ABIAMBA BANTU

Bantu bebungi abamonaa maasha a makuta bu ashi na masaku, bikishekishe su miiya ya mbulamatadi tangikandikie. Ingi mishindo ya maasha a makuta bu maasha a loteri abadi bakuatshishene kui mbulamatadi, aatueshaa makuta aakuasha bantu bebungi

ABIAMBA BIBLE

Mu Bible ta mbatemune mushindo kampanda wa maasha a makuta nya. Anka mui mayi a kulonda aalesha abipushaa Efile Mukulu pabitale maasha a makuta.

Kabingilo ka maasha a makuta, nka kudia bangi makuta, bino mbikutuene na elango dia mu Bible dia’shi “elameyi ku mishindo yooso ya luabi.” (Luka 12:15) Biabia, mu maasha a makuta mmufuame luabi. Bantu abakitshishaa aa maasha abaleshaa’shi muntu apete makuta akile bungi, kushi kulesha kululama pabitale muabi aupete muntu bua kuwina, muanda abauku’shi lukalo lua kufika mpeta alutakula bantu buabadia kutuusha makuta ebungi mu ma casinos. Pamutue wa kukuasha muntu bua’shi tekalanga na luabi, maasha a makuta aapa muntu malaka a kupete ekuta mu mushindo ubofule.

Mu maasha a makuta mui binangu bia kukimba penda buwa bua muntu bupenka: kudia makuta abashimisha kui bangi. Aku namu, Bible anyingisha bantu bino, “muntu takimbanga nka akimulogamina’nka aye na beene nya, anka akilongamina mungi.” (1 Bena-Kodinda 10:24) Na ungi muiya wa ku Miiya ekumi awamba’shi: “Tolakilanga . . . Kintu kia mukuenu.” (Efilu 20:17) Muntu aasha maasha a makuta p’atuulu eshimba diaye mu kuwina, akulupila’shi yawa aasha naaye ashimishe makuta bua’shi aye eapete.

Bible etudimusha dingi ku binangu bia kumona kaa bu bukome bufuame abufuishaa muabi. Mu Isaleele a kala kubaadi bangi abaadi bakutue lukumiino mui Efile Mukulu babanga ‘kulumbuluuila efile a muabi meesa.’ Lualua lulanguilo lua “efile a muabi,” Efile Mukulu baadi muilukumiine su? Nnya, bebalungile’shi: “Nui batungunukie na kukita bubi ku meso ande, nui basangule kukita bubui.”​—Yeeshaya 65:11, 12.

Eyendo’shi mu angi maumbo, makuta aatuuku ku maasha a makuta abadi bakuatshishene kui mbulamatadi aakuasha bu kufuta kalasa, kuyiisha mianda ya makuta kumpala sunga ingi mianda ayikuasha bantu. Anka mushindo wa kufuba na ano makuta ta ngushintuule biabadi beapete nya​—ku mianda ayitakula bantu mu kuikala na luabi mpa na kukimpa penda buwa bobe’be nabeene, binangu bia kupeta kantu koshii mukiengiele.

“Tolakilanga . . . Kintu kia mukuenu.”​—Efilu 20:17.

ABIAMBA BIBLE

Bible adimusha’shi “baaba abadidi kwikala ba mpeta abapono mu kitompwanga na mu muteo, na mu ngabiabi yi bungi ilootakane na yi bubi ayitweesha bantu mu lufu na mu kushimina.” (1 Timote 6:9, Kilombeno kipya 2014) Maasha a makuta aatukila ku luabi, na luabi lui na bukitshishi buibubi mu kipaso kiabadi batuule “luabi” kui Bible mu mulongo wa ngikisha ish’ayitungu kuikala nayo.​—Bena-Efeso 5:3.

Muanda aatakula bantu mu kupeta makuta mu kipaso kibofule, maasha a makuta aapa bantu kifulo kia makuta​—kintu kiabadi betamine mu Bible bu “mushi wa bubi bwa bipaso bioso.” Lukalo lua kupeta makuta ndulombeene kunemeena muntu na luekala na bukitshishi bui bukopo mu nshalelo aaye, abimutuala mu kuikala na kenyongoshi kakilekile na kuluisha lukumiino luaye mui Efile Mukulu. Mu ngakuilo a mu kinfuanyi, Bible akula pabitale bano bakuatshibue ku muteo wa kifulo kia makuta’shi “mbekakile abo banabene makyenga e bungi.”​—1 Timote 6:10, Kilombeno kipya 2014.

Luabi alukutshishuaa muntu kusanka na biadi nabio, na akutua kusanka na makuta aakuete kupeta na kuimukutshishua kuikala na muloo. “Muntu mufule makuta tayikutaa makuta, sunga mmuntu mufule buupeta.”​—Mulungudi 5:10, NWT.

Bantu midiyo abekalanga bepaane mu maasha a makuta mbakuatshibue ku bupika buibubi bua kuasha maasha a makuta. Muyile biabapuandikisha, mu États-Unis bantu midiyo be ku bupika bua kuasha maasha a makuta.

Lungi lukindi aluamba’shi: “Bupeta bupetshiibwe bukidibukidi ku mbangilo ta mblombeene nkupa mwabi na ku nfudiilo nya.” (Nkindji 20:21) Kuasha maasha a makuta nkufishe baaba abeasha mu kutuela bishiyo, kuponesha kua ma banke, bebungi mbashimishe midimo yaabo, kutshiba malunda na makuuku. Kutumikila malango a mu Bible nkulombeene kukuasha muntu buadia kusuuka nkalakashi ayituukila mu kuasha kua maasha a makuta na kuikala na muloo mu nshalelo.

“Baaba abadidi kwikala ba mpeta abapono mu kitompwanga na mu muteo, na mu ngabiabi yi bungi ilootakane na yi bubi ayitweesha bantu mu lufu na mu kushimina”​—1 Timote 6:9, Kilombeno kipya 2014.