Kadimbo ka pa ntuelelo a mu kadimbo ka Kishila, kabaadi akakuasha bu kituelelo kia mu kadimbo ka Kishila ka mu ntempelo. Muyile ma a Bible Ngaluluilo a nsenga ipia abaadi atuukie kumpala kua 2023, “kadimbo ka pa ntuelelo kabaadi bula bua kude 20 (bino mbipushene na mbuipi mua ntempelo) na bula bua muiyilu bubaadi bua kude 120.”  (2 Mya. 3:4, EEM) Angi ma Bible namu aalesha’shi bula buako bua muiyilu bubaadi bua “kude 120,” bilombene kulesha’shi kabaadi na kipidi kia metre 53!

Anka, kubanga mu kipua kia 2023, Bible Ngaluluilo a nsenga ipia amba pabitale kadimbo ka ku ntuelelo a mu ntempelo a Salomone’shi: “Bula buaye bua muiyilu bubaadi bua kude 20,” sunga’shi pepi metre 9. a Tubandeyi kutaluula tubingilo tupeela tua kuno kushintuluka.

Bula bua muiyilu bua kadimbo ka pa ntuelelo ta mbebuleshe mu 1 Banfumu 6:3 nya. Mu uno verse, mufundi Yelemiya atuusha bula na bukata bua munda mua kadimbo, kushi kutuusha bula bua muiyilu. Akupu mu shapitre alondo, alesha bitunduilo bikata bia Ntempelo, bu misungo ibidi ya kuivre ibaadi imane kumpala kua kadimbo ka pa ntuelelo, mpa na Kitonko kia mema kia kiamo kisunguulue, matempu ekumi, na misungo ya kuivre ibaadi imane kumpala kua kituelelo. (1 Bf. 7:15-37) Su kadimbo ka pa ntuelelo kabaadi na metre 50 a bula bua muiyilu na kabaadi kakile Ntempelo, buakinyi Yelemiya tabaadi muakuile bula bua muiyilu? Tulamiine’shi, sunga kunyima kua ma siekele, bena Yunda balongie mianda ya kala babaadi bafunde’shi kadimbo ka pa ntuelelo bula buako bua muyilu tabubaadi bukile ntempelo a Salomone nya.

Bantu balongie tulasa abalesha’shi midimba ya Ntempelo tayibadia kuikala na bukome bua kutuala kadimbo ka pa ntuelelo ke bula bua kude 120. Mu mafuku a kala, mashibo abaabadi bebakie na mabue mpa na matafuadi abaadi bula bukile, bu bibaadi bibelo bia ntempelo ya mu Ejipitu, ibaadi na kitako kibaadi akiende na kupeela. Anka ntempelo a Salomone tabaadi biabia nya. Bantu balongie tulasa abalesha’shi midimba tayibaadi bukata bukile pa kude 6, sunga metre 2,7. Mungi muntu ataluulaa bintu bia kala mmufikie mu kushinkamisha bino: “Muyile bukata bua midimba [ya ntuelelo a ntempelo], kadimbo ka pa ntuelelo takabaadi kalombene kuikala na bula [bua muiyilu] bua kude 120 nya.”

Pangi kifundue kia 2 Myanda 3:4 abaadi bekitentule bibubi. Sunga biekala’shi mu angi ma maniskri mui buno bungi bua “120” mu uno verse, bingi bifundue bia kukulupilua bu Codex Alexandrinus, a mu siekele a 5, na Codex Abrosianus, a mu siekele 6, abisambila bua “kude 20.” Buakinyi muntu baadi atentula baadi mulombene kuluba afunda “120”? Muanda, mu ki na Ebelu kishima “lukama” na “kude” mbifuanene ngofu. Biabia pangi yawa baadi antentula baadi mulombene kufunda “lukama” pa mbalo ya “kude.”

Eyendo’shi sunga tuno tu mianda ntuitutale bua kumona bia kuuka kalolo bibaadi ntempelo a Salomone, ki na muulo kumpala kua bioso nyi nkiakia kialesha: ntempelo mukata a mu kikudi. Tui na lutumbu lukata kui Yehowa p’aye kuitamina bafubi baye boso buabadia kumulanguila mu uno ntempelo!​—Eb. 9:11-14; Kbf. 3:12; 7:9-17.