1. Mmu mushindo kinyi amutungu bena Nkidishitu bekale bu mutshi? (Tala dingi kifuatulo.)

 “LUPAPI t’alutshokolaa mutshi utontame.” Luno lukindi alushimika kasele pa eyikashi dina muulo adikuashaa ingi mitshi buayidia kukambila lupapi kuamba’shi: kutontama. Bua kutama mu kikudi abitungu muina Nkidishitu ekale na nkatshinkatshi, muilumbuule bua kutontama. Mushindo kinyi? Abitungu tuikale na nkatshinkatshi, pa kuiwubidishena na nshalelo nsaa ayimueka kushintuluka, na pa kuneemeka mueneno na bitshibilo bia bangi.

2. Ngikashi kinyi ayiketukuasha bua kuiwubidishena apamueneka kushintuluka mu nshalelo, na nkinyi ki’atukataluula mu uno muisambo?

² Bu biatudi bafubi ba Yehowa, abitungu tuikale na nkatshinkatshi. Abitungu dingi tuikale beyishe na basha lusa. Mu uno muisambo atukataluula mushindo wi ngikashi bu ino ikuashe bangi bena Nkidishitu buabadia koobesha nsaa ayishintuluka nshalelo aabo. Atukamono dingi bilombene kuitukuasha ino ngikashi. Anka, kia kumpala tulongiele kui Yehowa na Yesu, bileshesho bipuidikie bia nkatshinkatshi.

3. Tui kuuka naminyi’shi Yehowa e na nkatshinkatshi?

³ Yehowa abamuitanyinaa bu “lubwebwe” muanda mushimate pepoo na tasanishua. (Miy. 32:4) Sunga mbiabia e na nkatshinkatshi. Sunga abishintuluka mianda pa nsenga, Yehowa e na nkatshinkatshi, na mushinkamishe’shi mianda yooso yaadi muitulee ayikalombana. Yehowa bapangile muntu ku kinfuanyi kiaye na ngobesha ya kuiwubidishena na nshalelo apashintuluka mianda. Mmuitupe mayi a kulonda a mu Bible aapushika kalolo, bua adia kuitukuasha bua’shi tuate bitshibilo bi buwa, sunga kuatuuka nkalakashi i naminyi mu nshalelo eetu. Yehowa aye nabene nyi nkileshesho, na mayi aaye a kulonda aadi muitupe aetushinkamisha’shi, sunga biadi muikale bu “lubwebwe,” e na nkatshinkatshi.

4. Tuusha kileshesho akilesha’shi Yehowa e na nkatshinkatshi. (Bena-Levi 5:7, 11)

 ⁴ Mashinda a Yehowa ngapuidikie na e na nkatshinkatshi. T’akitshishaa bantu mianda pa bukopo nya. Tubandeyi kutaluula kileshesho kia mushindo ubaadi muleshe’shi e na nkatshinkatshi kui bena Isaleele. Ta baadi atekie’shi, bantu booso ba mpeta na balanda batuushe milambu i mumune nya. Mu ingi mianda, baadi atadiila’shi muntu ooso, atuushe milambu muyile nshalelo aaye.—Badika Bena-Levi 5:7, 11.

5. Tuusha kileshesho akilesha kuiyisha kua Yehowa, na lusa luaye.

⁵ Kuiyisha kua Yehowa na lusa luaye, ngi abimutakulaa buadia kuikala na nkatshinkatshi. Bu kileshesho, kuiyisha kua Yehowa, kubaadi kumueke pabaadi akiebe kubutula bantu be bubi babaadi mu kibundi kia Sodome. Kukiila kui ba mikeyilu baaye, Yehowa balunguile Lota muntu mululame, buadia kusuukila ku muengie. Lota baadi na moo wa kuenda kuakua ku miengie. Biabia baadi mutekie bua’shi aye na kifuko kiaye, bebatadiile basuukile dia ku Zoare, ka kibundi kapeela, kabaabadi bapue kuatshila kitshibilo kui Yehowa bua kuikabutula. Yehowa baadi mulombene nka kushinshikila Lota bua’shi alonde nka buludiki buaye bubaapu kumulungula. Anka, Yehowa baadi mutadiile’shi Lota ende ku Zoare, na ta baadi nyi mubutule kaaka ka kibundi nya. (Kib. 19:18-22) Kunyima kua siekele i bungi, Yehowa baadi muleshe lusa luaye kui bantu ba mu Ninive. Yehowa baadi mutume mutemuki Yona, buadia nkebalungula mukandu wa kabutu, ka kiakia kibundi na bantu babi be muanka. Anka, pa baadi bena Ninive belangie ku mashimba, Yehowa baadi muibapushe lusa, na ta baadi mubutule kiakia kibundi nya.—Yon. 3:1, 10; 4:10, 11.

6. Tuusha kileshesho akilesha bibaadi Yesu muambule nkatshinkatshi ya Yehowa.

⁶ Yesu baadi muambule nkatshinkatshi ya Yehowa. Yesu babaadi bamutume pa nsenga bua kulungula mukandu wibuwa kui “mikooko ishimine, ya mu nshibo ya Isaleele.” Biabia, Yesu balesheshe’shi baadi na nkatshinkatshi, pa baadi mulungule mukandu wibuwa, kui bena Isaleele na kui bantu bashi bena Isaleele. Dingi efuku, ungi muana mukashi shi baadi muina Isaleele, bafikile mu kuisendela Yesu bua’shi amupashiishi muana aaye mukashi baadi “mukuatshikie na demo.” Na lusa looso, Yesu bakitshiine nka biabia bibaabadi bamutekie kui yawa muana mukashi, amupashiisha ka nsongakashi kaaye. (Mat. 15:21-28) Tubandeyi kutaluula kingi kileshesho. Ku mbangilo kua mudimo waye wa bulungudi, Yesu bakuile’shi: “Muntu ooso ampele, . . . nakamupele namu.” (Mat. 10:33) Biabia Yesu baadi mupele Mpiele, baadi mumupele misuusa yooso isatu? Nya. Yesu baukile’shi Mpiele baadi muinyongole, bua bibaadi mukite na’shi, Mpiele baadi muntu sha lulamato. Kunyima kua Yesu kusanguka, bamuekiele Mpiele, na aye nkumushinkamisha’shi bamufuila lusa, na’shi mumufule.—Luk. 24:33, 34.

7. Mu kuipushena na Bena Fidipe 4:5, nkumo kinyi ayitungu’shi tuikale naayo?

⁷ Tubakatuka mu kumona’shi Yehowa Efile Mukulu na Yesu Nkidishitu be na nkatshinkatshi. Atue namu tui na nkatshinkatshi su? Yehowa etutekie buatudia kuikala na nkatshinkatshi. (Badika Bena Fidipe 4:5.) Ungi Bible mmualuule uno  verse’shi: “Ikala na nkumo ya bu muntu e na nkatshinkatshi.” Tui kuiyipusha atue banabane’shi: ‘Bantu abammonaa namu bu muntu e na nkatshinkatshi, mutaale, na atadiila ingi mianda? Sunga’shi bantu abammonaa bu e na mianda i bukopo, sunga bu sh’apupiishaa bantu? Nashishimikilaa bangi bua’shi bakite mianda nka mu mushindo wankumiina ami nabene, su nateemeshaa namu bangi na kukumiina biabakula su kui mushindo?’ P’atunyiisha kuikala na nkatshinkatshi, atunyiisha kuambula Yehowa na Yesu. Tubandeyi kutaluula mianda ibidi ayilesha muulo wakuikadika na nkatshinkatshi, nsaa ayishintuluka mianda mu nshalelo eetu, na nsaa ayitungu kukumiina mueneno a bangi sunga bitshibilo biabo, pabidi bilekeene na bietu.

8. Nkinyi kilombene kuitukuasha buatudia kuikadika na nkatshinkatshi nsaa ayishintuluka mianda mu nshalelo eetu? (Tala dingi mayi a kuushi ku’esaki.)

⁸ Kuikala na nkatshinkatshi, akulesha muntu akumiina nsaa ayishituluka mianda mu nshalelo aaye. Kuno kushintuluka nkulombene kuitutushiisha mianda ibokopo, yatush’atuelela binangu’shi tui kuiyipeta. Pangi tui kupeta mukumbo wibukopo. Sunga’shi mianda i kushintuluka mu kabasamushi, kukutua kua makuta sunga mianda ya politike, ngilombene kuikasha nshalelo eetu bukopo bukile. (Mul. 9:11; 1 Ko. 7:31) Sunga kushintuluka kua mudimo mu ndumbuluilo, nkulombene kuikala bu kitompuanga kuatudi. Biabia sunga kuekadika lukalakashi, tui koobesha kuiwubidishena na nshalelo eetu mupia pa kukita kua ino mianda inanka: (1) kumiina nshalelo atoodi naaye, (2) tuula binangu biobe ku mianda ayifiki, (3) ikala na mueneno e buwa a mianda, na (4) kitshiina namu bangi mianda i buwa. b Tutaleyi mushindo ubaadi bangi bakuetu bakite ino mianda inanka biabadi bakuashibue.

9. Ungi mulume na mukashi aaye ba misionere, babaadi banyingiile lukalakashi lua mu kabasamushi mushindo kinyi?

⁹ Kumiina nshalelo oodi naaye binobino. Emanuele na Francesca babaadi bebatume bu ba misionere mu dingi eumbo dia kuabeene. Abo baki’ababanga kulonga ludimi lua mu diadia eumbo, na kuiwubidishena na bakuabo ba mu kakongie kaabo kapia, kipupa kia Corona-Virus kibabangile, na abo nkushaala kula na bakuabo balume na bakashi. Nyinaye na Francesca bafuile mu kabasamushi. Francesca baadi akumiina kuikala pamune na kifuko kiaye, anka ta kubaadi mushindo wakualukiila muiwumbu diabo pa muanda wa kipupa kia Corona-Virus. Nkinyi kibaadi kimukuashe bua kunyingiila ino mianda yooso i bino? Kia kumpala, Emanuele na Francesca babaadi beele luteko pamune, bua kuteka binangu, bua’shi efuku dioso bekale abakambila na kunyingiila tuinyongoshi. Yehowa baadi mualuule ku nteko yabo pa nsaa ilombane, kukiila ku bidibua bia mu kikudi. Bu kileshesho, babaadi banyingishibue na ungi video abaabadi babandile, mu yawa video babaadi abeele ungi mukuetu mulume nkonko bambile’shi: “Su tuekala na bukidi bua kukumiina nshalelo mupia, atuikala na bukidi bua kualushuula muloo wetu, na abitupa mushindo wa kuiwubidishena na uno nshalelo eetu mupia.” c Kia kabidi, bibaadi bibatakule buabadia kuikala na mayele e bungi a kulungula mukandu wibuwa ku telefone, na kubanga kulonga na bantu Bible. Kia kasatu, babaadi na muloo wa kukumiina kunyingishibua kua kifulo na bukuashi bua bakuabo balume na bakashi ba mu diadia eumbo. Ungi mukuetu mukashi baadi ebapasukila pa kuibatumina mesaje e na Kifundue kia mu Bible efuku dioso munda a kipua kishima. Mu mushindo umune, su tubakumiina nshalelo eetu mupia, atukapete muloo mu kiakia kiatudi na ngobesha ya kukita.

10. Ungi mukuetu mukashi baadi muiubidishene na kushintuluka kukata kubaadi kukitshikie mu nshalelo aaye naminyi?

 ¹⁰ Tala ku mafuku aafiki, na otuule binangu ku mianda i buwa. Christina mukuetu mukashi baadi akula ludimi lua Roumaine mushaleele mu Japon, baadi mutshobolokie nsaa ibaabadi bakatushe kakongie ka ludimi lua Anglais kabaadi atuele. Ta baadi anangushena’shi wawa muanda wi kukitshika. Sunga mbiabia baadi muate kitshibilo kia kukita muaye mooso bua kutuela mu kakongie ka ludimi lua ki Japonais, na kulungula mukandu wibuwa na kisumi mu yawa terituare. Baadi mutekie ungi muana mukashi muina mudimo naaye buadia kumukuasha bua kumulongiesha ludimi lua ki Japonais amone bia kuiluakula kalolo. Yawa muana mukashi baadi mukumiine kufubisha Bible, na broshure a We kuikala na muloo bua loso! bua kulongiesha Christina ludimi lua ki Japonais. Biabia Christina baadi mulongie bia kuakula ludimi lua ki Japonais kalolo, anka muanda wi na muulo ukata yawa muana mukashi baadi mukumiine kuuka bibungi pabitale Bible. Su tuatala penda kumpala na kuikala na binangu bi buwa, kuakua kushintuluka kua mu kabasamushi kuikuitutuadila miabi yatush’atutengielanga.

11. Nkinyi kibaadi kikuashe mulume na mukashi aaye babaadi na nkalakashi ya kukutua kua makuta?

¹¹ Kitshiina bangi mianda ibuwa. Ungi mulume na mukashi bashaleele muiwumbo diabadi bakanfikie mudimo wetu, babaadi bapete lukalakashi lua makuta nsaa ibaadi ishimine makuta muiwumbo diabo. Babaadi beubidishene na uno nshalelo naminyi? Kia kumpala babaadi baate mpango ya kupelepeesha nshalelo aabo. Kia kabidi, pamutue pabadia kutuula binangu ku nkalakashi yaabo abo banabene, babaadi bepaane mu kukuasha bangi, na kuikala na bibungi bia kukita mu mudimo wa bulungudi. (Bik. 20:35) Mulume amba’shi: “Kuikala na bibungi bia kukita mu mudimo wa bulungudi, ta tui na nsaa i bungi ya kunangushena ku mianda i bubi nya, na nsaa ibungi tui batuule binangu bietu mu kukita kikiebe kieshimba ki’Efile Mukulu.” Nsaa ayishintuluka nshalelo eetu, abitungu tutentekieshe muulo wa kutungunuka na kukuasha bangi bikishekishe, mu mudimo wetu wa bulungudi.

12. Kileshesho kia Mpoolo mutumibua, ki kuitukuasha buatudia kuiwubidishena na nshalelo a bantu mu mudimo wa bulungudi naminyi?

¹² Abitungu tuikale na nkatshinkatshi mu mudimo wetu wa bulungudi. Atufumankanaa na bantu be na nkumiino ilekeene, mikeelo ilekeene, na bakudile mu ma mbalo elekeene. Mpoolo mutumibua baadi na nkatshinkatshi, n’atue namu tui kulongiela ku kilesheho kiaye. Yesu batudile Mpoolo bu “mutumibua a ingi miilo.” (Lom. 11:13) Mu uno mudimo waye Mpoolo baadi alungula mukandu wibuwa kui bena Yunda, bena Greke, bantu balongie, bantu beyishe, bantu bakata, na ba nfumu. Bua kukuma mashimba elekeene a bantu babaadi abamuteemesha, Mpoolo bafikile “kioso akitungu kui bantu ba mishindo yoso.” (1 Ko. 9:19-23) Mpoolo mutumibua baadi mutuule binangu biaye ku bipikua, mbalo ikudile bantu, malongiesha, nkumiino yabo, na kuiwubidishena na nshalelo aabo bua’shi ebakakie kui Efile Mukulu. N’atue namu tui kulumbuula mudimo wetu wa bulungudi, su atuiwubidishena na nshalelo a bantu na atutompo kunangushena mu mushindo wibuwa bua kukuasha muntu ooso atufumankana naaye.

13. Mmasaku kinyi abadi baleshe mu 1 Bena Kodinda 8:9, atudia kusuuka su atuneemeka mueneno a bangi?

¹³ Kuikala na nkashinkatshi akuitukuasha dingi bua kunemeka mueneno a bangi. Bu kileshesho, bangi bakuetu bakashi abakumiinaa kuimpeeta, bangi namu t’abakumiinaa. Bangi bena Nkidishitu abakumiinaa kutoma ndambo ya maalua, anka bangi namu mbaate kitshibilo kia kupela kutoma su ntupeela. Bena Nkidishitu booso abakumiinaa kuikala na mbidi bukome, kadi mbasangule mishindo ilekeene ya kuiyipasukila. Su tuanangushena’shi nka atue ngi abakitaa mianda ibuwa, tui kubanga kutompa kukitshisha bakuetu balume na bakashi biabia bietu biatukumiina, bino  mbilombene kukokosha bakuetu na kuabuula kakongie. Tatukumiina kukita bino nya! (Badika 1 Bena Kodinda 8:9; 10:23, 24) Tutaluuleyi bileshesho bibidi abilesha mushindo wa kutumikila mayi a kulonda a mu Bible alombene kuitukuasha buatudia kuikala na nkatshinkatshi, na kulama butaale.

14. Mmayi kinyi a kulonda a Bible atudi balombene kutumikila pabitale nfuadilo na ntshibilo sunga ngitshikilo eetu a nyene?

¹⁴ Nfuadilo na ntshibilo a nyene e buwa. Yehowa ta muitulungule mushindo watudia kufuala nya, anka muitupe mayi a kulonda atudia kutumikila. Atufualaa bilamba mu mushindo wibuwa aulesha kineemo kia bu bafubi b’Efile Mukulu be na nkatshinkatshi, kuiyisha, na “binangu bibuwa.” (1 Ti. 2:9, 10; 1 Mp. 3:3) T’abitungu tuikale na nfuadilo atungu’shi bantu bekale abetubandila nka atue. Mayi a kulonda a mu Bible aakuasha dingi bakulu, buabadia kuleka kuela miya yabo abo banabene pabitale kufuala, na kutshiba sunga kuitshikisha nyene. Bu kileshesho, bangi bakulu ba mu kakongie babaadi abakumiina kukuasha, bangi bakuetu balume ba nsongua babaadi bambule mushindo wa kutshiba nyene wa bantu babaadi bebefunyishe, nyene yabo ibaadi iipi kadi ipalakane. Bakulu babaadi bebakuashe mushindo kinyi kadi kushi kuibeelela miiya? Mukunkushi a kifunda bapeele bakulu elango dia mushindo wabadia kuisamba na bakuetu, bebalunguile’shi: “Nsaa y’anukidi kumpala bua kulongiesha, bantu abakambaa kutala mushindo wanumuekaa ku meeso kukila bi’anuakula, paapa pe kuikala lukalakashi pabitale nfuadilo eenu na ntshibilo eenu a nyene.” Penda nka dino elango dipeela, dibaadi dikuashe bano bakuetu ba nsongua bua badia kuuka kia kukita, na kukuasha bakulu bua kuibalanga kushi kuibeelela miiya. d

15. Mmiiya kinyi na mayi a kulonda a mu Bible a kuitukunkusha p’atuata kitshibilo kia kubukibua? (Bena Loma 14:5)

¹⁵ Kupasukila mbidi yetu. Abitungu muina Nkidishitu  ooso aate kitshibilo kia mushindo wadia kupasukila mbidi yaye aye nabene. (Nga. 6:5) Nsaa ayaata muina Nkidishitu kitshibilo kia kubukiibua, abitungu aneemekie miiya ya mu Bible ya kupela kuedibua mase na kukita lubuko. (Bik. 15:20; Nga. 5:19, 20) Kitshibilo kia kubukibua muntu nabene eatshilaa. Bangi bantu abakumiinaa kuenda ku ma mpitaalo akata bua kupasukila mbidi yabo, bangi namu abakumiinaa ingi mishindo yakubukiibua. Tui kuikala bashinkamishe atue banabene’shi kubukibua kampanda kui buwa sunga’shi kui bubi, anka abitungu tunemekie mueneno a bakuetu balume na bakashi, pabitale kitshibilo kiabo kia kubukibua. Pabitale uno muanda, abitungu tulamiine ino mianda ayilondo mu binangu bietu: (1) Nka penda Bufumu bu’Efile Mukulu ngi abuketupaasha bua losoo ku mikumbo yeetu. (Yesh. 33:24) (2) Abitungu muina Nkidishitu ooso “ekale mushinkamishe” kiakia kibuwa kuadiye nabene. (Badika Bena Loma 14:5.) (3) T’abitungu tutshibile bangi kiimu, sunga kuikala bu mabue a kikokoshi kumpala kuabo. (Lom. 14:13) (4) Bena Nkidishitu abalesha kifulo, abapushaa’shi buumune bua kakongie bui na muulo ukata kukila mueneno aabo. (Lom. 14:15, 19, 20) Su tubalamiina ino mianda mu binangu, atunyinsha nkekala mu kipuano na bakuetu balume na bakashi na kukuatshishena butaale mu kakongie.

16. Mukulu e kulesha nkatshinkatshi mu kipuano kiaye na bangi bakulu naminyi? (Tala dingi kifuatulo.)

¹⁶ Abitungu bakulu bekale bu bileshesho bibuwa bia nkatshinkatshi. (1 Ti. 3:2, 3) Bu kileshesho, mukulu ta mmulombene kukulupila’shi bakumiine nka mueneno aaye misuusa yooso, muanda’shi aye e na bipua bi bungi kukila bangi bakulu nya. Abitungu yawa mukulu aukie’shi kikudi kia Yehowa ki kutakula muntu ooso mu kasaka ka bakulu, bua kuakula muanda kampanda aukuatshishena ku bitshibilo bibuwa biabata. Na su mayi a kulonda a mu Bible ta ngatupilue, bakulu be na nkatshinkatshi abakumiina kukuatshishena kitshibilo kibaabakumiina kui bakulu bebungi, sunga kiakia kitshibilo kielekeena na aabo mueneno a mianda.

17. Mmiabi kinyi y’atupete su tui na nkatshinkatshi?

¹⁷ Bena Nkidishitu abapetaa miabi ibungi p’abekala na nkatshinkatshi. Atusangeelaa kipuano kietu kibuwa na bakuetu balume na bakashi, na butaale mu kakongie. Atuikalaa na muloo wa ngikashi ibuwa ya bu muntu builekeene na bipikua bi munkatshi mua balanguidi ba Yehowa be mu buumune. Kintu ki na muulo ukata, tui na muloo wa kuuka’shi atuambula nkatshinkatshi y’Efile Mukulu eetu, Yehowa.