MUISAMBO WA KULONGA 35
LOONO 123 Tulamateyi bukunkushi bwa teokrasi
Mushindo ulombene bakulu kukuasha bantu babadi bakatushe mu kakongie
“Akukekala muloo wibungi muiyilu bua nkitshishi a miluisho umune belanga pe bua bantu balulame 99 bashi na lukalo lua kuilanga.”—LUK. 15:7.
KI’ATUISAMBILA
Atulongo buakinyi abitungu kukatusha bangi bantu mu kakongie na mushindo ulombene bakulu kukuasha baba bantu buabadia kuilanga na kuifubuila dingi pepi na Yehowa.
1-2. (a) Yehowa apushaa naminyi pabitale bantu abakitshi miluisho ikata bash’abelanga ku mashimba? (b) Yehowa akumiina’shi ba nkitshishi ba miluisho bakite kinyi?
YEHOWA, t’Efile Mukulu akumiinaa muikelo wibubi mu mishindo yao yoso nya. Mmushikue muluisho. (Mis. 5:4-6) Yehowa etutekie’shi tukookiele miiya yaye yadi muituelele mu Bible. Eyendo’shi, Yehowa t’atekaa bantu bakutue kupuidika bua’shi bekale bapuidikie nya. (Mis. 130:3, 4) Ku lungi lupese, t’akumiinaa ‘bantu bashi na kanemo bua Efile Mukulu, abaluula kalolo k’Efile Mukulu bua kuibingisha ku muikelo wibuufu.’ (Yu. 4) Nyi buakinyi, Bible akula pabitale “kabutu ka bantu bash’abatshinyi Efile Mukulu” mu nsaa ya ngoshi y’Efile Mukulu ya Armagedone.—2 Mp. 3:7; Kbf. 16:16.
2 Kadi, Yehowa t’akumiina’shi muntu su ngumune abutudibue. Anka bu biatuibilongiele mu miisambo ilondene ibashala, Bible akula’shi “akumiina’shi bantu boso belangie ku mashimba.” (2 Mp. 3:9) Biabia, bakulu ambambula Yehowa, abekalaa na luishinko nsaa y’abetatshisha bua kukuasha nkitshishi a miluisho bua’shi elangie na efubuile dingi pepi na Yehowa. Anka, ta mba nkitshishi ba bubi boso abelangaa nya. (Yesh. 6:9) Bangi abatungunukaa na kukita bubi sunga bakulu b’etatshisha misusa ibungi bua kuibakunkusha mu kuilanga. Bakulu mbalombene kukita kinyi pabitale uno muanda?
“KATUSHAYI YAWA MUNTU E BUBI”
3. (a) Bible akula’shi abitungu kukita kinyi na nkitshishi a miluisho sh’elanga ? (b) Buakinyi tui kuamba’shi, bi nka bu’shi nkitshishi a miluisho baata kitshibilo kia kukatushibua mu kakongie?
3 Nsaa i muntu mukite muluisho apele kuilanga , abitungu bakulu balonde bukunkushi bui mu 1 Bena Kodinda 5:13 amba’shi: “Katushayi yawa muntu e bubi munkatshi muenu.” Bi nka bu kuamba’shi, nkitshishi a miluisho baata kitshibilo kia kukatushibua mu kakongie. (Nga. 6:7) Buakinyi tui balombene kuamba biabia? Muanda nkitshishi a miluisho bapele kushintuula muikelo waye sunga kunyima kua bakulu kuitatshisha misusa ibungi bua kumukunkusha mu kuilanga. (2 Bf. 17:12-15) Bikitshino biaye abilesha’shi te na lukalo lua kukookiela miiya ya Yehowa nya.—Miy. 30:19, 20.
4. Buakinyi abaukishaa kakongie nsaa ayikatushibua nkitshishi a miluisho shii muilangie mu kakongie?
4 Nsaa i muntu mukite muluisho shii muilangie akatushibua mu kakongie, abaukishaa kakongie’shi takii dingi Kamonyi ka Yehowa. a Kabingilo ka kuakua kuukisha ta nka kuisha nkitshishi a miluisho milongo nya. Anka, abaukisha kakongie bua’shi kalonde elango dia mu Bible dia “kupela kuikala mu bukuuku” na yawa muntu, ‘tabadianga’ sunga naye. (1 Ko. 5:9-11) Yehowa e na kabingilo kebuwa ka kutuusha buno buludiki. Mpoolo mutumibua bafundile’shi: “Ndambo ipeela ya kitatusho ayitatushaa musabu oso.” (1 Ko. 5:6) Su muntu shii muilangie ta mbamukatushe mu kakongie, bangi mbalombene kupuandikisha’shi t’abitungu’shi, bakookiele miiya ya Yehowa nya.—Nki. 13:20; 1 Ko. 15:33.
5. Tui balombene kuikala na mueneno kinyi kui nkitshishi a miluisho mukatushibue mu kakongie, na mbuakinyi?
5 Nsaa i mukuetu mulume sunga mukashi akatushibua mu kakongie, abitungu tuikale na mmueneno kinyi? Sunga t’atukisha nsaa pamune naaye, abitungu tumumone bu mukooko ushimine kushi bu muntu shi mulombene kushintuluka nya. Mukooko ushimine ngulombene kualukiila mu loombe. Tentekiesha’shi mukooko ushimine ubaadi wilambule ao unabene kui Yehowa. Bi malua, muanda te na dingi nshalelo muipushene na mutshipo waye, na uno nshalelo e masaku. (Es. 18:31) Kadi, bu bikale’shi Yehowa mmulombene kumufuila lusa, biabia kui lukulupilo lua’shi mmulombene kualukiila. Bakulu mbalombene kulesha naminyi’shi be na lualua lukulupilo sunga kui nkitshishi a miluisho mukatushibue mu kakongie?
MUSHINDO WABAKUASHAA BANTU BAKATUSHIBUE MU KAKONGIE KUI BAKULU
6. Bakulu abakitaa kinyi bua kukuasha muntu mukatushibue mu kakongie?
6 Nsaa y’abakatusha muntu mu kakongie, bakulu abalekaa kumukuasha buadia kualukiila kui Yehowa su? Nya! Nsaa i komite a bakulu alungula muntu mukite muluisho shii muilangie ’shi akatushibua mu kakongie, mu yaaya nsaa komite a bakulu amupatuluila akitungu’shi akite buadia kualukiila mu kakongie. Anka t’abemenaa paapa nya. Misusa ibungi, abalungulaa nkitshishi a miluisho’shi abakumiina kuibunga dingi naaye kunyima kua mieshi ipeela bua kutala su bashintuula eshimba diaye. Su kunyima kua mieshi ipeela yawa muntu mukite muluisho akumiina’shi bebungie naaye dingi, bakulu p’abebungu naaye abamunyingisha buadia kuilanga. Sunga biekala’shi ta mmuilangie mu yaaya nsaa, bakulu abatompo kuibunga dingi naaye mu mafuku e kumpala bua kumunyingisha buadia kuilanga na kualukiila mu kakongie.
7. Nsaa ayikatushibua muntu mu kakongie, mmushindo kinyi ulombene bakulu kuambula lusa lua Yehowa? (Yeelemiya 3:12)
7 Bakulu abetatshishaa bua kuambula lusa lua Yehowa nsaa y’abesamba na muntu mukatushibue mu kakongie. Bu kileshesho, kala, Yehowa tabaadi mutengiele bua’shi muilo waye wa bena Isalele, wilangie kumpala kuadia kuibakuasha. Anka, batshile mpango ya kuibatumina batemuki, sunga kumpala kua’shi bashintuule ngielelo aabo a binangu. Mu muisambo wa kabidi wa kino Kitenta kia Mulami tuikele balongie mushindo ubaadi Yehowa mulungule Osea buadia kufuila mukashi aaye lusa na kumualusha dingi ku nshibo sunga mbibaadi mukashi aaye atungunuka na kukita muluisho ukata. Mu uno mushindo, Yehowa baadi mulongieshe muilo waye biadi na lusa lukata. (Os. 3:1; Mal. 3:7) Mu kuambula kileshesho kia Yehowa, bakulu bena Nkidishitu mu binyibinyi abakumiina’shi muntu mukite muluisho elangie na alukiile mu kakongie, na t’abakitaa bia’shi kualukiila mu kakongie kumuikeele bukopo nya.—Badika Yeelemiya 3:12.
8. Lukindi lua Yesu lua muana mushimine aluitukuasha naminyi bua kumona bukata bua lusa lua Yehowa kui baba bakatushibue mu kakongie? (Luka 15:7)
8 Tentekiesha muana mushimine a mu lukindi lua Yesu, luatuikele besambile mu muisambo wa kabidi wa mu mulongo wa ino miisambo. Pabamuene muan’aaye kuete kualukiila ku nshibo, nshe muana “nkusuuka lubilo, nkumuanya kiipa, nkumufifia kuitama na kalolo koso.” (Luk. 15:20) Lamiina’shi nshe muana tabaadi mutengiele’shi muana amutekie lusa nya. Anka, nshe muana basuukile lubilo kui muana aaye muanda baadi mumufule. Bakulu abetatshishaa bua kuikala na uno mmueneno kui baaba bapambukie. Muanda abakumiina’shi wawa mukooko ushimine “w’alukie ku nshibo.” (Luk. 15:22-24, 32) Nsaa i nkitshishi a miluisho belanga, akuikalaa muloo ukata muiyilu, mpa na pa nsenga namu apekalaa muloo!—Badika Luka 15:7.
9. Yehowa akumiina’shi bantu bakite miluisho bakite kinyi?
9 Mpa na binobino, tubalongo’shi Yehowa t’atadiilaa’shi bantu bakite miluisho bash’abakumiina kuilanga bashaale mu kakongie nya. Anka, atungunukaa na kuibakuasha. Akumiina’shi balukiile. Na nsaa ayilanga bantu, lamiina bino abipushaa Yehowa buabo. Osea 14:4 amba’shi: ‘Naashimisha etòmbo dyabo. Nebatomo kifulo n’eshimba dyande dyooso, nsungu yande ayibekumbu.’ P’abauku abipushaa Yehowa, bakulu abakimbi kantu koso akalesha’shi muntu babanga kuilanga. Na ano mayi abitungu anyingishe boso balekie Yehowa’shi, Mmuibafule na akumiina’shi balukiile kushii kuyisha.
10-11. Bakulu abakitaa naminyi bua kukuasha baba babaadi bakatushibue mu kakongie kala?
10 Tui kuamba naminyi bua bantu babaabadi bakatushe mu kakongie, pangi takudi bipua bikile bungi? Bano bantu pangi mbapue kuleka kukita miluisho ibaadi ikite bia’shi bakatushibue mu kakongie. Ingi nsaa pangi t’abatentekiesha dingi buakinyi abaadi bebakatushe mu kakongie. Sunga biekala bua muanda kinyi, abitungu bakulu betatshishe bua kuuka mbalo yabadi na kuenda mu kuibatala. Nsaa y’abesamba nabo, bakulu abebatekie buabadia kuela nabo luteko na kuibanyingisha na muloo oso buabadia kualukiila mu kakongie. Eyendo’shi, su muntu t’ebungu dingi na kakongie munda mua bipua bibungi, mmulombene kuikala mubofule mu kikudi. Biabia, su amba’shi akumiina kualukiila mu kakongie, bakulu mbalombene kuata mpango y’ashi muntu alongie naaye Bible, sunga kumpala kuadia kualushibua mu kakongie. Mu bioso bakulu nyi abaata mpango ya’shi alongie Bible.
11 Nsaa ayambula bakulu lusa lua Yehowa, abakitshi muabo moso bua kupeta bantu bakatushibue mu kakongie na kuibashinkamiisha’shi kibelo nkifungulue bua’shi balukiile. Nsaa ayilesha nkitshishi a bubi’shi belanga na balekie muikelo waye wibubi, mmukumbene kualushibua mu kakongie kushi kuyisha.—2 Ko. 2:6-8.
12. (a) Mmu mianda kinyi amutungu’shi bakulu badimukie ngofu? (b) Buakinyi tatui balombene kupuandikisha’shi kui bangi ba nkitshishi ba miluisho babashi balombene kufuila lusa kui Yehowa? (Tala dingi mayi e kuushi ku’esaki.)
12 Mu ingi mianda, abitungu’shi bakulu bekale badimukie kumpala kua kualusha muntu mu kakongie. Bu kileshesho, su yawa muntu baadi muluishe muana mukinga, sunga musumbule lukumiino, sunga mudimbe bua kuipaa dibaka, abitungu bakulu bataluule kalolo bua kushinkamisha su belanga binyibinyi. (Mal. 2:14; 2 Ti. 3:6) Abitungu bakaluile lombe. Anka, abitungu tushinguule’shi Yehowa atambulaa dingi nkitshishi a miluisho oso muilangie binyibinyi na aleka muikelo waye ubi. Biabia sunga abitungu’shi bakulu bekale badimukie kumpala kua kualusha bantu babaadi badimbe bangi, ta mbalombene kuenda kula na kupuandikisha’shi bangi ba nkitshishi ba miluisho ta mbalombene kuibafuila lusa kui Yehowa nya. b—1 Mp. 2:10.
KILOMBENE KAKONGIE KUKITA
13. Nkuilekena kinyi kui pankatshi pa biatuataa muntu abadi abasaashile kui bakulu na muntu mukatushibue mu kakongie?
13 Anka bu biatuikele bebilongie mu muisambo ushaale, ingi nsaa abaukishaa’shi muntu kampanda mbamusaashile. Yaaya nsaa, tui bakumbene kutungunuka na kuibunga naaye muanda bashintuula ngielelo aaye a binangu na muikelo waye. (1 Ti. 5:20) E nka mmuina kakongie dingi e nka na lukalo lua’shi bamunyingishe kui bakuabo balume na bakashi buadia kutungunuka na kukita bibuwa. (Eb. 10:24, 25) Anka, mbilekene na muntu mukatushibue mu kakongie. ‘Atupele kuikala mu kipuano’ na yawa muntu ‘sunga kudia naye.’—1 Ko. 5:11.
14. Mmushindo kinyi ulombene bena Nkidishitu kufubisha kondo k’abo k’eshimba kalongieshibue na Bible pabadi kumpala kua muntu abadi bakatushe mu kakongie? (Tala dingi kifuatulo.)
14 Mianda ibatulongo ayipushisha’shi tui balombene kulenguula muntu abadi bakatushe mu kakongie su? Nya. Eyendo’shi t’atukisha nsaa pamune naye. Anka bena Nkidishitu mbalombene kufubisha kondo k’abo k’eshimba kalongieshibue na Bible bua kuata kitshibilo kia kuitanyisha ku bisangilo muntu mukatushibue mu kakongie, pangi e kuikala muina kifuko nabo sunga’shi baadi kuku aabo a p’eshimba kumpala kuadia kukatushibua mu kakongie. Tui kukita naminyi su afika mu bisangilo? Kala, tatubaadi atuimuna yawa muntu nya. Pano dingi, abitungu muina Nkidishitu oso afubishe kondo k’eshimba kaaye kalongieshibue na Bible pabitale uno muanda. Bangi be kumona’shi ta bibubi kusema yawa muntu sunga kumukuukila ku bisangilo. Anka, t’atuisamba naaye mianda ibungi sunga kukisha naaye nsaa ya kukita ingi mianda.
Muina Nkidishitu mmulombene kufubisha kondo kaaye k’eshimba kalongieshibue na Bible bua kuata kitshibilo kia kuitanyina muntu mukatushibue mu kakongie ku bisangilo, na su e kumuela moyo nsaa y’afiki ku bisangilo (Tala kikoso 14)
15. Mmiluisho ya mushindo kinyi yabadi baleshe mu 2 Yowano 9-11? (Tala dingi kashibo akamba’shi: “ Yowano na Mpoolo abaadi besambile muluisho umune su?”)
15 Bangi mbalombene kuiyipusha’shi: ‘Bible t’abamba’shi yawa amuele moyo amukuatshishena mu mifubo yaye ibubi su?’ (Badika 2 Yowano 9-11.) Ma verse e kumpala na kunyima kua uno verse aalesha’shi buno buludiki mbutale bantu basumbule lukumiino, na baaba abatakula bangi mu kuikala na muikelo wibubi. (Kbf. 2:20) Biabia, su muntu akuatshishena malongiesha a bantu basumbule lukumiino na muikelo wibubi, bakulu ta mbalombene kuata mpango ya kuenda mu kumutala nya. Eyendo’shi, lukulupilo lui nka kuanka lua’shi mmulombene kushintuluka. Anka bu biashii mubande kushintuluka, t’atumuele moyo sunga kumuitanyina ku bisangilo nya.
TUAMBULEYI LUSA LUA YEHOWA
16-17. (a) Yehowa akumiina’shi ba nkitshishi ba miluisho bakite kinyi? (Esekyele 18:32) (b) Bakulu mbalombene kulesha’shi abafubu pamune na Yehowa nsaa y’abetatshisha bua kukuasha muntu mukite muluisho naminyi?
16 Tubalongo kinyi mu ino miisambo itano? Yehowa t’akumiina’shi muntu su ngumune abutudibue! (Badika Esekyele 18:32.) Akumiina’shi ba nkitshishi ba bubi balukiile mu kipuano naaye. (2 Ko. 5:20) Nyi buakinyi kubanga kala Yehowa mmunyingishe misusa ibungi muilo waye ubaadi umutombokiele buaudia kuilanga na kualukiila kuadi. Bakulu ba mu kakongie be na kinemo kikata kia kufuba pamune na Yehowa nsaa y’abetatshisha bua kukunkusha muntu mukite muluisho mu kuilanga .—Lom. 2:4; 1 Ko. 3:9.
17 Banda kunangushena muloo awikalaa muiyilu nsaa i ba nkitshishi ba miluisho abelanga ! Nshetu e muiyilu Yehowa, aye nabene apushaa wawa muloo nsaa i mukooko wikele ushimine awalukiila mu kakongie. Kifulo kietu bua Yehowa akitungunuka na kutama nsaa y’atunangushena ku lusa luaye, na kalolo kaye kakata kuatudi.—Luk. 1:78.
LOONO 111 Myanda ayitusankisha
a T’atuikala dingi atuakula pabitale bano bantu’shi mbatushibue mu kakongie nya. Mu kuipushena na biabadi baleshe mu mayi a Mpoolo e mu 1 Bena Kodinda 5:13, atubanga kuakula buabo’shi mbakatushibue mu kakongie.
b Bible amba’shi bangi bantu ta mbalombene kuibafuila lusa. Baba bantu mbaate kitshibilo kia kutombokiela Efile Mukulu nsaa yoso. Anka Yehowa na Yesu nyi balombene kutshiba su muntu mmulombene kufuidibua lusa sunga kukutua kufuidibua lusa.—Mak. 3:29; Eb. 10:26, 27.
