaya. Baledi betu babaadi betukushe na malongiesha a bena Katolike.

Buakinyi bodi okumiina kuikala bu mumpeele?

Panandi nki muana mukinga, nandi mufule kutemeesha apalongiesha ba mumpeele mu kipuilo. Mayi abo abadi aasankisha ngofu, mpa na masambila abaabadi abakitshi. Nyi buakinyi nambangile kusankila bua kuikala bu mumpeele. Pabankubeshe bipua 13, mama badi muntueshe mu interna mubaabadi abalumbula bana balume bua’shi bakalongie tulasa tukata bua kufika ba mumpeele mu mafuku e kumpala.

Babaadi abenulongiesha Bible panubaadi mu kalasa su?

Nya. Panandi na bipua 15, ungi mulongieshi etu bampeele mukanda wa ma Evanjile​—aulondo nshalelo a Yesu na mudimo waye​—nandi mubale wawa mukanda misango ibungi. Panankumbeshe bipua 18, nangile mu Rome mu kulonga ku universite ya ba episkopo, yabakunkushaa kui pape nabene. Nandongiele Latin, kina Greke, istuare, filozofi, pisikoloji na teoloji. Sunga biekalashi tubadi atuambuula ma verse a mu Bible mu mutue, na kupusha kuababadika Bible mu dia lubingo, tatubadi binyibinyi atulongo Bible nya.

Pabofikile bu mukata a kilongielo, bodi olongiesha namu su?

Mudimo wande ubadi wa kulumbuula na kukunkusha mianda. Sunga mbiabia, nandi nandongiesha miya mu kisangilo kia Vatican 2.

Buakinyi bobangile kuelesha mpaka pabitale kipuilo?

Kui mianda isatu ibadi ayinkalakasha. Kipuilo kibaadi akituelakana mu mianda ya politike. Babaadi abalekiela balanguidi na bakata ba kipuilo na muikelo wibubi. Na angi malongiesha a bena Katolike taabadi a eyondo nya. Bu kileshesho, mbikunyi bilombene Efile Mukulu e na kifulo kunyoka bantu bua losoo kunyima kua lufu luabo? Dingi, Efile Mukulu akuminaa binyibinyi’shi tuambuule nteko misango binunu na binunu na lunsadi a

Bokitshine kinyi?

Nandi mutekie Efile Mukulu bua’shi ankunkushe na mpolo ku meso. Nandi dingi muule Bible de Jérusalem a bena Katolike, ababatushile aa mafuku mu ludimi lua Italien, ami nkubanga kumubadika. Dingi mu dia lubingo kunamashika, panadi napudika misapi yande kunyima kua kukita misa, bangi bana balume babidi babafikile ku seminere. Babaadi bandungule’shi mba Temue ba Yehowa. Atue nkuisamba pabitale Bible munda mua nsaa na kipindi, na pabitale kialongiesha bua kutundula bena lulanguilo lua binyibinyi.

Nkinyi kibodi musankile pabitale bantu babafikile mu kukutembela?

Nandi musankile bibabadi abakula na kushinkamisha koso na mushindo ubabadi abalayila bifundue kalolo mu Bible a Katolike kushi lukalakashi. Kunyima, ungi Temue a Yehowa abetenyina bu Mario, babangile kuntembela. Badi na luishinko na lulamato​—na baadi afiki mu dia mposo dioso kunamashika, sunga kuekala mpeshi sunga kanya, baadi akokola ku kiibi kia ku seminere mu 9h00.

Bangi ba mumpeele babaadi banangushene naminyi?

Nadi muibetanyine buabadia kupetekielua patukuete kulonga, kadi muntu su ngumune a kuabadi tabaadi muate kulonga kua Bible na muulo nya. Sunga mbiabia, ami nadi muate kulonga kua Bible na muulo. Nadi nalongo mianda ibuwa bukile, bu kileshesho, buakinyi Efile Mukulu mmutadile mianda ibubi na makienga​—muanda ubaadi aunkalakasha kubanga kala.

Bakata bobe babaadi batompe bua’shi olekie kulonga kua Bible su?

Mu kipua kia 1975, nadi muende mu Rome misango ibungi bua kuibapatuluila mmueneno ande. Bakata babaadi batompe kushintula binangu biande, kadi takui mmuntu su ngumune baadi mufubishe Bible. Mfudiilo a bioso, mu 9/1/1976 nadi mufundile bakata be ku Rome bua kuibalungula’shi ntshi dingi muina Katolike. Kunyima kua mafuku abidi, nankatukile ku seminere na ami nkuata train bua kukatuela mu bisangilo bia ba Temue ba Yehowa bua musango wa kumpala, kadi ami nkusangana’shi kibaadi kikongeno kibaadi kibungie tukongie tui bungi. Mianda yoso inadi mumone kuakua ibaadi ilekene na inadi muubile! Muntu oso baadi na Bible aaye, na baadi alondesha pamune na baba babaadi abakitshi misambo ilekenelekene.

Bena kifuko kiobe babakitshine kinyi na ino mianda yoso?

Be bungi ba kuabadi babaabangile kunduisha ngofu. Kunyima nanguukile’shi muina ande mulume baadi alongo Bible na ba Temue ba Yehowa mu kibundi kia Lombardie, ku nord kua Italie. Nangile mu kumutala, na ba Temue ba kuakua babaadi bankuashe bua kupeta mudimo na mbalo ya kushala. Nka mu kiakia kipua kimune, nadi mubatshishibue, ami nkufika bu Temue a Yehowa.

Wealashena pobe kukita biabia su?

Nya su nkapela! Mfudiilo a bioso, nepusha binyibinyi peepi n’Efile Mukulu, muanda nanguku’shi mianda yanguku pabimutale ngimene mu Bible kushi mu binangu bia bantu sunga bipikua bia kipuilo. Na nemulombene kuiyilongiesha bangi na kushinkamisha mpa na kululama koso.