MU LUDIMI lua ku kibangilo kishima kiabadi baluule bu “etempu” mu Bible a Traduction du monde nouveau nkilombene kulesha miotoka ya mishindo ilekeenelekeene. (Bik. 8:28, 29, 38) Biabia, abimueka’shi Mutungulue muin’Etshopi baadi mukaamine mu mootoka ukata kukila tuno tu matempu tupeela tubaabadi abafubisha kui basalayi ku ngoshi sunga bua kusuuka lubilo. Tubandeyi kutaluula tungi tubingilo bua bino bibatuisamba.

Mutungulue muin’Etshopi baadi muntu mukata baadi ende kui bula. Mutungulue muin’Etshopi ‘mmuntu baadi na matalua na baadi afubu bu mukuashi a Kandase, ndalamumba a bena Etshopi, na baadi alama bupeta buaye boso.’ (Bik. 8:27) Etshopi a kala ngi taadi lelo bu Soudan dia kuushi kua kipindi kia Ejipitu a kano kabidi. Abimueka’shi uno muana mulume ta baadi mukaamine mu mootoka wi bu w’abafubishaa efuku dioso nya, bibaadi abitungu’shi aate mootoka ukata buadia kusemuna bingi bintu bibaadi na muulo bua luendo luaye. Miotoka ibaabadi abafubisha mu siekele a kumpala bino bipungo bietu (B.B.), bua kutuala bantu abende mu luendo, ibaadi na bipombo binanka. Ungi mukanda wa Acts—An Exegetical Commentary awamba’shi: “Mootoka bu uno ubaadi na mbalo ikata ya kusemuina bibuta na bingi bintu, mmootoka ubaadi awikasha luendo buwa bukile, na pangi ubaadi ulombene kuenda mbalo i kuibula.”

Pa baadi Fidipe mufikie kui Mutungulue mui’Etshopi bamupetele kuete abadika. Muanda aubanga bino: “Fidipe bayile lubilo pepi nadio na amupusha kuete kubadika n’eyi di bukopo mukanda wa mutemuki Yeshaya.” (Bik. 8:30) Miotoka ya kuenda nayo mu luendo ta ibaadi ipuibue bua kusuuka lubilo nya. Kuno kutambuka kua bipeela ta kubaadi kukuashe nka penda muin’Etshopi buadia kubadika nya, kadi kubaadi kukuashe dingi mpaa na Fidipe baadi atambuka lua ngua buadia kumubanga.

Mutungulue muin’Etshopi “batekiele Fidipe bua kukaamina na kushala naye.” (Bik. 8:31) Mu luno luendo lui bino lua etempu, be mushaale mbalombene kuimuimana mpaa na buimane. Biabia, mu dino etempu dia kuenda nadio mu luendo mubaadi mbalo ilombene Mutungulue muin’Etshopi na Fidipe kuimushaala.

Mu kuipushena na mayi ayokielue e mu mukanda wa Bikitshino shapitre 8, abilesha mianda i kuanka ya kala, mikanda yetu iyibanga kulesha binobino binfuanyi bia muntu mukata Mutungulue muin’Etshopi mmukaamine ku etempu dikata kukila tumatempu tupeela tubaabadi abafubisha kui basalayi ku ngoshi sunga bua kusuuka lubilo.