MUISAMBO WA KULONGA 14
“Ku bino booso abakashinguula’shi nwi balongi bande”
“Ku bino booso abakashinguula’shi nwi balongi bande, su nwi na kifulo munkatshi mwenu.”—YO. 13:35, Kilombeeno Kipya 2014.
LOONO 106 Twikaleyi na kifulo
KI’ABAKUILA MUANKA a
Kifulo ki munkatshi mua muilo wa Yehowa, ki na bukitshishi kinyi kui bantu be bungi bashi Tumonyi tua Yehowa abebamono? (Tala kikoso 1)
1. Nkinyi akikanyishaa bantu be bungi p’abatuele mu bisangilo bietu bua musuusa wa kumpala? (Tala dingi kifuatulo.)
PUANDIKISHA’SHI mulume na mukashi babafiki ku nshibo ya Bufumu ya Tumonyi tua Yehowa bua musuusa wa kumpala. Abekalaa na kukaanya kukata bua muloo wabebakukila nawo, kifulo ki’abamono munkatshi mua bena kakongie booso. Nsaa itabadi muishinda abalukiila ku nshibo abo babatuuku mu bisangilo, mukashi alungula mulume aye’shi, ‘Bano bantu mbelekeene na bangi bantu batuwuku. Ne na muloo wa kuibunga nabo.’
2. Buakinyi bangi abakokolaa?
2 Kifulo ki munkatshi mua kakongie ka bena Kidishitu nkilekeene na kia bangi bantu. Sunga mbiabia, Tumonyi tua Yehowa ta ntupuidikie nya. (1 Yo. 1:8) Biabia, p’atunyisha kuuka bantu booso mu kakongie, atunyisha kuuka tu bilubilo tuabo. (Lom. 3:23) Bi malua, muanda bangi abatadilaa kushipuidika kua bangi ku’ebakokosha.
3. Balongi ba Yesu ba binyibinyi abebatunduilaa ku kinyi? (Yowano 13:34, 35)
3 Tala dingi kifundue kia mutue wa muanda kia uno muisambo. (Badika Yowano 13:34, 35.) Balongi ba Kidishitu ba binyibinyi abebatunduilaa ku kinyi? Nku kifulo, kushi kukupuidika. Tala dingi uno muanda, Yesu t’amba’shi: ‘Kukiila bino anukauku’shi nui balongi bande’ nya. Kadi aamba’shi: “Ku bino booso abakashinguula’shi nwi balongi bande.” Yesu ta baadi muleshe’shi nka penda balongi baaye nya, mpaa na bantu bashi mu kakongie ka bena Kidishitu abeuku balongi baaye ba binyibinyi kukiila ku kifulo kishi kia kuikumiina ki’abelesheena.
4. Bangi abakumiinaa kuuka kinyi pabitale bena Kidishitu ba binyibinyi?
4 Bangi bantu bashi ba Tumonyi tua Yehowa be kuipusha’shi: ‘Kifulo nkilombene kutundusha bena Kidishitu ba binyibinyi naminyi? Yesu balesheshe batumibua baye kifulo mushindo kinyi? Na mmushindo kinyi wabidi bibofule bua kuambula kileshesho kia Yesu lelo uno?’ Tumonyi tua Yehowa atukitshi kalolo pa kunangushena ku ngaluulo ya ino nkonko. Kukita bino nkulombene kuitukuasha bua kunyisha kulesha kifulo bikishekishe nsaa yatunyingiila kukutua kua kupuidika kua bangi.—Ef. 5:2.
BUAKINYI KIFULO NGI MUSHINDO UMUNE WA KUUKA BALONGI BA BINYIBINYI BA YESU?
5. Patuula mayi a Yesu atupete mu Yowano 15:12, 13.
5 Yesu baadi muleshe patooka’shi kalolo ke pabuako ka kifulo nkalombene kutundusha balongi baaye. (Badika Yowano 15:12, 13.) Tala muiya ubebeeleele Yesu, awamba’shi: “Ikalai anwifulêna kifulo anka bu mwandji mwinufule.” Bino abipushisha kinyi? Anka bu abiende Yesu na kupatuula, kino nyi nkifulo kia kuipaana, kifulo kilombene kutakula muntu buadia kufuila muina Kidishitu naye su kui mushindo. b
6. Mmushindo kinyi aushimikaa Eyi di’Efile Mukulu kasele ku muulo wa kifulo?
6 Eyi di’Efile Mukulu ndishimikie kasele pa ma mbalo e bungi ku kifulo. Bantu be bungi be na ma verse abadi bakumiine ngofu bu ano aalondo: “Efile Mukulu nkifulo.” (1 Yo. 4:8) “Ofule mwinobe kifulo bu’be nabene.” (Mat. 22:39, Kilombeeno Kipya 2014) “Mwanda kifulo akibwikila mituuto na mituuto ya milwisho.” (1 Mp. 4:8, Kilombeeno Kipya 2014) ‘Kifulo takifwiya.’ Ano ma verse na angi aalesha patooka’shi, bi na muulo wa kukimba na kulesha dino eyikashi di buwa.
7. Buakinyi Satana te na ngobesha ya kulongiesha bantu bia kuifulena na kuikala mu buumune?
7 Bantu be bungi abeyipusha’shi mmushindo kinyi wibuwa wa kutundula lulanguilo lua binyibinyi? Bipuilo abiamba’shi atulongiesha bia binyibinyi, anka kioso kia kuabidi akilongiesha ingi mianda ilekene pabitale Efile Mukulu. Satana mmutuushe bipuilo bibungi bia madimi, na bino mbikeeshe bantu bukopo bua kutundula lulanguilo lua binyibinyi. Anka t’anatuushe ndumbuluilo a bantu mu nsenga ishima ishadiibue befulene nya. Nka penda Yehowa ngi mulombene kuibikita. Atuuku bino muanda kifulo akifiki kui Yehowa, na anka penda baaba booso bena kikudi kiselele kia Yehowa na miabi yaye, ngi balombene kuifulena mu binyibinyi munkatshi muabo. (1 Yo. 4:7) Ngi buakinyi, Yesu bambile’shi nka penda balongi baaye ngi balombene kuikala na kifulo kia binyibinyi munkatshi muabo.
8-9. Kifulo ki’abamonaa munkatshi mua Tumonyi tua Yehowa akikalaa na bukitshishi kinyi kui bantu be bungi?
8 Anka bu bibalesheshe Yesu, bantu be bungi mbaukie balongi baaye ba binyibinyi ku kifulo ki’abelesheenaa munkatshi muabo. Bu kileshesho, mukuetu mulume abetanyinaa bu Lan, atentekiesha musango wa kumpala ubaadi mutuele ku kikongeno kibaadi kikitshikile mu kipalue kia ndundo peepi na kuaye. Lan baadi ende mu kipalue kia ndundo mieshi ipeela kumpala mu kubandila ndundo. Lan amba’shi: “Kubaadi kuilekeena kukata ku kino kikongeno. Tumonyi tua Yehowa tubaadi na bukalanga bui moo, na tubaadi tufuale kalolo, na baana baabo mbebakushe kalolo.” Amba dingi’shi: “Booso abamueneka bu bantu abasankaa na kiabadi nakio, na be na butaale. Bino ngi binaadi mukumiine mu nshalelo ande. Ta ntentekieshaa muisambo su ngumune ubaabadi beele mu diadi’efuku nya. Anka muikeelo wa Tumonyi tua Yehowa ubaadi unkanyishe ngofu.” c Uno muikeelo kushi mpaka, mbipeta bia kifulo kia binyibinyi ki’atuilesheenaa munkatshi muetu. Ku muanda tui bafule bakuetu balume na bakashi, atuibakitshinaa mianda na kalolo na kaneemo.
9 Mukuetu mulume abatanyina bu John baadi na kuno kukaanya kumune nsaa ibaabangile kutuela mu bisangilo bia kakongie bua musuusa wa kumpala. Akula’shi: “Naadi mukaanye p’ami kumona kipuano ki munkatshi muabo, babaadi abamueneka nka bu bapuidikie. Kifulo kiabo kia binyibinyi kibaadi kinshinkamiishe’shi napete lulanguilo lua binyibinyi.” d Misuusa i bungi ino mianda ayilesha’shi muilo wa Yehowa nguileshe bu bena Kidishitu ba binyibinyi.
10. Nsaa kinyi i pabuayo yatudi na mushindo wa kulesha kifulo kia buina Kidishitu? (Tala dingi mayi a kuushi ku’esaki.)
10 Tala bipeta sunga balanguidi netu ta mbapuidikie. Ingi nsaa abakulaa sunga kukita mianda ayitufitshisha munda. e (Shak. 3:2) Mu ino nsaa i bino, tui na mushindo wi pa buawo wa kulesha kifulo kia buina Kidishitu ku mushindo watuakula sunga watukitshi mianda. Pabitale uno muanda, nkinyi kiatudi balombene kulongiela ku kileshesho kiabadi betulekiele kui Yesu?—Yo. 13:15.
YESU BALESHESHE BALONGI BAAYE KIFULO MUSHINDO KINYI?
Yesu baadi muleshe batumibua baaye kifulo sunga bibaabadi na muikeelo wa kukita bilubilo bi bungi (Tala kikoso 11-13)
11. Mmianda kinyi ibubi ibabalesheshe kui Shake na Yowano? (Tala dingi kifuatulo.)
11 Yesu ta baadi atekie balongi baaye bua’shi bekale bapuidikie nya. Anka na kifulo kioso baadi muibakuashe buabadia kulumbuula bu muntu buabo bui bubi bua’shi bakuminyibue na Yehowa. Ungi musuusa, babidi ba ku batumibua ba Yesu kui Shake na Yowano, na nyinaabo babafikile kui Yesu bua’shi ebape miasu ikata mu Bufumu bu’Efile mukulu. (Mat. 20:20, 21) Shake na Yowano, babaadi baleshe binangu bia kuitatula na bia luabi.—Nki. 16:18.
12. Nka penda Shake na Yowano ngi babaadi baleshe kino kinangu ki bubi su? Patuula.
12 Ta nka penda Shake na Yowano ngi babaadi baleshe buabua buikashi bui bubi diadia efuku nya. Tala mushindo ubakitshine bangi batumibua: “Na [balongi] ekumi pababebipushiishe, babafitshiile baaba baana babidi ba muntu munda.” (Mat. 20:24, Kilombeeno Kipya 2014) Tui balombene kunangushena bishima bibaadi biambene Shake na Yowano na bangi batumibua. Pangi bangi babaadi bakule bishima bu bino: ‘Anunangushena’shi nui buwa kuitukila? Buakinyi anutekie miasu ikata kuitukila mu Bufumu bu’Efile Mukulu? Ta nka pend’anue bafube na Yesu ngofu nya. N’atue namu tui balombene kupeta miasu ikata nka bunue!’ Batumibua babaadi balekiele uno muanda wabofusha kifulo kiabo kia bu bana na bana.
13. Yesu baadi mukite naminyi bua kutshiba uno muanda wa batumibua baaye? (Mateo 20:25-28)
13 Yesu bakitshine naminyi mu uno muanda? Ta mufiite munda nya. Ta muambe’shi baadi mulombene kuenda mu kukimba bangi balongi be buwa nya, bantu be na kuiyisha kukata, na balombene kuikitshishena mianda nsaa yooso na kifulo. Mu kuilekena na biabia Yesu baadi muakule nabo na kalolo kooso muanda baadi muukie’shi abakuminaa kukita mianda ibuwa. (Badika Mateo 20:25-28.) Na dingi, Yesu baadi mutungunukie nka na kuibakitshina mianda na kifulo, sunga mbibaabadi bakite dingi bilubilo pa kukimba kuuka muntu mukile bukata munkatshi muabo.—Mak. 9:34; Luk. 22:24.
14. Batumibua ba Yesu babaadi bakudile mu ma mbalo e naminyi?
14 Binyibinyi Yesu baadi atentekiesha’shi bipikua bia ma mbalo akudile batumibua baaye bibaadi na bukitshishi kuabadi. (Yo. 2:24, 25) Babaadi bakudikule mu ma mbalo mubaadi bakata ba bipuilo abakumiina kuikala na miasu ikata na nkumo. (Mat. 23:6; puandikisha na video amba’shi, kushala pa mbalo ya kumpala mu madyo akata, na nkwasa ya kumpala mu bitumbwilo e mu note a kulonga mu Mateo 23:6.) Bakata ba bipuilo bia bena Yuda, babaadi abanangushena’shi be buwa kukila bangi. f (Luk. 18:9-12) Yesu baadi muukie ano ma mbalo abaadi akudile batumibua baaye, abaadi na bukitshishi ku mueneno aabo abo banabene na kui bangi. (Nki. 19:11) Ta baadi atengiela’shi batumibua baaye bakutue kukita bilubilo nya. Anka baadi na luishinko kuabadi nsaa ibaabadi abebikitshi. Baadi muukie’shi babaadi na mashimba e buwa, ngi buakinyi baadi muibakuashe na luishinko buabadia kukambila kuitatula kuabo na luabi na kupianyikisha bino bintu bioso na kifulo.
TUI KUAMBULA KILESHESHO KIA YESU NAMINYI?
15. Nkinyi kiatudi balombene kulongiela ku muanda ubatuukile pankatshi pa Shake na Yowano na bangi batumibua?
15 Tui kulongiela mianda ibungi ku muanda ubaadi ukitshikie pankatshi pa Shake na Yowano. Shake na Yowano babaadi bakite bi bubi p’abo kuteka miasu ikata mu Bufumu bu’Efile Mukulu. Anka bangi balongi babaadi bakite bi bubi p’abo kutadiila uno muanda wabuule buumune buabo. Anka Yesu baadi akitshiina batumibua booso ekumi na babidi, mianda na kalolo na kifulo. Bino abitulongiesha kinyi? Abitulongiesha’shi, ki na muulo ukata, ta mbiabia abikitshi bangi nya, kadi mmushindo w’atukitshi pabitale bilubilo biabo na kukutua kuabo kua kupuidika. Nkinyi kilombene kuitukuasha? Nsaa ayituluishisha muina Kidishitu netu, abitungu tuiyipushe atue banabene’shi: ‘Buakinyi biabia bibakitshi bi bamfiitshisha munda ngofu? Bino abilesha kubofula kampanda kuandi nako akutungu’shi ndumbuule su? Uno muntu bamfiitshisha munda, e na mianda ayimukalakasha su? Su ne na kabingilo ke buwa ka kumufiitshila munda, ne kumulesha kifulo na kumufuila lusa su?’ Biabia su tubanyisha kukitshina bangi mianda na kifulo, atunyisha kulesha’shi tui balongi ba Yesu ba binyibinyi.
16. Mmuanda kinyi dingi watudi balombene kulongiela ku kileshesho kia Yesu?
16 Kileshesho kia Yesu akitulongiesha dingi buatudia kuikitshisha bua kuuka bakuetu bena kidishitu kalolo. (Nki. 20:5) Anka Yesu auku bi mu mashimba. Anka atue t’atuuku bi mu mashimba nya. Ngi buakinyi abitungu tuikale na luishinko kui bakuetu balume na bakashi nsaa ya betuluishisha. (Ef. 4:1, 2; 1 Mp. 3:8) Abikala bitubofuile su tubalongo pabitale ma mbalo abadi bakudile. Tubandeyi kutaluula kingi kileshesho.
17. Mmushindo kinyi ubaadi ungi mukunkushi a kifunda mupete bukuashi p’aye kuuka bena Kidishitu naye kalolo?
17 Mukunkushi a kifunda atentekiesha ungi mukuetu mulume afubaa mu kangi kakongie ke mu Afrique a kutunduka’shi, bua musuusa wa kumpala nadi nanangushena’shi uno mukuetu te na kalolo. Nkinyi kibakitshine uno mukunkushi a kifunda? Bakuile’shi: “Pa mutue pa kusumbushena mukuetu mulume, naadi muate kitshibilo kia kumulonga bua kumuiwuka kalolo.” P’aye kukita bino, mukunkushi a kifunda baadi mulongie ingi mianda i bungi pabitale mbalo ikudile uno mukuetu na bukitshishi buabidi nabio ku muikeelo waye. Mukunkushi a kifunda atungunuka aamba’shi: “Kashaa naukile mushindo wikitshishe uno mukuetu buadia kukambila muikeelo wa mbalo yadi mukudile, na mushindo wadi muikitshishe bua kushintuluka, ne mumufule ngofu na dingi tatudi ba kuuku ba binyibinyi.” Biabia nsaa y’atuikitshisha bua kuuka bakuetu balume na bakashi kalolo, abikala bitubofuile bua kuibalesha kifulo.
18. Nkonko kinyi ayitungu’shi tuiyipushe nsaa y’abetuluishisha kui bena Kidishitu netu? (Nkindji 26:20)
18 Ingi nsaa tui kuikala na lukalo lua kuifubuila kui muina Kidishitu netu muituluishishe. Kia kumpala atukitshi kalolo nsaa yatuiyipusha atue banabene nkonko bu ino: ‘Ne na bishinkamisho bioso su?’ (Nki. 18:13) ‘Bi kuikala’shi t’akuminanga kumfiitshisha munda su?’ (Mul. 7:20) ‘Ami namu kashaa ntakitshine kilubilo ki biabia su?’ (Mul. 7:21, 22) ‘Su ne fubuila kui uno muntu bua kuisamba naye, abinyisha kutamisha muanda su abilumbula bu bia nkuminanga?’ (Badika Nkindji 26:20.) Su tubaata nsaa ya kutaluula ino nkonko, tui balombene kuata kitshibilo’shi kifulo kietu bua bakuetu kitutakule mu kubuikiila bilubilo biabo.
19. We na kitshibilo kia kukita kinyi?
19 Tumonyi tua Yehowa atulesha’shi mbalongi ba binyibinyi, pa kuilesheena kifulo ku muntu na muntu. Ooso a kuatudi mulombene kulesha’shi mmulongi a Kidishitu a binyibinyi, nsaa yalesha kifulo kia bu bana na bana kui bakuabo balume na bakashi sunga biabadi bakutue kupuidika. Nsaa yatukitshi bino, tui balombene kukuasha bangi buabadia kutundula lulanguilo lua binyibinyi bua kuibunga neetu pamune bua kulanguila Yehowa, Efile Mukulu sha kifulo. Biabia, tuateyi kitshibilo kia kutungunuka na kulesha kifulo akitutundusha bu bena Kidishitu ba binyibinyi.
LOONO 17 “Nakumiina”
a Bantu be bungi mbakumiine bia binyibinyi muanda wa kifulo kia binyibinyi ki’abamonaa munkatshi muetu. Biabia bu biatudi bakutue kupuidika, ingi nsaa t’abikalaa bibofule bua kuilesheena kifulo. Tubandeyi kutaluula buakinyi kifulo ki na muulo, na mushindo watudi balombene kuambula kileshesho kia Yesu nsaa ayikitshi bangi bilubilo.
b Tala mukanda wa “Viens, suis-moi,” shap. 17, Kikos. 10-11, mu mfualase.
c Tala muisambo awamba’shi: “Ma vie a enfin un but,” wi mu Kitenta kia Mulami kia mu 1/11/2012, Esak. 13-14, mu mfualase.
d Tala muisambo awamba’shi: “Tout semblait me réussir,” wi mu Kitenta kia Mulami kia mu 1/5/2012, Esak. 18-19, mu mfualase.
e Mu uno muisambo ta besambila bua miluisho ikata yabadi balombene kutaluula kui bakulu, bu ino yabadi batemune mu 1 Bena-Kodinda 6:9, 10, nya.
f Abakula mianda ibaabadi bakule kui ungi mulambukishi kunyima kua mafuku e bungi. Bambile’shi: “Nsenga tayekeele na bantu 30 balulame bu Abrahama nya. Su kui bantu 30, ami na muan’ande tui babidi ba munkatshi muabo, su be 10, tui babidi ba munkatshi muabo, su mbataano, tuibabidi ba munkatshi muabo, su mbabidi, nnami na muan’ande, su ngumune e kuanka, nnami.”
