BANTU abakimbuulaa bintu bia kala, babaadi basangane mu kibundi kia Babilone a kala matafuadi e bungi abaabadi bapue bua kuibaka kibundi kia Babilone. Ungi muntu akimbulaa bintu bia kala abetanyinaa bu Robert Koldewey amba’shi, aa matafuadi, babaadi abeakitshina mu nfuulo a kaalo “paasha pa kibundi kia Babilone, mbalo ibaadi nsenga ya ema i buwa . . . na bintu bia kukuatshisha nabio kaalo bi bungi.”

Bintu biabadi basangane kui bantu abakimbuulaa bintu bia kala, abilesha’shi, bakata ba mbulamatadi ba mu Babilone, babaadi abafubisha dingi ma nfuulo a kaalo bua kukita bintu bia kukaanya. Ungi Profesere Paul-Alain Beaulieu a ku Université a mu Toronto, alongieshaa pabitale bia kukimbuula bintu bia kala amba’shi: “Mu Babilone ngi mubaadi bu nsulo . . . ya ma nfuulo abaabadi abafubisha kui bakata ba mbulamatadi bua kuata bitshibilo bia kuela bantu abebatombokiela mu kaalo, na abakitshi bibeshi na basha kasaabu bua bintu bia kishila.” Kui kifundue kia mu mafuku a Nfumu Nabukodonosore kibaadi muakule amba’shi: “Ebayipeyi, ebekieleyi, . . . ebatusheyi miishi mu ma nfuulo a kutekiela, ebayipeyi lufu lua malua mu ndimi ya kaalo ke bukopo.”

Bino abitentenkieshaa bantu ababadika Bible mianda ikata yabadi bafunde mu mukanda wa Ndanyele shapitre a 3. Muyile biabadi bafunde, Nfumu Nabukodonosore bakitshiine nkishi mukata a Oolo, amutuula mu kipia kia Dura paasha pa kibundi kia Babilone. Pa baadi bano ba nsongualume basatu bena Ebelu babaabadi abetanyina bu Shadrake, Meshake na Abende nego bapele kukunamina yawa nkishi, Nabukodonosore bakuatshile nsungu ikile, atuma eyi dia’shi bashisakanye kaalo mu nfuulo, “kakile ka mafuku ooso misuusa musambobidi,” na babelele bano bana balume basatu mu ‘yawa nfuulo e kaalo ke bukopo a kateembe.’ Muikeyilu umune baadi na bukome bukile baadi muibapashe ku lualua lufu.—Nda. 3:1-6, 19-28.

Matafuadi abaabadi basangane mu Babilone a kala aalesha dingi’shi akiakula Bible nkia binyi. Munkatshi mua aa matafuadi, mubaadi matafuadi e bungi abaadi na bifundue abiamba’shi, tumbishayi nfumu. Kimune kia biabia Bifundue kibaadi akiamba’shi: “Nabukodonosore, Nfumu a Babilone.” Kingi namu’shi: “Nayibaka ebalasa diandia kushaala losoo ami Nfumu mukata . . . bekulu bande, abamunana mu buno bufumu bua losoo.” Bino bibaadi bifundibue mbipushene na bibaabadi bafunde mu Ndanyele 4:30, bibambile Nabukodonosore’shi: “Awa, ta mBabilone mukata andi mwibakye bu nshibo ya bulopwe ku bukome bwande, na ku ntumbo ya bukata bwande?”