Papa baadi Pastere mu kipuilo kia bena Unie mu Canada. Biabia lubingo looso papa baadi etutumu ami na mukuetu mukashi buatudia kuenda mu ekodima. Kunyima atue babaatuku mu nsaa ya 11h, tubaadi atuende ku mudimo wa kipuilo. Kunyima kua midi tubaadi atuende na mama ku Nshibo ya Bufumu. Bibaadi bitubofuile bua kumona kuilekeena kui pankatshi pa bino bipuilo bibidi.

Mama babangile kulungula mukandu wibuwa kui ba kuuku baaye ba kala, Bob na Marion hutcheson. Na abo namu babaadi bakumiine bia binyibinyi. Mu kipua kia 1958, Hutcheson bangatshile’mi na bana baaye balume basatu, tuenda ku kikongeeno kibungie maumbo e bungi kibaadi na mutue wa muanda awamba’shi: “Kikiebe ki’eshimba di’Efile Mukulu.” Kibakitshikile munda mua mafuku muanda mu kibundi kia New York. P’angalusha binangu kunyima namono binobino’shi ta bibaadi bibofule bua bano bantu kungaata nya. Kadi, kino kikongeeno kibaadi buwa bukile kianshii mulombene kuiluankana mu nshalelo ande.

Pa naadi nki nsongua, tubaadi bakashalele mu Ferme munaadi nasangeela kupasukila nyema. Naadi nakumiina kulonga ngofu bua’shi ngikadikie bu veterinere. Nyinami baadi mukalungule ungi mukulu a mu kakongie uno muanda. Yawa mukulu baadi mmuntentekieshe na kalolo’shi, tui mu mafuku a ku nfudiilo, na andungula’shi kutuela ku université akungaata bipua bibungi. Na dingi kui na bukitshishi bukata ku kipuano kiande na Yehowa. (2 Ti. 3:1) Bino, bibaadi bintakule bua kuatakitshibilo kia kupela kutuela ku université.

 Natungunukile nka na kuiyipusha kiandia kukita kunyima kua kupudisha kalaasa ka sekondere. Sunga binaadi nalungula mukandu wibuwa lubingo looso, ntshinaadi musangeele bulungudi nya. Na tshinaadi munangusheene’shi ne kuikadika mbala-mashinda. Pa naadi nkia ntengiela, nshami shi Kamonyi ka Yehowa na masaba ande, babaadi banyingishe buandia kuenda mu kufuba nsaa i bungi mu kompanyi mukata a mu Toronto mu Canada. Bu bibaadi masaba ande na muasu ukata mu yawa kompanyi, naadi mukumiine wawa mudimo

Mu Toronto bu binaadi nakisha nsaa i bungi ku mudimo wande, na ba kuuku bashii ba Tumonyi tua Yehowa, nabangile kukutua bisangilo, na kukutuanga kulungula mukandu wibuwa nsaa yooso. Kumpala naadi mushaale na nyinami kulu mutande papa shii Kamonyi ka Yehowa. Kadi kunyima kuaye kufua, bibaadi abintungu’shi nkimbe ingi mbalo ya kushaala.

Hutcheson na mukashi aaye babaadi bangate bantuala ku kikongeeno kibakitshikile mu 1958, naadi nebamono nka bu baledi bande. Babaadi bangitanyine buandia kushaala nabo muabo mu nshibo na abo nkunkuasha buandia kutama mu kikudi. Mu kipua kia 1960, tubaadi babatshishibue pamune na muana aabo mulume John. John bafikile mbala-mashinda, na abio nkunkankamika buandia kutamisha mudimo wande wa bulungudi. Bakuetu pa babaamuene bi naadi nende kumpala mu kikudi mu kakongie, musuusa nka umune babaadi bantuule bu mukunkushi a Kalasa ka mudimo wa Teokrasi. a

Mu kipua kia 1966, naadi muiyibakishene na Randi Berge, baadi mbala-mashinda e na kisumi kikile na baadi mukumiine kuenda mu kufuba mu mbalo i na lukalo lukata lua balungudi. Mukunkushi eetu a kifunda baadi muitupasukile ngofu, etunyingisha buatudia kuenda mu kukuasha kakongie ka mu Orillia, Ontario. Nka paapa tubalongiele bintu tuekuenda.

Atue baki’abafiki kuakua ku Orillia, nami namu nabangile mudimo wa bu mbala-mashinda a mieshi yooso. Naadi mupushe buwa penda bua kipaso kibaadi Randi na muloo! Kasha nabangile bu mbala-mashinda nemupete muloo ukile wa kufubisha Bible na kumona bantu bi’abasankila bia binyibinyi. Tubapetele muabi ukata wa kukuasha ungi mulume na mukashi aaye ba muamua mu Orillia, buabadia kushintuluka mu nshalelo aabo bafika bafubi ba Yehowa.

Pa nayile mu kutemba mu Toronto, naadi muimoneene na Arnold MacNamara, umune a ku bakuetu balume babaadi abakunkusha Betele. Baadi mungipushe su nakumiina kuikala bu mbala-mashinda a nsaa yooso. Musango umune naadi mumualuule’shi: “Nankumiina! Naadi mukumiine kuenda angi ma mbalo, kadi kushii kuenda ku Québec!” Naadi musangane’shi bantu ba mu ma mbalo e bungi a mu Canada, abakulaa ludimi lua Anglais, anka bantu ba mu Province a Québec namu abakulaa nka nfualase. Aa mafuku bakata ba politike babaadi abatekie guvernema bua’shi Province a Québec ekadikie pa buaye sh’ayitabila mu Canada.

Arnold bamualuluile’shi, ku Québec ngi nka mbalo imune ya bakuete kutuma ba mbala-mashinda ba nsaa yooso kui filiale mu kino kipungo. Musuusa umune naadi mukumiine kui kuenda. Naadi mupue kuuka’shi mukashi ande Randi baadi mukumiine nkafuba kuanka. Kunyima naadi mumone’shi kino kibaadi kitshibilo ki buwa bukile kia ku bitshibilo bia mu nshalelo eetu!

Kunyima ku’atue kutuela mu kalaasa ka kataano ka mu nfualase, ami na Randi tubaadi bende mu Rimouski pamune na ungi mulume na mukashi aaye. Kubaadi bilometre bifikie ku 540, dia pankatshi pa kunundu na kutunduka kua kibundi kia Montreal. Tubaadi tuki’atulongo nka bintu bibungi na bino bibaadi bitukuashe ngofu p’atutuele mu bisangilo na pa mbadika ingi ngukisho. Naadi muambe’shi ku kikongeeno kietu akifiki, atukapete “ba Tumonyi Autriche be bungi” pamutue a kuamba’shi atukapete “ba Tumonyi ba mu Autriche be bungi.”

Kuakua ku Rimouski tubaadi bantu bananka, akupu ingi nsonguakashi inanka ibaadi na kisumi kia kulungula mukandu wibuwa ibetulondele na Huberdeaus na mukashi aaye na bana baabo bakashi babidi. Mukuetu mulume Huberdeaus na mukashi aaye, babaadi abafutshila nshibo ikata, ibaadi na tudimbo musambobidi. Ba mbala-mashinda boso babafikile mu kushaala muamua, na babanga kukuasha mu kufutshila yaaya nshibo. Tubaadi abeyitanyina bu nshibo itooka ku muanda ibaadi ishingie mpendi itooka na misungu itooka. Tubaadi bafikie ku 12 sunga 14 bashaale mu yaaya nshibo. Bu bibatudi ba mbala-mashinda ba nsaa yooso, ami na Randi, tubaadi atutuku mu kulungula mukandu wibuwa ku namashika, kunyima kua midi na ku kiolua. Biabia tubaadi atupusha buwa’shi mungi namu apeta mushindo wadia kuitushindikilanga mu uno mudimo, sunga bibakudi akuele mashika kiolua kioso mu kiakia kipungo.

Tubaadi banyiishe kuikala mu kipuano kibuwa na bano ba mbala-mashinda baasha lulamato, babafikile kuatudi bu bena kifuko. Ingi misuusa tubaadi atushaala pamune atooto kaalo sunga “kusangula efuku dia kuadia bia kudia bia kuakua.” Na tubaadi atukitshi boulette ya muita. Bu bibatudi beubidishene na bia kudia bilekeene, muntu na muntu baadi akitshi nsupu y’akumiina aye nabene kudia. Umune a ku bakuetu balume, baadi auku kuimba mizike kalolo kakile. Biabia bufuku bua mu dia Mpooso mooso, tubaadi atuyimbi na kusha.

Atue babapu kukita bipua bitaano, tubaadi bapushe muloo ukile wa kumona balongi ba Bible bebungi bi’abende kumpala mpaa na kubatshishibua! Kakongie kabatamine kafika na balungudi bafikie ku 35.

Ku Québec tubaadi balongieshibue mushindo wa kulungula mukandu wibuwa kalolo. Tubamuene mushindo awitukuasha Yehowa mu mudimo wetu wa bulungudi mpaa na ku nkalo yetu ya ku mbidi. Kukatusha biabia, tubaadi balongie bia kufula bantu abakula ludimi lua nfualase, na bipikua biabo. Bino mbitutume n’atue namu mu kufula bipikua bia bangi.—2 Ko. 6:13.

Tubaasamukile komite a filiale betulungula buatudia kukatuka paapa patudi, tuende ku kingi kibundi kia mu Tracadie dia kutunduka nguba kua Nouveau-Brunswick. Bino bibaadi lukalakashi lukata kuatudi, ku muanda naadi mupue kuela kiala bua kufuta nshibo, na naadi mukatekie bakata ba tulaasa bua’shi ngikadikie nalongiesha nsaa ipeela ku tulaasa tuabo bua kupeta ekuta. Kukatusha biabia, bangi ba ku balongi betu ba Bible, babaadi baki’abakatuka mu kuikala bu balungudi ba mukandu wibuwa. Na dingi tubaadi tuki’atuibaka Nshibo ya Bufumu.

 Tubaadi atuele nteko ku lubingo looso pabitale kuenda ku Tracadie, muanda kubaadi kuilekeene ngofu na mu Rimouski. Anka tubaadi baate kitshibilo kia’shi bu bibakumiina Yehowa’shi tuende kuakua, abitungu kuikuende. Tubaadi batompe Yehowa na tubamuene bi’etukatuisha bikokoshi bioso. (Mal. 3:10) Bu bibaadi Randi munyingie mu kikudi misuusa yooso, na kikudi kia kuipaana, na bibaadi mukumiine miseku, bino bibaadi bitukuashe bua kumona lukalakashi bu lushi kuanka.

Mu kakongie keetu kapia, mubaadi nka penda mukulu umune Robert Ross. Baadi na mukashi aaye Linda baadi mbala-mashinda a mieshi yooso. Babaadi baate kitshibilo kia kushaala kuakua kunyima kua kutanda muana aabo a kumpala. Sunga mbibaabadi baki’abakusha muana aabo ki mukinga, muloo ubaabadi betutambule nao, kitshibilo kiabo kia kufubila Yehowa, na katshintshi kaabo ka mudimo wa bulungudi bibaadi bitunyingishe ngofu ami na Randi.

Kunyima kua kufuba bu ba mbala-mashinda mu Tracadie munda a bipua bibidi, tubasamukile dingi babetuitanyina bua kuenda mu kufuba bu bakunkushi ba kifunda. Tubaadi bafube mu kifunda kiabakulaa ludimi lua Anglais munda a bipua musambobidi. Kunyima babaadi betutume mu kufuba mu kifunda ki’abakulaa ludimi lua nfualase mu Québec. Mukunkushi eetu a kifunda a muamua mu kibundi kia Québec, Léonce Crépeault baadi antumbula bua miisambo yande. Anka kunyima baadi angipusha nsaa yooso’shi, “Bantu be kunyiisha kutumikila ino miisambo naminyi?” b Kuno kumpasukila kua pa bupenka, kubaadi nkukuashe bua’shi ntuule kinangu kiande ku malongiesha bua’shi nyiishe kuiabofusha na ekadikie aapushika kalolo.

Umune wa ku midimo wansha nangiluankane mu nshalelo ande, mpa babantumine ku kikongeeno kibungie maumbo e bungi kibakitshikile mu 1978 mu kibundi kia Montreal. Kibaadi na mutue wa muanda awamba’shi: “La foi victorieuse.” Naadi mufube ku mudimo wa biakudia. Na tubaadi batuele ku kiakia kikongeeno bantu 80000, tubaadi bebadishe ngofu mu mushindo wilekene na bibatudi atukitshi kumpala. Mianda yooso ibaadi ipia, bintu bia kuteekiela, bungi bua bidibua bia kuteeka, na winyi mushindo wa kuibiteeka. Tubaadi na ma congélateur akata 20. Kadi ingi nsaa ta abaadi aafubu kalolo nya. Kumpala kua kubanga efuku dibedi ta tubaadi na mushindo wa kutuela mu kipalue mubaadi amukitshikila kikongeeno nya, ku muanda babaadi bapue kuata programe a kuimuashila ndundo kumpala kua’shi tubangie kikongeeno. Tubaadi bakuatshishe kaalo ku ma mbabula buatudia kuteeka kidibua kia namashika. Tubaadi bakookie ngofu, anka naadi mulongie mianda i bungi pabitale kufuba ngofu, kuikadika muntu munyingie mu kikudi, na eele miseku kui beneetu batufubu nabo. Kubatukile bipeta bi buwa bukile. Tuki mu bu kuuku bui buwa bukile mpaa na lelo uno. Bibaadi muloo  ukile wa kutuela ku kino kikongeeno kikata mu Québec Province baadi na kubinguabingua kui bukopo. Kubanga mu kipua kia 1940 na ku kipua kia 1950!

Naadi mulongie mianda i bungi kui bakunkushi nami, mu kino kikongeeno kikata kia ku Montreal. Kingi kipua David Splane taadi afubu lelo uno mu Kasaka ka Bakunkushi-Bakulu, ngi baadi bu mukunkushi a kikongeeno. Ku kingi kikongeeno kibalondele, babaadi bantekie nami bua’shi nkite wawa mudimo wa bu mukunkushi a kikongeeno. Biabia David Splane baadi muntu e buwa kufuba naye.

Mu kipua kia 2011, atue babapu kukita bipua 36, mu mudimo wa bu mukunkushi a kifunda, babaadi bangitanyine buandia kuikala bu mulongieshi a Kalaasa ka Bakulu mu Tukongie. Penda munda a bipua bibidi tubaadi balaale ku nsala ilekeene 75, kuno kubaadi kuipaana kukata. Ku nfudiilo kua lubingo looso, bakulu babaadi na lutumbu lui bungi kuatudi. Ku muanda babaadi abamono mushindo ubaadi Kasaka ka Bakunkushi-Bakulu akebapasukila ku nkalo yabo ya mu kikudi.

Akupu naadi mulongieshe ku Kalaasa ka Balungudi ba Bufumu. Bena kalaasa babaadi abakooko ngofu na kuinyongola pa muanda wa programe a kalaasa baadi na bintu bikile bungi. Kushaala mu kalaasa munda mua nsaa musambobidi kuifuku, kukita midimo y’abetupa, kukita bipindi, munda mua nsaa isatu ku kiolua kioso, na kukita ingi midimo ya maasa 4 sunga 5, ibaabadi abetupa ku lubingo looso. Ami na ungi mulongieshi nami tubaadi abebapatuluila’shi, ta nui kukita bino bioso su Yehowa nta muinukuashe. Nki’antentekieshaa mushindo ubaabidi abinkaanyisha p’ami kumona bena kalaasa mbakulupile Yehowa, na abapete mushindo wabadia koobesha kukita bibungi kukila bibaabadi abanangushena.

Bu bibaadi mama apasukila bangi, baadi mukuashe balongi baaye ba Bible buabadia kuenda kumpala mu kikudi, na bakuashishe mpaa na papa buadia kushintula mueneno aaye pabitale bia binyibinyi. Mafuku asatu kunyima kua lufu lua mama, papa baadi muitukaanyishe p’aye kuenda ku Nshibo ya Bufumu bua kuteemesha muisambo wa bantu booso na dingi batungunukile nka na kutuela mu bisangilo munda a bipua 26. Sunga bibaadi papa ta mubatshishibue, bakulu babaadi bandungule’shi aye ngi baadi afiki bu muntu a kumpala ku bisangilo lubingo looso.

Mama baadi dingi kileshesho ki buwa bukile kuandi na kui bakuetu bakashi. Bankashanami booso basatu na balume baabo, bakuete kufubila Yehowa na lulamato. Bankashanami babidi bakuete kufuba ku Betele a mu Portigal na yawa a kasatu kuete afubu ku Haiti.

Ami na mukashi ande Randi, binobino tukuete kufuba bu ba mbala-mashinda ba nsaa yooso mu kibundi kia Hamilton, Ontario. Pa batudi atukitshi mudimo wa bu bakunkushi ba kifunda, tubaadi na muloo wa kushindikila bangi mu kualukila bantu, na mu kulonga na balongi baabo ba Bible. Anka lelo uno tui na muloo wa kumona balongi betu ba Bible biabakuete kuenda kumpala mu kikudi. Na dingi bu bitatudi na ba kuuku be bungi mu kakongie keetu kapia, bikuete kuitunyingisha p’atumono mushindo awibakuasha Yehowa mu bipungo bi bubi na mu bipungo bibuwa.

P’atualusha binangu kunyima, tui na lutumbu lukata lua bibaadi bitupasukile namu bantu be bungi. Ku luetu lupese namu tui bekitshishe ngofu buatudia “kuikalakasha bua bangi” tue banyingisha buabadia kulombasha midimo yabo ya mu kikudi kalolo. (2 Ko. 7:6, 7) Bu kileshesho, kingi kifuko kubanga ku nyinabo, muana abo mulume, muana abo mukashi, booso babaadi mu mudimo wa nsaa yooso. Nayipuishe mulume a uno mukuetu mukashi su e kuata naye mudimo wa bu mbala-mashinda, bangaluluile’shi baadi akuatshishena ba mbala-mashinda basatu. Biabia namupuishi’shi, “We kuibakuatshishena kalolo kukila bilombene Yehowa kuibakuatshishena su?” Naadi mumunyingishe buadia kuata wawa mudimo wi nao bena kifuko kiaye. Kunyima kua mieshi isamombo bafikile naye mbala-mashinda.

Ami na mukashi ande Randi, atukatungunuka na kulungula “bipungilo bioso abikalando” pabitale ‘mifubo ya kukaanya ya Yehowa,’ na atukulupila’shi abakasangeela mufubo waye ngofu nka bu biatukuete kuiwusangeela.—Mis. 71:17, 18.