WEMONAA BU MUNTU SHA MULOO SU? Su mbiabia, nkinyi akikupeyaa muloo? Nkifuko kiobe, mmudimo oobe, nkipuilo kiobe? Pangi okuete kutengiela kintu kampanda kikumbeene kukupa muloo, bu kupudisha kalasa, kupeta mudimo wibuwa, sunga kuula mootoka.

Bantu bebungi abapetaa ndambo ya muloo nsaa y’abalombasha biipatshila kampanda sunga kupeta kintu kiabekalanga nakio lukalo. Kadi wawa muloo aupuiyaa mafuku bungi kinyi? Misuusa ibungi, awikalaa nka wa kapindi kapeela, bilombeene kubofusha muntu kuishimba.

Muntu ekalaa na muloo nsaa yakuete kuipusha biya, pakuete kusangeela muwa sunga te na bintu bibungi, na paadi na lukalo lua’shi nshalelo atungunukie nka biabia.

Kukatusha biabia, bu biabidi’shi muntu ekalaa na muloo nsaa y’epusha biya, tui kupuandikisha muloo na luendo, kushi bu mbalo ibapu kufika muntu sunga kepatshila kabalombasha. Kuamba’shi: “Nekala na muloo nsaa ya . . .” Bi nka bu kuyiisha muloo kula noobe.

Tuate kileshesho, puandikisha muloo na kuikala na mbidi bukome. Atukitaa naminyi bua kuikala na mbidi bukome? Abitungaa’shi tudie kalolo, tukite kalashishi, na kuikala na nkatshinkatshi mu nshalelo etu. Bi mumune, muloo autuukila mu kukita kua mianda ibuwa, kuikala na nshalelo muipushene na mayi a kulonda ebuwa.

Mmayi a kulonda sunga ngikashi kinyi ayitukuasha bua kuikala na muloo? Sunga biekala’shi ingi i na muulo kukila ikuabo, ino ayilondo ayikuasha ngofu:

• KUSANKA NA BIODI NABIO NA KUPA BANGI BINTU

• MBIDI BUKOME NA KUNYINGIILA

• KIFULO

• LUSA

• KUIKALA NA KEPATSHILA MU NSHALELO

• LUKULUPILO

Mukanda wa binangu wabanemekaa ngofu awamba’shi: “Muloo wi kui muntu shi na matope muishinda diaye.” (Misambo 119:1) Tutaluuleyi diadia eshinda.