1. Mbia buntu kinyi bingi biatudi bapete kui Yesu?

 KASHA takui muntu su ngumune muleshe kalolo bu Yesu nya. Pabaadi pa nsenga, baadi mukite bilengieleshi bua kukuasha bangi. (Luk. 9:12-17) Baadi mutuushe kia buntu kikile bioso pa kutuusha muwa waye buetu. (Yo. 15:13) Kasha asanguka, Yesu kuete kutungunuka nka na kulesha bangi kalolo. Anka bu bibaadi mulee, mmutekie Yehowa buadia kupongoola kikudi kiselele bua kuitulongiesha na kuitunyingisha. (Yo. 14:16, 17, mayi e kuushi ku’esaki 16:13) Na ku bukuashi bua bisangilo bietu bia kakongie, Yesu kuete kutungunuka na kuitupa biabia biatudi nabio lukalo bua kulongiesha bantu mu nsenga ishima pabitale Bible na kuibekasha bu balongi.​—Mat. 28:18-20.

2. Muyile Bena Efeso 4:7, 8 mba nnanyi bekale bu “bia buntu bikale bantu”?

² Kui kingi kia buntu kiabadi betupe kui Yesu. Mpoolo mutumibua baadi mufunde’shi kunyima kua Yesu kuenda muiyilu, “batushiishe bia buntu bikale bantu.” (Badika Bena Efeso 4:7, 8.) Mpoolo baadi mupatuule’shi, Yesu batushishe bino bia buntu bua kukuatshishena kakongie mu mishindo ilekene. (Ef. 1:22, 23; 4:11-13) Lelo uno mu bino “bia buntu bikale bantu” mui bafubi ba midimo, bakulu mu tukongie, na bakunkushi ba bifunda. a Eyendo’shi, bano balume mbakutue kupuidika, biabia abakitaa bilubilo. (Yak. 3:2) Anka Nfumuetu Yesu Nkidishitu kuete kuibafubisha bua kuitukuasha; bano bana balume mbekale bu bia buntu kuatudi.

3. Tuusha kileshesho kia mushinto watudi balombene kukuatshishena mudimo wa “bia buntu bikale bantu.”

³ Yesu baadi mupe bino “bia buntu bikale bantu” mudimo wa kunyingisha kakongie. (Ef. 4:12) Anka oso a kuatudi mmulombene  kuibakuasha nsaa y’abakitshi uno mudimo wi na muulo. Tui kuibipuandikisha na luibako lua Nshibo ya Bufumu, bangi ba kuatudi mbepane musango umune mu kuibaka Nshibo ya Bufumu. Bangi abakuatshishena bano abebaka pa kuibatuadila bidibua, kutunda bintu, na kukita ingi midimo. Mu mushindo umune, oso a kuatudi mmulombene kukuatshishena bafubi ba midimo, bakulu mu tukongie, na bakunkushi ba bifunda mu ngakuilo na bikitshino bietu. Tubandeyi kutala mushindo w’atupetela bukuashi ku mudimo wabo na biatudi balombene kuibalesha’shi atuibaataa na muulo mpa na Yesu winyi muitupe bino ‘bia buntu bikale bantu’shi’.

BAFUBI BA MIDIMO ABAKITAA “MIFUBO YA KUKUASHA”

4. Ngingi ‘mifubo kinyi ya kukuasha’ ibaabadi abakitshi kui bafubi ba midimo mu siekele a kumpala?

⁴ Mu siekele a kumpala bangi bakuetu balume abaadi bebatuule bu bafubi ba midimo. (1 Ti. 3:8) Abimueka’shi abo nyi babaadi bakite “mifubo ya kukuasha” ibaabadi bafunde kui Mpoolo. (1 Ko. 12:28) Abimueka’shi bafubi ba midimo abaadi abakitshi mifubo ibungi i na muulo bua’shi bakulu bepaane mu kulongiesha na kulama mikooko. Bu kileshesho, bafubi ba midimo abaadi balombene kukuasha mu kutentula Bifundue sunga mu kuula bintu bibaabadi nabio lukalo bua kutentula Bifundue.

5. Lelo uno mmifubo kinyi ingi ya kukuasha yabakuete kukita kui bafubi ba midimo?

⁵ Banda kutaluula ingi mifubo ya kukuasha yabakuete kukita kui bafubi ba midimo ba mu kakongie kenu. (1 Mp. 4:10) Mbalombene kuibatuula bua kutala makuta a kakongie sunga ma terituare, kuteka mikanda na kuiyabila balungudi, kufuba ku biamo bia audio na video, kukuukila bantu, sunga kukuasha mu kubamba kua Nshibo ya Bufumu. Ino midimo yoso i na muulo bua’shi kakongie katambukie kalolo. (1 Ko. 14:40) Kukatusha biabia, bangi bafubi ba midimo abakitaa miisambo ya mu Bisangilo bia Nshalelo na Buina Nkidishitu mpa na kukita miisambo ya bantu boso. Be kutuula mufubi a midimo bua kukuasha mukunkushi a kasaka ka bulungudi. Ingi nsaa mukulu mmulombene kuteka mufubi a midimo buadia kumushindikila nsaa yende mu kunyingisha muntu a mu kakongie.

6. Ntubingilo kinyi tuatudi nato tua kulesha lutumbu kui bafubi ba midimo betu bua mudimo wibukopo w’abakitshi?

⁶ Mudimo w’abakitaa kui bafubi ba midimo aukuashaa kakongie naminyi? Mungi mukuetu mukashi a mu Bolivie abetanyina bu Beberly b amba’shi: “Ne na lutumbu lukata bua bafubi ba midimo betu, nasangelaa bisangilo ngofu, ku bukuashi bua mudimo wabo, ne mulombene kuyimba, kutuusha ngaluulo, kuteemesha miisambo, na kulongiela ku ma video na bifuatulo. Abakuashaa bua’shi boso be mu bisangilo tabapetekieluanga na masaku, na kukuasha bangi bashi na mushindo wa kufika ku bisangilo bua’shi balondeshe programe ku bukuashi bua Vidéoconference. Kunyima kua bisangilo, abakunkushaa mudimo wa kusuula mu nshibo, kubadika makuta, na kukita bia’shi tupete mikanda yatudi nayo lukalo. Nebatumbula ngofu!” Leslie mushalele mu Colombie sha mulume afubaa bu mukulu mu kakongie amba’shi: “Mulume ande ekalaa na lukalo lua bukuashi bua bafubi ba midimo bua kukita midimo ilekene. Kushi bukuashi buabo, badia kuikala na bibungi bia kukita, ne na lutumbu lukata bua kisumi kiabo na kukumiina kuabo kua kukuasha.” Kushi mpaka bino abilesha biopushaa pabitale mudimo wa bafubi ba midimo ba mu kakongie kenu.​—1 Ti. 3:13.

7. Mmushindo kinyi watudi balombene kulesha lutumbu bua bafubi ba midimo? (Tala dingi kifuatulo.)

⁷ Sunga tui balombene kupusha’shi tui na lutumbu bua bafubi ba midimo betu, Bible etunyingisha bua ‘kuibalesha lutumbu.’ (Kol. 3:15)  Krzystof, ungi mukulu a mu Finlande, alesha lutumbu luaye mu uno mushindo’shi: “Natumaa ka karte sunga mesaje muandi muele verse na kulungula mufubi a midimo, mudimo kampanda ubakitshi ubanyingisha sunga buakinyi nasangeela mudimo waye.” Pascal na Jael, bashalele mu Nouvelle-Caledonie abelaa nteko misusa ibungi bua bafubi ba midimo. Pascal apatuula’shi: “Mu mafuku ashaale tuikele atutekie ngofu bua bafubi ba midimo, atutumbula Yehowa pa muanda wabo na kumuteka bua’shi ekale nabo na ebakuashe.” Yehowa apushaa nteko i bino, na kakongie kashima akapetaa bukuashi.​—2 Ko. 1:11.

BAKULU BA MU KAKONGIE “BAKUETE KUKITA MUFUBO WIBUKOPO MUNKATSHI MUENU”

8. Buakinyi Mpoolo bafundile’shi bakulu ba mu siekele a kumpala babaadi ‘abakitshi mufubo wibukopo’?

⁸ Bakulu ba mu siekele a kumpala babaadi abafubu ngofu bua kakongie. (Badika 1 Bena Tesalonike 5:12, 13; 1 Ti. 5:17) Abaadi ‘abakunkusha’ kakongie, kukunkusha bisangilo na kuata bitshibilo mu kasaka ka bakulu. Babaadi ‘abadimusha” bakuabo balume na bakashi pa kuibapa malango na kifulo kioso bua kukaluila kakongie. (1 Te. 2:11, 12; 2 Ti. 4:2) Eyendo’shi, bano balume abaadi abafubu ngofu bua kulombasha nkalo ya bifuko biabo na kulama lukumiino na kipuano kiabo na Yehowa kinyingie.​—1 Ti. 3:2, 4; Tt. 1:6-9.

9. Ngangi mashito kinyi abadi nao kui bakulu lelo uno?

⁹ Lelo uno, bakulu be na bibungi bia kukita. Nyi mbalungudi. (2 Ti. 4:5) Abetulekiela kileshesho kibuwa pa kuikala na kisumi mu bulungudi, abalumbuula bulungudi mu terituare a kakongie kabo, na kuitulesha bia kulungula na kulongiesha kalolo. Abafubu dingi bu ba nsushi be na lusa bashi na ntondo. Nsaa i muina Nkidishitu akitshi muluisho ukata, bakulu abetatshishaa bua kumukuasha bua’shi alumbuule kipuano kiaye na Yehowa. Mu yaya nsaa imune, abakitshi muabo moso bua kulama buiselele bua kakongie. (1 Ko. 5:12, 13; Nga. 6:1) Kia kumpala, bakulu abaukibua bu balami. (1 Mp. 5:1-3) Abakitaa miisambo ya mu Bible yabadi balumbuule kalolo, abetatshishaa bua kuiuka muntu oso a mu kakongie, na kuenda mu kutembela mikooko. Bangi bakulu abakuashaa mu kuibaka na kubamba Nshibo ya Bufumu, kulumbuula kikongeno, na kufuba mu Komite a kuipushena na ba munganga na mu Tusaka tua kutala bantu abakumbu, na mu ingi midimo. Bakulu abafubaa ngofu buetu!

10. Ntubingilo kinyi tuatudi nato tua kusangeela mudimo wi bukopo w’abakitaa kui bakulu betu?

¹⁰ Yehowa baadi mutemukie’shi balami abaketupasukila na’shi, t’atuikala dingi ‘na akitukuatshisha mô sunga kuitusûshisha.’ (Yel. 23:4, EEM.) Bino nyi bibaadi bipushe mungi mukuetu mukashi a mu Finlande abetanyina bu Johanna nsaa ibadi nyinaaye mukumbe ngofu. Amba’shi: “Sunga ntangikalaa na mushindo wa kulungula mungi muntu bianepusha, ungi mukulu anshinaadi nauku baadi munteemeshe na luishinko loso panaadi namulungula moo unaadi nao, aye nkuteka pamune nami na kunshinkamiisha’shi Yehowa mmunfule. Ntantentekiesha binyibinyi bibaadi muakule nya, anka natentekiesha’shi ntshinaadi mupushe dingi moo nya. Nashinkamisha’shi Yehowa nyi baadi mumutume buadia kunkuasha anka pa nsaa ilombane.” Mmushindo kinyi wabadi bakukuashe kui bakulu ba mu kakongie kenu?

11. Mmushindo kinyi watudia kulesha lutumbu bua bakulu? (Tala dingi kifuatulo.)

¹¹ Yehowa akumiina’shi tuleshes bakulu lutumbu na mashimba etu oso pa muanda wa “mufubo wabakuete kukita.” (1 Te. 5:12, 13) Henrietta, mushalele dingi mu Finlande, amba’shi: “Bakulu abakuminaa kukuasha bangi, anka bino t’abilesha’shi abekalaa na nsaa na bukome kukila bangi sunga’shi t’abekalaa na nkalakashi mu nshalelo nya. Ingi nsaa nakulaa penda’shi: ‘Ouku? We  mukulu ebuwa biabia. Nakumiinanga nkulungula bianka.’” Mungi mukuetu mukashi a mu Turquie abetamina bu Sera amba’shi: “Bakulu be na lukalo lua kunyingishibua buabadia kutungunuka na mudimo wabo. Biabia tui balombene kuibafundila tu mayi atunyingisha mu ka karte, kuibetamina ku nshibo bua kudia ka kudia, sunga kuenda nabo mu bulungudi.” Kui mukulu osankilaa bua kuipaana kuaye mu mudimo wa kakongie su? Kimba mishindo yodia kumulesha lualua lutumbu.​—1 Ko. 16:18.

BAKUNKUSHI BA BIFUNDA BE KUANKA BUA KUNYINGISHA

12. Mpango kinyi ibaadi kuanka bua kunyingisha tukongie tua mu siekele a kumpala? (1 Bena Tesalonike 2:7, 8)

¹² Nkidishitu Yesu bapeele kakongie “bia buntu bikale bantu” abafubu mu ungi mushindo. Ku bukunkushi buaye, bakulu ba mu Yelusalema abatumine Mpoolo, Barnabase na bangi bu bakunkushi ba bifunda. (Bik 11:22) Buakinyi? Bua nka kaaka kabingilo kamune kabaabadi batuudile bafubi ba midimo na bakulu: kunyingisha tukongie. (Bik. 15:40, 41) Bano balume bakuete kuisumina ingi miloo bua kukita uno mudimo. Ingi nsaa abatuulaa mpa na miuwa yabo mu masaku bua kulongiesha na kunyingisha bangi.​—Badika 1 Bena Tesalonike 2:7, 8.

13. Bakunkushi ba bifunda be na angi mashito kinyi?

¹³ Bakunkushi ba bifunda abendaa mu nyendo misusa ibungi. Bangi abatambukaa bilometre bibungi bua kutala tukongie. Ku lubingo loso, mukunkushi a kifunda akitaa miisambo ibungi, ende mu kutembela mikooko, kukunkusha kisangilo kia ba mbala-mashinda, kisangilo kia bakulu, na bisangilo bia mudimo wa bulungudi. Alumbuula miisambo na bikongeno bia kifunda na bia mafuku asatu. Alongiesha mu tulasa tua ba mbala-mashinda, kulumbuula kisangilo kia ba mbala-mashinda mu kifunda, na kukita ingi midimo i na muulo ayitungu kulombasha bukidi bukidi yabebatekie kui biro bia Filiale.

14. Tui na tubingilo kinyi tua kulesha lutumbu bua mudimo wibukopo wa bakunkushi betu ba bifunda?

 ¹⁴ Tukongie atupetaa bukuashi naminyi ku kia buntu kia bakunkushi ba bifunda? Mungi mukuetu mushalele mu Turquie akula pabitale misusa ayifikaa mukunkushi a kifunda’shi: “Misusa yoso yabadi bafikie mu kutala kakongie ketu nginyingishe bua kukisha nsaa ibungi mu kukuasha bakuetu balume na bakashi. Ne muimonene na bakunkushi ba bifunda bebungi anka su ngumune a kuabadi ta mundeshe’shi e na mianda ikile bungi ya kukita sunga’shi te na nsaa ya kuteemesha muntu.” Johanna atuisambilanga kumpala, baadi muende mu bulungudi na mukunkushi a kifunda, anka tababaadi bapete muntu su ngumune ku nshibo. Amba dingi’shi: “Natentekieshaa diadia efuku misusa yoso. Bakuetu bakashi boso abaadi bende ku ma mbalo e kula, naadi nebapusha bushiye biabia. Mukunkushi a kifunda baadi munyingishe na muloo oso na ankuasha buandia kumona’shi mu mudimo wa Yehowa tui balombene kuikala kula na bena kifuko netu sunga na ba lole betu, anka mu nsenga ipia, atukekala na mishindo ishi mpuilo ya kukisha nsaa pamune.” Bebungi ba kuatudi abasangeela ngofu bakunkushi babo ba bifunda na bukuashi buabadi bapete kuabadi.

15. (a) Muyile 3 Yowano 5-8 mmushindo kinyi watudi balombene kulesha lutumbu kui bakunkushi ba bifunda? (Tala dingi kifuatulo.) (b) Buakinyi abitungu tuleshe kanemo kui bakashi ba bakuetu be na mashito mu kakongie, na tui kuibikita naminyi? (Tala kashibo akamba’shi: “ Tentekiesha bakashi babo.”)

¹⁵ Yowano mutumibua baadi munyingishe Gayuse buadia kukuukila bakuetu balume abaadi bafikie mu kutala kakongie na ‘kuibakuasha mu mushindo ausankisha Efile Mukulu.’ (Badika 3 Yowano 5-8.) Mushindo umune watudia kukuukila bakunkushi ba kifunda, mpa kuibetamina mu kudia kia kudia. Ungi mushindo, mpa kutuela mu bisangilo bia mudimo bi’abakunkusha. Leslie atutemunanga kunundu, aleshaa luaye lutumbu mu ingi mishindo namu. Amba’shi:  “Natekaa Yehowa buadia kulombasha nkalo yabo. Ami na mulume ande tui bebafundile mikanda, tuebalungula bukuashi buatuikele bapete nsaa yabafikile. Tentekiesha’shi, bakunkushi ba bifunda nyi mbantu nka bu’tue. Ingi nsaa abakumbaa, kuinyongola, mpa na kubofula ku mashimba. Pangi mayi oobe a kalolo na kantu kapeela kuebapa akekala bu lualuulo ku luteko lua bukuashi lua mukunkushi enu a kifunda!​—Nki. 12:25.

TUI NA LUKALO NA “BIA BUNTU BIKALE BANTU”

16. Muyile Nkindji 3:27, nkonko kinyi ayitungu’shi bakuetu balume beyipushe?

¹⁶ Mu nsenga ishima tui na lukalo lua bakuetu balume ba kufuba bu “bia buntu bikale bantu.” Su we mukuetu mulume mu batshishibue, ‘we na kipaso kia kukuasha su’? (Badika Nkindji 3:27.) Okumiina kulombasha mianda itekiibue bua kuikala mufubi a midimo su? Su we mufubi a midimo, okumiina kulombasha mianda itekiibue bua kukuasha bakuenu bu mukulu mu kakongie su? c Okumiina kushintuula ingi mianda mu nshalelo oobe bua kuusha esaki dia kutuela mu Kalasa ka Balungudi ba Bufumu su? Kaka kalasa akakiebe kukulongiesha na nkukuasha bua’shi Yesu afube nobe ngofu. Su omono’shi tue mulombene kukita bino, teka Yehowa. Mutekie akukuashe na kikudi kiaye kiselele bua’shi obeshe kukita mudimo oso w’abakupa​—Luk. 11:13; Bik. 20:28.

17. “Bia buntu bikale bantu” abilesha kinyi pabitale Nfumuetu, Nkidishitu Yesu?

¹⁷ Bakuetu balume babadi batuule kui Yesu bu “bia buntu bikale bantu” nyi mbishinkamisho abilesha’shi kuete kuitukunkusha mu ano mafuku a ku nfudiilo. (Mat. 28:20) Tatui na lutumbu lua kuikala na Nfumu sha kifulo, sha kalolo, auku nkalo yetu na etupa bakuetu balume banyingie bua kulombasha nkalo yetu su? Biabia kimba mishindo ya kulesha lutumbu bua bano bana balume abafubu mudimo wibukopo. Kushi kuluba Yehowa, aye Nsulo ya “kia buntu kioso kibuwa na kia buntu kioso kipuidikie.”​—Yak. 1:17.