Ne mutandikue mu 1941, mu kifuko kibaadi na nshalelo mutshintshikile mu Paris, Kapitale ka France. Naadi mukumiine kulonga ngofu, kadi banda kunangushena kutshooboloka kunaadi nako panaadi na bipua ekumi. Nakumbile kikoolo kia mfuenkie na ami nkuimika kulonga ku kalasa! Ba Doktere babandunguile buandia kushaala nka ku lusala buashi tala nakookiesha eshimba. Ngi kibaadi kikite biashi, munda mua mieshi i bungi, naadi nakisha nsaa mu kubadika diksionere na mu kuteemesha miisambo ya ku kisaashi kia Radio Sorbonne i baabadi abeele ku Universite a mu Paris. Pa baadi Doktere mundungule’shi nampu kupanda na ne kualukiila ku kalasa, napushiishe muloo ukile. Nambile’shi, ‘biabakuete kukita kui ba Doktere bi buwa bukile!’ Kubanga nka paapa, naadi mukumiine kupaasha bantu ku maladi aabo. Pa baadi nshami angipusha kianankite mu nshalelo ande, naadi namualuula nka’shi, “Nankumiina kuikala bu Doktere.” Bino ngi bibaadi biikashe mudimo wa bu Doktere, bu lukalo luande lua ku bukinga.

Kifuko kiande, ki baadi kia bena Katolike. Mu binangu biande, ntshinaadi nauuku bi bungi pabitale Efule Mukulu nya, na naadi na nkonko i bungi ishi baadi na ngaluulo. Bibaadi nka penda kunyima ku’ami kulonga bu Doktere, ngi kunaadi mushinkamishe’shi muwa ubaadi upangibue.

Natentekiesha musuusa wande wa kumpala unaadi mubandile cellule a tulipe ku microscope. Naadi mukaanye ngofu p’ami kumona bibaadi abikitshi, bintu bia cellule pakudi mashika na pakudi kibobo. Naadi dingi mumone bibaadi abikitshi cytoplasme (nkintu ki munda mua cellule) p’afiki mu kutuela mui mungua etshibuula na anyiisha kutama p’atuele  mu meema ashi mungua. Kuno kushintulukashintuluka, na kungi kushintuluka kuibungi bukile akukitshikaa, mbua’shi mbidi i ubidishene na nshalelo ayidi nayo. Pa naadi mumone bi kufuba kua ooso cellule, naadi mushinkamishe’shi, muwa ta nguitukile nya ngupangibue.

Pa naadi mu kipua kiande kia kabidi kia kulonga kua bu Doktere, naadi mumone bishinkamiisho bi bungi bia’shi Efile Mukulu e kudi. Mu kulonga kua anatomi, tu baadi balongie mbidi ya muntu, tuamona abikitaa mboko bua’shi minue i anye na kuioola. Mushindo wi mishila ngilungie biningua, na bi’abifubu bioso pamune kalolo. Bu kileshesho, ne mulongie’shi mishila ya ku mboko ikakuate na ku minue, ngitshibuule pabidi, umune wende wakakuata na ku nsongo kua minue wi buseene na ungi namu wi mbalo imune. Tuntu tui bukopo, ntukuate dingi ku nsongo kua mifufua ya minue bua kuiyilunga pamune. Su minue yetu ya ku maasa ta ngikitshibue mu uno mushindo, abimueka patooka’shi, taibadia kuikala ayifubu kalolo nya. Ne mushinkamishe kalolo’shi, muntu mukite mbidi ya muntu e na binangu bikile.

Naadi mukaanye ngofu pabitale mudimo wa mupangi, nsaa inandi mulongie abibangaa muana munda kuyuka bua’shi kunyima atandikue. Ne mulongie’shi kumpala kua’shi muana atandikue, na mbidi bukome i buwa, akakaa lupapi lua oxygène Kui nyinaye kukiila ku musuku. Paapa, mashinda a lupapi e bu tufuko muishimba, taabandile kuula lupapi. Mafuku a kutandikua paende na kulombana, tuatua tufuko tua lupapi tui muishimba atuitatshilaa tuntu tu’abetanyinaa bu surfactant. Dingi, kunyima kua kutandikua, kui mianda ya kukaanya ayikitshikaa pa kuyuka kua kumpala kua muana batandikua. Kui muasa autukaa muishimba dia muana bua’shi, ukunkushe mase kuishimba dia kuyuka dia muana. Yaya nsaa, tuatua tu surfactant atukuasha bua’shi, aa mashinda a kuyuka, taashikanga ekuateena ao anabene nya, eabuule bua kushikuka musango nka umune, na kutuela lupapi lubilolubilo. Paapa, ngi apamono muana bia kuyuka kalolo aye nabene.

Naadi nakumiina kuiwuka winyi mupangi a bino bintu bi buno buwa bui bino, biabia, nabangile kuata kubadika kua Bible na muulo. Naadi mukumiibue kuishimba ngofu na miya ya mankenda ibaadi Efile Mukulu mukite nayo kilombeno na muilo wa Isaleele, takudi kupue kukila bipua bikile pa 3 000. Efile Mukulu baadi mulungule bena Isaleele, buabadia kushiikanga butshiafu buabo, kuitumpanga meema nsaa yoso, na kukatusha muntu amueka bu e na maladi a luambu pe bantu. (Lv. 13:50; 15:11; Miy. 23:13) Bible tabapuile kulesha bia kupela kupalakasha maladi a luambu, kumpala kua’shi bena siyanse bafikie mu kuibiuka. Na nauukile dingi’shi, muiya wa mankenda utale kusangisha kua mbindi kua mulume na mukashi, ubaadi aukuasha bua kukaluila muilo ku maladi a luambu. (Lv. 12:1-6; 15:16-24) Mfudiilo a bioso, ne mumone’shi, mupangi baadi mupe bena Isaleele miya bua buwa buabo, na baadi elela baaba babaadi abakookiela ku yaya miya miabi. Dingi, naadi mushinkamishe’shi, Bible mmuyokielue n’Efile Mukulu​—ntshi naadi mubande kuiuka eshina di’Efile Mukulu aa mafuku nya.

Pa naadi nalongo bua kuikadika bu Doktere, ngi panaadi mufumankane na ungi nsonguakashi aabetanyina bu Lydie, ami nkumufula. Tubaadi beyibakishene mu kipua kia 1965 panandi nki munkatshi mua kulonga. Mu kipua kia 1971, ami na Lydie tubaadi na bana basatu ba ku bana betu basamombo. Lydie baadi ankuasha ngofu, bu binaadi na mudimo wa bu Doktere, mpaa na wa mu kifuko kietu.

 Naadi mufube ku lupitaalo munda mua bipua bisatu kumpala kua’shi, ntuule luande lupitaalo. Kunyima kua kapindi kapeela, bangi bena dibaka, bena maladi babidi bakumpala batudi bateemune kunundu, babaafikile mu kuibukisha. Naadi nakiebe kufunda manga a kubuka nao mulume pabaadi mukashi muntekie’shi: “Bua lusa, Doktere, tuelanga mase mu buanga.” Na kukaanya kooso, nayipuishe’shi: “Binyibinyi? Buakinyi?” Mukashi bangaluluile’shi: “Tui ba Temue ba Yehowa.” Ntshi nandi mubande kupusha pabitale ba Temue ba Yehowa, sunga bi mmueneno aabo pabitale mase nya. Yawa mukashi baatushiishe Bible na andesha bifundue abilesha buakinyi mbaate kitshibilo kia kupela kuedibua mase. (Bik. 15:28, 29) Dingi, aye na mulume aaye, mbandeshe akikalombasha Bufumu bu’Efile Mukulu; abukakatusha makienga, mikumbo, na lufu. (Kibaf. 21:3, 4) Nka paapa, naadi muibalungule’shi: “Nukuete kundungula kulombana kua kinandi nakio lukalo kubanga ku bukinga!” Ami, “ne mulongie bu Doktere kudila kua kupeelesha makienga.” Naadi na muloo ukata bu bibaatudi besambe, munda mua nsaa mushima na kipindi. Pabaakatukile bena dibaka, ntshinandi nakumiina’nyi kuikadika muina Katolike nya, na Mupangi andi mukumiine e n’eshina bu​—Yehowa!

Naadi muimoneene na bena dibaka ba Temue ba Yehowa misuusa isatu ku lupitaalo luande, na tubesambanga musuusa ooso kipindi kikile nsaa mushima. Naadi muibetanyine ku nshibo bua’shi tumone bia nkesamba bibungi pabitale Bible. Biabia, sunga mbibaadi Lydie muisangie kuatudi mu kulonga kua Bible, ta baadi mukumiine’shi lulanguilo lua Katolike lubaadi aluitulongiesha mianda ibi nya. Bua bino, naadi muitanyine Mumpeele curé ku nshibo. Tubaadi besambile malongiesha a mu kipuilo ngofu mpaa na bibaadi biile bufuku, tuafubishanga nka penda Bible. Kuno kuisamba kuetu, ngi kubaadi kushinkamiishe Lydie’shi ba Temue ba Yehowa abetulongieshaa bia binyibinyi. Kunyima, kifulo kietu bua Yehowa Efile Mukulu kibaatamine ngofu, atue booso tubaadi babatshibibue mu kipua kia 1974.

Mianda inalongiele pabitale mpango y’Efile Mukulu bua bantu, ibaadi na bukitshishi mu nshalelo ande. Ami na Lydie, kufubila kua Yehowa kubaadi kufikie kintu kia kumpala mu nshalelo eetu. Tubaadi baate kitshibilo kia kukusha bana betu muyile mayi a kulonda a mu Bible. Tui balongieshe bana betu bia kufula Efile Mukulu na bantu, na biobino mbinyingishe kifuko kietu.​—Mat. 22:37-39.

P’atutala ku mungo, ami na Lydie, atusepaa pabitale mushindo ubaadi aumono bana betu, buumune buetu bua bu ba nambutuile. Babaadi abauuku’shi, eyi dia kulonda dia Yesu adiamba’shi, “eyi dienu dia’shi ‘Oolo’ diikale nka’shi Oolo, eyi dienu dia’shi ‘nya,’ diikale nka nya,” dibaadi mmuiya mu nshibo muetu. (Mat. 5:37, NWT) Bu kileshesho, pabaadi muana eetu mukashi na bipua 17, Lydie baadi mumutoshe  buadia kutukanga na kisaka kia bansongua naye. Umune a mu kisaka kia bansongua, baalunguile muana eetu mukashi’shi, “su nyinobe t’akumiina tuenda nobe, teka nshobe!” Anka, muana eetu baamualuluile’shi: “Ta kui akialuluka. Booso benka muiyi dimune.” Eyendo, bana betu basamombo mbamone’shi, tui mu buumune mu kutumikila kua mayi a kulonda a mu Bible. Tui na lutumbu lukata bua Yehowa, muanda lelo uno, be bungi ba mu kifuko kietu, bakuete kumufubila.

Sunga bia binyibinyi mbishintule mueneno ande, naadi mukumiine kufubisha kiakia kiandi mulongie bu Doktere, bua kukuasha muilo w’Efile Mukulu. Kunyima, naadi muitukile bua nkafuba bu Doktere ku Betele a mu Paris, akupu’nyi, naadi muende ku ungi Betele mupia a mu Louviers. Naadi mukite nyendo ya kuenda na kualukanga ku mudimo wande na wa Betele, kintu kia bipua 50. Mu kino kipungo, naadi mupete ba kuuku ba binyibinyi mu kifuko kia Betele, na bangi ba kuabadi, tabadi binobino na bipua bikile pa 90. Dingi, naadi na muloo ukile, na kukaanya kukata dingi efuku dibaabadi bantume, ngi dinaadi mukafumankane na ungi muina Betele mupia. Anandi mukuashe buadia kutanda, kupue kukila kintu kia bipua 20!

Pa baadi bipua abiende na kukila, kifulo kiande bua Yehowa kibaadi akinyiisha kutama, nsaa i naadi natala mushindo ubaadi Yehowa, akunkusha na kulama muilo waye kukiila kui ndumbuluilo aaye. Ku mbangilo kua kipua kia 1980, Kasaka ka Bakunkushi-Bakulu, kabaadi katuushe mpango ya’shi, kuikadikie kuipushena pankatshi pa ba Temue ba Yehowa na bakata ba ba munganga mu États-Unis.

Dingi, mu kipua kia 1988, Kasaka ka Bakunkushi-Bakulu, kabaadi katuushe ungi departema mupia, aabetanyina bu Departema a kuisamba na ba munganga. Bua kubanga, uno departema abamutalaa kui Komite a kuisamba na ba munganga (CLH) uno Departema mmukitshibue mu États-Unis, bua kukuasha ba Temue ba Yehowa be na maladi, bua’shi bapete ba munganga abakumiina kuibabuka muyile biabia bi’abakumiina kushi kuibeela mase. Pa baadi ino mpango ipalakane mu nsenga ishima, Komite a CLH baadi mutudibue mu France. Bibaadi binkaanyishe ngofu pa kumona bi ndumbuluilo a Yehowa, apasukila na kifulo kioso bakuetu balume na bakashi be na maladi, na kuibakuatshishena mu kipungo kiabadi na lukalo na bukuashi!

Naadi mufule mudimo wa bu Doktere kumpala ngofu. Anka, panandi nataluula mueneno ande, naadi mumone’shi kupaasha kui na muulo ukata, nyi nkua mu kikudi​—abitungu kukuasha bantu buabadia kuikala mu kuipushena na Yehowa Efile Mukulu, muikadikie nsulo ya muwa. Kunyima kua kuleka kufuba mu mudimo wande wa bu Doktere, ami na Lydie atukisheyaa nsaa ibungi mueshi ooso, mu kulungula kua mukandu wi buwa wa Bufumu bu’Efile Mukulu, bu ba mbala-mashinda ba mieshi yoso. Tukiatutungunukaa nka na kufuba mu uno mudimo wa kupaasha miuwa.

Nkuete kutungunuka nka na kutuusha bukuashi bua kapindi kapeela, kui baasha maladi abakumbu. Na ne mumone’shi, sunga Doktere ekadika na kiukilo ki naminyi, te bia kupaasha maladi ooso, na te bia kuimika lufu nya. Ngi buakinyi, nkuete kutengiela na kinsukunsuku kioso, kipungo kish’akikekala’nyi mitanyo, maladi sunga lufu. Bu bikuete kunyiisha kuifubuila nsenga ipia, muwa wa ikalayika wi kumpala kuande, muamua ngi muankalongo bi bungi pabitale bipangua bi’Efile Mukulu, mpaa na kipaso ki buwa kiadi mukite mbidi ya muntu. Mu binyibinyi, kiakia kinandi mukumiine kubanga ku bukinga, ta nkilombane kioso nya. Anka ne mushinkamishe’shi, mianda ibungi i buwa i ki kumpala!