1. Nkinyi kilombene kuitupa muloo wi bungi?

 YEHOWA akumiina’shi tuikale na muloo. Atuuku bino muanda muloo nyi nkipindi kia kikuba kia kikudi kiaye kiselele. (Nga. 5:22) Bu bi muloo wa kupaana ngukile wa kupeebua, atupushaa muloo wi bungi nsaa yatuipaana mu mudimo wa buina Kidishitu na aukuasha bakuetu mu mishindo ilekeenelekeene.​—Bik. 20:35.

2-3. (a) Anka bu biabebilesha mu Bena-Ngalatea 6:4, mianda kinyi ibidi ilombene kuitukuasha bua kulama muloo wetu mu mudimo wa Yehowa? (b) Nkinyi kiatukataluula mu uno muisambo?

² Anka bu biabadi bebileshe mu Bena-Ngalatea 6:4, Mpoolo mutumibua mmuleshe mianda ibidi ilombene kuitukuasha bua kulama muloo wetu. (Badika.) Wa kumpala, abitungu’shi kepatshila ketu kekale ka kupa Yehowa bintu bietu bia muulo. Su tubamupa bintu bietu bia muulo atuikala na muloo. (Mat. 22:36-38) Wa kabidi, t’abitungu tuikale atuipuandikisha na bangi. Kintu kioso kiatudi balombene kukita pa muanda wa bukome buetu bua mbidi, tulaasa tuatudi balongie, sunga ngobesha yetu ya butandua yatudi nayo, abitungu tutumbishe Yehowa. Na dingi, bioso biatudi nabio abifiki kuadi. Ku lungi lupese, su bangi bena ngobesha ikile yetu mu mushindo kampanda wa bulungudi, abitungu tuikale na muloo, muanda bakuete kufubisha ngobesha yabo bua kutumbisha Yehowa, t’abeyifubisha bua kuilesha bu bakile bangi sunga bua buwa buabo’bo banabene nya. Biabia pa mutue a kuipikeena naabo tui balombene kulongiela kuabadi.

³ Mu uno muisambo atukataluula kilombene kuitukuasha nsaa yatudi batshobolokie muanda ta tui na mushindo wa kukita kiakia kiatukumiina mu mudimo wetu. Atukataluula dingi mushindo watudi balombene kufubisha kalolo kia buntu kioso kiatudi nakio  na mushindo watudi balombene kulongiela ku kileshesho kia bangi.

4. Nkinyi kilombene kutshobolosha bangi bakuatudi? Tuusha kileshesho.

⁴ Bangi bakuatudi ta be bia kukita bi bungi mu mudimo wa Yehowa, muanda wa bununu sunga maladi, bino abibatshobolosha ngofu. Bino bibaadi bikitshikile Carol. Baadi mupete kineemo kia nkalungula mukandu wibuwa mbalo i lukalo lua balungudi be bungi. Mu aa mafuku baadi mulongie Bible na bantu 35, na baadi mukuashe be bungi bakuabadi bua kuenda kumpala na kuilambula bua kubatshishibua. Carol baadi mupete bipeta bi buwa mu bulungudi buaye! Kunyima bakumbile ngofu na nsaa i bungi baadi nka mushale ku nshibo. Carol amba’shi: “Pa muanda wa mukumbo wande ntshi na ngobesha ya kukita abikitshi bangi nya,” ‘anka ne pusha bu mi shi bi bangi bena Kidishitu boso be buwa. Nauku’shi ntshi mulombene kukita kioso kiankumiina kukita nya, na bino abintshoboloshaa.’ Carol akumiina kukita kioso kiadi mulombene kukita bua Yehowa. Eyondo’shi bino nyi abitungu’shi tukite! Tui balombene kushinkamisha’shi Efile eetu nsha lusa, muanda asankila mudimo wa Carol wa kuete kukita mupunda ngobesha yaye.

5. (a) Nkinyi akitungu’shi tutentekieshe nsaa yatudi batshobolokie muanda ta tui na ngobesha ya kukita kiatukumiina? (b) Anka bu biatuibimono pa kifuatulo, mushindo kinyi ukuete kukungunuka mukuetu mulume na kufubila Yehowa mupunda ngobesha yaye?

⁵ Su ingi nsaa we pusha’shi we mutshobolokie pa muanda wa kufudiila kampanda, eyipushe’shi ‘nkinyi akintekie Yehowa?’ Yehowa akumiina’shi okite kiakia kiodi mulombene kukita muyile nshalelo oodi naye binobino. Puandikisha uno muanda, mukuetu mukashi e na bipua 80 epusha mutshobolokie pa muanda ta mulombene kukita bi bungi mu mudimo wa bulungudi bu bibaadi akitshi pabaadi na bipua 40. Apuandikisha’shi sunga biakitshi mupunda ngobesha yaye t’abisankisha Yehowa. Bino mbia binyibinyi su? Banda kuela binangu. Su mukuetu mukashi baadi afubu mupunda ngobesha yaye pabaadi na bipua 40, na kuete atungunuka na kufuba mupunda ngobesha yaye patadi na bipua 80 na ta muimikie kutusha kiadi nakio ki buwa nya. Su tubabanga kuipusha’shi tatukia tukitshi bibungi mu mudimo wa Yehowa bua kumusankisha, abitungu tutentekieshe’shi Yehowa nyi e na kitshibilo kia kusangula akimusankisha. Su tubakitshi mupunda ngobesha yetu, yaya nsaa Yehowa etulungula’shi: “Bibuwa!”​—Puandikisha na Mateo 25:20-23, Kilombeeno Kipya 2014.

6. Nkinyi kiatulongiela ku kileshesho kia Maria?

⁶ Tui balombene kumona’shi mbibofole bua kupeta muloo nsaa yatutumu binangu bietu ku kiatudi balombene kukita kushi kutuma binangu ku kiatushi balombene kukita. Banda kutala kileshesho kia mukuetu mukashi abetanyina bu Maria, kuete kukumba mukumbo aumukutshishua bua kukita bi bungi mu bulungudi. Kumpala, baadi epusha mukalakashue na bu shi na muulo. Anka kunyima, Maria baadi munangushene pabitale ungi mukuetu mukashi a mu kakongie baadi nka ku lusala pa muanda wa maladi na aye kuata kitshibilo kia kumukuasha. Maria amba’shi: “Ne muate mpango ya kukita naye bulungudi ku bukuashi bua telefone na bua kufunda mikanda.” Nsaa yoso ibatudi atufubu naye pamune nadi nalukiila ku nshibo na muloo nepusha bi buwa muanda nakitshi kintu kampanda bua kukuasha mukuetu mukashi. Natue namu tui balombene kutamisha muloo wetu nsaa yatutuulu binangu bietu ku kiatudi balombene kukita kushi kukiatushi balombene kukita. Kadi tui kuamba naminyi su tui balombene kukita bi bungi sunga’shi tukuete kufuba kalolo mu midimo kampanda ya Yehowa?

7. Elango kinyi dibuwa dibaadi Mpoolo mutumibua mupe bena Kidishitu?

⁷ Mu mukanda waye wa kumpala uyokielue,  Mpyele mutumibua baadi munyingishe bakuetu bua kufubisha kia buntu na ngobesha yoso yabaadi nayo bua kunyingisha bena Kidishitu naabo. Mpyele bafundile’shi: “Bu bikale’shi ese akwanudi mmutambule bya buntu kui Efile Mukulu, bibuwa akwashe bena Kidishitu nê byabya anukekala balondi bebuwa bwa bya buntu bilekenelekene binupe Efile Mukulu.” (1 Mp. 4:10, EEM) Abitungu tukite muetu moso bua kufubisha bia buntu bietu kushi kuikalakasha’shi tala bangi bakuata kiutu sunga kutshoboloka. Su tubapele kukita muetu mooso muanda atuikalakasha pabitale biabadi balombene kupusha kui bangi, yaya nsaa atukutua kupa Yehowa mupunda ngobesha yetu.

8. Muyile 1 Bena-Kodinda 4:6, 7, buakinyi ta tui balombene kuitatula bua bia buntu biatudi nabio?

⁸ Atukumiinaa kufubisha bia buntu bietu ngofu anka abitungu tudimukie, bua kupela kuitatula pa muanda wabio. (Badika 1 Bena-Kodinda 4:6, 7.) Bu kileshesho, pangi ouku kalolo bia kubanga kulonga Bible na bantu ku mashibo abo. Abitungu ofubishe kiakia kia buntu! Anka bi na muulo tutentekieshe’shi kuitatula buakio kui bubi. Puandikisha’shi mu mafuku ashale we mupete muanda wi buwa mu bulungudi na obanga kulonga Bible na muntu. We na lukalo lukata lua kuiulungula bantu boso ba mu kasaka ka bulungudi. Nsaa ya nubebungu mu kisaka ungi mukuetu mukashi babanga namu kulonda waye muanda wadi mumone umukuashe bua’shi ape bantu ma jurnale, aye mupe muntu jurnale, obe namu we mubangie kulonga Bible na muntu. Nkinyi kiodia kukita? Ouku’shi muanda oodi mumone aunyingisha kisaka, anka we kuata kitshibilo kia kutengiela ingi nsaa bua kulonda muanda oobe, bua kupela kuluisha muloo wa mukuetu mukashi ekele mutushe jurnale. Kukita bino kui buwa. Anka mu bioso tolekanga kulonga Bible na bantu. We na kia buntu ekifubishe!

9. Mushindo kinyi watudia kufubisha bia buntu bietu?

⁹ Tutentekiesheyi’shi ngobesha yoso yatudi balombene kuikala nayo, mbia buntu abifiki kui Efile Mukulu. Abitungu tufubishe bino bia buntu bua kunyingisha kakongie kushi bua buwa buetu’tue banabene. (Fid. 2:3) Nsaa yatufubisha bukome buetu na ngobesha bua kukita kikiebe ki’eshimba di’Efile Mukulu, atuikala na kabingilo ka kuikala na muloo kushi pa muanda wa’shi atukitshi bi bungi kukila bangi sunga’shi tui buwa kuibakila, kadi mpa muanda wa’shi atukumiina kufubisha bia buntu bietu bua kutumbisha Yehowa.

10. Buakinyi ta bi buwa kuipuandikisha na bangi?

¹⁰ Su muntu ta mudimukie mulombene kubanga kupuandikisha biadi mulombene kukita na  biabashi balombene kukita kui mungi. Bu kileshesho, pangi mukuetu elaa miisambo ya bantu boso kalolo. Yaya ngobesha yaye. Muishimba diaye mulombene kubanga kubepuula mukuetu sh’elaa miisambo kalolo. Anka, yawa mukuetu mulombene kuikala na kia buntu kia kupaana, kukusha bana baye kalolo, sunga kuikala na kisumi mu bulungudi. Tui na lutumbu lukata lua kuikala na bakuetu balume na bakashi be na ngobesha na abafubisha bia buntu biabo bi buwa bua kufubila Yehowa na kukuasha bangi!

11. Buakinyi abitungu tuambule kileshesho kia Yesu?

¹¹ Sunga ta tui balombene kuipuandikisha na bangi, tui balombene kulongiela kui bangi bafubi ba Yehowa baasha lulamato. Tui balombene kulongiela ku kileshesho kia Yesu. Ta tui bapuidikie bu Yesu nya, anka tui balombene kulongiela bi bungi ku ngikashi yaye i buwa na bintu bi buwa bibaadi mukite. (1 Mp. 2:21) Nsaa yatukitshi muetu mooso bua kulonda kileshesho kia Yesu kalolo, mupunda ngobesha yetu, atuikala bafubi ba Yehowa be buwa na atutuusha bipeta bi buwa mu bulungudi buetu.

12-13. Nkinyi ki’atulongiela kui Mfumu Davide?

¹² Muiyi di’Efile Mukulu atusangana bileshesho bia balume na bakashi baasha lulamato batudi balombene kuambula sunga mbibabadi bakutue kupuidika. (Eb. 6:12) Nangushena pabitale Mfumu Davide ababadi betanyine kui Yehowa’shi “muntu muyile eshimba dyande, Esambi dipya 2015,” sunga mbiabadi bamufunde mu ungi Bible’shi “muntu ansangala nê, EEM.” (Bik. 13:22) Anka, Davide ta baadi mupuidikie. Dingi baadi mukite ingi miluisho ikata. Sunga mbiabia nyi kileshesho ki buwa kuatudi. Buakinyi? Muanda nsaa ibabamupeele elango ta baadi mutompe kuibingisha nya. Anka baadi mukumiine elango dibabamupeele di bukopo, na aye nkuinyongola kuishimba bua miluisho ibaadi mukite. Pa muanda wa biabia, Yehowa bamufuidile lusa.​—Mis. 51:3, 4, 10-12.

¹³ Tui kulongiela ku kileshesho kia Davide pa kuiyipusha’shi: ‘Nakitaa naminyi su babampa elango? Nakumiinaa bilubilo biande mususu umune, su nakimbaa kuibingisha? Nekalaa na bukidi bua kutopekabangi su? Nakitaa muande mooso bua kupela kualushuula bilubilo biande su?’ We mulombene kuiyipusha ino nkonko p’obadika pabitale bangi balume na bakashi baasha lulamato babadi batemune mu Bible. Babaadi bapete nkalakashi i mumune na yobe su? Ngikashi kinyi i buwa ibaabadi baleshe? Mu muanda oso eyipushe’shi: ‘Mushindo kinyi wandi mulombene kuambula kileshesho kia uno mufubi a Yehowa sha lulamato?’

14. Mushindo kinyi watudi balombene kupeta bukuashi pakutala bileshesho bia bakuetu bena Kidishitu?

 ¹⁴ Tui balombene kulongiela dingi pakutala kileshesho kia bena Kidishitu, bakulu na bakinga. Bu kileshesho, we mulombene kunangushena pabitale ungi muina Kidishitu a mu kakongie kuete kunyingiila bitompuanga na lulamato looso bakuete abamubingabinga mu kifuko, sunga’shi e na mukumbo. Bomono mui yawa muntu ngikashi i buwa yodi mulombene kuambula su? Nsaa yotaluula kileshesho kiaye ki buwa, we mulombene kulonga mishindo i buwa yodia kunyingiila bitompuanga biobe. Tui na lutumbu lukata pa kuikala na bano bakuetu balume na bakashi batudi balombene kuambula binyibinyi’shi kano nkabingilo ka kuikala na muloo!​—Eb. 13:7; Shak. 1:2, 3.

15. Elango kinyi dibatushishe Mpoolo mutumibua dilombene kutungunuka na kuitukuasha bua kulama muloo wetu mu mudimo wa Yehowa?

¹⁵ Bua kulama butaale na buumune bua kakongie, abitungu ooso akuatudi afube mupunda ngobesha yaye. Tutaluule kileshesho kia bena Kidishitu ba mu siekele a kumpala. Babaadi na bia buntu na midimo ilekeenelekeene. (1 Kod. 12:4, 7-11) Anka bino ta bibaadi bibatakule bua kuipikena na kuiabulushena nya. Anka, Mpoolo baadi munyingishe muntu oso a kuabadi buadia kukita kioso akitungu “bwadia kuibaka mbidi ya Kidishitu.” Mpoolo baadi mufundile bena Efeso’shi: “Mu kwilonga na kwilunga kalolo kwa binyungwa byooso abiiyifubila, muyile mufubo wabikiishwe kipindji kyooso mupunda bukome bwakyo. Byabya mbidi aikulu ayo yooso na kutama mu kifulo.” (Ef. 4:1-3, 11, 12, 16) Boso babaadi bakite kibakuile Mpoolo babaadi batueshe butaale na buumune ngikashi yatukuete kumona mu tukongie tuetu lelo uno.

16. Abitungu tuikale na kitshibilo kia kukita kinyi? (Bena Ebelu 6:10)

¹⁶ Ata kitshibilo kia kupela kuipuandikisha na bangi. Biabia longiela kui Yesu na okite mobe mooso bua kuambula ngikashi yaye. Longiela ku bileshesho bia bantu baasha lukumino babadi batemune mu Bible na ba ano mafuku etu. Nsaa yotungunuka na kufuba mupunda ngobesha yobe shinkamisha’shi Yehowa ‘ta mukutwe kululama bwadia kwiilwa mufubo oobe.’ (Badika Bena-Ebelu 6:10.) Tungunuka na kuikala na muloo mu mudimo wa Yehowa na uuka’shi e na muloo nsaa yakumono wekitshisha na mobe mooso bua kumusankisha.