1-2. Nkinyi kilombene kukuasha bua’shi lulanguilo luetu belukumine kui Efile Mukulu?

 NSAA yopusha kishima “lulanguilo” onangushena ku kinyi? Pangi onangushena mukuetu mukuname kuete kuteka esamba na Yehowa kumpala kuadia kulala. Pangi onangushena dingi kifuko ki na muloo kipaane mu kubadika kua Bible.

² Mu ino mianda yoso ibidi, bakuete abakitshi lulanguilo. Yehowa namu akumiinaa luno lulanguilo luabo su? Akumiina su lulanguilo luabo nduipushene na kikiebe kieshimba diaye, na dingi su abamulanguila na kifulo na kanemo. Tuibafule Yehowa ngofu. Atuuku’shi mulombene kulanguilua, na atukumina’shi kia buuntu kietu kia lulanguilo kikale ki buwa.

3. Nkinyi kiatukataluula mu uno muisambo?

³ Mu uno muisambo, atukataluula mishindo ya lulanguilo lubabadi bakumiine kala kui Yehowa na atukataluula dingi mishindo muanda ayikumiina Yehowa’shi tu mulanguile lelo uno. Nsaa yatutaluula uno muisambo muntu na muntu oso anangushene pabitale mushindo wadi mulombene kulumbuula lulanguilo luaye bu’Efile Mukulu. Atukataluula dingi buakinyi kulanguila Yehowa mu mushindo wi buwa akuituikasha na muloo.

4. Mushindo kinyi ubadi balanguidi ba Yehowa ba kala kumpala kua bino bipungo bietu, baleshe kanemo na kifulo kiabo bua Yehowa?

⁴ Mu mafuku a kala kumpala kua bipungo bietu, bafubi basha lulamato bu Abele, Nowa, Abrahame, na Yoobo babalesheshe kanemo na kifulo bua Yehowa. Mushindo kinyi? Pakumukokiela,  kulesha lukumiino luabo muandi, na pakuipaana kuadi. Bible tamutushe mianda yoso pabitale kibabadi balombene kukita mu lulanguilo luabo nya. Anka abimueka pabutooka’shi babadi bekitshishe bua kutumbisha Yehowa bua’shi lulanguilo luabo lukuminyibue naye. Kunyima Yehowa badi mupe bena Isaleele miya kukiila kui Moyise. Mu yaya miya mubadi mianda ya kulonda pabitale mushindo ya kulanguila Yehowa mu mushindo wadi mukumiine.

5. Nkushintuluka kinyi kubadi kukitshikie mu lulanguilo lua binyibinyi kunyima kua Yesu kufua na kusanguka?

⁵ Kunyima kua Yesu kufua na kusanguka, Yehowa tamutekie dingi balanguidi baye buabadia kunemeka muiya ya Moyise nya. (Lom. 10:4) Bena Kidishitu babadi balombene kulonda muiya upia “mwiiya wa Kidishitu.” (Nga. 6:2, Kilombeene Kipya 2014) Babadi balombene kukokiela “muiya” kushi penda kuiulamina mu binangu sunga kulama mulongo wa miya yabadi balombene kukokiela na yabashi balombene kukokiela, anka babadi balombene kuambula Kidishitu na kulonda malongiesha aye. Na lelo uno dingi bena Kidishitu bakuete kukita muabo moso bua kulonda Kidishitu bua’shi basankishe Yehowa na bua’shi “bapete kikiisho.”​—Mat. 11:29.

6. Mushindo kinyi ulombene kuitukuasha uno muisambo?

⁶ Nsaa yoso yatutaluula kipindi kioso kia lulanguilo luetu tuiyipushe’shi, ‘Mu muanda kinyi muankuete kuenda kumpala?’ We kuiyipusha dingi’shi, ‘Ne mulombene kulumbula dingi mushindo wande wa kulanguila su?’ We kuikala na muloo bua biokuete kukita binobino, anka we mulombene kuteka Yehowa bua’shi akukuashe omone biodia kulumbuula ingi mianda.

7. Yehowa amonaa nteko yetu ayitukila muishimba naminyi?

⁷ Atulanguila Yehowa nsaa yatumutekie. Bible apuandikisha nteko yetu na musengo wa kabanda wabadi balumbule kalolo, ubabadi abalambula mu tabernakle na kunyima abeulambula mu ntempelo. (Mis. 141:2) Uno musengo wa kabanda ubadi autusha mapenbue e buwa abadi aasangasha Efile Mukulu. Mu mushindo umune, nteko yetu ayitukila kuishimba “ayimusankisha” su tubafubisha bishima bipelepele. (Nki. 15:8; Miy. 33:10) Tuina kabingilo ke buwa ka kukumiina’shi bikuete kukuma eshimba dia Yehowa nsaa yatumulesha bi kifulo kietu na lutumbu luetu kuadi. Akumiina’shi tumulungule mianda yetu yoso, lukulupilo luetu, mpa na nkalo yetu. Kumpala kuatudia kuela nteko yetu kui Yehowa, buakinyi takui balombene kushala tuanangushena kalolo pabitale mianda yatukamulungula? Nsaa yokitshi biabia opete mushindo wa kulambula “musengo wa kabanda” wi mapembue e buwa kui Nshobe a muiyilu.

8. Mushindo kinyi wi buwa watudi nao wa kutumbisha Yehowa?

⁸ Atulanguila Yehowa nsaa yatumutumbisha. (Mis. 34:1) Atutumbisha Yehowa nsaa yatuakula pabitale ngikashi yaye na mifubo yaye ya kukanya. Atukekala na mianda i bungi i buwa ya kuakula su tuina lutumbu kuadi. Patuata nsaa i bungi yakunangushena bibuwa bua Yehowa​—na bua bintu bioso biadi muitukitshine​—atuikala na tubingilo tui bungi tua kumutumbisha. Mu mudimo wa kulungula mukandu wibuwa awitupa mushindo wipabuao wa ‘kulambula Efile Mukulu milambu ayimusangasha kuamba’shi kikuba kia milomo yetu.’ (Eb. 13:15, Esambi Dipya 2015) Anka bubiatudi balombene kunangushena kumpala kua kuenda mu kuteka Yehowa mu luteko. Nyi biatudi balombene kunangushena kalolo pabitale mushindo watukalungula bantu boso batufumankana nabo mu mudimo wetu wa bulungudi. Atukumiina’shi “milambu yetu” ikale i buwa buayidia kusankisha Efile Mukulu. Nyi buakinyi atuakula na muloo wetu oso nsaa yatulungula bangi mukandu wibuwa.

9. Nka bu bena Isaleele ba kala, miabi kinyi yatupete nsaa yatutuele mu bisangilo pamune? Tuusha kileshesho kia mushindo aukukuasha bisangilo.

 ⁹ Atutumbisha Yehowa nsaa yatutuele mu bisangilo. Mu mafuku a kala Yehowa balunguile bena Isaleele’shi: ‘Misusa isatu ku kipwa bantu booso bekale abende kumpala kua Yehowa Efile Mukulu oobe ku mbalo yekala musangule.’ (Miy. 16:16) Abitungu balekie mashibo abo na mafuba abo kushi muntu ealama. Anka Yehowa badi muibale’shi: “Muntu tayikala na meeso pa nsenga yobe nguba ofiki bwa kumona lukyebo lwa Yehowa Efile Mukulu oobe.” (Efi. 34:24) Bena Isaleele boso babadi batule lukulupilo luabo loso mui Yehowa na babadi abamutshinyi babatuelele mu uno musangelo wa ku kipua na dingi babadi papete miabi mu mishindo i bungi. Bu kileshesho, babalongiele bi bungi pabitale miya y’Efile Mukulu, banangushena mushindo wi buwa bua Yehowa kuabadi, babadi basangele kushala pamune na balanguidi naabo bua kuinyingishena. (Miy. 16:15) Babapetele miabi i mumune na yatupetaa patuisumina ingi miloo bua kutuela mu bisangilo bia bena Kidishitu. Banda kunangushena mushindo aupusha Yehowa muloo nsaa yuelumbula bua nkatusha ngaluulo ayikuasha mu bisangilo.

10. Buakinyi kuyimba nkipindi kina muulo ukata mu lulanguilo luetu?

¹⁰ Atulanguila Yehowa nsaa yatuyimbi pamune na bakuetu balume na bakashi. (Mis. 28:7) Bena Isaleele babadi abata kuyimba na muulo ukata bu kipindi kia lulanguilo luabo. Mfumu Davide badi mupe bena Levi 288 mudimo wa bu batuyimba ku ntempelo. (1 Mya. 25:1, 6-8) Lelo uno, tui balombene kulesha’shi kui bafule Efile Mukulu nsaa yatuyimbi ngono yakumutumbisha. Mushindo wikale eyi dietu ta wina muulo ukata nya. Tubande kutala kino kileshesho: Nsaa yatuakula “atukokolaa atwe booso mu bipaso bi bungi,” anka bino tambilombene kuitukutshishua kuakula mu bisangilo sunga mu bulungudi nya. (Shak. 3:2, Kilombeeno kipya 2014) Mu mushindo umune, abitungu tutungunukie na kuyimba bua kutumbisha Yehowa sunga tua nangushena’shi tatukuete kuyimba kalolo.

11. Nka bu abilesha Misambo 48:13, buakinyi abitungu tuiatshile nsaa ya kubadika Bible mu kifuko?

¹¹ Atulanguila Yehowa nsaa yatuibadikila Eyi diaye na kulongiesha bana betu pabimutale. Sabaato ibadi ayipa bena Isaleele mushindo bua badia kutuula midimo yabo ya kuifuku n’efuku ku lupese buabadia kutula binangu biabo ku kipuano kiabo na Yehowa. (Efi. 31:16, 17) Balanguidi ba Yehowa babadi mukantshi muabo babadi abalongiesha bana baabo pabitale Yehowa na biadi na kalolo. Lelo uno, n’atue namu tui balombene kuata nsaa yakuilongiela na kubadika Eyi di’Efile Mukulu. Kino nyi kipindi kia lulanguilo luetu bua Yehowa, na akitukuasha buatudia kuifubuila peepi naye. (Mis. 73:28) Na dingi patuibadikila Bible mu kifuko, tui balombene kukuasha kino kipungo kipia kia bana betu bakuete kukula​—buabadia kutamisha kipuano kiabo kibuwa na Nshetu sha kifulo e muiyilu.​—Badika Misambo 48:13.

12. Nkinyi kia tulongiela ku mushindo ubadi Yehowa mumone mudimo wa bano boso babapuile bintu bia ku tabernakle?

¹² Atulanguila Yehowa nsaa yatukuatshishena luibako na kulumbula mashibo a Bufumu. Bible akula’shi mudimo wa kuibaka ntempelo na bintu bia muanka ubadi “mudimo wa mbalo iselele.” (Efi. 36:1, 4) Na dingi lelo uno nyi, Yehowa kuete kumona mudimo wa luibako lua mashibo a Bufumu na ingi midimo ya Teokrasi bu mudimo wa kishila. Bangi bakuetu balume na bakashi bakuete kukisha nsaa yabo i bungi bua kuipana mu ino midimo. Tatui balombene kuikala namu na lutumbu bua mushindo wabakuatshishena midimo ya Bufumu su? Sunga mbiabia, bakuete kuipana dingi mu mudimo wa kulungula mukandu wibuwa. Bangi abakumiina mpa na kuikala ba mbala-mashinda ba mieshi yoso. Bakulu mu kakongie mbalombene  kulesha’shi abakuatshishena uno mudimo wa luibako, su tabetutuusha bua kutula bano bakuetu balume na bakashi abafubu ngofu bu ba mbala-mashinda ba mieshi yoso su mbalombashe ngikashi itekibue. Sunga tuekala’shi tui na kapatupatu mu mudimo wa luibako, sunga’shi tatuinako tui balombene kukuatshishena kulumbula kua mashibo a Bufumu, na kulama mbalo yetu ya lulanguilo ishale selele.

13. Mushindo kinyi watudi balombene kumona bia buuntu biatutusha bua kukuatshishena mudimo ya Bufumu?

¹³ Atulanguila Yehowa nsaa yatutusha bia buuntu bietu bua kukuatshishena mudimo ya Bufumu. Bena Isaleele babadi abatuadila Yehowa bia buuntu biabo nsaa yabende mu kutuela ku musangeelo wa ku kipua. (Miy. 16:16) Muntu oso babadi abatuala bia buuntu muyile nshalelo aaye, p’abo kukita bino babadi abalesha’shi bena lutumbu bua mpango yoso ya mianda ya mu kikudi yabadi bebakitshine kui Yehowa. Tui kulesha kifulo kietu na lutumbu luetu bua Yehowa bua bintu bioso bia mu kikudi biakuete kuitupa mushindo kinyi? Umune wa ku mishindo, nyi nkutusha bia buuntu bietu bua kukuatshina kakongie na mudimo wa mu nsenga ishima muyile kumona kuetu. Mpoolo mutumibua bakuile bino pabitale uno muanda: “Mwanda su kusasakeeta kupaana kwi kudi, kwi buwa muyiile kiakia kii na muntu, kushii muyiile kiakia kiashii nakio.” (2 Kod. 8:4, 12, Kilombeeno Kipya 2014) Yehowa ena muloo pabitale biatudi balombene kutuusha n’eshimba dietu dioso sunga biekala bipela.​—Mak. 12:42-44; 2 Kod. 9:7.

14. Muyile Nkindji 19:17, Yehowa amona bukuashi buatupa bakuetu bena lukalo na bukuashi mushindo kinyi?

¹⁴ Atulanguila Yehowa nsaa yatukuasha bena Kidishitu netu bena lukalo na bukuashi. Yehowa badi mulee bena Isaleele boso babadi abalesha kalolo pa kukuasha balanda’shi ebapa efuto. (Miy. 15:7, 10) Eyendo’shi, nsaa yoso yatukuasha balanguidi netu bena lukalo na bukuashi, Yehowa kuete kumona’shi naye atukuete kupa biabia bia buuntu. (Badika Nkindji 19:17.) Bu kileshesho, nsaa ibadi bena Kidishitu ba mu Fidipe batumine Mpoolo bia buuntu mu lukano, badi muibitanyine’shi, “mulambu ukuminyibwe ulumbulukye kwi Efile Mukulu.” (Fid. 4:18, Esambi Dipya 2015) Abitungu onangushene pabitale bakuenu balume na bakashi be mu kakongie, na weyipushe’shi, ‘Kui muntu namu ena lukalo na bukuashi?’ Yehowa asankaa ngofu nsaa yetumono atufubisha nsaa yetu, bukome buetu, kiukilo kietu, na bintu bia ku mbidi bua kukuasha baba boso bena lukalo na bukuashi. Amono biabia bu kipindi kia lulanguilo luetu.​—Shak. 1:27.

15. Kulanguila Yehowa akutekie nsaa na kuikitshisha, kadi buakinyi tabi bukopo?

¹⁵ Kulanguila Yehowa akuitutekie nsaa na kuikitshisha. Anka tabibukopo nya. (1 Yo. 5:3) Buakinyi tabi bukopo? Atumulanguilaa pa muanda wa kifulo kiatudi naye. Banda kupuandikisha muana mukinga akiebe kupa nshaye kintu kampanda. Akisha nsaa i bungi bua kusola kifuanyi kiadia kumupa, tamulombene kuitopeka bua nsaa bungi ibakitshi nya. Muanda mufule nshaye na ena muloo wakumupa kiakia kia buuntu. Mu mushindo umune, natue namu bu biatudi bafule Yehowa tuina muloo wakufubisha nsaa yetu na bukome buetu bua kumulanguila.

16. Muyile Bena-Ebelu 6:10, mushindo kinyi aumona Yehowa kuikitshisha kuetu kua pa bupenka bua kumusankisha?

¹⁶ Baledi basha kifulo tabatengiela’shi muana oso aku bana babo, atushe nka kiabuuntu ki mumune nya. Mbaukie’shi muana oso muilekene na bangi na ena nshalelo ilekene na ya bangi. Mu mushindo umune, Nshetu a muiyilu aukaa bi nshalelo a muntu pa bupenka. Pangi we mulombene kukita bi bungi kukila be bungi bouku na bodi mufule. Sunga’shi tuena ngobesha ya kukita bi bungi bu bangi bantu, pangi pa  muanda wa bununu, mikumbo, na mashito a mu kifuko. Totshobolokanga. (Nga. 6:4) Yehowa tanalube mudimo obe odi mukite. Su buekitshisha Muyile ngobesha yobe na kuibikita na kinangu ki buwa okamusakisha. (Badika Bena-Ebelu 6:10.) Yehowa amono mianda i kuishimba diobe yokumiina kukita. Akumiina’shi wekale na muloo pabitale kiakia kiodi na ngobesha ya kukita bua kumulanguila.

17. (a) Su tuasangana’shi bingi bipindi bia mu lulanguilo luetu bi bukopo tui balombene kukita kinyi? (b) Mushindo kinyi ukukuashe kimune kia ku bipindi bia mu lulanguilo luetu biabadi baleshe mu kashibo akamba’shi: “ Tamisha muloo oobe”?

¹⁷ Bikuikala naminyi su tuasangana’shi bi bukopo buatudia kukita bingi bipindi bia lulanguilo luetu, bu kuilongiela kua pa bupenka na kukita bulungudi pa mbalo i bantu be bungi? Nsaa yatunyisha kuipaana bua kukita ino midimo, atunyisha kupeta muloo wi bungi na abinyisha kuitukuasha. Tui balombene kupuandikisha lulanguilo luetu na ingi midimo bu kukita kalashishi ka mbidi, sunga kuomba biombuanga bia misike. Su tuakita ino midimo nka penda musango umune, tatui balombene kuenda kumpala nya. Biabia nkinyi kilombene kukitshika su tuata kitshibilo kia kubanga kuibikitanga efuku dioso? Tui balombene kubanga kuibikita mu nsaa ipeela na kunyima tuabanga kuibikita munda mua kipindi kikata. Nsaa yatumono bipeta bi buwa bia kuikitshisha kuetu, atuikala atutengiela yaya nsaa ya kukita wawa mudimo n’eshimba kuiyilu na abitutuadila miloo i bungi. Bomono mushindo odi mulombene kufubisha kino kileshesho nsaa yolanguila Yehowa su?

18. Nkintu kinyi kina muulo kiatudi balombene kukita, na kinyi akikitshika su tubebikitshi?

¹⁸ Kuikitshisha kuetu bua kulanguila Yehowa ngi kintu kina muulo ukata kiatudi balombene kukita. Su tubakitshi biabia atuikala na muloo wi bungi na nshalelo e buwa, na atuikala na lukulupilo lua kulanguila Yehowa bua loso. (Nki. 10:22) Atuikala na butaale bua mu binangu muanda atuuku’shi Yehowa akuasha balanguidi baye nsaa yabapete nkalakashi. (Yesh. 41:9, 10) Kushi mpaka tuina tubingilo tui buwa tuatudia kuikala na muloo, bu biatulanguila Nshetu sha kifulo mulombene, “ntumbo na kineemo” kui bipangua biaye bioso!​—Kibaf. 4:11, Kilombeeno Kipya 2014.