1-2. Nkinyi kibaadi kikitshikie pabaadi balongi babidi ba Yesu abende ku Emause?

 TUI muifuku dia 16 mueshi wa Nisane, mu kipua kia 33 bino bipungo bietu (B.B). Balongi ba Yesu mbenyongole na, be na moo. Babidi ba ku bano balongi abakatuka mu Yelusalema abende ku Emause kibundi ki mu bilometre 11 na Yelusalema. Bano bana balume mbabofule kuishimba ngofu muanda Yesu, muntu abaabadi abalondo, bakatuka mu kuipayibua. Babaadi abakulupila’shi Mesiya akiebe kukitshina bena Yunda bintu bikile buwa, anka binobino bafu. Anka kubakitshikile muanda wabashibaadi abatengiela.

² Muntu abash’abauku befubuila pepi nabo na babanga kutambuka pamune nabo. Balongi ababangile kumulondela biabadi batshobolokie pabitale mianda ibubi ibakitshikila Yesu. Akupu yawa muana mulume babangile kuibalungula mianda yabashi balombene kuluba efuku su ndimune. “Kubanga na Moyise na Batemuki boso,” baadi mupatuule buakinyi Mesiya baadi na kia kukienga na kufua. Nsaa ibafikile bano bantu basatu ku Emause, abatunduile’shi yawa muntu baadi nyi Yesu abaabadi basangule kui Efile Mukulu! Tui balombene kupuandikisha muloo ubaadi nao balongi pa kuuka’shi, Mesiya baadi na muwa!​—Luk. 24:13-35.

3-4. Nkinyi kibaadi kikitshikile balongi ba Yesu, na nkinyi ki’atulongo mu uno muisambo? (Bikitshino 1:3)

³ Yesu baadi mupue mafuku 40 pa nsenga kumpala kuadia kualukiila muiyilu, na munda mua aa mafuku 40, baadi mumuekiele balongi baaye misusa ibungi. (Badika Bikitshino 1:3.) Yesu baadi munyingishe balongi baye babaadi benyongole na babaadi na moo. Abo nkupeta muloo na nkunyinga eshimba bua kuenda mu kulungula  na kulongiesha mukandu wibuwa pabitale Bufumu. a

⁴ Tui balombene kupeta bukuashi pa kulonga pabitale mianda ibaadi Yesu mukite mu kiakia kipungo. Mu uno muisambo, atukiebe kulonga mushindo ubaadi Yesu mufubishe kino kipungo (1) bua kunyingisha balongi baaye, (2) bua kuibakuasha bua kupusha Bifundue kalolo, na (3) bua kuibalongiesha pabitale mashito abakapete mu mafuku e kumpala. Mu muanda oso atumono mushindo watudi balombene kuambula kileshesho kia Yesu.

NYINGISHA BANGI

5. Buakinyi balongi ba Yesu abaadi na lukalo lua kunyingishibua?

⁵ Balongi ba Yesu abaadi na lukalo lua kunyingishibua. Buakinyi? Bangi abaadi balekie mashibo aabo, bifuko biabo, na midimo yabo bua kulonda Yesu nsaa yoso. (Mat. 19:27) Bangi abaadi abebakitshina mianda ibubi muanda abaadi bafikie balongi ba Yesu. (Yo. 9:22) Abaadi bakumiine kuno kushintuluka mu nshalelo aabo na kukiengieshibua muanda abaadi bakumiine’shi Yesu baadi Mesiya baadi mulayibue. (Mat. 16:16) Kadi nsaa ibaadi Yesu muipayibue, abaadi benyongole na babofule ku mashimba muanda tababaadi abauku akikiebe kukitshika.

6. Yesu bakitshine kinyi kunyima ku’aye kusanguka?

⁶ Kushi mpaka Yesu tabaadi mumone kinyongua kia balongi baaye bu kubofula kua mu kikudi nya. Na dingi baadi auku’shi ta mbenyongole muanda wa kukutua kua lukumiino nya. Biabia nka mu diadia efuku dibaadi musangukie, babangile kunyingisha ba kuuku baye. Bu kileshesho, baadi mumuenekiele Mariya a ku Magadala nsaa ibaadi adidi ku mashama aaye. (Yo. 20:11, 16) Baadi dingi mumuenekiele balongi babidi batudi batemune ku mbangilo kua muisambo. Na baadi mumuenekiele’nyi Mpiele mutumibua. (Luk. 24:34) Nkinyi kiatudi balombene kulongiela ku kileshesho kia Yesu? Tubande kutala kibaadi mukite nsaa ibaadi mumuenekiele Mariya a ku Magadala.

7. Muyile biabadi bebileshe mu Yowano 20:11-16, Yesu baadi mumone Mariya akitshi kinyi ku nakashika buee efuku dia 16 mueshi wa Nisane, na bibaadi bimutakule bua’shi akite kinyi? (Tala dingi kifuatulo.)

⁷ Badika Yowano 20:11-16. Ku nakashika buee  muifuku dia 16 mueshi wa Nisane, bangi bana bakashi abayile ku mashama mbalo ibaabadi batuule Yesu. (Luk. 24:1, 10) Tubandeyi kutaluula kileshesho kia umune a ku baaba bana bakashi, Mariya a ku Magadala. Nsaa ibafikile Mariya ku mashama, bemusangene mui bisumanga. Biabia bayile akalungula Mpiele na Yowano. Bano bana balume babidi abasuukile lubilo benda batadiile ku mashama na Mariya namu ebalonda. Kunyima kua’bo kushinkamisha’shi mu mashama mui bisumanga, abalukiile ku nshibo. Kadi Mariya tabaadi mualukiile. Bashadile kuakua, adilanga. Sunga tabaadi auku’shi Yesu baadi paapa. Yesu baadi amono uno muana mukashi sha lukumiino baadi adidi pa muanda waye, na baadi akiebe kunyingisha yawa muana mukashi. Biabia baadi mumuenekiele Mariya na akupu aye nkukita muanda upeela ubaadi umunyingishe ngofu. Bamulunguile bua’shi ende kui bakuabo na akebalungule mukandu wi na muulo ukata. Baadi na kia kuibalungula’shi Yesu baadi dingi na muwa.​—Yo. 20:17, 18.

8. Tui kuambula Yesu mushindo kinyi?

⁸ Tui kuambula Yesu naminyi? Tui kuambula Yesu nsaa y’atunyingisha bakuetu balume na bakashi buabadia kutungunuka na kufubila Yehowa. Anka bu Yesu abitungu tutuule binangu bietu ku nkalakashi yabo, tutompe kuituula pa mbalo yabo, na kuibanyingisha. Tubandeyi kutaluula muanda ubaadi upete mukuetu mukashi abetanyina bu Jocelyn, sha mukuabo mukashi bafuile mu masaku e bukopo. Amba’shi: “Munda mua mieshi ibungi, naadi nka na kenyongoshi kakile bukopo.” Anka ungi mukuetu mulume na mukashi aaye, baabadi bamuitanyishe kuabo ku nshibo, abo nkumuteemesha pa kuituula pa mbalo yaaye, na kumushinkamiisha’shi e na muulo ku meso ku’Efile Mukulu. Jocelyn amba’shi: “Naadi mupushe nka bu’shi Yehowa baadi muibafubishe bua kungabula mu muela wi mpumo i bukopo na kumpaasha. Bukuashi buabo bubaadi bumpe dingi lukalo lua kutungunuka na kufubila Yehowa.” Mpa na atue namu tui balombene kunyingisha bangi pa kuibateemesha kalolo nsaa y’abetulungula bi mu mashimba aabo na pa kuituula pa mbalo yabo nsaa y’atuisamba nabo, na kuibakuasha bua’shi batungunukie na kufubila Yehowa.​—Lom. 12:15.

KUASHA BANGI BUABADIA KUPUSHA EYI DI’EFILE MUKULU

9. Balongi ba Yesu abaadi na lukalalashi kinyi, na Yesu baadi muibakuashe naminyi?

⁹ Balongi ba Yesu abaadi bakumiine Eyi di’Efile Mukulu na abo nkukita muabo moso bua kuiditumikila mu muwa wabo. (Yo. 17:6) Anka tababaadi abapusha buakinyi abaadi bayipee Yesu ku mutshi wa makienga bu ntomboshi nya. Yesu baadi auku’shi balongi baaye abaadi na lukumiino na’shi mbafule Yehowa, anka bibaadi abitungu’shi bapushe Bifundue kalolo. (Luk. 9:44, 45; Yo. 20:9) Biabia aye nkuibalongiesha biabadia kupusha Bifundue kalolo. Tubande kutala kibaadi mukite nsaa ibaadi mufumankane na balongi baye babidi muishinda dia ku Emause.

10. Yesu baadi mukuashe balongi baaye naminyi buabadia kutundula’shi baadi Mesiya? (Luka 24:18-27)

¹⁰ Badika Luka 24:18-27. Lamiina’shi Yesu tabaadi muilubule kuabadi musango umune’shi baadi nnanyi. Anka, baadi muibele nkonko. Buakinyi? Pangi baadi na lukalo lua’shi apushe bibaabadi abanangushena na bibaadi mu mashimba aabo. Na nyi bibaabakitshine. Abamulunguile’shi abaadi abapuandikisha’shi Yesu ekala Nfumu mu Isalele na kuibafungusha ku bupika bua bena Loma abaadi abebakiengiesha. Kunyima kua’bo kulesha bibaabadi abapusha, Yesu baadi mufubishe Bifundue bua kuibakuasha buabadia kupusha’shi matemuki ebungi abaadi alombane. b Kunyima kiakia kiolua, baadi muimonene na bangi balongi na aye nkuibapatuluila dingi akipushisha aa matemuki. (Luk. 24:33-48) Nkinyi kiatudi balombene kulongiela ku uno muanda?

11-12. (a) Ndilongiesha kinyi di’atupetela ku mushindo ubaadi Yesu mulongieshe bia binyibinyi bia mu Bible? (Tala dingi bifuatulo.) (b) Mukuetu baadi alongo Bible na Nortey baadi mumukuashe naminyi?

 ¹¹ Tui kuambula Yesu naminyi? Kia kumpala, nsaa y’olongiesha balongi ba Bible, ebele nkonko na mayele oso mu kipaso kilombene kuibakuasha buabadia kulesha biabapusha muishimba na biabanangushena. (Nki. 20:5) Kunyima kua kupusha bi’abepusha, webaleshe mushindo wabadia kupeta ma verse a mu Bible alombene kuibakuasha ku muanda wabadi nao. Tuebalungulanga mususa umune akitungu’shi bakite. Pamutue pa biabia, ebele nkonko pabitale ma verse a mu Bible. Webanyingishe buabadia kunangushena pabitale mianda y’ababadika na pabitale mushindo wabadia kuiyitumikila mu muwa wabo. Tutaleyi muanda ubaadi umone ungi mukuetu mulume a mu Ghana abetanyina bu Nortey.

¹² Pabaadi Nortey na bipua 16, babangile kulonga Bible. Mususa umune kifuko kiaye kibabangile kumubingabinga. Nkinyi kibaadi kimukuashe buadia kutungunuka na kulonga Bible? Mulongieshi aaye a Bible baadi mufubishe Mateo shapitre 10 bua kupatuula’shi bena Nkidishitu ba binyibinyi abakapete kubinguabingua. Nortey amba’shi: “Biabia, nsaa ibabangile kubinguabingua, naadi mushinkamishe’shi napete bia binyibinyi.” Mulongieshi aaye a Bible baadi dingi mumukuashe buadia kunangushena pabitale Mateo 10:16 buadia kuikala na budimu na kanemo nsaa y’esamba na bena kifuko naye pabitale bia binyibinyi. Kunyima kua kubatshishibua kuaye, Nortey baadi akumiina kuikala mbala-mashinda, anka nshaye baadi na lukalo lua’shi ende ku Université. Pamutue pa kulungula Nortey kiadia kukita, mulongieshi aaye a Bible, baadi mumuele nkonko bua kumukuasha bua’shi anangushene pabitale mayi a kulonda a mu Bible na kuata kitshibilo kibuwa. Bibatushishe kipeta kinyi? Nortey batshile kitshibilo kia kuikala mbala-mashinda. Nshaye bamubingile ku nshibo. Nortey bapushishe naminyi pabitale uno muanda? Amba’shi: “Ne mushinkamishe’shi naadi muate kitshibilo kibuwa.” N’atue namu, p’atuata nsaa ya kukuasha bangi buabadia kunangushena pabitale Bifundue, atuibakuasha buabadia kunyingisha lukumiino luabo na kutungunuka na kufubila Yehowa.​—Ef. 3:16-19.

KUASHA BANA BALUME BUABADIA KUIKALA “BIA BUNTU BIKALE BANTU”

13. Yesu bakitshiine kinyi bua kushinkamisha’shi mudimo wa kulungula mukandu wi buwa autungunuka na kukitshibua kunyima kuaye kualuka muiyilu? (Bena Efeso 4:8)

¹³ Pabaadi Yesu pa nsenga, baadi alombasha mudimo ubaabadi bamupe kui Nshaye na kalolo  kooso. (Yo. 17:4) Anka Yesu tabaadi anangushena’shi, nka aye bupenka nyi baadi mulombene kukita kikiebe kieshimba dia Yehowa nya. Munda mua bipua bisatu na kipindi bia mudimo waye wa bulungudi pa nsenga, baadi alongiesha bangi bia kukita mudimo. Yesu baadi mukulupile balongi baaye. Baadi muibape mudimo wa kulongiesha na kulungula mukandu wi buwa, na kupasukila muilo wa Yehowa wi na muulo kuadi. Bangi ba ku balongi babaadi abakunkusha wawa mudimo, babaadi na bipua bikile ku 30. (Badika Bena Efeso 4:8.) Bano bana balume babaadi bafube na Yesu na babaadi na lulamato kuadi. Kadi kumpala kua’shi ende muiyilu baadi muibalongieshe ngofu buadia kuikala “bia buntu bikale bantu.”

14. Yesu bakitshiine kinyi bua’shi akuashe balongi baye buabadia kukula mu kikudi munda mua mafuku aaye 40 a nfudiilo pa nsenga? (Tala dingi kifuatulo.)

¹⁴ Yesu baadi apa balongi baaye elango pa butooka, kadi na kifulo. Bu kileshesho, bamuene’shi bangi balongi babaadi na mpaka ya’shi Yesu tabafuile na’shi tabaadi musangukie, nyi buakinyi baadi muibakuashe bua kuwuka bia binyibinyi pa kuibapa elango. (Luk. 24:25-27; Yo. 20:27) Baadi muibalungule dingi buabadia kunyiisha kutuula binangu biabo mu kupasukila muilo wa Yehowa pa mutue pa kutuula binangu mu kukimba kua makuta e bungi. (Yo. 21:15) Na baadi muibatentekieshe biabasha kuipuandikisha na bangi muyile bi’abakitshi mu mudimo wa Yehowa. (Yo. 21:20-22) Na baadi mutopekie binangu bibubi bibabadi nabio pabitale Bufumu na ebakuasha buabadia kutuula binangu biabo nka penda mu kulungula mukandu wibuwa. (Bik. 1:6-8) Bakulu be kulongiela kinyi kui Yesu?

15-16. (a) Bakulu be kuambula Yesu mu mishindo kinyi? Patuula. (b) Elango ndikuashe Patrick mushindo kinyi?

¹⁵ Bakulu be kuambula Yesu mushindo kinyi? Abitungu balongieshe bakuetu balume mpaa na bano baki bansongualume bua’shi balombashe ngikashi itekiibue buabadia kukita midimo i bungi mu kakongie. c T’abitungu bakulu batengiele’shi, bua kulongiesha bano bakuetu balume nka bekadikie bapuidikie nya. Abitungu bakulu balongieshe bakuetu balume na kifulo kioso bua’shi bamone bia kuikala beyishe, be na lulamato, na abakumiina kukuasha bangi.​—1 Ti. 3:1; 2 Ti. 2:2; 1 Mp. 5:5.

¹⁶ Tubandeyi kutala mushindo ubaadi mukuetu  Patrick mukuashibue na elango. Baadi na kiubishi kia kuikala na ngakuilo e bubi, mpaa na kukitshiina bakuetu bakashi mianda i bubi. Ungi mukulu baadi munyingie mu kikudi, baadi mumone’shi abitungu Patrick ashintuule mianda i bungi, ngi aye nkumupa elango adipushika kalolo, na dinyi diadia elango, baadi muidituushe na kalolo kooso. Patrick amba’shi: “Naadi mupushe muloo ukile muanda yawa mukulu baadi mundeeshe mianda ibaadi ayitungu’shi ndumbuule.” Amba dingi’shi: “Naadi mupushe kutshoboloka panamuene bangi bakuetu balume abapete mashito anaadi mukumiine. Biabia, elango dia bakulu dibaadi dinkuashe bua’shi mmone’shi, abitungu ntuule binangu biande mu kukuasha bakuetu balume na bakashi na kuiyisha kooso, sunga nekala ntshi na mashito mu kakongie.” Bu kipeta, Patrick baadi mutudiibue bu mukulu a kakongie pabaadi ki’alombasha bipua 23.​—Nki. 27:9.

17. Mushindo kinyi ubaadi Yesu muleshe’shi mmukulupile balongi baye?

¹⁷ Yesu tabapeele balongi baye penda mudimo wa kulungula mukandu wibuwa nya, kadi bebapeele dingi mudimo wa kulongiesha. Balongi babaadi pangi bepushe’shi ta be na ngobesha ya kukita uno mudimo. Biabia, Yesu tabaadi na mpaka ya’shi ta mbalombene kukita uno mudimo nya, na baadi muibalungule bua kuiwukita. Bua kuleesha’shi baadi muibakulupile ngofu, Yesu bambile’shi: “Nka bu bintume Yaya, nami namu nenutumu.”​—Yo. 20:21.

18. Bakulu be kuambula Yesu naminyi?

¹⁸ Bakulu be kuambula Yesu naminyi? Bakulu ba sha binangu abalongieshaa bangi pa kuibapa mashito. (Fid. 2:19-22) Bu kileshesho, bakulu mbalombene kuteka ba nsongua buabadia kukuasha mu kusuula na kubamba Nshibo ya Bufumu. Bakulu mbalombene kupa bakuetu balume midimo, kuibalongiesha bia kuiyikita, na kukulupila’shi abeyikitshi kalolo. Mungi mukulu kii mupia abetamina bu Matthew amba’shi, ekalaa na muloo ukata pa kumona bakulu abapu kuisha, abamulongiesha kalolo bia kukita midimo ilekenelekene mu kakongie na kukulupila’shi eyilombasha kalolo. Amba’shi: “Nsaa inaadi nakitshi bilubilo abaadi abankuasha buandia kulongiela ku bianka, na kukita bibuwa mususa aufiki.” d

19. Abitungu tuikale na kitshibilo kia kukita kinyi?

¹⁹ Yesu baadi mufubishe mafuku aaye 40 a nfudiilo pa nsenga bua kunyingisha na kulongiesha bangi. Abitungu tuikale na kitshibilo kia kulonda kileshesho kiaye kalolo. (1 Mp. 2:21) Aketukuasha bua kuibikita. Ku nfudiilo a bioso baadi, mmulee’shi: “Ne nenu mafuku oso mpa na ku nfudiilo kua uno ndumbuluilo a mianda.”​—Mat. 28:20.