1. Nkinangu kinyi ki buwa kia tubamono mui muilo wa Yehowa?

 TAKUDI mafuku e bungi apue kukila, Bible baakuile’shi, muilo w’Efile Mukulu ‘aukepâna ao unabene’ bua kufubila Yehowa mu kulonda buludiki bua Yesu. (Mis. 110:3) Buno butemuki, bukuete kulombana kalolo kakile lelo uno. Ku kipua kioso, bafubi ba Yehowa be na kisumi, bakuete kukishanga midiyo ya nsaa mu mudimo wa kulungula mukandu wibuwa. T’abapetaa efuto mu kukita kua uno mudimo nya. Abewukitaa penda mu kuipaana kuabo’bo banabene. Abataa’nyi nsaa ya kukuatshishena bena Kidishitu nabo, ku mianda ya ku mbidi, ya mu binangu na ya mu kikudi. Bakulu na bafubi ba midimo, abakisheyaa nsaa ibungi mu kulumbuula kua bisangilo na mu kulama kua bena Kidishitu nabo. Nkinyi akitakulaa muilo wa Yehowa, bua kukita uno mudimo ooso? Nyi nkifulo​—kifulo bua Yehowa na kifulo bua bantu nabo.​—Mat. 22:37-39.

2. Bu biabadi baleshe mu mukanda wa Bena-Looma 15:1-3, nkileshesho kinyi kiabadi balekie kui Yesu?

² Yesu mmulekie kileshesho ki buwa kia kutuula nkalo ya bangi, kumpala kua yaye. Tuikitsheyi muetu mooso buatudia kulonda matabula aaye. (Badika Bena-Looma 15:1-3.) Booso abamuambula, abakapete miabi. Yesu bambile’shi: “Muloo wa kupaana ngukile wa kupeebwa.”​—Bik. 20:35, Kilombeeno Kipya 2014.

3. Nkinyi ki’atukataluula mu uno muisambo?

³ Mu uno muisambo, atukataluula kungi kuipaana kubaadi Yesu mukite, bua kukuasha bangi, na atukamono, mushindo watudi balombene kuambula kileshesho kiaye. Atukesambila dingi, mushindo watudi balombene kutamisha lukalo luetu bua kukuasha bangi.

4. Mmushindo kinyi ubaadi Yesu mutuule nkalo ya bangi kumpala kua yaye?

⁴ Yesu baadi mukuashe bangi sunga nsaa ibaadi mukookie. Banda kunangushena bibaadi Yesu mukite, pa baayiile kibumbu kia bantu mu kufumankana naye, dia ku lupese lua muengie ushi kula na Kafarnaume. Aku namu Yesu baapu kukisha bufuku bushima mu kuteka. Baadi mukookie ngofu, anka pa baammuene kibumbu kikata kia bantu, baadi muibapushiishe lusa, balanda na bantu be na maladi, babaadi mu nkatshi muabo. Ta baadi nka penda muibapaashe nya, anka baadi dingi mukite muisambo ukata aunyingisha​—w’abetanyina bu muisambo wa ku muengie.​—Luk. 6:12-20.

5. Mmushindo kinyi ulombene ba mfumu ba bifuko kuambula kinangu kia Yesu kia kuipaana nsaa yabadi bakookie?

⁵ Mushindo wi ba mfumu ba bifuko bakuete kuambulanga Yesu. Tubande kupuandikisha uno muanda: Kunyima kua kufuba ngofu efuku dishima, mfumu a kifuko baaluka ku nshibo mmukookie. Kiakia kiolua nkia kukita lulanguilo lua mu kifuko, apusha bia kukisha diadi’efuku kushi kukunkusha lulanguilo, kadi atekie Yehowa bua’shi amupe bukome bua kuilukunkusha. Yehowa, baaluula ku luteko luaye na bakunkusha kulonga nka bu pa kiubishi. Bana babalongo dilongiesha di na muulo kiakia kiolua’shi, baledi babo, abatuulaa mianda ya mu kikudi pa mbalo ya kumpala, kukila kingi kintu kioso.

6. Tuusha kileshesho kia mushindo ubaadi Yesu mutushe nsaa yaye bua kukuasha bangi.

⁶ Yesu baadi akumiina kukisha nsaa na bangi, sunga mpabaadi na lukalo lua kuikala bupenka. We kupuandikisha mushindo ubaadi Yesu mupushe, nsaa ibaadi muiwukie’shi kuuku aaye Yowano Mubatshishi bayipayibua? Yesu baadi muinyongole ngofu. Bible amba’shi: “Pa bapushîshe [lufu lwa Yowano,] bakatukile papa, atwela mu bwato, enda kwa bupenka bwê mu mapya.” (Mat. 14:10-13, EEM) Abipushika buakinyi baadi akumiina kuikala bupenka. Be bungi ba kuatudi, abakumiinaa kulesha kinyongua kiabo pabadi pa bupenka. Anka bua Yesu, ta bibaadi bino nya. Kibumbu kikata kia bantu, kibakafikile mbalo ibaadi Yesu ende bua kuikala bupenka, kumpala kua’shi eekufikie. Yesu baakitshiine naminyi? Pa bauukile nkalo ya kibumbu kia bantu,  “beebapushiishe lusa.” Yesu pa baamuene’shi, be na lukalo lua kukuashibua mu mianda ya mu kikudi, na kunyingishibua akufiki kui Efile Mukulu, beebakuashiishe nka paapa kushi kunyengakana. Nka paapa, “baabangile kwibalambukisha [kushi tumyanda tupeela, kadi] myanda iibungi.”​—Mak. 6:31-34, Kilombeeno Kipya 2014; Luk. 9:10, 11.

7-8. Tuusha kileshesho akilesha mushindo wi bakulu be na kifulo abambula Yesu nsaa i muntu kampanda mu kakongie na lukalo lua bukuashi.

⁷ Mushindo wi bakulu be na kifulo abambula Yesu. Tui na lutumbu lukata bua bakulu betu belambule bua kuitukitshiina midimo! Midimo ibungi y’abakitaa, t’ayikambaa kumueka mu kakongie kashima nya. Bu kileshesho, bakuetu abafubaa mu Komite a kuisamba na ba munganga, abatushaa bukuashi lubilolubilo kui bakuabo bena Kidishitu pakudi muanda autungu kuisamba na ba munganga. Sunga ino mianda ayitekie bukuashi, yatuuka munkatshi a bufuku! Pa muanda wa lusa lua bakuabo balume na bakashi, bano bakulu na bifuko biabo, abakishaa nkalo ya bena Kidishitu nabo kumpala kua yabo.

⁸ Dingi, bakulu abakuashaa mu kuibaka kua mashibo a Bufumu, na angi mashibo a lulanguilo, mpaa na mu bisaka bia kukuasha bantu bapete masaku. Kushi kuluba’nyi nsaa ibungi y’abakishaa mu tukongie tuetu, mu kuitulongiesha, mu kuitunyingisha mpaa na mu kuitukuatshishena. Bano booso bakuetu balume na bifuko biabo, mbalombene lutumbu luetu lukata. Yehowa, eebeelele miabi bua kinangu kiabo kia kuipaana kiabalesha! Kushi mpaka, nka bi muntu ooso, bakulu namu’nyi abitungu bekadikie na nkatshinkatshi. T’abitungu’shi balenguule nkalo ya bifuko biabo, muanda’shi bakuete kukisha nsaa ibungi mu midimo ya teokrasi nya.

9. Muyile mukanda wa Bena-Fidipe 2:4, 5, abitungu’shi bena Kidishitu booso beekale na kinangu kinyi?

⁹ Badika Bena-Fidipe 2:4, 5. Eyendo, atue booso ta tui bakulu nya, anka, atue booso tui balombene kulonga bia kuambula kinangu kia Yesu kia kuipaana. Bible amba’shi, ‘beetuudile bu mufubi.’ (Fid. 2:7) Tubande kunangushena kiatudi balombene kulongiela pa uno muanda. Mpika e buwa sunga mufubi, baadi akimbi mishindo ya kusankisha mfumu’aaye. Pa muanda tui ba mpika ba Yehowa, na atukuashaa bakuetu, atukumiina kuikadika na muulo ku meeso kua Yehowa, mpaa na kua bakuetu bena Kidishitu. Ino mianda ayilondo, ngilombene nkukuasha bua kuibikita.

10. Nkonko kinyi yatudi balombene kuiyela?

¹⁰ Taluula binangu biobe. Eyele nkonko bu ino: ‘Nakumiinaa namu kutuusha nsaa yande na bukome buande bua kukuasha bangi? Bu kileshesho, ne kukita naminyi su banteka bua nkakisha nsaa pamune na bakuetu batabadi banunu, sunga bua kutuala mukuetu mukashi taadi mununu ku bisangilo? Nankumiinaa kutuuka lubilo pakudi lukalo na bantu bua nkasuula ku nshibo ya kikongeeno sunga ya Bufumu su?’ Nsaa y’atuilambulaa atue banabene kui Yehowa​—atumulaa’shi atukumiina kufubisha bintu bietu bioso bua kumufubila​—na kukuasha bangi. Su tuamona’shi kui ingi mianda ayitungu’shi tulumbuule, nkinyi kiatudi balombene kukita?

11. Luteko ndulombene kuitukuasha mushindo kinyi bua kukimba kinangu kia kuipaana?

¹¹ Teka Yehowa n’eshimba diobe dioso. Tupuandikishe’shi, bommono’shi abikutungu kulumbuula ku muanda kampanda, anka, ta kui namu kiinyi kia nkusukuma bua kuibikita. Mu muanda wi bino, ealuule kui Yehowa omutekie n’eshimba diobe dioso. Omuleshe lualua lukalakashi pa butooka. Lungula Yehowa biopusha na omutekie bua’shi, akupe “lukalo na bukome bua kuibikita.”​—Fid. 2:13, NWT.

12. Bakuetu bakinga bapue kubatshishibua, mbalombene kulombasha lukalo kinyi?

¹² Su we mukuetu mukinga mupue kutambula, teka Yehowa buadia nkukuasha bua’shi opete lukalo, lua kukuasha bakuetu balume na bakashi mu kakongie kenu ngofu. Mu bingi bibundi, mui bakulu be bungi kukila bafubi ba midimo. Na ku bano bafubi ba midimo, be bungi babaapu kukula, bangi tabadi bakulu ngofu. Bu bikuete kunyisha kutama ndumbuluilo a Yehowa, tui na lukalo na bakuetu bansongua ngofu buabadia kuitukuasha, mu kulama kua muilo wa Yehowa. Su okumiina nkafuba mbalo yoso yaya yabadi noobe lukalo, okekala na muloo. Buakinyi? Kumuanda, okasankisha Yehowa, okekala dingi na nkumo i buwa, na okekadika na muloo autukila mu kukuashanga bangi.

13-14. Mmatabula kinyi atudi balombene kuela bua kukuasha bakuetu balume na bakashi? (Tala kifuatulo kia ku kipusu.)

¹³ Ikala obekieela bua kutundula nsaa i muntu kampanda na lukalo lua bukuashi. Mpoolo mutumibua, baalunguile bena Kidishitu ba mu Yuuda’shi: “Anka tanwilwankananga kukitshiina kwa bantu kalolo, na bwa kukwasha [bantu] na bintu bienu, mwanda Efile Mukulu asangala na bitapilo bi biabia.” (Eb. 13:16, Kilombeeno Kipya 2014) Dino dibaadi elango di buwa bukile! Mu kapindi kapeela kunyima ku’abo kupeta uno mukanda, bena Kidishitu ba mu Yuuda babaadi bakatukie ku mashibo aabo, midimo yabo ya busunga, mpaa na bakuabo bashi bena kukumiina baabanga ‘kusuukila mu miengye.’ (Mat. 24:16, Kilombeeno Kipya 2014) Mu aa mafuku, ta babaadi na mpaka ya’shi abibatekie kuikuashena nya. Su kumpala babaabangile kutumikila elango dia Mpoolo dia kuikuashenanga, babaadi balombene kusangana’shi  mbibofule buabadia kuiwubidishena na nshalelo mupia.

¹⁴ Pangi, bakuetu balume na bakashi nta mbalombene kuitulungulanga efuku dioso’shi, be mu lukalo na bukuashi nya. Bu kileshesho, mukuetu mukashi e kufua, aleka mulume aaye mu maalo. Mukuetu mulume, te na lukalo na bukuashi bua bia kudia, kumutuala mbalo kampanda, sunga kumukitshiina ingi midimo ya mu nshibo su? Pangi, e kupela kuteka bukuashi ku muanda’shi, amono bu etukalakasha. Anka, e kuikadika na lutumbu lukata, su tuata mpango ya kumupa kiadi nakio lukalo, na kumukuashanga nsaa yoso. Tatupuandikishanga’shi, tui kukuasha muntu kampanda, nka nsaa y’etutekie bukuashi bua kiadi nakio lukalo nya. Eyipushe’shi, ‘su nnami e mu uno muanda wi bino, ne kuikadika na lutumbu lua bukuashi kinyi buampete?’

15. Nkinyi akitungu’shi tukite su atukumiina kukuasha bangi?

¹⁵ Ikala muntu abadia kuteka bukuashi kui bangi. Kushi mpaka, owuku bakuetu balume na bakashi mu kakongie keenu, abekalaa kuanka bua kukuasha bangi nsaa yoso. T’abamuekaa bu atue abebakalakasha nya. Atuuku’shi, tui balombene kuibakulupila, nsaa yatudi na lukalo na bukuashi na atukumiina kuikala nka bu’bo. Ungi mukulu abetanyinaa bu Alan, e na bipua 45, mmukumiine kuikadika bu muntu abadia kuteka bukuashi. P’anangushenaa ku kileshesho kia Yesu, amba’shi: “Yesu, baadi na mianda ibungi ya kukita, anka bantu booso bakulu na bakinga, babaadi bamufule ngofu na ta babaadi na moo wa kumuteka bukuashi. Babaadi abamumono bu muntu ebapasukilaa binyibinyi. Nakumiina n’eshimba diande dioso kuambula kinangu kia Yesu, na kuwukibua bu muntu abadia kutekanga bukuashi, afulu namu bangi, na kupasukila namu’nyi bangi.”

16. Mukanda wa Misambo 119:59, 60 wi kuitukuasha naminyi p’atuiwutumikila bua kulonda kileshesho kia Yesu kalolo?

 ¹⁶ T’abitungu’shi tutshoobolokie su t’atuambula Yesu mu mushindo upuidikie nya. (Shak. 3:2) Muina kalasa, nta mmulombene kuambula mulongieshi aaye, mu mushindo upuidikie nya. Anka, bu bi muina kalasa alongo ku bilubilo biaye na p’ekitshisha bua kuambula kileshesho kia mulongieshi aaye, ngi pamono mushindo wadia kuididiila kumpala. Bi mumune, su tuatumikila mianda y’atupete mu kuilongiela kuetu kua Bible, tuakita muetu mooso buatudia kulumbuula mianda i bubi y’atumono, tui balombene koobesha kulonda kileshesho kia Yesu kiadi muitulekiele.​—Badika Misambo 119:59, 60.

17-18. Mmiabi kinyi yatudi balombene kupeta su tuambula binangu bia kuipaana bia Yesu?

¹⁷ Kinangu kietu kia kuipaana, nkilombene kuambukila namu bangi. Ungi mukulu aabetanyinaa bu Tim, amba’shi: “Tui na bakuetu bakinga balume bende kumpala mu mianda ya mu kikudi, na tui bebasangule bu bafubi ba midimo mu kakongie​—bangi ba kuabadi, mbakinga ngofu​—be mu uno mudimo, muanda’shi mbambule kinangu kia kufubila bangi, kibaabadi abamono namu mui bangi. Kuipaana kuabo, nkukuashe kakongie ketu na bakuete kukuatshishena bakulu ngofu.”

¹⁸ Tui bashaale mu nsenga, mui bantu abakumiina nka penda kuikimbila buwa buabo’bo banabene. Anka, ta bi biabia munkatshi mua muilo wa Yehowa. Kinangu kia Yesu kia kuipaana kibetukumu ngofu, na tui na kitshibilo kia kulonda kileshesho kiaye. Ta tui balombene kulonda matabula aaye mu mushindo upuidikie nya, anka tui ‘kulonda matabula aaye na lulamato looso.’ (1 Mp. 2:21) Bu bi’atuikitshisha bua kuambula kinangu kia Yesu kia kuipaana, atuikala na muloo muanda atusankisha Yehowa.