1. Mpoolo mutumibua baadi apusha naminyi pabitale bafubi ba midimo?

 BAFUBI ba midimo abakitaa midimo i na muulo mu tukongie. Mpoolo mutumibua baadi aata bano bana balume be na lulamato na muulo ukata. Bu kileshesho, pa baadi Mpoolo mufundile bena Nkidishitu ba mu Fidipe mukanda, baadi museme bikishekishe bafubi ba midimo na bakulu.​—Fid. 1:1.

2. Mukuetu mulume Luis baadi mupushe naminyi pabitale mudimo waye wa bu mufubi a midimo?

² Bia bikala bansongua sunga bantu babapu kukula, bakuetu balume be bungi bapue kubatshishibua, abapushaa muloo ukile nsaa y’abekala bu bafubi ba midimo. Bu kileshesho, mukuetu mulume Devan baadi na bipua 18, pa baabadi bamutuule bu mufubi a midimo. Ku lungi lupese namu, mukuetu mulume Luis babaadi bamutuule bu mufubi a midimo aye taadi na bipua bikile pa 50. Mukuetu Luis bapushiishe naminyi pa bekeele bu mufubi a midimo? Amba’shi: “Ne na muloo ukile bua kufubila bakuetu balume na bakashi mu kakongie mu uno mushindo. Babandesha’shi mbanfule ngofu, nami namu kubanga binobino nebaleesha’shi ne muibafule!” Bafubi ba midimo be bungi abapushaa n’abo nka uno muloo wi bino.

3. Nkonko kinyi y’atutaluula?

³ Su we mukuetu mulume mupue kubatshishibua kadi tuekeele mufubi a midimo, tue kuikitshisha namu bua kuibuikala? Nkinyi kilombene nkutakula bua kuibuikala? Na Bible akula ngikashi kinyi ayitungu’shi wekale nayo bodia kuikala mufubi a midimo? Mu  uno muisambo, atukapete ngaluulo ya ku ino nkonko. Anka bua kubanga, tubandeyi kuisambila mudimo wi nawo mufubi a midimo.

MUFUBI A MIDIMO EKALAA NA MUDIMO KINYI?

4. Bafubi ba midimo abekalaa na mudimo kinyi? (Tala dingi kifuatulo.)

⁴ Mufubi a midimo nyi mmukuetu mulume mupue kubatshishibua abadi basangule ku bukuashi bua kikudi kiselele, bua kukuasha bakulu ku midimo i bungi ya mu kakongie. Bangi bafubi ba midimo abekalaa kuanka bua kushinkamisha’shi balungudi be na ma terituare na mikanda bua kukita mudimo wa bulungudi. Bangi bafubi namu abakuashaa mu kutumpa na mu kulumbuula Nshibo ya Bufumu kalolo. Bafubi ba midimo abafubaa dingi mu kupa kua bantu mbalo mu kakongie nsaa ya bisangilo na kufuba ku mianda ya sono. Midimo i bungi y’abakitaa kui bafubi ba midimo i na muulo ukata. Kintu ki na muulo ukata nkia’shi, bafubi ba midimo mbakuetu balume bafule Yehowa, na be na nshalelo asankisha Yehowa. Na dingi be na kifulo kikata bua bakuabo bena Nkidishitu balume na bakashi. (Mat. 22:37-39) Mukuetu mulume mubatshishibue e kuikitshisha naminyi bua kuikala bu mufubi a midimo?

5. Mukuetu mulume mupue kubatshishibua e kuikitshisha naminyi bua’shi ekale mufubi a midimo?

⁵ Bible aleesha ngikashi ayitungu’shi baaba booso abakiebe kuikala bu bafubi ba midimo beyilombashe. (1 Ti. 3:8-10, 12, 13) Bua kupeta ano mashito a bu mufubi a midimo, abitungu olongie ngikashi itekibue mu Bifundue na w’ekitshishe bua kuikala nayo. Kia kumpala, abitungu obande kunangushena obe nabene buakinyi okumiina kuikala bu mufubi a midimo.

BUAKINYI OKUMIINA KUIKALA BU MUFUBI A MIDIMO?

6. Nkinyi kilombene nkutakula bodia kufubila bakuenu balume na bakashi mu mudimo ooso wawa? (Mateo 20:28; tala dingi ki ku kipusu.)

⁶ Nangushena pabitale kileshesho kietu kikata kia Yesu Nkidishitu, baadi akitshi kintu kioso muanda baadi mufule Nshaye, na kufula bantu. Kiakia kifulo kibaadi kitakule Yesu buadia kufuba ngofu, na kufubila bangi na kuiyisha kooso. (Badika Mateo 20:28; Yo. 13:5, 14, 15) Su nkifulo kibakutakula, Yehowa akuelela miabi na akukuasha bodia kulombasha kepatshila koobe ka kulombasha ngikashi itekibue bua kuikala bu mufubi a midimo.​—1 Ko. 16:14; 1 Mp. 5:5.

7. Buakinyi abitungu mukuetu mulume alekie kuitatula?

⁷ Mu ino nsenga, bantu abakumiinaa ke bungi  bantu abekitshisha bua kukita mudimo kalolo. Anka ta ngi biabidi mu ndumbuluilo a Yehowa nya. Mukuetu mulume mufule bangi bu bibaadi Yesu muibikite, t’atontaa bangi sunga kuileesha kuabadi bu aye muibakile nya. Su muntu e na kuno kuitatula bamutuula bu mufubi a midimo mu kakongie, pangi mmulombene kupela ingi midimo ayitekie kuiyisha, na ayitungu kukita bua kupasukila mikooko ya Yehowa. Na pangi e kumona ino midimo bu ayimuisha milongo. (Yo. 10:12) Yehowa t’elelaa muntu e na kuitatula sunga kuileesha miabi nya.​—1 Ko. 10:24, 33; 13:4, 5. 

8. Yesu baadi mupe batumibua baye elango kinyi?

⁸ Mu angi mafuku, sunga bakuuku ba Yesu babaadi abekitshisha buabadia kupeta angi mashito, anka babaadi na kabingilo ke bubi. Tubandeyi kutala muanda ubaadi utale batumibua ba Yesu babidi: Yakobo na Yowano. Yakobo na Yowano babaadi batekie Yesu bua’shi ebape mbalo i na muulo ukata mu Bufumu buaye. Yesu ta baadi muibatumbule bua kibaabadi batekie nya. Mu kuilekeena na biabia, baadi mupatuluile batumibua booso 12 shi: “Yawa akumiina kuikala mukata munkatshi muenu, abitungu ekale mufubi enu, na akumiina kuikala a kumpala munkatshi muenu abitungu ekale mpika a boso.” (Mak. 10:35-37, 43, 44) Bakuetu balume be na kabingilo ke buwa, kuamba’shi lukalo lua kufubila bangi, abakuashaa kakongie mu mishindo i bungi.​—1 Te. 2:8.

NKINYI KILOMBENE KUNYINGISHA LUKALO LOOBE LUA KUIKALA BU MUFUBI A MIDIMO?

9. We kunyingisha lukalo loobe lua kuikala bu mufubi a midimo naminyi?

⁹ Kushi mpaka, we mufule Yehowa na okumiinaa kufubila bangi. Pangi, tue na lukalo lua kukita midimo y’abakitaa kui bafubi ba midimo nya. Nkinyi kilombene nkukuasha bua kukumiina kukita uno mudimo? Buakinyi tue mulombene kunangushena pabitale muloo oodi mulombene kupeta nsaa y’ofubila bakuenu balume na bakashi? Yesu bambile’shi: “‘Muloo wa kupaana ngukile wa kupebua.’” (Bik. 20:35) Yesu baadi akitshi mianda ibaadi akula. Yesu baadi mupete muloo wa kufubila bangi, n’obe namu we kuiwupeta.

10. Yesu baleeshe’shi baadi na muloo wa kufubila bangi naminyi? (Maako 6:31-34)

¹⁰ Tutaleyi kileshesho akileesha’shi Yesu baadi na muloo wa kufubila bangi. (Badika Maako 6:31-34.) Dingi efuku, Yesu na batumibua baye babaadi bakookie ngofu. Babaadi bende mbalo i kula na bantu bua’shi bakayikishe. Anka kisaka kia bantu kibaadi kibabadidiile kumpala, bakulupile’shi Yesu ebalongiesha. Yesu ta baadi mulombene kupela kuibalongiesha nya. Ngi buakinyi, Yesu na batumibua baye “ta babaadi bapete sunga nsaa ya kudia.” Sunga’shi Yesu ta baadi mulombene kualusha bano bantu kunyima kua kuibalongiesha penda muanda umune sunga ibidi ya bia binyibinyi nya. Anka bu bibaadi’shi kifulo nyi kibaadi akimutakula, “babangile kuibalongiesha mianda i bungi.” Na batungunukile na kuibalongiesha mpaa na “nsaa ipue kuenda.” (Mak. 6:35) Yesu ta bakitshiine bino bu kitungo nya, anka bakitshiine bino muanda “bebapushiishe lusa.” Yesu baadi mukumiine kuibalongiesha muanda baadi muibafule. Kufubila bangi, kubaadi kutuadile Yesu miloo i bungi.

11. Yesu bakitshiine kinyi bua kukuasha bantu babaadi abamuteemesha na bintu bia ku mbidi? (Tala dingi kifuatulo.)

¹¹ Pa baadi Yesu alongiesha kibumbu kia bantu, bakitshiine bi bungi kukila penda kuibalongiesha. Baadi dingi mupasukile nkalo yabo ya ku mbidi. Yesu baadi mukite kilengieleeshi atuusha bia kudia ebipa balongi baye buabadia kuibiabila. (Mak. 6:41) P’aye kukita biabia, balongieshe balongi baye mushindo wabadia kufubila bangi. Baadi dingi muibaleeshe’shi midimo bu ino y’abakitaa kui bafubi ba midimo, i na muulo ukata. Banda kupuandikisha muloo ubabapushiishe kui batumibua pa baabadi ababila bidibua bia ku kilengieleeshi kia Yesu mpaa na “pa badiile bantu booso abo nkuikuta”! (Mak. 6:42)  Uno ta ngi penda musuusa wa kumpala ubaadi Yesu mutuule nkalo ya bangi kumpala kua yaye nya. Mu nshalelo aaye ooso mushima a pano pa nsenga, baadi afubila nka bantu. (Mat. 4:23; 8:16) Yesu baadi na muloo wi bungi wa kulongiesha bangi na kuibapasukila ku nkalo yabo. N’obe namu wekala na muloo wi bungi su bokumiina kufubila bangi bu mufubi a midimo.

12. Buakinyi t’abitungu tunangushene’shi ta tui na ngobesha ya kukuasha mu kakongie?

¹² Su opusha’shi tue na ngobesha ya kukita kintu su nkimune, totshobolokanga. Kushi mpaka, we na ngikashi ilombene kukuasha bua’shi bakufubishe mu kakongie. Teka Yehowa na obadikie binangu bia Mpoolo bi mu mukanda wa 1 Bena Kodinda 12:12-30. Mayi a Mpoolo aaleesha kalolo’shi, nka bu bangi bafubi ba Yehowa, n’obe namu we na mudimo wi buwa wi na muulo ukata mu kakongie. Su kubanga binobino tue mulombashe ngikashi itekibue, bua kufuba bu mufubi a midimo totshobolokanga. Kukatusha biabia, kita muyile ngobesha yobe bua kufubila Yehowa na kukuasha bakuenu balume na bakashi. Ikala mushinkamishe’shi bakulu bakuete kunangushena pabikutale, na abakakupa midimo yodi na ngobesha ya kukita.​—Lom. 12:4-8.

13. Tui kuamba naminyi bua ingi mianda itekibue y’abatekaa bakuetu balume be na mashito?

¹³ Tubandeyi kutala kabingilo kamune ke na muulo ukata ka buakinyi abitungu olombashe ngikashi itekibue ya kuikala bu mufubi a midimo: I bungi ya ku ino ngikashi abeyitumikilaa kui bena Nkidishitu booso. Biabia, abitungu bena Nkidishitu booso befubuile kui Yehowa, bekale na miloo ayituukila mu kupaana na bekale kileshesho ki buwa kia mu nshalelo a buina Nkidishitu. Mmianda kinyi i pa buayo ilombene mukuetu mulume kukita bua kuikala mufubi a midimo?

NGIKASHI ITEKIBUE

14. “Kuikala muntu a kineemo” akupushisha kinyi? (1 Timote 3:8-10, 12)

¹⁴ Tubandeyi kutaluula ingi ya ku ngikashi itekibue yabadi bateemune mu mukanda wa 1 Timote 3:8-10, 12. (Badika.) Abitungu bafubi ba midimo “bekale bantu ba kineemo.” Kino kishima nkilombene kualuulua dingi bu “muntu abadi balombene kuneemeka,” bino t’abileesha’shi tue mulombene kukutua kusepa sunga kukutua kusepesha namu bangi nya. (Mul. 3:1, 4) Biabia, abitungu wate mashito oobe ooso na muulo. Su buekala opudisha kukita midimo y’abakupa, na kuiyikita kalolo, bakuenu balume na bakashi ba mu kakongie abakumono’shi we muntu a kukulupila na abakuneemeka.

15. “Kuikala bashi na ndimi ibidi” na “bashi na luabi lua kupeta bintu mu bulamalama” akupushisha kinyi?

 ¹⁵ “Bashi na ndimi ibidi” bino abipushisha’shi wekale muntu shi na madimi na abadia kukulupila. Okitshi kiakia kiodi muakule na t’odimbi bangi. (Nki. 3:32) “Bashi na luabi lua kupeta bintu mu bulamalama” bino abipushisha’shi abitungu wekale muntu sh’adimbi nsaa y’anukitshi mianda ya busunga na bangi, na mianda yooso itale makuta. Tue mulombene kuluisha kipuano kiobe ki buwa na bena Nkidishitu nobe, bua’shi opete makuta nya.

16. (a) “Kuikala bashi bepaane mu kutoma malofu” akupushisha kinyi? (b) “Kuikala na kondo k’eshimba katooka” akupushisha kinyi?

¹⁶ “Bashi bepaane mu kutoma kua malofu” bino abipushisha’shi t’abitungu wekale otomo maalua e bungi sunga kuikala na nkumo ya’shi we ntomi. “Bekale na kondo k’eshimba katooka” bino abipushisha’shi wekale na nshalelo muipushene na mayi a kulonda a Yehowa. Sunga mbioshi mupuidikie, osangeelaa butaale abutuukila mu kipuano ki buwa n’Efile Mukulu.

17. “Kubanda kuibatompa kumpala” akupushisha kinyi? (1 Timote 3:10; tala dingi kifuatulo.)

¹⁷ “Abitungu kubanda kuibatompa kumpala” bino abipushisha’shi we mupue kuileesha’shi we muntu abadia kukulupila, na abadia kupa mashito. Kia kumpala, nsaa y’abakupa mudimo kui bakulu, londa malango aabo kalolo na kulonda buludiki abutuukila mu ndumbuluilo. Ikala mushinkamishe’shi bopusha kalolo akikutungu’shi okite na nsaa ayikutungu’shi wewupudishe. Su bokitshi mudimo ooso w’abakupa kalolo na kisumi, bakuenu balume na bakashi ba mu kakongie abamono biuende kumpala mu kikudi, sunga’shi we mulombene kupeta mashito. Abitungu bakulu bekale bapasukie bua kulongiesha bakuetu balume bapue kubatshishibua. (Badika 1 Timote 3:10.) Nui na bansongualume bapue kubatshishibua mu kakongie keenu su? Be na namu biubishi bi buwa bia kuilongiela Bible na kulumbuula bisangilo kalolo su? Be na kiubishi kia kutuushanga ngaluulo mu bisangilo na kulungula mukandu wi buwa su? Su be na bino biubishi, ebapeyi midimo muyile bipua biabo, na nshalelo aabo. Uno ngi mushindo, wa “kubanda kuibatompa kumpala.” Dingi mu kipungo kia baki bansongua, be kulombasha ngikashi itekibue buabadia kuikala bafubi ba midimo.

18. “Kuikala bashi na muanda wa kuibatopeka nao” akupushisha kinyi?

¹⁸ “Bashi na muanda wa kuibatopeka nao” bino abipushisha’shi mmuntu abashi balombene kufunda’shi bakitshi muanda wi bubi. Mu binyibinyi,  bena Nkidishitu mbalombene kudimbiilua mianda. Yesu babaadi bamudimbiile mianda, na Yesu baadi mupue kuakula’shi: ‘Balongi baye abakebadimbiila namu n’abo mianda.’ (Yo. 15:20) Biabia, su botungunuka na kuikala na muikeelo wi buwa, bu bibaakitshiine Yesu, wekala na nkumo i buwa mu kakongie.​—Mat. 11:19.

19. Bible akula kinyi p’amba’shi abitungu “mulume muina Nkidishitu ekale muibakile mukashi umune”?

¹⁹ “Abitungu bafubi ba midimo bekale na mukashi umune.” Pa baadi Yehowa mukite eyibakishi dia kumpala, bambile’shi eyibakishi ndikitshibue na mulume umune na mukashi umune. Abitungu bena Nkidishitu booso bakookiele uno muiya. (Mat. 19:3-9) Mulume muina Nkidishitu ta mulombene kutambuka lusandi nya. (Eb. 13:4) Anka bino mbitale mianda i bungi. Abitungu wekale mulamate nka kui mukashi oobe, tokumanga kuleesha mianda ya kifulo kui bangi bakashi.​—Yob. 31:1.

20. Mukuetu mulume e kupasukila nkalo ya kifuko kiaye “kalolo” naminyi?

²⁰ “Abitungu bakungushe kalolo bana babo na ba mu nshibo muabo.” Su we nfumu a kifuko, abitungu wate mashito oobe na muulo. Ikala okunkusha lulanguilo lua mu kifuko pa kiubishi. Ikala otuuku mu bulungudi na muntu ooso a mu kifuko kiobe. Kuasha bana boobe buabadia kuikala mu kipuano kia pa bupenka na Yehowa. (Ef. 6:4) Muntu apasukilaa nkalo ya kifuko kiaye, aleesha’shi mmulombene kupasukila nkalo ya kakongie kalolo.​—Puandikisha na 1 Timote 3:5.

21. Su tanuafubile bu bafubi ba midimo nui kukita kinyi?

²¹ Bakuetu balume, su ta nuekeele bu bafubi ba midimo, nui kubadika uno muisambo kalolo na nuateka Yehowa bua uno muanda. Elongieleyi ngikashi itekibue bua kuikala mufubi a midimo, na nuikitshishe buanudia kuiyilombasha. Nangushenayi pabitale kifulo kianudi nakio bua Yehowa na bua bakuenu balume na bakashi. Tamishayi lukalo luenu lua kukumiina kufubila bakuenu balume na bakashi. (1 Mp. 4:8, 10) Ekitshisheyi buanudia kuikala bafubi ba midimo, na anuikala na muloo wi bungi bu bi’anufubila bakuenu balume na bakashi mu kakongie. Yehowa elela kuikitshisha kuenu miabi buanudia kumufubila bu bafubi ba midimo!​—Fid. 2:13.