1-2. Mmu mushindo kinyi mulombene kuikala muina Nkidishitu bu nshibo i bukopo? (1 Bena Kodinda 15:58)

 MU KIPUA kia 1978, babaadi bebakie nshibo ikile mashibo ooso a mu Tokyo mu Japon bula. Ibaadi na ma etaje 60, bantu babaadi ababandila babaadi abeyipusha’shi ino nshibo i kushaala imane apakitshika kutshinkatshinka kua nsenga akukitshikaa mu kino kibundi misuusa i bungi su? Bantu bebakie ino nshibo mbakite naminyi bua’shi ikadikie ayishaala imane apakitshika kutshinkatshinka kua nsenga? Baaba beyibakie, mbeyipue mu mushindo wa’shi ikadikie i bukopo na i na ngobesha ya kukambila kutshinkatshinka kua nsenga. Bena Nkidishitu be nka bu ino nshibo. Mu mushinso kinyi?

² Abitungu muina Nkidishitu ekadikie na nkatshinkatshi, pankatshi pa kushaala munyingie na bukidi bua kupusha. Abitungu ekadikie munyingie na kushaala sh’asanyishua nsaa ayitungu kukookiela miiya ya Yehowa na mayi aaye a kulonda. (Badika 1 Bena Kodinda 15:58.) Abitungu muina Nkidishitu ekadikie na “bukidi bua kukookiela” kushi kuladikiisha mianda. Mu ungi mpushisho, abitungu muina Nkidishitu ekadikie na “nkatshinkatshi” sunga kuikala na bukidi bua kupusha mu ingi mianda su bi na muulo. (Yak. 3:17) Muina Nkidishitu baapu kulonga bia kuikala na uno mmueneno a mianda e na nkatshinkatshi, t’akekadika na mianda i bukopo sunga kuilekiela nya. Mu uno muisambo, atukataluula mushindo watudia kuikala bash’abasanyishua. Atukatundula mishindo itaano ayitompaa Satana bua kubofusha bitshibilo bietu, na kulonga mushindo watudia kukambila kuikitshisha kuaye.

3. Mmiiya kinyi yabadi beele kui Yehowa y’atusangana mu Bikitshino 15:28, 29?

³ Yehowa e nka bupenka mutuushe miiya ilulame, na akitaa misuusa yooso bua’shi miiya yaye ikale ibofule kui muilo waye bua kuiyipusha. (Yesh. 33:22) Bu kileshesho, mu siekele a kumpala kasaka ka bakunkushi-bakulu, kabaadi katundule mishindo isatu ilombene muina Nkidishitu kushaala kushi kusanyishua: (1) kuleka lulanguilo lua mankishi, nkulanguila nka penda Yehowa, (2) nkulesha kaneemo bua mase ekale kintu kia kishila, na (3) nkukookiela mayi a kulonda a mu Bible, aetukuasha biatusha kupeta kinangu kia kutambuka masandi. (Badika Bikitshino 15:28, 29.) Lelo uno, bena Nkidishitu be kukookiela Yehowa mu ino mishindo isatu i pabuayo naminyi?

4. Tui kulanguila nka penda Yehowa mushindo kinyi? (Kibafumbuilue 4:11)

⁴ Tulekieyi lulanguilo lua mankishi, tulanguile nka penda Yehowa. Yehowa baadi mulungule bena Isaleele buabadia kumulanguila nka penda aye. (Miy. 5:6-10) Na pa baadi Satana mutuushe bitompuanga, Yesu balesheshe kalolo’shi abitungu tulanguile nka penda Yehowa. (Mat. 4:8-10) Ngi buakinyi, ta tui balombene kulanguila mankishi. Dingi, ta tui kukita lulanguilo lua bantu, bu kulanguila bakata ba bipuilo, bakata ba mianda ya politike, lulanguilo lua nyenyenyi, kukisha kapapi, na kuibamona bu b’efile mukulu. Atushalaa bemane pepoo nka ku lupese lua Yehowa, na kumulanguila nka penda aye “mupangi a bintu bioso.”—Badika Kibafumbuilue 4:11.

5. Buakinyi abitungu tukookiele muiya wa Yehowa utale kuata muwa na mase bu bintu bia kishila?

⁵ Atukookielaa muiya wa Yehowa utale kuata muwa na mase bu bintu bia kishila. Buakinyi? Muanda Yehowa amba’shi mase aalesha muwa, na nkia buntu ki na muulo akifiki kuadi. (Lv. 17:14) Pa baadi Yehowa mutadiile’shi bantu badie muita wa nyema bua musuusa wa kumpala, baadi muibapeleshe’shi ta badianga mase. (Kib. 9:4) Yehowa baadi mualushuule nka uno muiya umune pa baadi muelele bena Isaleele mu Muiya wa Moyise. (Lv. 17:10) Na Yehowa baadi mulungule kasaka ka bakunkushi-bakulu ka mu siekele a kumpala buakadia kulungula bena Nkidishitu booso’shi: “Belame . . . ku mase.” (Bik. 15:28, 29) Atushaala banyingie mu kukookiela kua uno muiya, p’atuata bitshibilo bia mushindo wa kubukibua. b

6. Abitungu tukite kinyi buatudia kukookiela mayi a kulonda a Yehowa alulame mu nshalelo eetu?

⁶ Tuikaleyi balamate nka ku mayi a kulonda a Yehowa alulame. (Eb. 13:4) Mpoolo mutumibua bafubishe ngakuilo a mu kinfuanyi, buadia kuitudimusha bua “kuipaa” bina mbidi bietu, bino abilesha’shi abitungu tuate bitshibilo bi bukopo bua kukambila ngabiabi i bubi ya ku mbidi. Abitungu tulekie kukita kintu kioso kilombene kuitutakula mu kutambuka lusandi. (Kol. 3:5; Yob. 31:1) P’atupete kitompuanga, abitungu musuusa umune tukatushe kinangu kioso sunga kikitshiino kilombene kuluisha kipuano kietu n’Efile Mukulu.

7. Nkitshibilo kinyi akitungu’shi tuate, na mbua kinyi?

⁷ Yehowa etutekie buatudia kuikala atukookiela “n’eshimba dimune.” (Lom. 6:17) Buludiki bua Yehowa abuikalaa kuanka misuusa yooso nka bua buwa buetu, na miiya yaye ta tui balombene kuiyishintula. (Yesh. 48:17, 18; 1 Ko. 6:9, 10) Atuikitshishaa buatudia kusankisha Yehowa na kulesha dino eyikashi dimune nka bu kayimba ka misambo kabambile’shi: “Nyi n’eshimba dya kukôkyela milangilo yobe mafuku oso, mpâ na pankafu.” (Mis. 119:112, EEM) Biabia, Satana ekitshishaa bua kubofusha kitshibilo kietu kia kukookiela. Mmayele kinyi afubishaa?

8. Satana kuete afubisha kubinguabingua na kepatshila ka kubofusha kitshibilo kietu kia kukookiela naminyi?

⁸ Kubinguabingua. Diabulu afuishaa buluishi bua ku mbidi na bua mu binangu, na kepatshila  ka’shi abofushe kitshibilo kietu kia kukookiela. Lukalo luaye ndua “kuitudia,” na kuluisha kipuano kietu na Yehowa. (1 Mp. 5:8) Bena Nkidishitu ba mu siekele a kumpala, babaadi abebakitshiina mianda bi bubi, kukupilua, kuipayibua pa muanda wa kitshibilo kiabo kia kushaala bashimate. (Bik. 5:27, 28, 40; 7:54-60) Lelo uno, Satana ki’atungunuka nka na kufubisha kuno kubinguabingua. Tukuete kumona buno buluishi, mu mushindo wa bakuete kukitshiina bakuetu balume na bakashi mianda bi bubi mu Russie, mu bingi bibundi, na mu buluishi bua pa bupenka bu’atupetaa kui beshikuanyi netu.

9. Tuusha kileshesho akilesha bia kudimuka p’abakukitshisha mianda mu bufiefie.

⁹ Kukitshisha muntu mianda mu bufiefie. Satana kuete afubisha “mayele e bubi” bua kuitubingabinga. (Ef. 6:11) Tuateyi kileshesho kia mukuetu mulume abetanyinaa bu Bob, baadi ku lupitaalo bua’shi bamubaale bua mukumbo wi bukopo. Baadi mulungule doktere’shi sunga nekadika na ano maladi, ta nkumiina kuedibua mase. Doktere baadi mukumiine buadia kuneemeka kitshibilo kiaye. Biabia, bufuku kumpala kua’shi babaale Bob, munganga atapishenaa buanga bua anesthesie bafikile mu kumona Bob kunyima kua bena kifuko kia Bob kualuka kuabo ku nshibo. Yawa munganga balunguile Bob’shi mase ta ngalombene kufubibua nao nya, kadi aekala peepi bua’shi su abitungu kuiela edibue. Pangi yawa munganga a buanga bua anesthesie baadi apuandikisha’shi Bob mmulombene kushintula kitshibilo kiaye, bu bishi bakuabo paapa. Anka Bob ta bashintuile kitshibilo kiaye kia kupela kuedibua mase nya, sunga kuakitshika muanda kinyi.

10. Buakinyi nangunangu ya bantu i masaku? (1 Bena Kodinda 3:19, 20)

¹⁰ Nangunangu ya bantu. Su tuabanga kumona mianda na kinangu kia bu muntu, tui kubanga kuluba Yehowa na mayi aaye a kulonda. (Badika 1 Bena Kodinda 3:19, 20.) “Binangu bia ino nsenga” abikalaa na bukitshishi bui bungi kui bantu bua’shi bapele kukookiela Efile Mukulu. Bena Nkidishitu bapeela ba mu kakongie ka Pergame na ka Tiyatire, babaadi bakumiine lulanguilo lua mankishi na binangu bi bubi bia kutambuka lusandi bibaadi bipalakane kui bantu be bungi mu bibundi. Yesu baadi mupe tukongie tooso tubidi elango di bukopo bua bibaatudi atutadiila bantu abatambuka lusandi. (Kbf. 2:14, 20) Lelo uno, bantu be tuifunyishe bakuete kutompa kuitukitshisha bua’shi tukumiine binangu bi bubi. Bena kifuko netu na bangi bantu, abatompaa kuitulesha’shi tui na miiya ikile bukopo, na’shi tui balombene kuipaa miiya ya Yehowa. Bu kileshesho, be kuamba dingi’shi ta bi na muulo buanudia kushaala batokane mu muikeelo nya, na’shi miiya ilulame ya mu Bible ngia kala.

11. Su atukumiina kushaala bashimate pepoo, abitungu’shi tulekie nkinyi?

¹¹ Ingi nsaa, tui kunangushena’shi buludiki bu’abetupa kui Yehowa t’abupushika kalolo. Tui kupeta kitompuanga kia “kuenda kula na mianda ifundibue.” (1 Ko. 4:6) Bakata ba bipuilo babaadi mu mafuku a Yesu, babaadi abakitshi uno muluisho. P’abo kutenteka yabo mianda mu Muiya, bibaadi bikeele bantu ba mu aa aabo mafuku bukopo bua kuiyikookiela. (Mat. 23:4) Yehowa etupeyaa buludiki abupushika kalolo kukiila Kuiyi diaye na kukiila kui ndumbuluilo aaye. Ta tui na kabingilo katudia kutenteka bungi buludiki ku biadi muitupe nya. (Nki. 3:5-7) Biabia, t’atukitaa mianda ikutuene na akiakula Bible nya sunga kutuusha miiya yetu atue banabene bua’shi balanguidi netu beyilonde.

12. Satana kuete afubisha “madimi” naminyi?

¹² Mianda ya madimi. Satana kuete afubisha “mianda ya madimi” na “mianda ya pa nsenga” bua kudimba na kuabuula bantu. (Kol. 2:8) Mu siekele a kumpala, mu ano madimi mubaadi filozofi imeene mu nangunangu ya bantu, malongiesha a bena Yuda asha atukila mu bifundue, na malongiesha a’shi abitungu bena Nkidishitu baneemekie nka Muiya wa Moyise. Ano ooso abaadi madimi ku muanda, babaadi abakimbi’shi bantu batuule binangu nka kuabadi kushi kutuula binangu  kui Nsulo ya binangu bia binyibinyi, Yehowa. Lelo uno, Satana kuete afubisha bisaashi na internete bua kupalakasha nkuku ya mianda ya madimi, na mikandu i bubi ya bakuete kutuusha kui bakata ba politike. Tui bamone mianda i bungi i bino mu kipungo kia Corona-Virus. c Tumonyi tua Yehowa tuikeele atuteemesha nka buludiki abutuukila mu ndumbuluilo eetu, na baleka kuinyongola bu abinyongolanga baaba bekeele abateemesha ino mikandu ya madimi.—Mat. 24:45.

13. Buakinyi abitungu tuikale badimukie pabitale kutuula binangu ku ingi mianda?

¹³ Kutuula binangu ku ingi mianda. T’abitungu’shi tushimishe binangu bietu ku “mianda i na muulo” nya. (Fid. 1:9, 10) P’atutuulu binangu bietu ku ingi mianda, atushimisha nsaa yetu na bukome buetu bui bungi. Midimo y’atukitaa mu nshalelo eetu bu kudia, kutoma, kukisha kapapi, na kufuba mudimo wa ku mbidi, mbilombene kukumba binangu bietu su tuatadiila’shi ino mianda ikadikie na muulo ukata mu nshalelo eetu. (Luk. 21:34, 35) Kukatusha biabia, efuku dioso tukuete kupushanga na kubadika mianda i bungi ya bakuete kuikakeena kui bena politike ngofu. Abitungu tuikale bashinkamishe’shi ta tui batuule binangu bietu mu kuno kuikakeena kua madimi. Abikala buwa su tuabanga kusangula lupese luatudia kutuula binangu bietu n’eshimba dietu. Satana kuete afubisha ano mayele ooso abatuteemuna kunundu, na kepatshila ka’shi abofushe kitshibilo kietu kia kukita kiakia ki buwa. Tubandeyi kutala biatudia kukambila kuakua kuikitshisha kuaye na kushaala bashimate.

14. Nkintu kinyi kimune ki bia kuitukuasha buatudia kushaala bashimate ku lupese lua Yehowa?

¹⁴ Nangushena buakinyi we mulambule muwa oobe kui Yehowa na obatshishibua. We mukite ano matabula muanda okumiina’shi oshaale ku lupese lua Yehowa. Banda kunangushena kibaadi kikukuashe bodia kuikala mushinkamishe’shi bopete bia binyibinyi. Bobangile kuiwuka Yehowa binyibinyi, otamisha kaneemo na kifulo buaye bu Nshobe e muiyilu. We mupete lukumiino, na luakutakula mu kuilanga kuishimba. Eshimba diobe dibaadi dikutakule bodia kuleka kukita mianda yooso i bubi, na obanga kukita mianda ayimusankisha. Boodi mupushe buwa bukile po boodi muukie’shi Efile Mukulu mmukufuile lusa. (Mis.  32:1, 2) Bobangile kutuela mu bisangilo bia buina Nkidishitu na obanga kulungula bangi mianda i buwa yodi mulongie. Bu biodi muilambule obatshishibua bu muina Nkidishitu, binobino okuete kutambukila muishinda adiende ku muwa, ikala na kitshibilo kia kupela kuimukatuka.—Mat. 7:13, 14.

15. Buakinyi kuilongiela na kunangushena abitukuasha?

¹⁵ Elongiele Eyi di’Efile Mukulu na kunangushena ku biolongo muanka. Nka bia kunyinga mutshi su wanyiisha kuela mishi yawo muushi mua nsenga ngofu, tui kushaala banyingie su lukumiino luetu luamena mishi Muiyi di’Efile Mukulu. Apanyiisha kukula mutshi, na mishi yawo namu ayinyiisha kutuela mu nsenga ngofu na ayinyiisha kuenda kui bula. P’atuilongiela Eyi di’Efile Mukulu na kunangushena, atunyingisha lukumiino luetu na atutamisha kishinkamiisho kietu kia’shi mashinda a Efile Mukulu e buwa. (Kol. 2:6, 7) Nangushena mushindo awitulongieshaa Yehowa, w’etukunkushaa, na kukaluila kuaye bibaakudi kukuashe bafubi baye ba kala. Bu kileshesho, Ezekiele baadi mutuule binangu biaye kui muikeyilu baadi apimi ntempelo kalolo abamuene mu kimonua. Kino kimonua kibaadi kinyingishe Ezekiele, na akitupa malongiesha atookane pabitale mushindo watudia kukookiela mayi a kulonda a Yehowa bua lulanguilo lui selele. d (Es. 40:1-4; 43:10-12) N’atue namu bi kuitukuasha p’atuata nsaa ya kulonga na kunangushena pabitale mianda ikata i Muiyi di’Efile Mukulu.

16. Eshimba dinyingie dibaadi dikaluile Bob mushindo kinyi? (Misambo 112:7)

¹⁶ Ikala n’eshimba dinyingie. Nfumu Davide bambile’shi ta mmulombene kuluba kifulo kiaye bua Yehowa pa bayimbile’shi: “Eshimba diande ndinyingie, ô Efile Mukulu ande.” (Mis. 57:7, NWT) N’atue namu tui kuikala n’eshimba dinyingie, p’atukulupila nka mui Yehowa. (Badika Misambo 112:7.) Tutaleyi mushindo ubaadi uno verse mukuashe Bob, atudi bateemune kunundu. Pa babamulunguile’shi mbalame mase bua’shi su kubamueka mushindo beele, bebaluluile’shi su babeele tumase su ntupeela, atuuku mu lupitaalo nka paapa. Kunyima Bob bambile’shi: “Ntshi naadi na mpaka bua kinaadia kukita, na ntshi naadi nekalakasha bua kilombene kukitshika nya.”

17. Muanda wabadi bamone kui Bob wi kuitulongiesha kinyi? (Tala dingi kifuatulo.)

¹⁷ Bob baadi n’eshimba dinyingie muanda baadi  mupue kuata bino bitshibilo bia kushaala mushimate munda a mafuku e bungi kumpala kua’shi ende mu kutuela mu lupitaalo. Kia kumpala, baadi na lukalo lua’shi asankishe Yehowa. Kia kabidi, Bob baadi elongiela kalolo Bible na mikanda yetu ayipatuula Bible ayakula bi muwa na mase bu bintu bia kishila. Kia kasatu, Bob baadi mushinkamishe’shi kulonda buludiki bua Yehowa, akutualaa miabi i bungi. N’atue namu tui kuikala n’eshimba dinyingie nsaa y’atufumankana na bitompuanga.

18. Kileshesho kia Barake akitulongiesha bua kukulupila mui Yehowa naminyi? (Tala kifuatulo kia ku kipusu.)

¹⁸ Kulupila mui Yehowa. Tutaluuleyi mushindo ubaadi Barake mobeshe muanda baadi mukulupile ku buludiki bua Yehowa. Mu aa mafuku, muilo wa bena Isaleele ta ubaadi wilumbuule bua kulua ngoshi nya, na ta babaadi sunga na biina ngoshi, kadi Yehowa balunguile Barake buadia kuenda mu kulua na nfumu a bena Kanaana, Sisera na kiluilo kiaye. Aku namu babaadi na biina ngoshi bi bungi. (Bans. 5:8) Mutemuki mukashi Debora balunguile Barake buadia kualaala muibanda akafumankana na Sisera na matempu aaye a ngoshi 900. Muamua muibanda, ngoshi ibaadi ayimueka’shi i kukambila bena Isaleele muanda wa matempu a ngoshi abaadi lubilo, sunga Barake baadi auku biabia’shi ngoshi i bukopo, baadi nka mukookiele enda. Pa balaleele nka basalayi ba bena Isaleele muibanda dia Tabore, Yehowa basukumuine mpeshi a mabue muiyilu. Matempu a ngoshi a Sisera ababangile kushiikama mu matekie, na Yehowa atshokuela Barake ngoshi. (Bans. 4:1-7, 10, 13-16) Mu mushindo umune, Yehowa aketutshokuela su tubakulupila muadi na kulonda buludiki bu’abetupa kui ndumbuluilo aaye.—Miy. 31:6.

19. Buakinyi okumiina kushaala munyingie?

¹⁹ Ngoshi yetu ya tukuete kulua bua kushaala bashimate, iki’ayitungunuka bu biatuki bashaale mu uno ndumbuluilo a mianda e bubi. (1 Ti. 6:11, 12; 2 Mp. 3:17) Tuikaleyi na kitshibilo kia kuikala bantu bash’abasanyishua p’atupete kubinguabingua, kukitshishua mianda mu bufiefie, nangunangu ya bantu, madimi, na kutuula binangu ku ingi mianda. (Ef. 4:14) Biabia, tushaleyi banyingie, bashimate mu kuilambula kuetu kui Yehowa, na bash’abasanyishua mu kukookiela kuetu kua miiya yaye. Na dingi abitungu tuikadikie na nkatshinkatshi. Mu muisambo aulondo, atukesambila mushindo wi Yehowa na Yesu bu bileshesho bipuidikie bia kuikala na nkatshinkatshi.