MUISAMBO WA KULONGA 10
Buakinyi abitungu obatshishibue?
‘Muntu ooso aa kwanudi abatshishibwe.’—BIK. 2:38.
LOONO 34 Tutambukileyi mu kululama
KI’ABAKUILA MUANKA a
1-2. Nkinyi akikambaa kukitshika nsaa ayibatshishibua bantu, na nkinyi akitungu’shi otaluule?
OBANDILAA kisaka kia bantu abakiebe kubatshishibua su? Opushaa mayi aabo p’abaluula na kishinkamiisho ku nkonko ibidi kumpala kua kubatshishibua. Omono bakuabo ba mu kifuko na ba kuuku baabo be na nfiedi buabo. Nsaa ayabuka bantu ababatshishibua mu meema, opushaa biabebakupiila nkasa na omonaa muloo ukata wi ku mapala aabo. Su tubatshintshikila, mu lubingo looso binunu bia bantu, abielaa dino etabula bietshipa na kubatshishibua, bafika Tumonyi tua Yehowa Efile Mukulu.
2 Kadi obe namu? Su okuete kunangushena bua kubatshishibua, we muntu e na muulo mu uno ndumbuluilo e bubi, ku muanda okuete ‘kukimba Yehowa.’ (Mis. 14:1, 2) Uno muisambo mbeufunde bobe, biekala mukinga sunga mukulu. Kadi bua bano booso bakuatudi bapue kubatshishibua, ngufundibue dingi bua kunyingisha kitshibilo kietu kia kufubila Yehowa losoo. Biabia, tubandeyi kutaluula tubingilo tusatu tua ku tubingilo tui bungi, tua buakinyi atukumiina kufubila Yehowa.
WE MUFULE BIA BINYIBINYI NA KULULAMA
Satana mmusaabuule eshina di buwa dia Yehowa munda a bipua kinunu na kuete kutungunuka na kuibikita (Tala kikoso 3-4)
3. Buakinyi bafubi ba Yehowa mbafule bia binyibinyi na kululama? (Misambo 119:128, 163)
3 Yehowa mmutekie muilo waye bua ‘kufula bya binyibinyi.’ (Sek. 8:19) Yesu baadi mulungule balongi baaye buabadia kukimba kululama. (Mat. 5:6) Bino abipushisha’shi abitungu muntu ekale na lukalo lukata lua kukita kiakia kilulame, ki buwa, na kitookane ku meeso ku’Efile Mukulu. We mufule bia binyibinyi na kululama su? Tui bashinkamishe’shi we muibifule. We mushikue madimi na mianda yooso i bubi na buntomboshi. (Badika Misambo 119:128, 163.) Madimi aalesha bumuntu bua Satana mukunkushi a ino nsenga. (Yo. 8:44; 12:31) Kamune ka ku tuipatshila tua Satana nka kusabulusha eshina dia kishila dia Yehowa Efile Mukulu. Satana tababangile kupalakasha madimi pabitale Efile Mukulu kubanga nka pa batombokiele muifuba dia Edene. Aleshaa Yehowa, bu muikumiine aye nabene, na bu Mukunkushi shii mululame, mufie bantu ki buwa. (Kib. 3:1, 4, 5) Madimi a Satana pabitale Yehowa, akuete kutungunuka na kuluisha binangu bia bantu na mashimba aabo. Nsaa ayisangula bantu bua kupela ‘kufula bya binyibinyi,’ Satana ngi kuete kuibakunkusha mu binangu biabo bioso bua kukutua kululama na kuikala na muikeelo wi bubi.—Lom. 1:25-31.
4. Mmushindo kinyi ubaadi Yehowa muileeshe bu “Efile Mukulu a binyibinyi”? (Tala dingi kifuatulo.)
4 Yehowa ‘Efile Mukulu a biinyibiinyi,’ na kuete alongiesha bano booso bamufule bia binyibinyi na kalolo kooso. (Mis. 31:6) P’aye kukita bino, mmuibakuashe buabadia kuikala mu bulungantu ku madimi a Satana. Yehowa alongieshaa dingi bafubi baaye buabadia kuikala na mashimba atooka na kululama. Bino ngi abibakuasha buabadia kuikala na kineemo na butaale. (Nki. 13:5, 6) Yehowa mmukukitshine namu bino nsaa iboodi olongo Bible su? We mulongie’shi mashinda a Yehowa e buwa bua bantu booso, na boobe pa bupenka. (Mis. 77:13) Nyi buakinyi okumiinaa kukita kiakia ki’abamba kui Efile Mukulu’shi nkilulame. (Mat. 6:33) Okumiina kuakuila bia binyibinyi, na kulesha’shi kiakia kiakule Satana pabitale Efile Mukulu eetu Yehowa, nkia madimi. We kuibikita naminyi?
5. Mmushindo kinyi odia kuakuila bia binyibinyi na kululama?
5 We mulombene kusangula eshinda dia muwa adiamba’shi: “Nalekie madimi a Satana, na nakumiina bia binyibinyi. Nakumiina Yehowa bu Mukunkushi ande, na kukumiina kukita kiakia kiamba’shi nkilulame.” We kukita bino naminyi? Pa kuifubuila kui Yehowa mu luteko, kuitshipa obe nabene kuadi, na kuibilesha kui bantu booso’shi buetshipi bua kubatshishibua. Kufula kiakia kia binyibinyi na kilulame, nyi kui na bukome abuitutakula bua kubatshishibua.
WE MUFULE YESU KIDISHITU
6. Mukanda wa Misambo 45:4, aukupa tubingilo kinyi tua kufula Yesu Kidishitu?
6 Buakinyi we mufule Yesu Kidishitu? Tala tungi tubingilo tui buwa topete mu Misambo 45:4. (Badika.) Yesu baadi mufule bia binyibinyi, kuiyisha, na kululama. Su we mufule bia binyibinyi na kululama, abipushika’shi we mufule nyi Yesu Kidishitu. Banda kunangushena mushindo ubaadi Yesu n’eshimba dinyingie bua kuakuila kiakia kia binyibinyi na kilulame. (Yo. 18:37) Biabia, mmushindo kinyi ubaadi Yesu muiyishe?
7. Nkinyi kibopete akimueka mu kuiyisha kua Yesu?
7 Yesu baadi muleshe kuiyisha ku kileshesho kiaye. Bu kileshesho, baadi apa Nshaye ntumbo yooso, ta muitumbishe aye nabene efuku su ndimune. (Mak. 10:17, 18; Yo. 5:19) We pushaa namu naminyi pabitale kuiyisha kua Yesu? Mu binyibinyi, abikutakula bodia kufula Muan’Efile Mukulu na ku mulonda. Eyendo nyi biokitshi. Buakinyi Yesu baadi muiyishe? Ku muanda mmufule Nshaye na kuete kuambula kuiyisha kuaye. (Mis. 18:35; Eb. 1:3) Tue mulombene namu kuifubuila kui Yesu kuete kuambula ngikashi ya Yehowa na kupuidika kooso su?
8. Buakinyi tui bafule Yesu bu Mfumu eetu?
8 Tui bafule Yesu bu Mfumu eetu, muanda nyi Mukunkushi e buwa. Yehowa aye nabene nyi balongieshe Muana aaye na kumutuula bu mukunkushi. (Yesh. 50:4, 5) Banda kunangushena namu mushindo ubaadi Yesu muleshe kifulo kia kuipaana aye nabene. (Yo. 13:1) Bu biadi Mfumu oobe, Yesu mmulombene kifulo kiobe. Mmupatuule’shi baaba booso bamufule mu binyibinyi, nyi baaba bayitanyina bu ba kuuku baaye, abalesha kifulo kiabo pa kukookiela ku miiya yaaye. (Yo. 14:15; 15:14, 15) Kino nyi nkineemo kikata kia kuikadika kuuku a Muana a Yehowa!
9. Lubatshisho lua bena Kidishitu lui mumune na lua Yesu naminyi?
9 Umune wa ku miiya ya Yesu ngua’shi balongi baaye babatshishibue. (Mat. 28:19, 20) Balekiele kileshesho. Mu ingi mishindo lubatshisho luaye nduilekeene na lua balongi baaye. (Tala kashibo akamba’shi: “ Kuilekeena kua lubatshisho lua Yesu na lua balongi baaye.”) Anka mu ingi mishindo, i mumune. Pa baadi mubatshishibue Yesu baadi muilambule aye nabene bua kukita kikiebe ki’eshimba dia Nshaye. (Eb. 10:7) Mu mushindo umune, balongi ba Yesu ababatshishibuaa bua kulesha patooka’shi, babelambula abo banabene kui Yehowa Efile Mukulu. Kunyima kua lubatshisho luabo, kintu ki na muulo ukata mu nshalelo aabo, nkukita kikiebe ki’eshimba di’Efile Mukulu, kushi kiabo abo banabene. Biabia, abalondaa kileshesho kia Mfumu aabo.
10. Buakinyi kifulo bua Yesu nkilombene nkutakula bodia kubatshishibua?
10 Okumiina Yesu bu Muan’eleka a Yehowa, na bu Mfumu abadi batuule kui Efile Mukulu bua kuitumuna. Ouku’shi Yesu mmuiyishe na kuete kuambula Nshaye na kupuidika kooso. We mulongie’shi Yesu badishiishe babaadi na nsala, asamba babaadi batshobolokie ku mashimba, na kupaasha babaadi na mikumbo. (Mat. 14:14-21) Na okuete kumona bia kuete kukunkusha kakongie kaaye lelo uno. (Mat. 23:10) Bu biadi Mfumu eetu, Bufumu bi’Efile Mukulu abuketukitshina mianda ikile buwa mu mafuku aafiki. We kulesha’shi we mumufule mushindo kinyi? Pa kulonda kileshesho kiaye. (Yo. 14:21) We mulombene kubanga kukita bino pa kuitshipa kui Yehowa obe nabene na kubatshishibua.
WE MUFULE YEHOWA EFILE MUKULU
11. Mbua kabingilo kinyi ke na muulo ukata koodi mulombene kubatshishibua, na buakinyi bi buwa kubatshishibua?
11 Nkabingilo kinyi ke na muulo ukata ka kubatshishibua? Yesu balesheshe muiya ukata wa mu miiya y’Efile Mukulu pa bambile’shi: ‘Abitungu ofule Yehowa Efile Mukulu oobe n’eshimba dyoobe dyooso, na muuwa oobe ooso, na kinangu kyoobe kyooso, mpaa na bukome boobe booso.’ (Mak. 12:30) Bino bishima bioso abilesha kifulo kiobe bu’Efile Mukulu su?
Yehowa nyi Nsulo ya mianda yooso i buwa y’okuete kusankila na y’okasankila mu mafuku aafiki (Tala kikoso 12-13)
12. Buakinyi we mufule Yehowa? (Tala dingi kifuatulo.)
12 Kui tubingilo tui bungi tua kufula Yehowa. Bu kileshesho, we mupue kupusha’shi aye nyi “nsulo ya muuwa” na’shi etupeyaa “kya-buntu kyooso kya muulo na bwedi booso bupwidikye.” (Mis. 36:9; Shak. 1:17) Kintu kioso ki buwa ki’atusangalaa nakio akituukilaa kui Efile Mukulu eetu shaa kifulo na kalolo.
13. Buakinyi nkuulo nkia buntu ki buwa?
13 Nkuulo nkia buntu ki buwa kitupe Yehowa. Buakinyi atuamba biabia? Nangushena pabitale kipuano ki pankatshi pa Yehowa na Muana aaye. Yesu bambile’shi: “Yaaya mmumfule” na “nee mufule Yaaya.” (Yo. 10:17; 14:31) Kipuano ki pankatshi p’aabo kibatamine pabaabadi pamune munda a bipua midiyala. (Nki. 8:22, 23, 30) Binobino, nangushena mushindo ubaadi Efile Mukulu mupushe kenyongoshi, pa kutadiila Muana aaye akiengie na kufua. Yehowa mmufule bantu, mpaa n’obe, baadi mukumiine kutuusha Muana aaye a kifulo bu mulambu bua’shi obe na bangi nupete muwa wa ikalaika. (Yo. 3:16; Nga. 2:20) Kano nyi nkabingilo kakata katudi naako ka kufula Efile Mukulu.
14. Nkepatshila kinyi ke buwa koodi mulombene kusangula mu muwa oobe?
14 Kifulo kiobe bua Yehowa akinyisha kutama muanda okuete kulonga bi bungi pa bimutale. Mu binyibinyi abitungu wefubuile kuadi ngofu kubanga binobino mpaa na bua losoo. Nyi biodi mulombene kukita. Akunyingisha na kalolo kooso bua kusankisha eshimba diaye. (Nki. 23:15, 16) We mulombene kuibikita kushi penda mu ngakuilo oobe nka na mu bikitshino biobe. Mu nshalelo oobe na mu muwa oobe olesha’shi we mufule Yehowa binyibinyi. (1 Yo. 5:3) Kano nyi kepatshila kakile buwa koodi mulombene kusangula mu nshalelo oobe.
15. We kuleesha’shi we mufule Yehowa naminyi?
15 We kuleesha’shi we mufule Yehowa naminyi? Kia kumpala, wele luteko lui pabualo bua kuitshipa obe nabene kui Efile Mukulu a binyibinyi. (Mis. 40:8) Dingi, oleesha’shi we muitshipe pa bupenka pa kubatshishibua. Anka bu biatudi bapue kuisambila kunundu kua uno muisambo, lubatshisho loobe nkipungo kia muloo na ki na muulo mu muwa oobe. Obanga nshalelo mupia kushi boobe nabene, anka bua Yehowa. (Lom. 14:8; 1 Mp. 4:1, 2) Kino nkilombene kuikala bu kitshibilo kikata kiboota, na nnaakio. Na dingi, akikupa mushindo wa kuikala na nshalelo e buwa. Mushindo kinyi?
16. Anka bu abibilesha Misambo 41:12, Yehowa akafutu baaba booso balambule muwa wabo bua kumufubila mushindo kinyi?
16 Yehowa mmuntu shaa kalolo kakile. Kintu kioso ki’opa Yehowa aye akakupa bi bungi kukila paapa. (Mak. 10:29, 30) Akakupasukila ngofu, akakufute, akalombashe nkalo ya mu nshalelo oobe, sunga biatudi bekale mu uno ndumbuluilo e bubi. Uno mpenda mbangilo. Luendo lobanga na lubatshisho loobe t’aluikala na mfudiilo. We mulombene kufubila Nshobe sha kifulo bua losoo. Kifulo ki pankatshi p’obe na Nshobe akikatungunuka nka na kutama. Bu bi Yehowa nga ikalaika, n’atue namu atukeekala na muwa wa ikalaika.—Badika Misambo 41:12.
17. Nkinyi kiodi mulombene kupa Yehowa kiashi nakio?
17 Nsaa yuele matabula a kuitshipa na kubatshishibua, we na kineemo kikata kia kupa Nshobe kintu kampanda ki na muulo ukata. Mmukupe kintu kioso ki buwa, na kipungo kia muloo kioshopetele dingi kashaa. Bua kumukitshina namu naaye, we mulombene kupa Mupangi a eyilu na nsenga kintu kampanda kiashi nakio, kiakia kintu nyi nkuitshipa koobe na kuilambula bua kumufubila. (Yob. 1:8; 41:11; Nki. 27:11) Uno nyi mushindo wi buwa odia kufubisha nshalelo oobe! Kushi mpaka, kifulo kiobe bua Yehowa nyi kabingilo ke buwa ka kubatshishibua.
BUAKINYI NKUETE KUTENGIELA BUA KUBATSHISHIBUA?
18. Nkonko kinyi yodi mulombene kuiyela?
18 Mmushindo kinyi oodi mulombene kualuula ku luno lukonko aluamba’shi: Okumiina kubatshishibua? Obe nabene nyi mulombene kualuula. Anka bi nkukuasha pueyipusha obe nabene’shi: ‘Buakinyi nkuete kutengiela bua kubatshishibua?’ (Bik. 8:36) Tentekiesha tubingilo tusatu tuatubaapu kuisambila. Ka kumpala, we mufule bia binyibinyi na kululama. Eyipushe obe nabene’shi: ‘Nakumiina nkamona efuku adikeekala muntu ooso aakula bia binyibinyi na kukita mianda ilulame?’ Ka kabidi, we mufule Yesu Kidishitu. Eyipushe obe nabene’shi: ‘Nakumiina Muana a Efile Mukulu bu Mfumu’ami, na nakumiina kulonda kileshesho kiaye?’ Ka kasatu ke na muulo ukata, we mufule Yehowa. Eyipushe obe nabene’shi: ‘Nakumiina kusankisha eshimba dia Yehowa na kumufubila bu Efile Mukulu ande?’ Su ngaluulo yoobe ya ku ino nkonko yooso i shi oolo, buakinyi t’obatshishibua? Buakinyi okuete kutengiela bua kubatshishibua?—Bik. 16:33.
19. Buakinyi t’abitungu kuitutuusha bua kubatshishibua? Tuusha kileshesho. (Yowano 4:34)
19 Su okuete kuitutuusha bua kubatshishibua, taluula kileshesho kibaadi Yesu mutuushe. (Badika Yowano 4:34.) Tala Yesu bi’apuandikisha kukita kikiebe ki’eshimba dia Nshaye na bidibua. Buakinyi? Atusangeelaa bidibua. Yesu baadi muukie’shi kioso ki’abetutekie kui Yehowa bua kukita mbua buwa buetu. Yehowa t’akumiina’shi tukite kintu kampanda kilombene kuituluishiisha. Yehowa akumiina’shi obatshishibue su? Oolo. (Bik. 2:38) Na dingi, ikala mushinkamishe’shi kukookiela ku muiya wa kubatshishibua akukakukuasha. Su tuekalaa na kuitutuusha bua kudia kidibua kiodi mufule, buakinyi we kuitutuusha bua kubatshishibua?
20. Nkinyi ki’atukataluula mu muisambo aulondo?
20 Mbuakinyi nkuete kutengiela bua kubatshishibua? Be bungi be kualuula mu uno mushindo’shi: “Ntshi muilumbuule.” Muanda wi’shi kitshibilo kia kuitshipa obe nabene kui Yehowa na kubatshishibua, ngi kitshibilo ki na muulo ukata kiosh’okaata dingi. Biabia, abitungu wate nsaa ya kunangushena kalolo, na kuikitshisha pabitale kiakia kitshibilo. Biabia, su we na lukalo lukata lua kubatshishibua, we kukita kinyi kubanga binobino bua kuilumbuula obe nabene? Atukataluula lualuulo lua ku luno lukonko mu muisambo aulondo.
LOONO 28 Twikale bakuuku ba Yehowa
a Lubatshisho nyi etabula di na muulo ukata bua ooso mulongi a Bible. Nkinyi kilombene kutakula mulongi a Bible bua kuela dino etabula? Mu kikoso, nkifulo. Biabia, kifulo buakinyi na bua nnanyi? Mu uno muisambo, atukapete ngaluulo na kuisambila kilombene kufika muwa wetu p’atubatshishibua na kufika bena Kidishitu.
