MUISAMBO WA KULONGA 31
LOONO 12 Efile Mukata, Yehowa
Kiabadi bakite kui Yehowa bua kupaasha bantu ku muluisho na lufu
“Efile Mukulu bafudile ba pa nsenga ngofu paaye kutuusha muana aaye eeleka.”—YO. 3:16.
KI’ATUISAMBILA
Atuisambila mpango yabadi baate kui Yehowa bua kuitukuasha bua’shi tumone bia kulua na muluisho na kiadi mukite bua’shi tutuukie mu bupika bua muluisho na kupeta muwa wa loso.
1-2. (a) Muluisho nkinyi, na tui koobesha kuiutshimuna naminyi? (Tala dingi: “Kishima kiabadi bapatuule.”) (b) Nkinyi ki’atukataluula mu uno muisambo na mu ingi miisambo ya mu kino Kitenta kia Mulami? (Tala dingi mayi e muisaki 32 “Mukuetu abadika.”Tala dingi “Kui ababadika” mu kino Kitenta kia Mulami.)
OKUMIINA kuuka mushindo ukufule Yehowa Efile Mukulu su? Tala mushindo wibuwa odia kupeta lualulo: Longa biadi mukite bua kukupaasha ku mulusho na lufu. Muluisho a nyi mmuishikuanyi mukata, oshi mulombene kutshokola bupenka bobe. Atukitaa miluisho efuku dioso, na atufuiyaa pa muanda wa muluisho. (Lom. 5:12) Anka mukandu wibuwa nguno: Ku bukuashi bua Yehowa, tui balombene kutshokola muluisho. Eyendo’shi, atoobesha kutshokola!
2 Takudi bipua pepi 6000, Yehowa Efile Mukulu kuete kukuasha bantu buabadia kukambila muluisho. Buakinyi? Muanda mmuitufule. Baadi mufule bantu kubanga ku kibangilo, nyi buakinyi mmukite kintu kikata bua kuibakuatshishena mu ino ngoshi. Efile Mukulu auku’shi muluisho autualaa ku lufu, biabia t’akumiina’shi tufue nya. Anka, akumiina’shi tuikale na muwa bua loso. (Lom. 6:23) Nyi bi’akumiina dingi b’obe. Mu uno muisambo atukaluula ku ino nkonko isatu: (1) Yehowa mmukite kinyi bua kupa bantu ba sha miluisho lukulupilo? (2) Nkinyi kibaadi kikite bantu ba sha miluisho ba kala bua’shi Yehowa ebakumiine? (3) Nkinyi kikite Yesu bua kupaasha bantu ku muluisho?
YEHOWA MMUKITE KINYI BUA KUPA BANTU BA SHA MILUISHO LUKULUPILO?
3. Mmushindo kinyi ubafikile baledi betu ba kumpala bu ba sha miluisho?
3 Nsaa ibaadi Yehowa mupangie mulume na mukashi ba kumpala, baadi akumiina’shi bekale na muloo. Baadi muibape mbalo ikile buwa ya kushaala, kia buntu ki’eyibakishi, na mudimo wibuwa ngofu. Babaadi na kia kuwusha nsenga na bana baabo na kuikasha nsenga ishima bu mpaladiiso, bu bibaadi lupango lua Edene. Baadi muibelele penda muiya umune. Na nkuibadimusha’shi, su abatupilua wawa muiya, pa kukumiina kumutombokiela, muluisho wabo autuala ku lufu. Atuuku kibaadi kikitshikie. Kikudi kish’akimuekaa, kishibaadi kifule Efile Mukulu sunga kuibafula, kibafikile na akio nkuibatakula mu kukita muluisho. Adame na Eva babaadi bakite kiakia kibaabadi bebalungule kui yawa muikeyilu ntomboshi, Satana. Babakutshilue kutuula lukulupilo mui Nshabo sha kifulo, abo nkukita muluisho. Anka bu biatuiuku, mayi a Yehowa abaadi alombane. Kubanga diadia efuku, abaadi na kia kukienga bua muluisho wabo: Ababangile kununupa, na ku nfudiilo abo nkufua.—Kib. 1:28, 29; 2:8, 9, 16-18; 3:1-6, 17-19, 24; 5:5.
4. Buakinyi Yehowa mmushikue muluisho, na buakinyi kuete kuitukuasha bua kuiwutshimuna? (Bena Loma 8:20, 21)
4 Yehowa baadi mufundishe uno muanda wa malua mu Bible bua kuitukuasha. Awitukuasha bua kupusha buakinyi mmushikue muluisho ngofu. Muluisho awituabuula na Nshetu, na kuitutuala ku lufu. (Yesh. 59:2) Satana mmushikue Yehowa na bantu. Nyi buakinyi baadi mutompe Adame na Eva buabadia kukita muluisho, na ki’atungunuka na kutompa bantu mpa na lelo uno. Biabia, nsaa ibaadi Adame na Eva bakite muluisho, pangi Satana baadi mupuandikishe’shi, baluisha mpango ya Yehowa bua bantu. Anka tabaadi ashinguula mushindo wikale Yehowa nsha kifulo. Efile Mukulu ta mmushintuule efuku su ndimune mpango yaaye bua bana ba Adame na Eva nya. Mmufule bantu, nyi buakinyi musango umue baadi mupe bantu boso lukulupilo. (Badika Bena Loma 8:20, 21.) Yehowa baadi auku’shi bangi ba ku bana baabo abakaata kitshibilo kia kumufula na kukimba bukuashi buaye bua kulua na muluisho. Bu biadi Nshabo na Mupangi aabo, baadi na kia kuibapa mushindo wa kutuuka ku bupika bua muluisho na kuifubuila pepi naaye. Yehowa baadi mulombene kuibikita naminyi?
5. Nsaa kinyi ibaadi Yehowa mutuushe lukulupilo lua kumpala bua bantu ba sha miluisho? Patuula. (Kibangilo 3:15)
5 Badika Kibangilo 3:15. Lukulupilo lua kumpala lubaadi lumuenekie nsaa ibaadi Yehowa mutshibile Satana kiimu. Efile Mukulu baadi mutemukie’shi: “Kekulu” nyi akakapaasha bantu. Kano kekulu nyi akakasooso Satana, na kulumbuula bubi boso bubaadi mufuishe mu Edene. (1 Yo. 3:8) Biabia, kano kekulu kabaadi na kia kukienga. Satana baadi na kia kuikasuma ku kisuulu, na kuikayipaa. Bino bibaadi bilombene kutapa Yehowa kuishimba ngofu. Anka Yehowa baadi mukumiine kukienga na kutadiila bua’shi kano “kekulu” ka kiengie bua kupaasha bantu ku muluisho na lufu!
BANTU BA SHA MILUISHO BA KALA BABAADI BAKITE KINYI BUA’SHI YEHOWA EBAKUMIINE?
6. Nkinyi kibakitshine bana balume ba sha lukumiino bu Abele na Nowa, buabadia kuifubuila pepi na Yehowa?
6 Munda mua ma siekele abapu kukila, Yehowa mmuende na kulesha patooka mushindo ulombene bantu ba sha miluisho kuifubuila pepi naye. Abele, muana mulume a kabidi a Adame na Eva, baadi bu muntu a kumpala baadi na lukumiino mui Yehowa kunyima kua bu ntomboshi bua mu Edene. Bu bibaadi Abele mmufule Yehowa na akimbi Kumusankisha na kuifubuila pepi Naaye, baadi mumulambule mulambu. Abele baadi mulami a mikooko, biabia baadi muate bangi ba ku bana ba mikooko yaaye na ebayipaa bua kulambula Yehowa. Yehowa baadi mukite kinyi? Baadi ‘mukumiine Abele na mulambu waye.’ (Kib. 4:4) Yehowa baadi mukumiine ingi milambu i bino ibaabadi bamulambule kui bantu babaadi bamufule na bakulupile muadi, bu Nowa. (Kib. 8:20, 21) Pabaadi mukumiine ino milambu, Yehowa baadi muleshe’shi mmulombene kukumiina bantu ba sha miluisho, na mbalombene kuifubuila pepi naaye. b
7. Tui kulongiela kinyi ku mushindo ubaadi Abrahame mukumiine kulambula muana aaye?
7 Abrahame baadi na lukumiino lui bukopo mui Yehowa. Yehowa baadi mumutekie buadia kukita kintu kikile bukopo. Balunguile Abrahame bua’shi a mulambule muana aaye Izaake. Eyendo’shi bua Abrahame, kino kibaadi kintu kikile bukopo kiashibaadi apuandikisha kukita. Sunga mbiabia, baadi muilumbuule bua kukita kibaadi kimutekie Yehowa. Pabaadi Abrahame akiebe kuipaa muana aaye, Efile Mukulu baadi mumuimikie. Kino kileshesho akilongiesha bantu boso be na lukumiino muanda wa binyibinyi wi na muulo wa’shi Yehowa baadi mulombene kukumiina kutuusha Muana aaye a kifulo bu mulambu. Yehowa mmufule bantu ngofu.—Kib. 22:1-18.
8. Milambu ya nyema ibaabadi batekie mu Muiya ayitulongiesha kinyi? (Bena Levi 4:27-29; 17:11)
8 Nsaa ibaadi Yehowa mupe bena Isalele Muiya, baadi muibatekie buabadia kulambula nyema bua kuibafuila lusa ku miluisho yabo. (Badika Bena Levi 4:27-29; 17:11.) Ino milambu ibaadi ayilesha’shi Yehowa akatuusha mulambu ukile buwa aukapaasha bantu ku miluisho. Efile Mukulu baadi mulungule batemuki buabadia kufunda pabitale kekulu kabaadi kalayibue, kabekeele bu Muana e pa buaye a Efile Mukulu, baadi na kia kukienga na kuipayibua. Baadi na kia kuikala nka bu mukooko ulambulue. (Yesh. 53:1-12) Banda kunangushena ku uno muanda: Yehowa baadi na kia kuata mpango ya’shi Muana aaye adi mufule ekale bu mulambu bua kupaasha bantu ku muluisho na lufu, mpa na obe!
MMUSHINDO KINYI UBAADI YESU MUFIKIE MU KUITUPAASHA?
9. Yowano mubatshishi baadi muakule kinyi pabitale Yesu? (Bena Ebelu 9:22; 10:1-4, 12)
9 Mu siekele a kumpala bino bipungo bietu (B.B), Yowano mubatshishi mufubi a Efile Mukulu bamuene Yesu a mu Nazarete afiki kuadi na amba’shi: “Talayi Muana a mukooko a Efile Mukulu yawa akatusha miluisho ya bantu ba pa nsenga!” (Yo. 1:29) Ano mayi abaadi aaleshe’shi Yesu nnanye kekulu kabaadi kalayibue kubanga kala. Yesu baadi na kia kulambula muwa waye. Muanda wi na muulo, bantu ba sha miluisho, babaadi na lukulupilo lukile buwa: Muluisho aukatshokolua bua loso.—Badika Bena Ebelu 9:22; 10:1-4, 12.
10. Yesu baadi muleshe naminyi’shi ‘mmufikie mu kuitanyina’ ba nkitshishi ba miluisho?
10 Yesu baadi mutuule binangu biaye ngofu kui bantu babaadi banemeenue na bushito bua muluisho, aye nkuibetamina buabadia kufika balongi baaye. Baadi auku’shi muluisho nyi nsulo ya makienga a bantu. Nyi buakinyi baadi mukuashe balume na bakashi babaadi abakiengie muanda wa muluisho ubaabadi bakite. Ku bukuashi bua kileshesho, baadi mupatuule’shi: “Bantu be na mbidi bukome, tabe na lukalo lua munganga, anka baaba abakumbu, nyi be naye lukalo.” Baadi mukumbashe’shi: “Nemufikie mu kuitanyina ba nkitshishi ba miluisho.” (Mat. 9:12, 13) Biabia nyi bibakitshine Yesu. Na kalolo koso baadi mulekieele miluisho ya muana mukashi baadi mukumune ngua na mpolo yaaye. (Luk. 7:37-50) Baadi mulongieshe mukashi a mu Samadiya bia binyibinyi bi na muulo pa mushima wa mema, sunga mbibaadi auku’shi mmushaale na mulume shii aaye. (Yo. 4:7, 17-19, 25, 26) Efile Mukulu mmupe Yesu bukome bua kushimisha kiakia akifuishaa muluisho—lufu. Naminyi? Yesu baadi musangule bantu ku lufu, ba bipua bilekene, balume na bakashi.—Mat. 11:5.
11. Buakinyi bantu ba sha miluisho abaadi abakumiina kuifubuila pepi na Yesu?
11 Abipushika kalolo buakinyi bantu babaadi bepane mu muluisho abaadi abakumiina kuifubuila pepi na Yesu. Baadi muibaleshe lusa na kuituula pa mbalo yabo. Tababaadi abapusha moo bua kuifubuila pepi naaye. (Luk. 15:1, 2) Na Yesu baadi ebatumbula na kuibapa buedi muanda wa lukumiino luabo muadi. (Luk. 19:1-10) Baadi muleshe lusa mu kipaso kipuidikie nka bu Nshaye. (Yo. 14:9) Mu ngakuilo na mu bikitshino biaye, baadi muleshe’shi Nshaye sha lusa na kalolo mmufule bantu na akumiina kukuasha oso a kuabadi buadia kutshokola muluisho. Yesu baadi mukuashe bantu ba sha miluisho babaadi abakumiina kushiintuula nshalelo aabo na kumulonda.—Luk. 5:27, 28.
12. Yesu baadi muakule kinyi pabitale lufu luaye?
12 Yesu baadi auku akimutengiela kumpala. Misusa ibungi, baadi mulungule balongi baaye’shi abakamuluishisha na kumuipaa ku mutshi. (Mat. 17:22; 20:18, 19) Baadi auku’shi ku bukuashi bua mulambu waaye, akakatusha muluisho pa nsenga, nka bibaabadi Yowano muambe na bibaabadi batemukie kui batemuki. Yesu bakuile dingi’shi kunyima kua lufu luaye ‘akakaka bantu ba mishindo yoso’ kuadi. (Yo. 12:32) Bantu ba sha miluisho mbakumbene kusankisha Yehowa pa kukumiina Yesu bu Nfumuabo na kulonda matabula aaye. Biabia abibakuasha buabadia “kupoososhibua ku bupika bua muluisho.” (Lom. 6:14, 18, 22; Yo. 8:32) Nyi buakinyi Yesu baadi munyingie eshimba na akumiina kufua lufu lua makienga bua kuitupaasha.—Yo. 10:17, 18.
13. Yesu baadi mufue mu mushindo kinyi, na lufu luaye aluitulongiesha kinyi pabitale Yehowa Efile Mukulu? (Tala dingi kifuatulo.)
13 Yesu babaadi bamupaane, bamukuate, bamukee, bamudimbiile mianda, bamutshibile kiimu’shi bapiila, mpa na kumukengiesha. Basalayi babaadi bende naye ku mbalo ya kumuipayila na abo nkumukookola ku mutshi. Pabaadi anyingiila na lulamato loso dino dikienga, kubaadi Mungi muntu baadi edipusha dingi ngofu. Nyi Yehowa Efile Mukulu. Baadi na ngobesha na bukome bua kuimika diadia dikienga anka tabaadi muibikite nya. Buakinyi? Yehowa baadi mufule Muana aaye ngofu, biabia buakinyi baadi mutadiile bua’shi akiengie na afue? Muanda Yehowa mmuitufule. Yesu bambile’shi: “Efile Mukulu bafudile ba pa nsenga ngofu paaye kutuusha muana aaye eeleka, bua’shi muntu oso aleesha lukumiino muadi tabutudibuanga, kadi apete muwa wa loso.”—Yo. 3:16.
Yehowa baadi mutapikie kuishimba ngofu pabaadi mutadiile bua’shi Muana aaye ayipayibue bua kuitufungusha ku bupika bua muluisho na lufu (Tala kikoso 13)
14. Mulambu wa Yesu awitulongiesha kinyi?
14 Mulambu wa Yesu nyi nkishinkamiisho kikata akilesha’shi Yehowa mmufule bana ba Adame na Eva. Aulesha mushindo wabadi bakufule kui Yehowa. Baadi mulambule Muana aaye aadi mufule na aye nkunyingiila kenyongoshi katushii bia kupuandikisha bua kukupaasha ku muluisho na lufu. (1 Yo. 4:9, 10) Eyendo’shi, akumiina kukuasha oso a kuatudi buadia kulua na muluisho, na kuiutshokola!
15. Abitungu’shi tukite kinyi bua kupeta bukuashi bua kia buntu ki’Efile Mukulu kia mulambu wa nkuulo wa Yesu?
15 Kia buntu ki’Efile Mukulu, mulambu wa nkuulo wa Muana aaye eeleka, nkikuashe buatudia kulekielua miluisho yetu. Anka, bua’shi Efile Mukulu etufuile lusa, abitungu tukite kintu kampanda. Nkintu kinyi? Yowano Mubatshishi mpa na Yesu aye nabene mbatuushe lualuulo’shi: “Elangieyi ku miluisho yenu, muanda Bufumu bua muiyilu tabudi pepi.” (Mat. 3:1, 2; 4:17) Kuilanga kui na muulo su atukumiina kulua na muluisho na kuifubuila pepi na Nshetu sha kifulo. Kadi kuilanga akupatuula kinyi, na mmushindo kinyi w’akuitukuasha buatudia kusankisha Yehowa sunga mbiatudi bena miluisho? Muisambo wa kulonga aulondo aukaluula ku luno lukonko.
LOONO 18 Lutumbu bwa nkuulo
a KISHIMA KIABADI BAPATUULE: Mu Bible, kishima “muluisho” nkilombene kupatuula bintu bibidi. Nkilombene kulesha p’atukitshi kiakia ki’abamba kui Yehowa’shi ki bubi, sunga nsaa y’atukutua kukita kiakia kiamba’shi kibuwa. Biabia kishima “muluisho” nkilombene dingi kulesha nshalelo a kukutua kua kupuidika atudi bapiane kui Adame. Tukuete kufua muanda wa muluisho watudi bapiane.
