Mpoolo mutumibua baadi mufundile bena Nkidishitu ba mu Tesalonike’shi: “Su kui muntu shatumikila eyi dietu di mu uno mukanda, mudimukileyi.” (2 Te. 3:14) Kumpala, tubaadi atuamba’shi bakulu nyi abatuusha buno buludiki. Su muntu atungunuka na kulenguula mayi a kulonda a mu Bible kunyima kua’bo kumupa malango misusa ibungi, bakulu mbalombene kukita muisambo wa kudimusha nao kakongie. Akupu, balungudi ta mbalombene kukisha nsaa pamune na muntu atungu kudimukila.

Anka, abitungu kushituula ingi mianda. Binobino atupusha’shi elango dia Mpoolo nditale kitshibilo kilombene kuata muina Nkidishitu pa bupenka pabitale mianda kampanda. Biabia takui lukalo lua’shi bakulu bakite muisambo wa kudimusha nao. Buakinyi kuno kushintuluka? Tutaluule kibaadi akisambila Mpoolo pabaadi mutuushe dino elango.

Mpoolo bamuene’shi bangi mu kakongie babaadi na “kafutakanyi.” Baadi muibape elango adituukila mu Eyi di’Efile Mukulu anka tababaadi bedikookiele. Musango wa kumpala ubafikile mu kuibatala, baadi muibatumine dino eyi: “Su muntu takiebe kufuba, su nkudia tadianga.” Anka, bangi babaadi abapele kufuba bua kulombasha nkalo yabo, sunga mbibaabadi na ngobesha ya kufuba. Dingi, babaadi abatuelakana mu mianda ya bangi. Bena Nkidishitu babaadi balombene kumona baba bantu ba sha kafutakanyi naminyi?—2 Te. 3:​6, 10-12.

Mpoolo bambile’shi: “Mudimukileyi.” Kishima kia mu ki na Greke kiabadi bafubishe pano, akipatuula’shi otundula yawa muntu na omudimukila bua’shi tala ekala na bukitshishi bui bubi koodi. Mpoolo baadi mupe kakongie kashima dino elango kushi penda kui bakulu. (2 Te. 1:1; 3:6) Biabia nyi mmuina Nkidishitu bupenka buaye baadi mulombene kutundula mungi muina Nkidishitu shakookiela elango dia mu Bible, baadi na kia ‘kuleka kuikala mu kipuano’ na muntu sha kafutakanyi.

Bino abipatuula’shi yawa muntu babaadi abamuata bu muntu mukatushibue mu kakongie su? Nya, Mpoolo baadi mukumbashe’shi: “Tungunukayi na kumulanga bu mukuenu.” Biabia muina Nkidishitu oso pa bupenka mmulombene kutungunuka na kuibunga mu bisangilo na yawa muntu abadi badimukile, na kuenda naye mu bulungudi anka mbalombene kuata kitshibilo kia kupela kuibunga naaye bua kukisha kapapi. Buakinyi? Mpoolo aluula’shi: “Bua’shi buufu bumukuate.” Nsaa y’atulekie kuibunga na muina Nkidishitu mu uno mushindo, mmulombene kupusha buufu na ashintuula muikelo waaye.—2 Te. 3:​14, 15.

Bena Nkidishitu mbalombene kutumikala dino elango naminyi lelo uno? Kumpala kua bioso, abitungu tushinkamishe’shi muikelo wa yawa muntu ngua ‘kafutakanyi’ binyibinyi muyile abilesha Mpoolo. Tabaadi esambila pabitale baba abakitshi mianda ilekene netu muyile kondo kabo k’eshimba, kadi ishi ikutuene na mayi a kulonda a mu Bible sunga miiya. Na tabaadi esamba pabitale baba betuluishishe. Anka, Mpoolo baadi akula pabitale baba abaata kitshibilo kia kupela kukookiela elango adituukila mu Bible.

Lelo uno, su tubamono mukuetu muina Nkidishitu alesha kino kikudi kia kukutua kua kukookiela, a atukiebe kuata kitshibilo pa bupenka kia kupela kuibunga pamune naye bua kukisha kapapi. Bu biabidi’shi nyi nkitshibilo kiatudia kuata pa bupenka, t’abitungu’shi tuikilungule bangi nya, kukatusha bena kifuko batudi nabo mu nshibo imune. Na atuikala nka atuibungu na yawa muntu mu bisangilo na kuenda naaye mu bulungudi. Su bashintuula mmueneno aaye na muikelo waye, tui kubanguula kuibunga naaye bua kukisha kapapi.