1. Muntu belanga kuishimba akitaa kinyi?

 NSAA y’atukitshi kintu kampanda kibubi, bi na muulo bua’shi tuilangie. Mu Bible, muntu belanga kuishimba ashintuula binangu biaye pabitale muluisho wadi mukite, na kuleka kukita wawa muluisho, mpa na kuata kitshibilo kia kupela kuiukita dingi.—Tala Kipatuluilo kia bishima, “Kuilanga.”

2. Buakinyi abitungu’shi atue boso tulongie akipatuula kuilanga? (Neemiya 8:​9-11)

² Muntu oso abitungu alongie akipatuula kuilanga. Buakinyi? Muanda atukitaa miluisho efuku dioso. Bu biatudi bana ba Adame na Eva, oso a kuatudi mmupiane muluisho na lufu. (Lom. 3:23; 5:12) Takui muntu su ngumune mulombene kuamba’shi te na miluisho. Sunga bantu babaadi na lukumiino lukata, bu Mpoolo, baadi nka alu na muluisho. (Lom. 7:​21-24) Bino abipushisha’shi abitungu tubofule kuishimba nsaa yoso muanda wa miluisho yetu su? Nya, Yehowa nyi nsha lusa, na akumiina’shi tuikale na muloo. Tutaluule muanda ubaadi ufikile bena Yunda ba mu mafuku a Neemiya. (Badika Neemiya 8:​9-11.) Yehowa tabaadi akumiina’shi batungunukie na kubofula ku mashimba muanda wa miluisho yabo ya kala nya, anka baadi akumiina’shi bapete muloo wa kumulanguila. Yehowa auku’shi kuilanga kuishimba akufuishaa muloo. Biabia etulongiesha akipatuula kuilanga. Su tubelanga ku miluisho yetu, tui balombene kushinkamisha’shi Nshetu sha lusa etulekiela miluisho yetu.

3. Nkinyi ki’atulongo mu uno muisambo?

³ Tubandeyi kulonga mianda ibungi pabitale kuilanga. Mu uno muisambo atulongo mianda isatu. Kia kumpala, atulongo kibaadi Yehowa mulongieshe Isalele pabitale kuilanga. Kia kabidi, atuisambila mushindo ubaadi Yehowa mukunkushe bantu mu kuilanga.  Ku nfudiilo atuisambila kibaadi Yesu mulongieshe balongi baye pabitale kuilanga.

YEHOWA BAADI MULONGIESHE MUILO WA ISALELE PABITALE KUILANGA

4. Yehowa baadi mulongieshe muilo wa Isalele kinyi pabitale kuilanga?

⁴ Nsaa ibaadi Yehowa muelele bena Isalele miiya, babaadi bamulee’shi abeyikookiela. Su abadia kukookiela miiya yaaye, badia kuibakaluila na kuibelela miabi. Pabitale yaaya miiya, baadi muibashinkamiishe’shi: “Ooló, dino nyi eyi dia nkupa leelo, tàndìkile bukopo boobe nya, tadii pooshyookukuma nya.” (Miy. 30:​11, 16) Anka su bamutombokiela, bu kileshesho pa kuata kitshibilo kia kulanguila bangi b’efile, t’ebelela dingi miabi, na abakiengie. Anka, bino t’abilesha’shi Efile Mukulu bebasumbushena bua loso nya. Babaadi balombene ‘kualukiila kui Yehowa Efile Mukulu [aabo], na kuteemesha eyi diaye.’ (Miy. 30:​1-3, 17-20) Mu ungi ngakuilo, babaadi balombene kuilanga. Su abelanga, Yehowa baadi mulombene kuifubuila dingi kuabadi na kuibelela dingi miabi.

5. Mmushindo kinyi ubaadi Yehowa muleshe’shi ta mmusumbushene muilo waye? (2 Banfumu 17:​13, 14)

⁵ Muilo ubaadi Yehowa musangule ubaadi umutombokiele misusa ibungi. Kukatusha kulanguila ma nkishi, babaadi bakite ingi mianda ikile bubi. Pa muanda wa biabia, babaadi bakiengie. Anka Yehowa tabaadi musumbushene muilo waye ubaadi utombokie nya. Baadi mutume batemuki misusa ibungi bua kunyingisha muilo waye bua’shi wilangie na walukiile kuadi.—Badika 2 Banfumu 17:​13, 14.

6. Mmushindo kinyi ubaadi Yehowa mufube na batemuki bua kulongiesha muilo waye muulo wa kuilanga? (Tala dingi kifuatulo.)

⁶ Misusa ibungi Yehowa baadi atumu batemuki buabadia kudimusha na kulanga muilo waye. Bu kileshesho, kukidila kui Yelemiya, Efile Mukulu bakuile’shi: “Ealushe kwandji, obe Isalêle . . . Tankakwimikila’nyi mushila mu mpala mwanda nyi na lusa. . . . Tankwatâ nsungu loso nyâ. Wodi n’ao ngwa kukumîna’shi we mukite ino myanda i bubi muanda we mutombokile Yehowa.” (Yel. 3:​12, 13) Kukidila kui Yowele, Yehowa bambile’shi: “Alukaayi kwandi n’eshimba dyeenu dyooso.” (Yow. 2:​12, 13) Baadi mutume  Yeshaya bua kuakula’shi: “Etumpeyi nuisokole; katushaayi ku meso kuande bikitshino byenu bibi.” (Yesh. 1:​16-19) Kukidila kui Esekyele, Yehowa baadi muipushe’shi: “Nee mulombeene kwikala na muloo bwa lufu lwa mubi? . . . Kushii’shi eekumbe ku mashinda aaye, dingi ashaale na muuwa’nyi? Ntshii na muloo bwa lufu lwa afu nya. . . . Byaabya alukiilaayi, dingi shaalayi anutala.” (Es. 18:​23, 32) Yehowa asankaa binyibinyi nsaa y’amono bantu abelanga ku miluisho yaabo, muanda akumiina’shi bekale na muwa wa loso! Biabia Yehowa t’atengielaa nka’shi muntu mukite muluisho ashintulukie kumpala kuadia kumukuasha nya. Tubande kutaluula tungi tu bileshesho.

7. Yehowa baadi mulongieshe muilo waye kinyi ku bukuashi bua kileshesho kia Osea na mukashi aaye?

⁷ Tubandeyi kutala mushindo ubaadi Yehowa mufube na kileshesho kia muanda ubaadi ukitshikie, kia Gomere mukashi a mutemuki Osea. Kunyima kua kutambuka lusandi, baadi mutuukie kua mulume aaye akatuela kui bangi balume. Bibaadi bukopo buadia kushintuluka su? Yehowa, aye amonaa bi muishimba, balunguile Osea bino: ‘Nda dimo, ofule yawa mwana mukashi, mufudiibwe kwi mungi mulume, yawa sha kutambuka lusandji, mwanda byabya ngi bii kifulo kya Yehowa kwi baana ba Isaleele sunga beekala abalangwila bangi beefile.’ (Os. 3:1; Nki. 16:2) Lamiina’shi mukashi a Osea baadi nka atungunuka na kukita muluisho ukata. Anka, Yehowa balunguile Osea buadia kumufuila lusa na kumuata dingi bu mukashi aaye. a Mu mushindo umune, Yehowa tabaadi musumbushene muilo waye ubaadi utombokie nya. Sunga mbibaabadi abatungunuka na kukita mianda ibubi, Yehowa baadi nka muibafule. Baadi atungunuka na kuibatumina batemuki buabadia kuibakuasha bua’shi bashintulukie na bashintuule nshalelo aabo. Kino kileshesho akitulongiesha’shi Yehowa, atalaa bi muishimba, akatungunuka na kukimba bia kukuasha muntu muipaane mu kukita kua muluisho na kumukunkusha mu kuilanga su? (Nki. 17:3) Tubandeyi kutala bibaadi muibikite.

MUSHINDO AUKUNKUSHAA YEHOWA BANTU MU KUILANGA

8. Yehowa baadi mukite kinyi buadia kukunkusha Kayina mu kuilanga? (Kibangilo 4:​3-7) (Tala dingi kifuatulo.)

⁸ Kayina baadi muana mbedi a Adame na Eva. Baadi mupiane lukalo lua kukita miluisho kui baledi baye. Dingi, Bible akula pabimutale’shi: “Bikitshino bia Kayina bibaadi bubi.” (1 Yo. 3:12) Pangi bino abilesha buakinyi Yehowa “tabaadi mukumiine Kayina na mulambu waye” nsaa ibaadi eulambula. Pamutue pa kushintuula muikelo waye, “Kayina bafiitshile munda ngofu na aye nkuinyongola.” Yehowa bakitshine dingi kinyi? Besambile na Kayina. (Badika Kibangilo 4:​3-7.) Lamiina’shi Yehowa baadi munangushene na Kayina na kalolo koso na amulungula’shi amuelela muabi su bakitshi bibuwa. Yehowa baadi dingi mudimushe Kayina’shi nsungu yaaye ngilombene kumutakula mu kukita muluisho. Bi malua, Kayina bapelele kuteemesha. Tabaadi mutadiile Yehowa buadia kumukuasha bua’shi elangie. Pa muanda Kayina bapelele kupushisha Efile Mukulu, Yehowa baadi muate kitshibilo kia kupela kukunkusha muntu oso mu kuilanga su? Nya!

9. Yehowa baadi mukunkushe Davide mu kuilanga naminyi?

⁹ Yehowa baadi mufule Nfumu Davide ngofu. Baadi mpa na mu muitamine bu “muntu asankisha eshimba diande.” (Bik. 13:22) Anka baadi mukite miluisho ikata, kutambuka lusandi na kuipayishena. Muyile Muiya wa Moyise, bibaadi abitungu’shi Davide ayipayibue. (Lv. 20:10; Mb. 35:31) Anka, Yehowa baadi akumiina kukuasha  Davide buadia kuilanga. b Baadi mutume mutemuki aaye Natane bua nkemonena na nfumu, sunga mbibaadi Davide tabandile kuilanga ku muluisho waye. Natane baadi mufube na kileshesho bua kukuma eshimba dia Davide. Davide batunduile’shi baadi mutape Yehowa kuishimba ngofu, na aye nkuilanga. (2 Sam. 12:​1-14) Baadi mufunde musambo aulesha mushindo ubaadi muinyongole pabitale bibaadi mukite. (Mis. 51, mayi e ku mbangilo) Wawa musambo ngunyingishe bantu bebungi babaadi bakite miluisho na kuibatakula mu kuilanga. Bino t’abitusankisha pa kumona’shi Yehowa na kifulo kioso baadi mukunkushe mufubi aaye Davide mu kuilanga su?

10. Opushaa naminyi pabitale luishinko lua Yehowa na lusa luaye kui bantu bakite miluisho?

¹⁰ Yehowa mmushikue muluisho mu mushindo wao oso. (Mis. 5:​4, 5) Anka, auku’shi atue boso tui bena miluisho, na pa muanda wa kifulo kiaye buetu, mmuate kitshibilo kia kuitukuasha buatudia kulua na muluisho. Nsaa yoso akimbaa bia kukuasha mpa na baba bakite miluisho ikile bukata buabadia kuilanga na kuifubuila pepi naaye. Kuuka bino akuitunyingisha ngofu! Nsaa y’atunangushena pabitale luishinko lua Yehowa na lusa luaye, abitutakula bua kushala na lulamato kuadi na kuilanga kuishimba mususa umune su tubakitshi muluisho. Tutaluleyi binobino mushindo ubaabadi balongieshe kakongie ka bena Nkidishitu pabitale kuilanga.

KIBAADI YESU MULONGIESHE BALONGI BAYE PABITALE KUILANGA

11-12. Nkileshesho kinyi kibaadi Yesu mutuushe bua kuitulongiesha’shi Yehowa akuminaa kuitufuila lusa? (Tala kifuatulo ki ku kipusu.)

¹¹ Mu siekele a kumpala bino bipungo bietu (B.B.), nsaa ya kufika kua Mesiya ibalombene. Anka bu biatudi bebimone mu muisambo ushaale, Yehowa baadi mufubishe Yowano Mubatshishi na Yesu Nkidishitu bua kulongiesha muilo waye muulo wa kuilanga.—Mat. 3:​1, 2; 4:17.

¹² Pabaadi Yesu pa nsenga, baadi mulongieshe bantu’shi Nshaye akumiinaa kuitufuila lusa su tubakitshi muluisho. Yesu baadi muibalongieshe bianka pabaadi muibape kileshesho kia muana mushimine. Yawa nsongualume baadi muate kitshibilo kia kukatuka ku nshibo na kubanga  kukita mianda ibubi. Anka, ‘binangu bibamualukiile’ na aye nkualukiila ku nshibo. Nshaye bakitshine kinyi? Yesu bambile’shi pabaadi muana “ki ku bula’bia, nshaye nkumumona na lusa nkumukuata, aye nkusuuka lubilo, nkumuanya kiipa, nkumufifia kuitama na kalolo koso.” Muana baadi na lukalo lua’shi afikie bu mufubi mu nshibo ya nshaye, anka nshaye bamuitamiine bu “muana ande” na aye nkumualusha pa mbalo ibaadi nayo mu kifuko bu muana aaye. Nshe muana bambile’shi: “Ekeele mushimine na bamueneka.” (Luk. 15:​11-32) Pabaadi Yesu muiyilu kumpala kuadia kufika pa nsenga, kushi mpaka baadi amonoa mushindo ubaadi Nshaye alesha luno lusa kui bantu abelanga ku miluisho yabo. Eyendo’shi uno muanda ubaadi witulondele Yesu awitunyingisha na kuitulesha mushindo wikale Nshetu, Yehowa na lusa!

13-14. Mpiele mutumibua baadi mulongie kinyi pabitale kuilanga kuishimba, na nkinyi kibaadi mulongieshe bangi pabitale kuilanga? (Tala dingi kifuatulo.)

¹³ Mpiele mutumibua baadi mulongie bibungi kui Yesu pabitale kuilanga na kufuidibua lusa. Misusa ibungi Mpiele baadi na lukalo lua kufuidibua lusa, na Yesu baadi nka amufuila lusa na kalolo koso. Bu kileshesho, kunyima kua’ye kupela’shi tauku Nfumuaye misusa isatu, baadi muinyongole ngofu bua bibaadi mukite. (Mat. 26:​34, 35, 69-75) Anka kunyima kua Yesu kusanguka, baadi mumuekiele Mpiele pa bupenka bua kuisamba naaye. (Luk. 24:​33, 34; 1 Ko. 15:​3-5) Kushi mpaka, mu yaaya nsaa, Yesu na kifulo kioso baadi mushinkamiishe mutumibua aaye baadi muilangie’shi bamufuila lusa.—Mak. 16:7.

¹⁴ Mpiele baadi mupushe kalolo abikalaa kuilanga na kufuidibua lusa. Biabia aye nkulongiesha bangi pabitale kuilanga na kufuidibua lusa. Ungi musango kunyima kua musangelo wa Pantekote, Mpiele bakitshine muisambo kumpala kua kibumbu kia bena Yunda bashi bena kukumiina, ebapatuluila’shi abaadi bayipee Mesiya. Akupu, baadi muibanyingishe’shi: “Biabia, elangieyi na nualulukie bua’shi miluisho yenu ishimishibue bua’shi bipungo bia kupetuula bukome bifikie  kui Yehowa nabene.” (Bik. 3:​14, 15, 17, 19) Mpiele baadi muleshe’shi muntu mukite muluisho belanga alulukaa, ashintuula ngelelo aaye a binangu na bikitshino biaye, bua kuikala na muikelo upia ausankisha Efile Mukulu. Mutumibua baadi muleshe dingi’shi Yehowa ashimisha miluisho yabo, sunga kuiyikatusha bua loso. Na kunyima kua bipua makumi, Mpiele baadi mushinkamiishe bena Nkidishitu’shi: “Yehowa . . . e na luishinko kuanudi muanda t’akumiina’shi muntu su ngumune abutudibue, anka akumiina’shi bantu boso belangie ku mashimba.” (2 Mp. 3:9) Luno nyi ndukulupilo lui buwa kui bena Nkidishitu nsaa y’abakitshi miluisho, sunga yekala bukata bui naminyi!

15-16. (a) Mmushindo kinyi ubaadi Mpoolo mutumibua mulongie pabitale lusa? (1 Timote 1:​12-15) (b) Mmuanda kinyi watukataluula mu muisambo aulondo?

¹⁵ Takui bantu bebungi babaadi na lukalo lua kuilanga na kufuidibua lusa kukila Saule a ku Tarse nya. Baadi akiengiesha ngofu bakuabo na Nkidishitu. Pangi bena Nkidishitu bebungi babaadi abapuandikisha’shi, t’ashintuluka efuku su ndimune. Anka, Yesu baadi auku’shi Saule mmukumbene kushintuluka na kuilanga. Aye na Nshaye babamuene ngikashi ibuwa mui Saule. Yesu bambile’shi: “Ne musangule uno muntu.” (Bik. 9:15) Yesu baadi mpa na mukite kilengieleshi bua kukunkusha Saule mu kuilanga. (Bik. 7:58–8:3; 9:​1-9, 17-20) Saule, abadi betanyine kunyima bu Mpoolo baadi muilangie afika muina Nkidishitu. Yesu bamupeele mudimo wa bu mutumibua. Misusa ibungi Mpoolo baadi alesha lutumbu bua mushindo wabadi bamuleshe kalolo na lusa kui Yehowa na Yesu. (Badika 1 Timote 1:​12-15.) Mutumibua sha lutumbu baadi mulongieshe’shi: “Efile Mukulu e na kalolo p’akimbi kukukuasha bua kuilanga.”—Lom. 2:4.

¹⁶ Ungi musango, Mpoolo baadi mupushe’shi mu kakongie ka bena Kodinda abaadi batadiile muana mulume baadi mutambukie lusandi. Mpoolo baadi mupudishe wawa muanda naminyi? Baadi muiupudishe mu mushindo awitulongiesha bibungi pabitale mushindo wa kutuusha dinyoka na kifulo kioso, anka abibikitaa Yehowa, na kuikala na lusa. Atukataluula uno muanda kalolo kantu pa kantu mu muisambo aulondo.