KUILUMBUULA akupashaa miuwa. Bu kileshesho, apatuuku masaku a ku bintu bipangibue, bantu belumbule abapandaa ku anka ngofu. Na abapetaa mushindo wabadia kukuasha bangi. Ndumbuluilo a mu Europe akuashaa bantu amba’shi: “Kuilumbuula kua kalolo akupashaa miuwa.”

2. Buakinyi abitungu tuilumbuule bua mpombo ikata? (Mateo 24:44)

² “Mpombo ikata” ayikabanga mu kabasamushi. (Mat. 24:21) Mpombo ikata ngilekeene na angi masaku e bungi, muanda atuuku’shi ayikafiki. Takupuile kukila bipua 2000, na Yesu kudimusha balongi baaye buabadia kuilumbuula bua diadia efuku. (Badika Mateo 24:44.) Su tubekala belumbule abiketubofuila buatudia kunyingiila kino kipungo ki bukopo, na kukuasha bangi buabadia kunyingiila bu atue.—Luk. 21:36.

3. Mmushindo kinyi auketukuasha kunyingiila, lusa, na kifulo bua kuikala belumbule bua mpombo ikata?

³ Tutaluuleyi ngikashi isatu ilombene kuitukuasha buatudia kuikala belumbule bua mpombo ikata. Tui kukita naminyi su betulungula buatudia kulungula mukandu wa kiimu wi bu mabue, na bantu bashi balanguidi neetu betutombokiela? (Kbf. 16:21) Abikatungu tunyingiile bua kukookiela Yehowa, na kumukulupila’shi aketukaluila. Atukakitshi naminyi su bangi bakuetu bashimisha bingi bintu biabo sunga bintu biabo bioso bia ku mbidi? (Aba. 3:17, 18) Abikatungu tuikale na lusa bua’shi luitutakule buatudia kuibapa bingi bintu bia ku mbidi. Atukakitshi naminyi su miilo isangie yaketutuuka ngoshi, atukekala mu kipuano ki buwa na bakuetu balume na bakashi mu kiakia kipungo su? (Es. 38:10-12) Abikatungu tuikale bebafule ngofu bua’shi bitukuashe buatudia kunyingiila kiakia kipungo ki bukopo.

4. Bible etulesha kinyi akitungu’shi tutungunukie na kudima eyikashi dia kunyigiila, lusa, na kifulo?

 ⁴ Eyi di’Efile Mukulu aditunyingisha bua kutungunuka na kudima eyikashi dia kunyigiila, lusa, na kifulo. Luka 21:19 amba’shi: “Anukalama miuwa yenu mu kunyingiila kuenu.” Mukanda wa Bena Kolose 3:12 awamba nyi’shi: “Fualayi . . . lusa.” Na mukanda wa 1 Bena Tesalonike 4:9, 10 awamba dingi’shi: “Anue banabene nui balongieshibue n’Efile Mukulu bua kuifulena ku muntu na muntu. . . . Kadi bakuetu, atuinusendeela bua kutungunuka na kunyisha kuibikita.” Ano ma verse ooso mbeafundile balongi bapue kulesha kunyingiila, lusa, na kifulo. Biabia, bakuete kutungunuka na kulonga mushindo wa kulesha ino ngikashi. N’atue namu, abitungu tukite nka biabia. Bua’shi bitukuashe, tubandeyi kutaluula bibaadi bena Nkidishitu ba kumpala baleshe eyikashi dioso dia ku ino ngikashi. Dingi, atukamono mushindo watudia kuambula bano balongi booso, na bu kipeta atulesha’shi tui belumbule bua mpombo ikata.

5. Bena Nkidishitu ba kumpala babaadi banyingiile bitompuanga naminyi?

⁵ Bena Nkidishitu ba kumpala babaadi na lukalo na kunyingiila. (Eb. 10:36) Kukatusha kunyingiila kua nkalakashi ibaadi ayikuata bantu booso, abo babaadi abapete nyi bitompua bu biabadi bena Nkidishitu. Bebungi ba kuabadi babaadi ababinguabingua, kui bakata ba bipuilo bia mu Yudeya, na bakata ba mu Loma, mpaa na kui bena bifuko biabo abo banabene. (Mat. 10:21) Na babaadi abekitshisha bua kushinkamisha’shi, malambukishi a madimi a bantu basuumbule lukumiino abaadi aabuula tukongie, ta e na bukitshishi kuabadi. (Bik. 20:29, 30) Biabia baaba bena Nkidishitu babaadi banyigiile. (Kbf. 2:3) Mu mushindo kinyi? Babaadi abalondo bileshesho bia mu bifundue bia kunyingiila, bu kileshesho kia Yobo. (Yak. 5:10, 11) Babaadi abeele nteko, bua kupeta bukome bua kunyingiila. (Bik. 4:29-31) Na babaadi batuule binangu biabo nka ku bipeta bibuwa bibaadi abituuku mu kunyingiila kuabo.—Bik. 5:41.

6. We kulongiela kinyi ku bibaadi binyingiile Merita buluishi?

⁶ N’atue namu tui kunyingiila su atubadika efuku dioso bileshesho bia kunyingiila Muiyi di’Efile Mukulu, na mu mikanda yetu, na kunangushena ku bianka. Mukuetu mukashi Merita a mu Albanie pabakitshine bino baadi mupete mushindo wa kunyigiila kubinguabingua kui bukopo kua mu kifuko kiaye. Amba’shi: “Muanda wa Yobo wi mu Bible, ubaadi unyingishe ngofu panaadi muiwilongiele. Baadi akiengie ngofu, kushi aye kuuka winyi baadi nsulo ya bitompuanga biaye, na bambile’shi: “Mpaa na pa nkafuila ntaa na ndekie kululama kuande!” (Yob. 27:5, NWT) Pa mpuandikisha bitompuanga biande, mbipeela ngofu pe bibaadi bikiengie Yobo. Mu kuilekeena na Yobo, ami nauku baaba bakuete kunfuishiisha bitompuanga biande.”

7. Sunga’shi t’ofumankeene na nkalakashi ibukopo, abitungu olongie bua kukita kinyi kubanga binobino?

⁷ Dingi tui kunyingisha kunyingiila kuetu p’atuikala atuele nteko misuusa yooso kui Yehowa, na kumulungula mianda yeetu yooso. (Fid. 4:6; 1 Tes. 5:17) Pangi t’opetele nkalakashi ibukopo binobino nya. Sunga mbiabia we mulombene kuela nteko kui Yehowa, omuteka bukuashi su we mukalakashibue na su we na mianda ibungi mu mutue, sunga kukutua kuuka kia kukita. Su buekadika otekie Efile Mukulu eetu bua’shi akukuashe mu luteko ku ino mianda ipeela y’okiopete binobino, t’abikakuikeela bukopo bodia kuteka nsaa yokapete nkalakashi ibukopo mu mafuku aafiki nya. Okashinkamisha’shi Yehowa auku kalolo nsaa yadi mulombene nkukuasha, na mushindo wadia nkukitshina mianda.—Mis. 27:1, 3.

8. Kileshesho kia Mira akilesha bia kunyingiila nkalakashi lelo uno, nkilombene kuitukuasha bua nkalakashi ya mu mafuku aafiki naminyi? (Yakobo 1:2-4) (Tala dingi kifuatulo.)

⁸ Atukanyingiila ngofu mu mafuku aafiki ku mpombo ikata su tubabanga kunyingiila ku nkalakashi ya ano mafuku. (Lom. 5:3) Buakinyi atuamba biabia? Bakuetu be bungi abamba’shi nsaa yooso y’atunyingiila nkalakashi y’atupete,  abitukuasha bua kunyingiila ingi nkalakashi ayifiki. Nsaa y’abanyigiila nkalakashi ku bukuashi bua Yehowa, lukumiino luabo alunyiisha kunyinga’shi Yehowa mmukumiine kuibakuasha. Na muanda be na lukumiino mui Yehowa, mbalombene kunyingiila nkalakashi ayifiki. (Badika Yakobo 1:2-4.) Mukuetu mukashi mbala-mashinda Mira, a mu Albanie, musangane’shi bi baadi munyingiile mu mafuku a kala, mbimukuashe buadia kutungunuka na kunyingiila nkalakashi yakuete kupeta binobino. Amba’shi ingi nsaa epushaa’shi nka penda aye ngi ekalaa na nkalakashi i bungi. Anka p’atentekiesha bungi bua misuusa yabadi bapue kumukitshina mianda kui Yehowa munda a bipua 20 bipue kukila bua kumukuasha, aye nabene elungula’shi: ‘Shaala na lulamato. Tolekanga kufubila Yehowa kubanga binobino, kunyima kuaye kupua nkukuasha bua kunyingiila ku nkalakashi i bungi.’ N’obe namu we kunangushena ku mushindo wabadi bapue nkukuasha kui Yehowa bua kunyingiila. Shinkamisha’shi kuete abekiela misuusa yooso y’okuete onyingiila nkalakashi na’shi akakufutu. (Mat. 5:10-12) Dingi, apakabanga mpombo ikata, okalongo biodia kunyingiila na biodia nkekala na kitshibilo kiodia kutungunuka na kunyingiila.

9. Kakongie ka mu Antiyoshe mu Sirii kabaadi kaleshe lusa naminyi?

⁹ Tubandeyi kutala kibaadi kikitshikie pa baadi bena Nkidishitu ba mu Yudeya bapete kikupa kia nsala ki bukopo. Pa bapushishe bena kakongie ka mu Antiyoshe mu Sirii pabitale yaya nsala, kushi mpaka babapushiishe lusa bua bakuabo balume na bakashi ba mu Yudeya. Biabia lualua lusa luabo lubaadi luibatakule bua kukita kintu kampanda bua bakuabo balume na bakashi. Balongi “babaatshile kitshibilo kia kutuma bukuashi kui bakuabo be mu Yudeya.” (Bik. 11:27-30) Sunga bakuetu balume na bakashi babaadi na nsala babaadi bashaale kuibula, bena Nkidishitu ba mu Antiyoshe babaadi baate nka kitshibilo kia kuibakuasha.—1 Yo. 3:17, 18.

10. Mu ingi mishindo kinyi muatudi balombene kulesha lusa nsaa ayipete balanguidi neetu masaku aatukila ku bintu bipangibue? (Tala dingi kifuatulo.)

¹⁰ N’atue namu tui kulesha lusa lelo uno p’atupusha’shi balanguidi neetu babapete masaku aatukila ku bintu bipangibue. Tui kuikala belumbule bua kukuasha pangi p’atuipusha bakulu su tui balombene kukuasha ku yaya mbalo ibatuuku masaku, p’atutuusha bia buntu abikuatshishena mudimo wa mu nsenga ishama, sunga kuteka bua baaba babapete masaku aatukila ku bintu bipangibue. b (Nki. 17:17) Bu kileshesho, mu kipua kia 2020, ma komite aatushaa bukuashi kui bantu abapete masaku aatukila ku bintu bipangibue akile pa 950, ekeele atudibue mu nsenga ishima bua kupasukila baaba bakuatshikie na kipupa kia Corona-Virus. Tui na lutumbu lukata bua baaba bakuete kufuba mu ano ma komite. Pa muanda be na lusa bua bakuabo balume na bakashi, mbebabile bintu bia ku mbidi na kuibakuasha buabadia kutungunuka na kufubila Yehowa. Mu ingi mianda mbalumbuule sunga kuibaka mashibo na ma mbalo a lulanguilo.—Puandikisha na 2 Bena Kodinda 8:1-4.

11. Bikitshino bia lusa abitumbishaa Nshetu e muiyilu naminyi?

¹¹ P’atulesha lusa kunyima kua masaku aatukila ku bintu bipangibue kutuuka, bangi abamono kuikitshisha kuetu. Bu kileshesho, mu kipua kia 2019, lupapi luibukopo lu’abetanyinaa bu Ouragan Dorian lubaadi luluishe Nshibo ya Bufumu mu Bahamas. Pa baadi bakuetu balume na bakashi abebakuula yaya Nshibo ya Bufumu, babatekiele ungi muntu shi Kamonyi ka Yehowa auku luibako, buadia kuibafundila bingi bintu biabadi nabio lukalo bua kukita wawa mudimo. Bebalunguile’shi: “Nankumiina kutuusha kia buntu . . . bintu bilombane na ndambo ya makuta. . . . Nankumiina kukita bino nka penda bua ndumbuluilo eenu. Akintakula bua kukita bino [mbianuipushaa] pabitale  ba kuuku benu.” Bantu be bungi mu nsenga t’abauwuku Yehowa nya. Anka be bungi bakuabadi abamonaa nka abikitshi Tumonyi tua Yehowa bua kukuasha bangi. Tui na kineemo kia kuuka’shi bikitshino bietu bia lusa, mbilombene kukaka bantu kui Efile Mukulu, sha “lusa lukata”!—Ef. 2:4.

12. Kuikala na eyikashi dia lusa lelo uno akuitulumbuula bua mpombo ikata naminyi? (Kibafumbuilue 13:16, 17)

¹² Buakinyi abitungu tuleshe lusa mu kipungo kia mpombo ikata? Bible etulesha’shi baaba bash’abakumiina nkakuatshishena bena politike ba mu ino nsenga, abakapete nkalakashi ibukopo kubanga binobino, mpaa na mu kipungo kia mpombo ikata. (Badika Kibafumbuilue 13:16, 17.) Bakuetu balume na bakashi, be kuikala na lukalo lua bukuashi bua kupudisha nkalo yabo i na muulo. Apakafiki Nfumu eetu Yesu Nkidishitu, bua kutshiba kiimu e kuitupeta atuleesha lusa, etuitanyina’shi, “Fikayi, nupiane Bufumu.”—Mat. 25:34-40.

13. Bu abilesha Bena Loma 15:7, bena Nkidishitu ba kumpala babaadi banyingishe kifulo kiabo kia bu bana na bana naminyi?

¹³ Kifulo nyi kibaadi kitunduilo kia bena Nkidishitu ba kumpala. Eyendo bibaadi bibofule bua kulesha kifulo su? Tubandeyi kutaluula bantu belekeene babaadi mu kakongie ka mu Loma. Munkatshi muabo ta mubaadi nka penda bena Yudeya babaadi bakule na kukookiela Muiya wa Moyise nya, anka mubaadi dingi bantu ba bingi Bisamba babaadi bakule na bipikua bilekeene ngofu. Bangi bena Nkidishitu babaadi ba mpika, bangi namu babaadi bantu balungantu. Pangi bangi babaadi mpaa na bu bakata ba ba mpika. Mmushindo kinyi ubaadi baaba bena Nkidishitu batungunukie na kuileshena kifulo munkatshi muabo, sunga mbibaabadi bakudile mu bipikua bilekeene? Mpoolo mutumibua baadi muibanyingishe buabadia ‘kuikuukishena.’ (Badika Bena Loma 15:7.) Bino abilesha kinyi? Kino kishima kiabadi baleshe bu ‘kukuukila’ akilesha kutambula muntu kampanda na kalolo kooso, bu bantu ba mu nshibo yoobe, sunga ba kuuku boobe. Bu kileshesho, Mpoolo balunguile Filemone, biadia kukuukila Onesime baadi ende amba’shi: ‘Mukuukile na kalolo koso.’ (Fil. 17) Na Priskila na Akila babakuukiile Apolose, baadi ki muenyi mu buina Nkidishitu abamuatshile na “bamupatuluila eshinda di’Efile Mukulu kalolo.” (Bik. 18:26) Baaba bena Nkidishitu, ta babaadi balekiele kuilekeena kuabo bua’shi kutuushe bilumbu pankatshi paabo nya.

14. Anna na mulume aaye babakitshine naminyi bua kulesha kifulo?

¹⁴ N’atue namu tui kulesha kifulo bua bakuetu balume na bakashi p’atuibakuukila bu ba kuuku betu, na kukishanga naabo nsaa pamune. Bino abibatakula buabadia kuitulesha namu n’atue kifulo. (2 Kod. 6:11-13) Tutaleyi muanda wabadi bamone kui Anna na mulume aaye. Mu kapindi kapeela kunyima ku’abo kutumibua mu mudimo upia wa bu misionere dia kuponaa nguba kua Afrique, kipupa kia Corona-Virus kibatuelele. Abo baki benyi, pa muanda wa kino kipupa, ta babaadi na mushindo wa kuimoneena na muntu su ngumune, na ta bibaadi bibofule buabadia kuiwukeena na bakuetu balume na bakashi. Uno mulume na mukashi aaye babadia kulesha kifulo kiabo mushindo kinyi? Babaadi bafubishe videoconférence bua kuipeteena na bakuetu ba mu yaya mbalo yabadi, na kuibalungula bi’akumiina’shi beukeene naabo kalolo. Bino bibaadi bikume bifuko bi bungi ku mashimba mu yaya mbalo, na bababangile kuibetanyina na kuibatumina mesaje nsaa yooso. Buakinyi bano ba misionere babaadi bekitshishe bua kuiwukeena na bakuabo balume na bakashi ba mu kakongie kaabo kapia? Anna amba’shi: “Ntaa na ngiluankane bakuetu balume na bakashi babaadi bandeshe kifulo, na kifuko kiande mu kipungo ki buwa na mu kipungo ki bubi nya, bileshesho biabo mbintakule buandia kulesha namu kifulo.”

15. Bolongiela kinyi ku kileshesho kia Vanessa pabitale kufula bakuetu booso? (Tala dingi kifuatulo.)

¹⁵ Be bungi ba kuatudi be mu tukongie, bakuetu balume na bakashi mbakudile mu ma mbalo elekeene  na be na bu muntu builekeene ngofu. Tui kunyingisha kifulo kietu bua baaba bakuetu booso belekeene, p’atutuulu binangu bietu nka ku ngikashi yabo i buwa. Vanessa ungi mukuetu mukashi afubilaa mu Nouvelle-Zélande, musangane’shi bi bukopo bua kuikala mu kipuano ki buwa na bangi bena kakongie. Anka baadi muate kitshibilo kia’shi pamutue wa kulekiela bu muntu buabo bua mukokosha, baadi akisha nsaa i bungi naabo pamune. Kukita biabia nkumukuashe buadia kumona bi kifulo kia Yehowa kuabadi. Amba dingi’shi: “Kasha mulume ande ekadika bu mukunkushi a kifunda, tui bekadikie na ba kuuku bebungi bukile, balume na bakashi be na bu muntu builekeene, na ne musangane’shi mbibofule bua kuikala naabo mu kipuano ki buwa. Binobino ntandi mufule bantu belekeene. Na Yehowa namu mmufule kuno kuilekeena, muanda muitukakie atue booso nka mu bisaka bia bantu belekeene.” P’atulongo bia kumona bangi abibamonaa Yehowa, atulesha’shi tui bebafule.—2 Ko. 8:24.

16. Buakinyi abikatungu tuikale na kifulo mu kipungo kia mpombo ikata? (Tala dingi kifuatulo.)

¹⁶ Kifulo akikeekala na muulo ukata mu kipungo kia mpombo ikata. Apakabanga mpombo ikata, Yehowa aketukaluila mushindo kinyi? Tutaleyi Yehowa bibalunguile muilo waye kiabadia kukita nsaa ibabatuukile Babilone a kala ngoshi bambile’shi: ‘Ndaayi mwilo wande, nutwele mu mashibo nukekangile biibi, fwamaayi kapindi ka nguba na apakiila nsuungu.’ (Yesh. 26:20) Abimueka’shi ano mayi ooso, ngetutale atue abakapete mpombo ikata. “Mashibo” ngalombene kulesha tukongie tuetu. Mu kipungo kia mpombo ikata, Yehowa aketukaluila, biadi muitulee nka su tubatungunuka na kulama buumune na bakuetu balume na bakashi. Pano pasha fikile mpombo ikata, abitungu wekitshishe ngofu biosha kusumbushena bakuetu balume na bakashi, anka onyiishe kutamisha kifulo kiobe kuabadi. Bua’shi tupande abitungu tuikale nka na kifulo!

17. Su tubelumbula kubanga binobino, atukapete mushindo wa kukita kinyi mu kipungo kia mpombo ikata?

¹⁷ Efuku dikata dia Yehowa adikekasha bantu na “twinyongoshi tukile.” (Sef. 1:14, 15) Mpaa na muilo wa Yehowa, aukakiengie ngofu. Biabia su tuelumbuula kubanga binobino, atukapete mushindo watudia kushaala baumiine, na kukuasha bangi. Atukanyingiila lukalakashi looso lulombene kuitufikila. Nsaa ayikiengie bakuetu, atukakitshi muetu mooso bua kuibakuasha pa kuibalesha lusa na kuibapa bintu biabadi naabio lukalo. Biabia su tubalongo bia kufula bakuetu kubanga binobino, atukebalesha kifulo mu mafuku aafiki. Yehowa aketupa efuto dia muwa wa ikalaika, pa nsenga. Masaku aatukila ku bintu bipangibue, na mpombo atukebilubu.—Yesh. 65:17.