BWA BALEDI
6: Kudimusha
AKULESHA KINYI
Kishima kudimusha nkilombeene kulesha kukunkusha sunga kulongyesha. Ingi nsaa, akilesha mpa na kunyoka kwa mwana bwa mwikelo ubi ubalesha. Anka misango ibungi, akilesha kulongyesha myanda itale mwikeelo ikumbeene kumukwasha bwashi ekale ata bitshibilo bibuwa kumpala kwa byooso.
BWAKINYI KWI NA MUULO
Mu bipwa makumi bishale, kudimusha bana nkupwe kushimina mu bingi bifuko, mwanda baledi abatshinyi shi kunyoka kwa bana akukutshisha mwana kwiata na muulo. Anka, baledi basha binangu bibuwa abelela bana miiya ilombane na kwibalongyesha bwashi beyinemekye.
“Bana be na lukalo lwa kwibelela miiya bwashi ibakwashe bakule kalolo. Kukutwa kudimuna bana, akwibekasha bu bwato bushi na nkapi—abufudiila mu kutuuka mwishinda mpa na kwiyina.”—Pamela.
KYODY’A KUKITA
Twalulanga binangu. Su mwana talondo miiya yoobe, taluula dinyoka dyoyikalanga mumupe. Ku lungi lupese, tumbula mwana pobesha kulonda miiya yoobe.
“Natumbulaa bana bande nsaa yooso bu byabadi bakokyele mu ino nsenga mwi bantu bebungi bakutwe kukokyela. Kwibatumbula akukwasha bwashi bakumiine nsaa ayitungu kwibanyoka.”—Christine.
EYI DYA KULONDA DYA MU BIBLE: “Kyakya akikunu muntu, nyi kyaumbula.”—Bena-Ngalatea 6:7.
Ikala na nkatshinkatshi. Ikala na nkatshinkatshi pabitale bipwa bya mwana na ngobesha yaaye mpa na bubi bubakitshi. Dinyoka aditusha bipeta bibuwa su ndilombane na bubi bubakitshi mwana—bu kileshesho, mwana batumika bibubi na telephone, mukumbeene kushimisha matalwa a kukuma telefone munda mwa nsaa sunga mafuku. Na dingi, tabibuwa kutamisha myanda ipeela nya.
“Netatshisha bwa kushinguula su mwana ande bapele penda kukokyela sunga shi bakitshi kilema mwanda ta mmwele binangu kalolo. Kwi kwikutwena pankatshi pa mwikeelo ubi autungu kushuula na penda kilema kampanda kibakitshika akitungu kunyoka.”—Wendell.
EYI DYA KULONDA DYA MU BIBLE: “Tanukwatshishanga bana benu nsungu, bwa’shi tala bekala batshobolokye.”—Bena-Kolose 3:21, Kilombeno kipya 2014.
Ikala na kifulo. Kudimusha akwikala kubofule su bana abauku shi baledi abebikitshi mwanda mbebafule.
“Pabaadi nsongwalume etu mukite bilema, tubaadi bamushinkamishe shi twi na muloo bwa bitshibilo byaaye bibuwa bibaadi mwate kala. Tubamupatulwile shi tekala nka na kyakya kilema nya su etatshisha bwa kulumbuula na dingi atukyebe kumukwasha bwa kwibikita.”—Daniel.
EYI DYA KULONDA DYA MU BIBLE: “Kifulo. . . Nkiwule ndaa na bumuntu.”—1 Bena-Kodinda 13:4.
Tala dingi
KITENTA KYA MULAMI
Mushindo kinyi autungu kulanga mwan’oobe?
Bible kwete kulesha myanda 3 itale elango dibuwa.
