Tabibakufikiile namu dingi efuku, okutua kutentekiesha mianda y’okiokatuka mu kulonga su? Bino abitukitshikilaa atue booso bisuusa na misuusa. We kukita naminyi? Taluula mianda ikata ibokatuka mu kulonga.

Nsaa yuelongiela, banda kutompa kuimana kapeela bua kunangushena pabitale mianda ikata ibokatuka mu kulonga. Bino ngi bibaadi Mpoolo munyingishe bakuabo balume na bakashi buabadia kuibikita nsaa y’abalongo mukanda waye, pabafundile’shi: “Binobino, muanda ukata watukuete kuisambila nguno.” (Eb. 8:1) Pabaadi Mpoolo muakule bino bishima, baadi mukuashe bena Nkidishitu naye buabadia kupusha kalolo akipatuula kishima kioso kiadi muakule, na kuipushena kua mianda yoso ibaadi muakule.

We kuitshibila nsaa, pangi minite ekumi ku nfudiilo kua kuilongiela koobe bua kunangushena bua kupusha kalolo akipushisha mianda ikata ibokatuka mu kulonga. Su bolubu mianda yooso ikata, we kuiyikimbuula dingi pa mbalo ifunde’shi mianda i muanka, sunga kubanga kubadikuula dingi kikoso kioso bua’shi bikukuashe bua kutentekiesha mianda ikata ibokatuka mu kulonga. Su bolongo muanda upia, ekitshishe bua kuiwupatuula mu bishima biobe’be nabene. Su buekala otentekiesha mianda ikata ibolongo, t’okuasha nka penda binangu biobe bua’shi bikale abilamiina mianda nya, kadi onyiisha kumona’shi mianda yolongo ayikukuasha ngofu mu nshalelo oobe.