Bangi bantu babadikie uno muanda lubilolubilo, mbeyipushe pabitale uno muanda. Anka kui bantu babidi belekene babetanyina bu Mefiboshete mu ino verse, na tui kulonga muanda kampanda p’atutaluula kibaadi kikitshikie.

Saule Mfumu a bena Isaleele baadi na bana balume musambobidi na bakashi babidi. Muana a kumpala a Saule baadi Yonatane. Kunyima mfumu bapetele muana mulume abetanyina bu Mefiboshete abatandiile n’ekupi diaye Rispa. Muanda wi na muulo, Yonatane namu batandiishe aaye muana mulume abetenyina bu Mefiboshete. Biabia, Mfumu Saule baadi na muana abetanyina bu Mefiboshete na muikulu aaye’nyi baadi na dino eshina.

Mu kingi kipindi, Mfumu Saule babangile kushikua bena Gabaone babaadi bashaale pamune na bena Isaleele na aye nkubanga kukimba bua’shi eebayipee booso. Abimueneka’shi, bungi buabo bubaadi abuende na kufuima. Anka ta baadi na matalua a kuibayipa nya. Buakinyi? Ku muanda p’atualuka ku mafuku a Yoshua, ba mfumu ba bena Isaleele babaadi bakite kilombeno kia butaale na bena Gabaone.​—Yos. 9:3-27.

Kiakia kilombeno kibaadi kiki nka kuanka mpaa na mu kipungo kia Mfumu Saule. Mfumu Saule ta mmuneemekie kino kilombeno nya, baakimbile bia kuipa bena Gabaone. Pa muanda wa bino, “Saule na nshibo yaye mbasemune mase.” (2 Sam. 21:1, NWT) Mfudiilo a bioso, Davide bayikeele mfumu. Bena Gabaone babaadi bapande ku lualua lufu, babalunguile David pabitale mianda ibi ibaadi ayikitshika. Davide baadi muibayipushe kiadi mulombene kukita bua kulumbuula mianda ya kukutua kua kululama ibaabadi bakite kui Saule, na bua’shi Yehowa amone bia kuelela eumbo diabo miabi. Pa mutue paashi bena Gabaone bateka makuta, babatekiele bana musambobidi ba “ku ntandwa ya mfumu Saule” muntu badilanga kuibashimisha bua’shi bayipayibue. (Mb. 35:30, 31) Davide baadi mukumiine bibabamutekiele.​—2 Sam. 21:2-6.

Mu aa mafuku, Saule na Yonatane tababaadi bapue kufua ku ngoshi, anka, muana a Yonatane Mefiboshete baadi ki’atala. Baadi mulemane kubanga ku bukinga aku namu ta baadi mutuelakane ku ngoshi ibaadi ayilu nshaye-kulu na bena Gabaone nya. Davide baadi mukite kilombeno kia bukuuku na Yonatane, kino kilombeno kibaadi kilombene kukuasha bana babo mpaa na muana a Yonatane Mefiboshete. (1 Sam. 18:1; 20:42) Mukanda wa 2 Sam. 21:7, NWT awamba’shi: “Mfumu Davide baapushiishe Mefiboshete lusa, muana a Yonatane muikulu a Saule, ku muanda wa mutshipo wa bukuuku ubaadi Davide na Yonatane muana a Saule bakite kumpala kua Yehowa.”

Dingi, Davide balombeshe kibaadi bena Gabaone bamutekie. Bebapeele bana babidi ba Saule, umune a kuabadi ngi abaabadi abetanyina bu Mefiboshete, na bekulu batano ba Saule. (2 Sam. 21:8, 9) Kino kikitshiino kia Davide kibaadi kipudishe ebaasa dia mase dibaadi muiwumbo.

Uno muanda ngukile mianda yoso ya kala. Miya y’Efile Mukulu ibaadi ayipushika kalolo. Miya ibaadi ayamba’shi: “Baana tabaakwipayiibwa bwa bito bya baamashaabo.” (Miy. 24:16) Yehowa ta baadi mulombene kukumiina’shi bana babidi ba Saule na bekulu baye batano bashi basoole muanda bafue nya. Muiya ubaadi autenteka’nyi’shi: “Muntu ooso aipayiibwa anka pa mwanda wa kito kyaaye’ye nabeene.” Abimueka’shi bano bana musambobidi ba ku lutando lua Saule babafuile, babaadi batuelakane muibaasa dia mase dia nshabo Saule kui bena Gabaone mu ungi mushindo. Bu kipeta, bana musambobidi babaadi bafute ebaasa dia bubi buabo.

Uno muanda aulesha’shi, muntu ta mmulombene kukita bubi ebingisha aye nabene pa kunangushena sunga kuakula’shi, nankitshi bino muanda wa kulonda buludiki nya. Mukanda wa Nkindji awamba’shi: “Lumbuula muishinda aditambukila ngua yobe, na mashinda oobe ooso, aakekala alongame.”​—Nki. 4:24-27, NWT; Ef. 5:15.