BWA BALEDI
8: Kileshesho
AKILESHA KINYI
Baledi abapa bana kileshesho su abakitshi myanda yabalongyesha. Bu kileshesho, twe mulombeene kukulupila shi mwana obe mulume elekye madimi su nsaa yooso yoshokumiina kwisamba na muntu e pa kiibi, apusha wamba shi: “Mulungule shi ntshi panka.”
“Bantu bebungi abamba shi ‘Londa byankulungula, tokitanga byankitshi.’ Kadi bino binangu ta mbilombane bwa kukusha kalolo bana nya. Be bu butongo abutomaa byooso byatwakula na kukita, na abakyebe kwitulungula su myanda yatukitshi ta ngipushene na y’atwibalongyesha.”—David.
EYI DYA KULONDA DYA MU BIBLE: “Biabia obe alambukisha bangi, twelambukisha namu obe nabene su? Obe alungula bantu’shi, tabayibaanga, oyibaa [namu] su?”—Bena-Loma 2:21, Kilombeno kipya 2014.
BWAKINYI KWI NA MUULO
Bana mpa na bansongwa abalondaa kileshesho kya baledi baabo kukila kya bangi bantu booso—kukila mpa na bakuuku baabo. Bino abilesha shi anwe baledi nwi pa mbalo ya kumpala bwa kukunkusha bana mwishinda dibuwa—su anukitshi eyendo myanda yanukwete kwibalongyesha.
“Twi kwambulwila mwana mwanda misango nkama na kwiyipusha su kwete kupusha, kadi musango umune watukitshi mwanda wilekene na byatwakulaa, mwana akyebe kwitutentekyesha wanka. Bana abalondeshaa kalolo kyooso kyatukitshi, mpa na nsaa yatushi abapwandjikisha shi be kwibikita.”—Nicole.
EYI DYA KULONDA DYA MU BIBLE: “Binangu bya mwiyilu . . . tabi na bu-nsesa.”—Shake 3:17.
KYODY’A KUKITA
Taluula ngikeelo yoobe. Nkinyi kyokumiinaa kukita bwa kukisha kapapi? Mushindo kinyi okitshinaa mulunda oobe na bana myanda? We na bakuuku be naminyi? Wekalakasha bwa bangi? Mu byooso, we muntu okumiina shi bana boobe bekale?
“Ami na mulum’ande tatupeyaa bana miiya yatushi abobesha kunemeka atwe banabeene nya.”—Christine.
Teka lusa bwa bilema byoobe. Bana boobe abauku shi twe mupwidikye nya. Pwamba shi “nfwile lusa” nsaa ayitungu kwibikita—kwi mulunda oobe sunga bana boobe—olongyesha bana boobe bya kwikala balulame na kwiyisha.
“Bana betu be na lukalo lwa kumona patukumiina kilema kyetu, na kumona patutekye lusa bwa kilema kyetu. Su tatukitshi byabya, abalongo bya kufya bilema byabo.”—Robin.
“Atwe baledi, twi na bukitshishi bukata kwi bana betu, na kileshesho kyetu akikwasha ngofu mwanda abekimono nsaa yooso. nyi mmukanda ubudibwe nsaa yooso, dilongyesha dyatupete nsaa yooso.”—Wendell.
