MUISAMBO WA KULONGA 34
LOONO 107 Kileshesho kya kifulo kya Yehowa
Mushindo auleshaa bakulu lusa na kalolo kui bantu bakite miluisho
‘Efile Mukulu e na kalolo p’akimbi kukukunkusha bua kuilanga.’—LOM. 2:4.
KI’ATUISAMBILA
Abikitaa bakulu bua kukuasha muina kakongie mukite muluisho ukata.
1. Nkinyi kilombene kukitshika kunyima kua muntu kukita muluisho ukata?
MU MUISAMBO ushaale, tuikele balongie bibaadi Mpoolo mulungule kakongie ka Kodinda kiakadia kukita na muntu baadi mukite muluisho ukata. Yawa nkitshishi a muluisho tabaadi muilangie na abo nkumukatusha mu kakongie. Biabia, anka bu abibilesha kifundue kia mutue wa muanda, bangi bakite miluisho ikata mbalombene kukumiibua ku mashimba. Mbalombene kukunkushibua mu kuilanga. (Lom. 2:4) Bakulu mbalombene kuibakunkusha mu kuilanga naminyi?
2-3. Nkinyi akitungu’shi tukite su tubauku’shi muina Nkidishitu netu bakitshi muluisho ukata, na mbuakinyi?
2 Su bakulu t’abauku’shi muina kakongie mmukite muluisho ukata, ta mbalombene kumukuasha nya. Biabia, nkinyi kiatudi balombene kukita su tuauka’shi muina Nkidishitu netu bakitshi muluisho ukata, nkintu kilombene kutakula bua’shi akatushibue mu kakongie? Abitungu tumunyingishe buadia kuenda mu kukimba bukuashi kui bakulu.—Yesh. 1:18; Bik. 20:28; 1 Mp. 5:2.
3 Kadi, tui kukita kinyi su yawa mukite muluisho apela kuenda mu kulungula bakulu? Paapa bua’shi apete bukuashi buadi nabo lukalo, abitungu tuende atue banabene tukalungule bakulu. Su tubakitshi biabia, atulesha’shi tui bafule mukuetu mulume sunga mukashi muanda atuuku’shi bakulu mbakumbene kumukuasha. Su nkitshishi a miluisho atungunuka na kukita miluisho, ashimisha kipuano kiaye na Yehowa, mmulombene dingi kuluisha nkumo ya kakongie. Nyi buakinyi, sunga biekala bukopo bua kuibikita, atunyingi’eshimba bua kuenda mu kulungula bakulu muanda tui bafule Yehowa na mukuetu mulume sunga mukashi.—Mis. 27:14.
KI’ABAKITAA KUI BAKULU BUA KUKUASHA MUNTU MUKITE MULUISHO UKATA
4. Bakulu be na kepatshila kinyi nsaa y’abesamba na muntu mukite muluisho ukata?
4 Nsaa i muina kakongie bakitshi muluisho ukata, kasaka ka bakulu akasangula bakulu basatu ba munkatshi muabo bua kukita komite. a Bano bakuetu balume abitungu bekale na kuiyisha na kuuka mikalo yabo. Abetatshisha bua kukuasha muntu mukite muluisho buadia kuilanga, anka bibuwa bashinguule’shi ta mbalombene kukitshisha muntu pa bukopo buadia kushintuluka. (Miy. 30:19) Abitungu bakulu bashinguule’shi ta mbankitshishi ba miluisho boso balombene kuilanga bu bibaadi bikite Nfumu Davide. (2 Sam. 12:13) Bangi ba nkitshishi ba miluisho mbalombene kuata kitshibilo kia kupela kukookiela elango dia Yehowa. (Kib. 4:6-8) Sunga mbiabia, kepatshila ka bakulu, nka kukita muabo moso pakudi mushindo bua kukunkusha muntu mukite muluisho mu kuilanga. Nkinyi akitungu’shi bakulu batentekieshe nsaa y’abesamba na muntu mukite muluisho?
5. Abitungu’shi bakulu balamiine kinyi mu binangu nsaa y’abesamba na muntu mukite muluisho? (2 Timote 2:24-26) (Tala dingi kifuatulo.)
5 Bakulu abauku’shi sunga biekala’shi muntu mmukite muluisho ukata, e nka na muulo ku meso kua Yehowa. (Luk. 15:4, 6) Nyi buakinyi, nsaa y’abesamba na muntu t’abalesha’shi be na mianda ibukopo kuadi mu ngakuilo na bikitshino biabo nya; sunga kupuandikisha’shi kisangilo kiabo nkitale penda kuela nkonko na kuuka muanda ukitshikie. Pamutue pa biabia, abalesha ngikashi ayisanganyibua mu 2 Timote 2:24-26. (Badika.) Bakulu abakitshi bia’shi bekale na kalolo na kupopeela nsaa y’abetatshisha bua kukuma eshimba diaye.
Anka bu bibaadi abikitshi balami ba mikooko ba kala, bakulu abakitaa muabo moso bua kupeta mukooko ushimine (Tala kikoso 5)
6. Mmushindo kinyi ulombene bakulu kulumbuula eshimba diabo kumpala kuabadia kuisamba na nkitshishi a miluisho? (Bena Loma 2:4)
6 Bakulu abalumbuulaa mashimba aabo. Abetatshisha bua kuambula Yehowa mu bioso bi’abakitshina nkitshishi a miluisho, abatentekiesha ano mayi a Mpoolo: ‘Efile Mukulu e na kalolo p’akimbi kukukunkusha mu kuilanga.’ (Badika Bena Loma 2:4.) Bakulu abaatentekiesha’shi, kia kumpala mbekale bu balami ba mikooko be ku bukunkushi bua Nkidishitu. (Yesh. 11:3, 4; Mat. 18:18-20) Kumpala kuabadia kuisamba na muntu mukite muluisho, komite ele luteko na kutentekiesha kepatshila kaaye nyi nkuamba’shi, kukunkusha muntu mukite muluisho mu kuilanga. Abakimbuula mu Bifundue na mu mikanda yetu. Na abatekie Yehowa buadia kuibakuasha buabadia kupusha winyi muntu na muanda waye. Abataluula kiabadi na lukalo lua kuuka pabitale nshalelo a kala a yawa muntu mukite muluisho bua kuuka kimutakule mu kunangushena, kuikala na mueneno, mpa na muikelo wi biabia.—Nki. 20:5.
7-8. Mmushindo kinyi ulombene bakulu kuambula luishinko lua Yehowa nsaa y’abesamba na muntu mukite muluisho ukata?
7 Bakulu abambulaa luishinko lua Yehowa. Abatentekieshaa mushindo ubaadi Yehowa mutompe kukuasha bankitshishi ba bubi mu mafuku a kala. Bu kileshesho, Yehowa baadi muleshe Kayina luishinko. Aye nkumulungula kilombene kukitshika su ta mmushintulukie na’shi amuelela miabi su bamukookiela. (Kib. 4:6, 7) Yehowa baadi mutume mutemuki Natane buadia kupa Davide elango. Natane baadi mufubishe kileshesho kibaadi kikuashe Davide buadia kuilanga. (2 Sam. 12:1-7) Yehowa tabaadi ‘mukookie kutuma’ batemuki baaye “misusa na misusa” kui muilo wa Isalele nsaa yaushibaadi umukookiele. (Yel. 7:24, 25) Tabaadi mutengiele’shi muilo waye wilangie kumpala kuadia kuiukuasha nya. Pamutue pa biabia, baadi muate mpango ya kuibanyingisha buabadia kuilanga.
8 Bakulu abambulaa kileshesho kia Yehowa nsaa y’abetatshisha bua kukuasha muntu mukite muluisho ukata. “Abebakitshina mianda ”na kalolo koso” anka bu abilesha 2 Timote 4:2, nsaa y’abanangushena na muina Nkidishitu mukalakashue. Biabia, abitungu’shi mukulu ekale n’eshimba difukame na luishinko bua kumona bia kukuasha muntu mukite muluisho akumiine kukita bibuwa. Su [mukulu] ekala na nsungu sunga’shi mmukalakashue, yawa muntu mmulombene kupela kuteemesha elango sunga kupela kuilanga.”
9-10. Mmushindo kinyi ulombene bakulu kukuasha nkitshishi a miluisho buadia kunangushena ku mianda imutakule mu kukita muluisho?
9 Bakulu abetatshishaa bua kuuka mianda imutakule bua kukita muluisho. Bu kileshesho, mmuende na kubofula kapeelakapeela muanda wa kulenguula kuilongiela na kuenda mu bulungudi su? T’ekalanga dingi ele nteko kui Yehowa sunga’shi nteko yaaye ayikalanga ya kinundunundu? T’ekalanga dingi etatshisha bua kukambila nkalo ibubi? Ba kuku baye mba nnanyi? Na mbintu kinyi bi’akishaa nabio kapapi? Bitshibilo biadi muate mbikale na bukitshishi ku ngielelo aaye a binangu na nkalo yaaye naminyi? Ashinguula’shi bitshibilo biadi muate na muikelo waye mbinyongoshe Nshaye, Yehowa su?
10 Bakulu mbalombene kuela nkitshishi a miluisho nkonko ilombene kumutakula mu kunangushena pabitale bintu bibofushe kipuano kiaye na Yehowa na bimutakule mu kukita muluisho. Abebikitshi na kalolo koso kushi kumuela nkonko pabitale mianda imutale nka aye nabene ishi ilombeene bakulu kuuka. (Nki. 20:5) Na dingi, mbalombene kufubisha bileshesho bua kukuasha muntu anangushene ku bikitshino biaye na kumona bubi buabio, nka bu bibaadi Natane mufubishe kileshesho bua kukuasha Davide. Pangi musango wa kumpala w’abesamba naaye, yawa muntu mmulombene kubanga kuinyongola pabitale bitshibilo bibaadi muate na pabitale ngielelo aaye a binangu. Mmulombene pangi mpa na kuilanga .
11. Mushindo kinyi ubaadi Yesu mukitshine ba nkitshishi ba miluisho mianda?
11 Bakulu abetatshishaa bua kuambula Yesu. Pabaadi esamba na Saule a ku Tarse, Yesu aye bapu kusanguka baadi mumuele luno lukonko: “Saule, Saule, buakinyi okuete kunkiengiesha?” Paapa Yesu baadi mumukuashe buadia kutundula bubi bubaadi akitshi. (Bik. 9:3-6) Na pabitale “yawa muana mukashi Yezabele,” Yesu bambile’shi: “Ne mumulekiele nsaa bua’shi elangie.”—Kbf. 2:20, 21.
12-13. Bakulu mbalombene kulekiela nkitshishi a bubi nsaa ya kuilanga naminyi? (Tala dingi kifuatulo.)
12 Bakulu abambulaa Yesu, na t’abataa kitshibilo bukidibukidi pa kunangushena’shi nkitshishi a miluisho t’ashintuluka nya. Bangi mbalombene kuilanga nsaa y’abebungu bua musango wa kumpala na bakulu, bua bangi namu abitungu nsaa ibungi. Biabia bakulu mbalombene kuata mpango ya kuisamba na nkitshishi a miluisho kushi penda musango umune. Pangi, kunyima kua kuisamba naaye mususa wa kumpala, muina Nkidishitu mukite muluisho mmulombene kubanga kunangushena pabitale biabamulunguile. Mmulombene kulesha kuiyisha na kuteka Yehowa buadia kumufuila lusa ku muluisho waye. (Mis. 32:5; 38:18) Paapa, nsaa y’abesamba naye ungi mususa, nkitshishi a muluisho mmulombene kuikala na mmueneno muilekene na ayikalanga naaye musango wa kumpala.
13 Bua kukunkusha nkitshishi a miluisho mu kuilanga, bakulu abetuulu pa mbalo yaaye na kumulesha kalolo. Abakulupila na kuela nteko kui Yehowa bua’shi ele muabi ku bioso bi’abakitshi bua’shi muina Nkidishitu mukite muluisho ashintuule binangu biaye na elangie .—2 Ti. 2:25, 26.
Ingi nsaa bakulu mbalombene kuisamba na muntu mukite muluisho kushi penda musango umune bua kumulekiela nsaa yadia kuilanga (Tala kikoso 12)
14. Ntumbo ayende kui nnanyi nsaa i nkitshishi a miluisho elanga , na mbuakinyi?
14 Su nkitshishi a muluisho b’elanga, atuikala na muloo! (Luk. 15:7, 10) Ntumbo ayende kui nnanyi? Kui bakulu su? Tentekiesha bino bibafundile Mpoolo pabitale ba nkitshishi ba bubi: “Pangi Efile Mukulu e kuibakuasha bua kuilanga.” (2 Ti. 2:25) Biabia nyi Yehowa, ta mmuntu su ngumune bakuasha muina Nkidishitu buadia kushintuula binangu biaye na mmueneno aaye nya. Mpoolo apatuula mianda ibuwa ayikitshika nsaa ayilanga muntu . Yawa muntu mmulombene kupeta kiukilo kibungi kia bia binyibinyi, apetuula binangu bibuwa, na apanda ku muteo wa Satana.—2 Ti. 2:26.
15. Mmushindo kinyi ulombene bakulu kutungunuka na kukuasha nkitshishi a miluisho?
15 Nsaa i muntu elanga , komite aata mpango ya kutungunuka na kumutembela bua kumukuasha buadia kunyingisha lukumiino luaye, na kumukuasha buadia kutungunuka na kukambila bitompuanga bia Satana buadia kukita bibuwa. (Eb. 12:12, 13) Eyendo’shi, bakulu t’abalungula muntu su ngumune ka muanda sunga kapeela pabitale muluisho wabadi bakite kui muntu nya. Kadi abitungu’shi kakongie kaukie kinyi?
“OLANGIE BANTU ABAKITSHI MILUISHO KU MESO KUA BANTU BOSO”
16. Muyile 1 Timote 5:20, muaku “bantu boso” ubakuile Mpoolo aulesha kinyi?
16 Badika 1 Timote 5:20. Mpoolo baadi mufundile Timote baadi mukulu naaye, amupatuluila biadia kukita na “bantu abakitshi miluisho.” Mpoolo baadi akiebe kuakula’shi kakongie kashima kabaadi bu “bantu boso” su? Ta mbiabia nya. Anka, baadi akula pabitale bantu bapeela babaadi balombene kuuka muluisho. Baaba bantu mbalombene kuikala bantu babaadi bapetekielue pabaadi pakitshikie muluisho, sunga babaabadi balungule kui nkitshishi a muluisho aye nabene. Bakulu mbalombene kuiukisha baba bantu mu bufiefie’shi mbataluule wawa muanda na’shi, nkitshishi a miluisho mmunyokibue.
17. Su bantu bebungi abauku muluisho ukata sunga’shi abakewiuku, abitungu kuukisha kakongie naminyi, na mbuakinyi?
17 Ingi nsaa bantu bebungi mu kakongie mbalombene kuuka muluisho, sunga’shi abakeuku wanka kunyima. Pabitale wawa muanda, “bantu boso” mbalombene kuikala kakongie kashima. Paapa mukulu umune mmulombene kuukisha kakongie’shi mukuetu mulume sunga mukashi babamusaashila. Buakinyi? Mpoolo aluula’shi: “Bua’shi biabia bidimushe baaba babashaala” tala bakita miluisho ikata.
18. Bakulu be kutshiba kilumbu kia muana mubatshishibue e muushi mua bipua 18 naminyi? (Tala dingi kifuatulo.)
18 Bakulu mbalombene kukita kinyi nsaa i muana mubatshishibue e muushi mua bipua 18 bakitshi muluisho ukata? Kasaka ka bakulu akaata mpango ya’shi bakulu babidi besambe naaye pamune na baledi baaye bena Nkidishitu. b Bakulu abepusha baledi biabadi bakite bua kukuasha muana bua’shi ashintuule muikelo waye na kuilanga . Su muana ateemesha elango dia baledi baaye na ashintuula binangu na muikelo waye, bakulu babidi mbalombene kuata kitshibilo kia kutadiila baledi baye bua’shi batungunukie na kumukuasha. Muanda baledi nyi babadi bape bushito kui Efile Mukulu bua kunyoka bana babo na kifulo kioso. (Miy. 6:6, 7; Nki. 6:20; 22:6; Ef. 6:2-4) Ingi misusa, bakulu abekala abepusha baledi su muana kuete kupeta bukuashi buadi nabo lukalo. Kadi, bakulu mbalombene kukita kinyi su muana mupue kubatshishibua apela kushintuula muikelo waye? Yaya nsaa, komite a bakulu afumankana naye pamune na baledi baaye bena Nkidishitu.
Nsaa i muana e muushi mua bipua 18 bakitshi muluisho, bakulu abesamba naye pamune na baledi baaye bena Nkidishitu (Tala kikoso 18)
“YEHOWA E NA KIFULO KIKATA, NA LUSA LUI BUNGI”
19. Bakulu abambulaa Yehowa naminyi, nsaa y’abesamba na muntu mukite muluisho?
19 Bakulu be mu komite be na bushito ku meso kua Yehowa bua kulama buiselele bua kakongie. (1 Ko. 5:7) Anka abakitshi muabo moso buabadia kukuasha muntu mukite muluisho buadia kuilanga su kui mushindo. Na nsaa y’abakuasha muntu, abatungunuka na kukulupila’shi ashintuluka. Buakinyi? Muanda abakumiina kuambula Yehowa aye “e na kifulo kikata, na lusa lui bungi.” (Yak. 5:11) Yowano mutumibua baadi mupue kukula, baadi muleshe bino binangu. Bafundile’shi: “Bana bande bakinga, nenufundila ino mianda bua’shi tanukitanga miluisho. Na su muntu akita muluisho, tui na mukuashi e pepi na Yaya, Yesu Nkidishitu, aye muntu mululame.”—1 Yo. 2:1.
20. Atukataluula kinyi mu muisambo wa nfudiilo wa ku ino miisambo?
20 Bi malua, muanda ingi nsaa muina Nkidishitu mmulombene kupela kuilanga . Su mbiabia, abitungu akatushibue mu kakongie. Bakulu mbalombene kukita kinyi pabitale wawa muanda? Atukataluula uno muanda mu muisambo wa nfudiilo wa ku ino miisambo.
LOONO 103 Balami—mbantu bekale bya buntu
a Kala, bino bisaka tubaadi atuibitamina bu komite a kusambisha. Anka bu bikale’shi kusambisha ngumune wa ku midimo yabadi bebape, t’atuikala atuitamina dingi kino kisaka bino. Anka, atuikala penda atuitamina kino kisaka bu komite a bakulu.
b Bino bi’abesambila pabitale baledi mbitale dingi bantu babadi bape matalua a kulama muana kui mbulamatadi sunga bangi be na bushito bua bu muledi kui muana.
