“Ba Temue ba Yehowa babaadi na kalolo kakile kushi penda kui bantu, anka mpa na kui mbua yande. Dingi efuku, Elaine baadi muimane pa katempu ka mikanda baadi mupe mbua yande ibidi, biscuit. Kunyima kua paapa mbua ibaadi ifubuile peepi na katempu ka mikanda bua kudia biabia ‘biscuit bipeela’ bibaadi bishaale.

“Kunyima kua mieshi ipeela kukila, mbua ibaadi isankile biscuit biabo, na ami namu naadi musangeele kuisamba naabo mu kapindi kapeela. Anka ntshi naadi nakumiina kuisamba nabo bibungi nya. Naadi na bipua bikile 70, na ntshi naadi mushinkamishe bi lukumiino lua ba Temue ba Yehowa nya. Pa muanda naadi mutshobolokie bua bipuilo bi bungi bia buina Kidishitu, naadi munangushene’shi abitungu nelongiele Bible ami nabene.

“Mu kino kipungo, naadi mumone ba Temue ba Yehowa bemane ma mbalo elekeenelekeene a mu kibundi mbuipi a tutempu tua mikanda. Na abo namu babaadi nka na muloo. Babaadi abatusha ngaluulo ku nkonko yande nka ayitukila mu Bible, bu kipeta, lukulupilo luande muabadi lubatamine.

“Dingi efuku Elaine bangipuishe’shi, ‘Okumiina’shi nyema nkia buntu akifiki kui Efile Mukulu su?’ Namualuluile’shi ‘oolo, ne mushinkamishe biabia!’ Ngi Elaine kubadika mukanda wa Yeeshaya 11:6-9. Bibaadi bialuule mueneno ande a mianda sunga binaadi nki na mpaka ya kukumiina mikanda ya ba Temue.

“Mafuku abalondele, naadi mukumiine kuisamba mu kikoso na Elaine na Brent. Babanduguile bua kubadika mukanda wa Mateo bua kumona Bikitshino abilesha kuikala muina Kidishitu a binyibinyi. Biabia naadi mubadikie. Na kunyima kua mafuku apeela, naadi mukumiine kulonga Bible na Brent na Elaine. Na bino bibaadi mu kipua kia 2016.

“Naadi atengiela kulonga kuande kua Bible kulubingo na kutuela mu bisangilo mu nshibo ya Bufumu n’eshimba kuiyilu. Naadi mupushe buwa ngofu na naadi na muloo wa kuuka akiakula Bible binyibinyi. Kunyima kua bipua bipeela naadi mufikie Temue a Yehowa mubatshishibue. Binobino ntandi na bipua 79, ne na lutumbu lui bungi muanda ne mupete lulanguilo lua binyibinyi. Yehowa mmungielele muabi paye kuntuesha mu kifuko kia bafubi baye belambule.”