1-2. Bakulu abakitaa “mudimo kinyi wibuwa”?

 SU OKUETE kufuba bu mufubi a midimo, we kuikitshisha bodia kulombasha ngikashi i bungi itekibue bua kuikala bu bukulu. We kulombasha kepatshila ka kukita “mudimo wibuwa” su?​—1 Tim. 3:1.

² Bakulu abakitaa mudimo kinyi? Bakulu abakunkushaa mudimo wa bulungudi, mudimo wa kulama mikooko, kulongiesha, na kunyingisha kakongie mu ngakuilo na mu kileshesho kiabo ki buwa. Ngi buakinyi Bible e na kabingilo ke buwa ka kuitanyina bakulu abafubu ngofu bu “bia buntu bikale bantu.”​—Ef. 4:8.

3. Mukuetu mulume e kulombasha ngikashi itekibue bua kuikala bu mukulu naminyi? (1 Timote 3:1-7; Tite 1:5-9)

³ We kukita naminyi bodia kulombasha ngikashi itekibue bua’shi ofube bu mukulu? Kui kuilekeena kukata pankatshi pa’shi olombashe ngikashi itekibue bua kuikala bu mukulu, na kulombasha ngikashi itekibue bua kukita mudimo wa ku mbidi. Ke bungi, bua’shi opete mudimo mu ino nsenga, abitungu wekale na kiukilo ki bungi ki’abakimbaa kui sha mudimo. Mu kuilekeena na biabia, bua’shi bakutuule bu mukulu, t’abitungu’shi wekale na kiukilo ki bungi kia kulungula mukandu wi buwa sunga kia kulongiesha nya. Anka abitungu’shi olombashe ngikashi itekibue yabadi bateemune mu mukanda wa 1 Timote 3:1-7 na wa Tite 1:5-9. (Badika.) Mu uno muisambo, atutaluula mianda isatu y’abatekie bakulu: Wa kumpala, nkuikala na nkumo i buwa munda mua kakongie na paasha pa kakongie, wa kabidi, nkuikala kileshesho ki buwa kia bu nfumu a kifuko, na wa kasatu, nkukumiina kufubila kakongie.

 KUIKALA NA NKUMO I BUWA

4. “Kuikala shi na matope” akupushisha kinyi?

⁴ Bua kulombasha ngikashi itekibue bua kuikala bu mukulu, abitungu “wekale muntu shi na matope,” bino abipushisha’shi kuikala na nkumo i buwa mu kakongie, muanda muikeelo oobe t’autakula bantu buabadia nkutopeka. Kukatusha biabia, abitungu “wekale na nkumo ibuwa kui bantu bashi bena kukumiina.” Sunga bantu bashi bena kukumiina bakuakula bi bubi pabitale nkumiino yobe, anka ta be na kabingilo kabadia kukutua kukumiina’shi we muntu mululame na e na muikeelo wi buwa nya. (Nda. 6:4, 5) We kuiyipusha’shi: ‘Ne na nkumo i buwa munda mua kakongie na paasha pa kakongie su?’

5. We kuleesha naminyi’shi “we mufule mianda ibuwa”?

⁵ Su buekala “mufule mianda ibuwa,” omono mianda i buwa i mui bangi na kuibatumbula bua ngikashi yabo i buwa. Wekala dingi na muloo wa kukitshiina bangi mianda i buwa, kukita mianda mpaa na yabash’abatengielanga kui bangi’shi we kuibakitshiina. (1 Te. 2:8) Buakinyi dino eyikashi di na muulo kui bakulu? Muanda bakuete kufubisha nsaa yabo i bungi buabadia kulama kakongie, na kupasukila midimo yabo. (1 Mp. 5:1-3) Muloo autuukilaa mu kufubila kua bangi, ngukile kintu kioso kiakia kiatudia kuisumina.​—Bik. 20:35.

6. Mu ingi mishindo kinyi modi mulombene kuleesha’shi we “muntu akuukilaa beenyi”? (Bena Ebelu 13:2, 16; tala dingi kifuatulo.)

⁶ Oleesha’shi we “muntu akuukilaa bangi” nsaa yuebakitshiina mianda i buwa, mpaa na baaba bashi bakuuku boobe. (1 Mp. 4:9) Dingi diksionere ditale mianda ya Bible, adipatuula pabitale muntu akuukilaa beenyi mu uno mushindo: “Kibelo kia nshibo yaye n’eshimba diaye abitungu bikale bibaule bua beenyi.” Eyipushe obe nabene’shi: ‘Bangi abangukaa namu’shi ne muntu akuukilaa bantu beenyi su?’ (Badika Bena Ebelu 13:2, 16.) Muntu akuukilaa beenyi, aleeshaa kalolo kui bantu ba bipaso bioso. Bu kileshesho, aleeshaa kalolo kui balanda, kui bantu babafiki mu kuela muisambo mu kakongie kabo, na kui bano abekitshishaa ngofu buabadia kunyingisha bakuabo balume na bakashi bu bakunkushi ba bifunda.​—Kib. 18:2-8; Nki. 3:27; Luk. 14:13, 14; Bik. 16:15; Lom. 12:13.

7. Mukulu e kuleesha naminyi’shi ta “muntu mufule makuta”?

⁷ “Tuekalanga muntu mufule makuta.” Bino abipushisha’shi tuekalanga mutuule binangu biobe nka ku bintu bia ku mbidi. Biuekala mulanda sunga mpeta, tuula mianda ya Bufumu pa mbalo ya kumpala mu mishindo yooso ya mu nshalelo oobe. (Mat. 6:33) Ofubisha nsaa yobe, bukome bobe, na bingi bintu biodi nabio bua kulanguila  Yehowa, bua kupasukila nkalo ya kifuko kiobe, na bua kufubila kakongie. (Mat. 6:24; 1 Yo. 2:15-17) Eyipushe obe nabene’shi: ‘Namonaa makuta bu kinyi? Nasankaa na biandi nabio su? Sunga’shi natuulaa binangu biande nka bua kupeta makuta e bungi na kupeta bintu bi bungi bia ku mbidi su?’​—1 Ti. 6:6, 17-19.

8. Mu ingi mishindo kinyi modia kuleesha’shi we na “nkatshinkatshi” na “kuikanda”?

⁸ Su buekala na “nkatshinkatshi” na “kuikanda,” wekala na nkatshinkatshi mu mianda yooso ya mu nshalelo oobe. Bu kileshesho, tuekala muntu e na kudia sunga kutoma kui bungi nya, nfuadilo oobe sunga ntshibilo oobe a nyeene ekala na nkatshinkatshi, na wata bitshibilo bi buwa pabitale mushindo wa kukisha kapapi. Tuambula nfuadilo sunga ntshibilo a nyeene ekalaa naye bantu bash’abafubilaa Yehowa nya. (Luk. 21:34; Yak. 4:4) Oshaala muumiine nsaa i bangi abakukitshiina mianda i bubi. “Tuekala nkodi a maalua”; sunga kuikala na nkumo ya’shi we ntomi. Eyipushe obe nabene’shi: ‘Nshalelo ande aleesha’shi ne muntu e na nkatshinkatshi na kuikanda su?’

9. “Kuikala na binangu bibuwa” na “kuikala muntu shi na kafutakanyi” abipushisha kinyi?

⁹ Su “buekala na binangu bibuwa,” wekala onangushena pabitale akiakula Bible muyile mianda ilekeenelekeene yodia kupeta mu nshalelo oobe. Onangushena kalolo pabitale mushindo odia kutumikila elango dia mu Bible, pabitale muanda oodi nao. Bu kipeta, opusha muanda kalolo, na wata bitshibilo bi buwa, na tuekala na bukidi bua kuata bitshibilo nya. Mu kuilekeena na biabia, wekala mushinkamishe’shi bopu kuikala na mianda yooso ayitungu pabitale wawa muanda. (Nki. 18:13) Su bopu kuuka mianda yooso kalolo pabitale wawa muanda, wekala na nkatshinkatshi mu kuata kua bitshibilo abileesha bi mueneno a Yehowa. Su buekala “muntu shi na kafutakanyi,” wekala muntu muilumbuule na aneemeka nsaa. Wekala muntu muukibue bu muntu abadia kukulupila na bu muntu alondaa buludiki. Su buekala na ino ngikashi yooso ya tubesambila muushi a kano kamutue ka muanda ka uno muisambo, ayikakukuasha bodia kuikala na nkumo i buwa. Bua binobino, tuisambileyi ngikashi y’abakula kui Bible ilombene bakulu kuikala nayo buabadia kuikala kileshesho ki buwa kia bu nfumu a kifuko.

IKALA KILESHESHO KI BUWA KIA BU NFUMU A KIFUKO

10. “Kukunkusha kalolo ba mu nshibo yobe” akupushisha kinyi?

¹⁰ Su we mulume muibakile na okumiina kulombasha ngikashi etekibue bua’shi wekale mukulu, nkumo ya kifuko kiobe i na dingi bukitshishi ku mianda y’abakutekie. Bino abikutungu’shi wekale “muntu akunkusha kalolo ba mu nshibo yobe.” Bino abikutungu’shi wekale na nkumo ya bu muntu mufule kifuko kiaye, na aataa mashito aaye a bu nfumu a kifuko na muulo. Abikutungu’shi wekale okunkusha lulanguilo lua mu kifuko kiobe, wekale oshinkamisha’shi ba mu kifuko kiobe abatuelaa mu bisangilo bia bena Nkidishitu, na webakuashe buabadia kuikala balungudi be buwa ba mukandu wi buwa. Buakinyi bino bi na muulo? Mpoolo mutumibua baadi munangushene’shi: “Su muntu tawuku bia kukunkusha kalolo ba mu nshibo muaye, mbikunyi biadi mulombene kulama kakongie k’Efile Mukulu?”​—1 Ti. 3:5.

11-12. Mmushindo kinyi ulombene muikeelo wa bantu ba mu kifuko kuikala na bukitshishi ku ngikashi itekibue ya nshe bana? (Tala dingi kifuatulo.)

¹¹ Su we nshe bana, abitungu’shi “bana bobe bakinga bakukookiele na kalolo koso.” Abitungu webalongieshe na kuibalambukisha na kifulo kioso. Mu binyibinyi, bana bakinga booso abakumiinaa kuasha nabo maasha na kukita tu mianda atuibasepesha. Biabia, ku muanda webalongiesha na kalolo kooso, abekala na kukookiela, na kaneemo, na muikeelo wi buwa. Dingi abitungu wekitshishe mobe mooso bua kukuasha bana bobe bua’shi bekale mu kipuano ki buwa na Yehowa, bekale na nshalelo muipushene na mayi a kulonda a mu Bible, na batame mu kikudi buabadia kubatshishibua.

¹² Abitungu ekale “na bana bena kukumiina bashi na nkumo ya mianda ya bukitekite, sunga bu  ntomboshi.” Su nshe bana e na muana muina kukumiina mushaale naye mu nshibo muaye, kadi yawa muana bakitshi muluisho ukata, bi na bukitshishi kinyi kui nshe bana? Su nshe bana ekeele abepuula mashito aaye a kulongiesha yawa muana na kumunyooka, pangi e bu bakutua kulombasha ngikashi itekibue ya kuikala bu mukulu.​—Tala muisambo wi mu Kitenta kia Mulami kia 15/10/1996, esak. 21, kikos. 6-7, mu nfualase.

FUBA BUA KUKUASHA KAKONGIE

13. We kuleesha’shi we “muntu e na nkatshinkatshi” na “shi na mutue wibukopo” naminyi?

¹³ Bakuetu balume be na ngikashi i buwa ya bu bena Nkidishitu, be na muulo ukata mu kakongie. Muntu e na “nkatshinkatshi” afuishaa butaale. Su okumiina’shi bantu bakuukie bu buntu e na nkatshinkatshi, ikala oteemesha bangi na kukumiina mueneno aabo. Mu bisangilo, we kukumiina namu kukuatshishena kitshibilo kia bantu be bungi su t’akiipaa muiya wa mu Bible sunga mayi a kulonda? “Tuekalanga muntu a mutue wibukopo” bino abikiebe kupushisha’shi t’abitungu’shi okuminyishishe bangi muanda nka mu mushindo okumiina’shi wikale. Muanda wi na muulo nkuuka’shi abitungu namu kuteemesha mueneno a bangi. (Kib. 13:8, 9; Nki. 15:22) “Tuekalanga muntu mukumiine kutontoola” sunga “akuataa nsungu bukidi.” Pa mutue pa kuikala muntu a mianda i bukopo-bukopo, abitungu kuikala muntu sha butaale na kaneemo. Muntu sha butaale nsaa ayituuku mianda ya kuikakeena. Abitungu wekale muntu a kumpala kufuisha butaale mu mianda yooso. (Yak. 3:17, 18) Ngakuilo oobe a kalolo e kupeelesha nsungu ya bangi mpaa na ya beshikuanyi nobe.​—Bans. 8:1-3; Nki. 20:3; 25:15; Mat. 5:23, 24.

14. Kuamba’shi “tekalanga muntu mupia mu lukumiino” na sha “lulamato” abipushisha kinyi?

¹⁴ Mukuetu mulume mulombashe ngikashi ya kuikala bu mukulu, “Ta mulombene kuikala muntu mupia mu lukumiino.” Su tobandile kuikala na bipua bi bungi n’obe kubatshishibua, abikutungu mafuku e bungi bua kuikala muina Nkidishitu munyingie mu kikudi. Kumpala kua’shi bakutuule bu mukulu, abitungu oleeshe’shi we muiyishe nka bu Yesu, na’shi otengiela Yehowa akufubishe mu mudimo ooso w’akumiina. (Mat. 20:23; Fid. 2:5-8) We mulombene kuleesha’shi we  na “lulamato” pa kushaala mulamate kui Yehowa, na ku mayi aaye a kulonda alulame, na kulonda buludiki buabetupa kui ndumbuluilo aaye.​—1 Ti. 4:15.

15. Abitungu’shi mukulu ekale muntu elaa miisambo ya bantu booso kalolo su? Patuula.

¹⁵ Bible apatuula kalolo’shi abitungu bakulu bekale “bantu balombanyiine kulongiesha.” Bino abipushisha’shi, abitungu ekale muntu elaa miisambo ya bantu booso kalolo su? Nya. Ta mbakulu booso abeelaa miisambo ya bantu booso kalolo nya, anka nsaa y’abende mu bulungudi na mu kukunka mikooko, bakulu be na lukalo lua kuikala na ngobesha ya kufubisha Bible kalolo bua kulongiesha na kunyingisha bakuetu balume na bakashi. (1 Ti. 3:2) Sunga mbiabia, abitungu’shi wekitshishe ngofu bua kulumbuula ngobesha yobe bua kuikala bu mulongieshi e buwa. We kuikala mulongieshi e buwa mushindo kinyi?

16. Mmushindo kinyi oodi mulombene kuikala mulongieshi e buwa? (Tala dingi kifuatulo.)

¹⁶ “Lamata pepoo kuiyi dia lulamato.” Bua kuikala mulongieshi e buwa, abitungu miisambo ya bantu booso na malango oobe bituukile Muiyi di’Efile Mukulu. Ikala welongiela kalolo Bible na mikanda yetu. (Nki. 15:28; 16:23) Nsaa yuelongiela, tuula binangu biobe ku mushindo ubabapatuula verse a mu Bible kui mikanda yetu na biodia kumutumikila mu mushindo wi buwa. Na dingi, nsaa y’olongiesha ekitshishe bua kukuma mashimba a baaba abakuteemesha. Na dingi bua’shi wekale mulongieshi e buwa, teka malango kui bakulu babapu kuisha na weatumikile. (1 Ti. 5:17) Abitungu bakulu bekale “abawuku . . . kunyingisha” bakuabo balume na bakashi; anka abitungu dingi bakulu baate nsaa ya kulanga sunga “kuibasaashila.” Abitungu bakite bino bioso na kalolo. Su buekala na kalolo na kifulo na buata malongiesha oobe Muiyi di’Efile Mukulu, wekala mulongieshi e buwa, muanda wambula Yesu Nkidishitu Mulongieshi Mukata.​—Mat. 11:28-30; 2 Ti. 2:24.

TUNGUNUKA NA KUIKITSHISHA

17. (a) Nkinyi kilombene kukuasha mufubi a midimo buadia kutungunuka na kuikitshisha? (b) Abitungu bakulu balamiine kinyi nsaa y’abataluula bakuetu balume bua kuibatuula bu bakulu? (Tala kashibo akamba’shi: “ Ikalayi na nkatshinkatshi nsaa y’anutaluula bangi bantu.”)

¹⁷ Kunyima kua kutaluula ino ngikashi itekibue  bua muntu kuikala bu mukulu, bangi bafubi ba midimo be kupusha’shi ta be na ngobesha ya kulombasha ino ngikashi. Anka tentekiesha’shi Yehowa na ndumbuluilo aaye ta mbalombene nkuteka bua’shi wekale na ino ngikashi yooso mu mushindo upuidikie nya. (1 Mp. 2:21) Biabia, bukome bua Yehowa, kikudi kiaye kisele ngi abukukuasha bodia kuikala na ino ngikashi itekibue. (Fid. 2:13) We na eyikashi kampanda di pabuadio diokumiina kulumbuula su? Teka Yehowa pabitale diadia eyikashi. Kimbuula mu mikanda yetu pabitale wawa muanda, na oyipushe bakulu babapu kuisha bua’shi bakukuashe bodia kulumbuula diadia eyikashi.

18. Bafubi booso ba midimo abebanyingisha buabadia kukita kinyi?

¹⁸ Atue booso mpaa na baaba bapue kuikala bu bakulu, abetunyingisha buatudia kutungunuka na kudima ngikashi ibatukatuka mu kutaluula mu uno muisambo. (Fid. 3:16) We mufubi a midimo su? Toyimeenanga muishinda! Teka Yehowa buadia nkulongiesha na nkulumbuula bua’shi wekale na ngobesha yodia kumufubila na kukuasha kakongie. (Yesh. 64:8) Yehowa elele kuikitshisha koobe miabi i bungi bua’shi olombashe ngikashi itekibue bodia kuikala mukulu.