BENA Isalele babaadi bafule mizike ngofu. Misusa ibungi Bible ateemuna bantu abawombo biombuanga na kuyimba ngono. Kipindi kikata kia Bible nkikitshibue na ngono. Bu kileshesho, mukanda wa Misambo, Loono lua Salomone, na mukanda wa Kuidila, ibaadi ifundibue bua kuyimbibua. Mukanda awisambila nshalelo a akala (Music in Biblical Life mu Anglais) awamba’shi Bible alesha patooka’shi bena Isalele babaadi abafubisha mizike mu midimo ilekenelekene ya mu nshalelo aabo.

Mizike mu nshalelo a kuifuku n’efuku. Bena Isalele babaadi abawombo biombuanga na kuyimba ngono bua kulesha bi mu mashimba aabo. (Yesh. 30:29) Bana bakashi babaadi aboombo ma tanko, abayimbi ngono na muloo, na kusha masha ku misangeelo bu muifuku dia kutudibua kua nfumu mupia, nsaa ibaadi basalayi abatshokola ngoshi, na ku misangeelo ya lulanguilo. (Bans. 11:34; 1 Sam. 18:6, 7; 1 Bf. 1:39, 40) Bena Isalelele babaadi dingi abayimbi ngono bua kulesha kenyongoshi kaabo nsaa ayifu muntu. (2 Mya. 35:25) Nka bu abibilesha ungi mukanda wa Encyclopédie a McClintock na Strong, “abimueka patooka’shi bena Isalele babaadi bafule mizike ngofu.”

Mizike kuibalasa dia nfumu. Ba nfumu ba bena Isalele babaadi abapusha buwa kuteemesha mizike. Nfumu Saule baadi muitanyine Davide bua’shi ekale bu ngomba kuibalasa diaye. (1 Sam. 16:18, 23) Kunyima kua mafuku Davide nabene pabafile bu nfumu, baadi mukite biombuanga, afunda ngono, na alumbuula kisaka kia tuyimba tubaadi atuyimbi ku ntempelo a Yehowa. (2 Mya. 7:6; Am. 6:5) Nfumu Salomone baadi na bana balume na bana bakashi muibalasa diaye babaadi abayimbi.​—Mul. 2:8.

Mizike mu lulanguilo. Kintu ki na muulo, bena Isalele babaadi abafubisha mizike bua kulanguila Yehowa. Biabia kubaadi bana balume ba ngomba 4 000 babaadi aboombo biombuanga ku ntempelo a mu Yelusalema. (1 Mya. 23:5) Babaadi abayimbi mbembo, nseese, bindaala, na mpungi. (2 Mya. 5:12) Anka, ta mpenda bano ba ngomba babaadi abauku kalolo nyi babaadi abalanguila Yehowa na mizike nya. Bena Isalele bebungi babaadi abayimbi ngono ya kukaamina nsaa ibaabadi abende ku Yelusalema ku misangeelo ya ku kipua. (Mis. 120-134) Muyile bifundue bia bena Yunda, bena Isalele babaadi abayimbi Misambo ya Hallel a mu nsaa ya kidibua kia Pasaka.

Mizike ikii nka na muulo ukata kui muilo w’Efile Mukulu lelo uno. (Yak. 5:13) Atuyimbilaa Yehowa ngono bua kumutumbisha. (Ef. 5:19) Mizike ayinyisha kuitubunga na bena Nkidishitu netu. (Kol. 3:16) Na ayitunyingisha bua kumona bia kunyingiila nkalakashi. (Bik. 16:25) Mizike nyi mmushindo ukile buwa wa kulesha lukumiino na kifulo kietu bua Yehowa.