1. Muikeyilu kuete akula kinyi na nkinyi kiabipushisha?

 SU MUIKEYILU baadi esamba nobe, bodia kumuteemesha ku bibaadi aakula su? Oolo, lelo uno, muikeyilu kuete akula na “bena eumbo dioso, kisamba kioso, ludimi loso, na muilo oso.” Kuete akula kinyi? Kuete akula’shi: “Tshinayi Efile Mukulu, na mutumbisheyi . . . languilayi Yawa bakitshine eyilu na nsenga.” (Kbf. 14:​6, 7) Yehowa nyi Efile Mukulu umune a binyibinyi mulombene’shi bantu booso bamulanguile. Tui na lutumbu lukata bu biadi muitupe mushindo wa kumulanguila mu ntempelo aaye mukata a mu kikudi!

2. Ntempelo a Yehowa a mu kikudi nkinyi? (Tala dingi kashibo akamba’shi:  “Bishi ntempelo.”)

² A ntempelo a mu kikudi nkinyi, na mbalo kinyi yatudi balombene kupeta mbapatuule kantu pa kantu pa bimutale? Ntempelo a mu kikudi, ta nshibo yabadi bebakie na matafuadi nya. Nyi mpango ya Yehowa ya lulanguilo luadi mukumiine luimeene mu mulambu wa nkuulo wa Yesu Nkidishitu. Mpoolo mutumibua apatuula ino mpango mu mukanda waye ubaadi mufundile bena Nkidishitu ba mu Ebelu ba mu siekele a kumpala, babaadi bashaale mu Yudeya. b

3-4. Nkinyi kibaadi Mpoolo mufundile bena Nkidishitu ba mu Ebelu babaadi mu Yudeya, na baadi muibakuashe naminyi?

³ Buakinyi Mpoolo baadi mufundile bena Nkidishitu Bena Ebelu babaadi mu Yudeya uno mukanda? Abimueneka’shi mbua tubingilo tubidi tukata. Ka kumpala, mbua kuibanyingisha. Kumpala kua’shi bafikie bena Nkidishitu, be bungi ba kuabadi babaadi  mu bipuilo bia bena Yuda. Bakata babo ba bipuilo babaadi bebabepuule muanda babafiki bena Nkidishi. Buakinyi? Muanda bena Nkidishitu ta babaadi na ntempelo e buwa a kulanguila Efile Mukulu, sunga bilambuilo bia kukitshina milambu y’Efile Mukulu sunga ba tshite muakuidi ba kuibakuasha. Bino bibaadi bilombene kutshiobolosha balongi ba Nkidishitu na kubofosha lukumiino luabo. (Eb. 2:1; 3:​12, 14) Bangi ba kuabadi babaadi abanangushena’shi balukile mu lulanguilo lua bena Yuda.

⁴ Kia kabidi, Mpoolo baadi mutopekie bena Nkidishitu ba mu Ebelu bashi baadi abetatshisha bua kupusha malongiesha apia na e na muulo wi bukopo, abetanyinaa bu “biakudia bibukopo” bi’atupete Muiyi di’Efile Mukulu. (Eb. 5:​11-14) Biabia, bangi ba kuabadi babatungunukile’nka na kulonda Muiya wa Moyise. Mpoolo baadi mupatuule’shi biabia bitapilo bia mu Muiya wa Moyise ta bibaadi bilombene kukatusha miluisho yoso nya. Kano nyi kabingilo kabaabadi batudile uno Muiya ku “lupese.” Nyi buakinyi Mpoolo baadi muibalongieshe angi malongiesha a mu bia binyibinyi bia kitako. Mpoolo baadi mutentekieshe bena Nkidishitu naye pabitale “lukulupilo luibuwa” luimene mu mulambu wa Nkidishitu’shi ndulombene kuibakuasha binyibinyi bua kuifubuila “pepi n’Efile Mukulu.”—Eb. 7:​18, 19.

5. Nkinyi ki mu mukanda wa Bena Ebelu akitungu’shi tupushe, na bua kinyi?

⁵ Mpoolo baadi mupatuluile bakuabo Bena Ebelu’shi mushindo w’abalanguila Yehowa binobino, ngukile mushindo ubaabadi abamulanguila kala. Mushindo ubaadi bena Yuda abalanguila ubaadi wipushene na Muiya, na ubaadi wikale penda “muesheshi wa mianda ayikafiki, anka bia binyibinyi bi mui Nkidishitu.” (Kol. 2:17) Muesheshi wa kintu autushaa penda kinfuanyi kia kintu akiwutusha. Mu mushindo umune, kipaso kibaadi bena Yuda abalanguila Efile Mukulu kala mmuesheshi, muanda kipaso ki buwa kia kulanguila kibaadi akitungu’shi kifikie. Abitungu tupushe kalolo bi mpango ya Yehowa yadi muituatshile bua kuitufuila lusa ku miluisho yetu na buatudia kumulanguila mu mushindo w’akumiina. Tubandeyi kupuandikisha “muesheshi” (kuamba’shi lulanguilo lua bena Yuda) na “bia binyibinyi” (kuamba’shi lulanguilo lua bena Nkidishitu), bu biabadi bebipatuule mu Bena Ebelu. Su tubakitshi biabia, atupusha kalolo akipushisha ntempelo a mu kikudi, na kialesha kuatudi lelo uno.

6. Tabernakele babaadi abamufubisha naminyi?

⁶ Mushindo ubaadi aulanguila bena Yuda kala. Mpoolo baadi akamba kuisambila’nka bua tabernakele abaabadi bapue kui Moyise mu kipua kia  1512 kumpala kua bino bipongo bietu (K.B.B.), tala kashibo akalesha “Mushindo ubaadi aulanguila bena Yuda kala, na aulanguila bena Nkidishitu lelo uno.” Tabernakele baadi nka bu nshibo y’epema ibaadi bena Isaleele abasemuna bua kuenda nayo mu mbalo ilekeenelekeene. Babaadi bamufubishe munda mua bipua bifikie ku 500, mpaa na pa baabadi bebakie ntempelo a mu Yelusalema na abo nkumutuula bua losoo. (Efi. 25:​8, 9; Mb. 9:22) Kano “kashibo ka mapema ka kufumankena” nyi kabaadi bu mbalo ikata ibaadi bena Isaleele abafumankena bua kuifubuila peepi n’Efile Mukulu, kutuusha milambu yabo na kulanguila Efile Mukulu. (Efi. 29:​43-46) Biabia, tabernakele baadi alesha dingi kintu kampanda ki na muulo akikafiki bua bena Nkidishitu.

7. Ntempelo a mu kikudi babangile kuikala kuanka mafuku kinyi?

⁷ Mushindo aulanguila bena Nkidishitu lelo uno. Tabernakele a kala baadi “muesheshi wa bintu bia muiyilu,” na baadi kinfuanyi kia ntempelo mukata a Yehowa a mu kikudi. Mpoolo bambile’shi: “Ino nshibo y’epema [sunga tabernakele] nkifuanyi kia kino kipungo kiatudi.” (Eb. 8:5; 9:9) Mu kipungo kibaadi Mpoolo mufundile bena Ebelu, ntempelo a mu kikudi baadi mupue kuikala kuanka binyibinyi bua bena Nkidishitu. Yawa ntempelo Bekeele kuanka kubanga mu kipua kia 29 bino bipungo bietu (B.B.). Mu kiakia kipua, Yesu baadi mubatshishibue na kuedibua muimu wa kikudi kiselele, na abanga kufubila Yehowa bu “tshite muakuidi mukile bukata” mu ntempelo a mu kikudi. c—Eb. 4:14; Bik. 10:​37, 38.

8-9. Muyile mukanda wa Bena Ebelu 7:​23-27, nkuilekeena kinyi kui pankatshi pa ba tshite muakuidi bakata ba mu Isaleele na Tshite Muakuidi mukile Bukata Yesu Nkidishitu?

⁸ Mushindo ubaadi aulanguila bena Yuda kala. Tshite muakuidi mukata baadi na matalua a kulesha mpala ya muilo kumpala ku’Efile Mukulu. Aarone tshite muakuidi mukata a kumpala a mu Isaleele baadi mutudibue na Yehowa nsaa ibaabadi balambule tarbenakele kui Efile Mukulu. Anka bu biabadi bebileshe kui Mpoolo’shi “bantu be bungi babaadi na kia kufika ba tshite muakuidi abende na kuishintushena, muanda lufu lubaadi aluibakutshishua bua kutungunuka na kuikala bu ba tshite muakuidi.” d (Badika Bena Ebelu 7:​23-27.) Na bu bibaabadi bakutue kupuidika, baaba ba tshite muakuidi babaadi abatuusha milambu ya miluisho yabo’bo banabene. Bino abituusha mpatuluilo ibidi ilekeene pankatshi pa ba tshite muakuidi bakata ba bena Isaleele na Tshite muakuidi Mukile bukata Yesu Nkidishitu.

⁹ Mushindo aulanguila bena Nkidishitu lelo uno. Bu biadi Tshite muakuidi eetu Mukile bukata, Yesu Nkidishitu nyi “mufubi . . . a nshibo y’epema ya binyibinyi yabadi bayibakie kui Yehowa, kushi kui muntu.” (Eb. 8:​1, 2) Mpoolo apatuula’shi: “Bu bikale’shi aye [Yesu] atungunuka na kuikala na muwa bua losoo, bu tshite muakuidi buaye ta bui na muntu ebupiana.” Mpoolo baadi mukumbashe’shi, Yesu “te na kato, mmuilamune kui bankitshishi ba miluisho” na’shi mmuilekene na ba tshite muakuidi bakata ba bena Isaleele, muanda “aye te na lukalo lua kutusha milambu efuku dioso” bua miluisho yaye’ye nabene. Binobino, tubandeyi kutaluula kuilekeena kui pankatshi pa bilambuilo na milambu ibaabadi abakitshi kui bena Yuda ba kala na mushindo ukuete kulanguila bena Nkidishitu lelo uno.

10. Milambu ibaabadi abalambuila ku kilambulo ibaadi ayipushisha kinyi?

¹⁰ Mushindo ubaadi aulanguila bena Yuda kala. Paasha pa kibelo kia tabernakele ngi pabaadi kilambuilo kibaabadi abalambuila nyema bua kupa  Yehowa. (Efi. 27:​1, 2; 40:29) Biabia, yaya milambu ta ibaadi ilombene kukatusha miluisho yoso ya bantu bua losoo nya. (Eb. 10:​1-4) Kutungunuka na kutuusha milambu ya nyema mu tabernakele kubaadi muesheshi wa mulambu umune ubaadia kukuula bantu booso ku miluisho yabo bua losoo.

11. Nku kilambuilo kinyi kubaadi Yesu nabene muilambule bu mulambu? (Bena Ebelu 10:​5-7, 10)

¹¹ Mushindo aulanguila bena Nkidishitu lelo uno. Yesu baadi auku’shi Yehowa mmumutume pano pa nsenga bua kutusha muwa waye wa bu muntu bu mulambu wa nkuulo bua bantu booso. (Mat. 20:28) Biabia, ku lubatshisho luaye, Yesu baadi muilambule aye nabene bua kukita kikiebe ki’eshimba dia Yehowa. (Yo. 6:38; Nga. 1:4) Yesu baadi muilambule ku kilambuilo kia mu kinfuanyi akilesha “kikiebe ki’eshimba” di’Efile Mukulu bu Muana aaye bua kutuusha muwa waye wa bu muntu upuidikie. Muwa wa Yesu ubaadi utushibue “musango umune bua loso” bua kubuikila bua losoo miluisho ya muntu ooso akumiina mui Nkidishitu. (Badika Ebelu 10:​5-7, 10.) Dingi atukataluula bintu bioso bibaadi munda mua tabernakele.

12. Nnanyi baadi atuele mu kadimbo kooso ka mu tabernakele?

¹² Mushindo ubaadi aulanguila bena Yuda kala. Tabernakele na ntempelo bibaabadi bebakie kunyima mu Yelusalema bibaadi bi mumune paasha. Munda mubaadi tudimbo tubidi: “Mbalo ya kishila” na “Mbalo ikile kishila,” pankatshi pa tuno tudimbo tubidi pabaadi patshibulue na kilamba. (Eb. 9:​2-5; Efi. 26:​31-33) Mu kadimbo ka kishila mubaadi kitudilo ki’elampi kia òlo, na kilambuilo kibaabadi abashiikila kabanda, na mesa a  mikate. Nka penda “ba tshite muakuidi bedibue muimu” ngi babaadi abatuele mu kaaka Kadimbo ka kishila bua kufuba midimo yabo. (Mb. 3:​3, 7, 10) Mu Kadimbo kakile kishila mubaadi mushete wa òlo wa kilombeno ubaadi aulesha’shi Yehowa e kuanka. (Efi. 25:​21, 22) Nka penda tshite muakuidi mukata ngi baadi atuele mu Kadimbo kakile kishila musuusa umune ku kipua Muifuku dia kushimisha miluisho. (Lv. 16:​2, 17) Ku kipua kioso, baadi atuele na mase a nyema bua kushimisha miluisho yaye’ye nabene na ya muilo ooso. Biabia, Yehowa namu ku bukuashi bua kikudi kiaye kiselele, mmupushishe kalolo akilesha bino bintu bia mu tabernakele.—Eb. 9:​6-8. e

13. Kadimbo ka Kishila na Kadimbo Kakile Kishila tua mu tabernakele atulesha kinyi bua mushindo aulanguila bena Nkidishitu lelo uno?

¹³ Mushindo aulanguila bena Nkidishitu lelo uno. Nka penda ndambo ipeela ya balongi ba Nkidishitu ngi bedibue muimu wa kikudi kisele lelo uno, na be na muloo wa kuikala mu kipuano ki pabuakio na Yehowa. Bano bedibue muimu 144000 ngi abafubu bu ba tshite bakuidi muiyilu na Yesu. (Kbf. 1:6; 14:1) Kadimbo ka kishila ka mu tabernakele akalesha’shi mbakuminyibue bu bana ba mu kikudi b’Efile Mukulu sunga mbiabaki pa nsenga. (Lom. 8:​15-17) Kadimbo kakile kishila ka mu tabernakele akalesha eyilu, muamua mushaale Yehowa. “Kilamba kishikie” pankatshi pa Kadimbo ka kishila na Kadimbo kakile kishila, akilesha mbidi ya Yesu i bu ishikie pa kibelo kia muiyilu bu biadi Tshite muakuidi Mukile bukata a mu ntempelo a mu kikudi. P’aye kutusha mbidi yaye ya bumuntu bu mulambu bua bantu booso, Yesu mmufungule eshinda dia muwa wa muiyilu bua bena Nkidishitu booso bedibue muimu. Abitungu n’abo namu balekie mbidi yabo ya musamba buabadia kupeta efuto diabo dia muiyilu. (Eb. 10:​19, 20; 1 Ko. 15:50) Kunyima kua Yesu kusanguka, batuelele mu Kadimbo Kakile Kishila ka mu ntempelo a mu kikudi, mbalo ya bakuete kufumankana naye kui bedibue muimu booso.

14. Muyile mukanda wa Bena Ebelu 9:​12, 24-26, buakinyi mushindo aulanguila bena Nkidishitu mu ntempelo a Yehowa a mu kikudi wi buwa kukila bibaadi bena Isaleele abamulanguila?

¹⁴ Pano tui kumona kalolo bi bukata bua mpango ya Yehowa bua lulanguilo lui selele luimeene mu mulambu wa nkuulo na butshite muakuidi bua Yesu Nkidishitu. Tshite muakuidi mukata a mu Isaleele baadi atuele mu Kadimbo Kakile Kishila kabadi bakite kui bantu na mulambu wa mase a nyema, anka Yesu mmutuele “muiyilu munabene,” mbalo ya kishila bua booso bua’shi amuekie kumpala kua Yehowa. Kuakua kuete aleesha muulo wa muwa waye wa bumuntu upuidikie pa muanda wetu “bua kukatusha muluisho ku bukuashi bua mulambu waye.” (Badika Bena Ebelu 9:​12, 24-26.) Mulambu wa Yesu mmulambu ukata aushimisha muluisho bua losoo. Anka bu bi’atukebimono kuushi, biatuikala na lukulupilo lua kuenda muiyilu sunga lua kushaala pa nsenga atue booso tui balombene kulanguila Yehowa mu ntempelo a mu kikudi.

15. Nnanyi baadi afubu mu lupango lua tabernakele?

¹⁵ Mushindo ubaadi aulanguila bena Yuda kala. Lupango lua tabernakele lubaadi lukata, lubaadi luifunyishue na midimba mubaadi amutuele ba tshite muakuidi bakata bua kukita midimo yabo. Mu lualua lupango mubaadi kilambuilo kikata kibaabadi abalambuila milambu ya kushiika kaalo na mubaadi elonga dikata di na meema dibaabadi abafubisha kui ba tshite muakuidi bua kuitumpa meema bua’shi bekale batookie kumpala kua kukita mudimo wa kishila. (Efi. 30:​17-20; 40:​6-8) Ntempelo abaabadi bebakie kunyima baadi dingi na mbalo i paasha ibaadi bantu bashi ba tshite bakuidi abemana bua kulanguila Efile Mukulu pamune.

16. Nnanyi afubu mu lupango looso lua ntempelo a mu kikudi?

¹⁶ Mushindo aulanguila bena Nkidishitu lelo  uno. Kumpala kua’shi bende muiyilu bua nkafuba pamune na Yesu bu ba tshite bakuidi, bena Nkidishitu bedibue muimu bakuete kufuba na lulamato pano pa nsenga mu lupango lua ntempelo a mu kikudi. Diadia elonga dikata dia meema adibatentekiesha muanda wi na muulo ukata, nka bu biabadi batekie bena Nkidishitu booso bua kushaala batookane mu binangu na mu kikudi. Muamua dingi, mui “kibumbu kikata,” kia bantu bakuete kukuatshishena bakuabo na Nkidishitu bedibue muimu na lulamato looso bua kufubila Yehowa su? Oolo, Yowano mutumibua bebamuene mbemane “kumpala kua nkuasa a Bufumu,” bino mbipushene na pa nsenga paasha pa lupango lua kilambuilo na “abamukitshiina [Efile Mukulu] mufubo wa kishila bufuku na kaanya mu ntempelo aaye.” (Kbf. 7:​9, 13-15) Tui na lutumbu lukata kui Yehowa muanda mmuitupe mushindo wi buwa bukile wa kumulanguila mu ntempelo aaye mukata a mu kikudi!

17. Tui na kineemo kia kupa Yehowa milambu kinyi?

¹⁷ Lelo uno, bena Nkidishitu booso be na kineemo kia kulanguila Yehowa pa kufubisha nsaa yabo, bukome buabo, na bintu biabo bia ku mbidi bua kukuatshishena midimo ya Bufumu bu’Efile Mukulu. Nka bibaadi Mpoolo mulungule bena Nkidishitu ba mu Ebelu, n’atue namu “tuikaleyi nka atulambula Efile Mukulu mulambu wa ntumbo, kuamba’shi bishima abituukila mukanua muetu abiwukisha patooka eshina diaye.” (Eb. 13:15) Tui kulesha lutumbu bua kineemo kiatudi nakio pa kukita kioso akitungu bua kumupa milambu yetu i buwa.

18. Muyile mukanda wa Bena Ebelu 10:​22-25, t’abitungu tubepuule kinyi na t’abitungu tulube kinyi?

¹⁸ Badika Bena Ebelu 10:​22-25. Kumpala kua kufudiisha mukanda waye kui Bena Ebelu, Mpoolo baadi mufunde mianda ayitungu’shi tukite buatudia kulanguila Yehowa. Mu ino mianda mui kuifubuila kui Yehowa mu luteko, kulungula mukandu wi buwa, kutuela mu bisangilo bia kakongie pamune, na kuinyingishena ku muntu na muntu “bikishekishe bia tukuete kumona efuku dia [Yehowa] adiseesela peepi.” Muikeyilu a Yehowa bakuile’shi “languila Efile Mukulu!” (Kbf. 19:10; 22:9) Bakuile bino misuusa ibidi bua kulesha muulo winao uno muanda. Ta tui balombene kuiluankana bino bia binyibinyi bia mu kikudi bitale ntempelo mukata a mu kikudi a Yehowa na kineemo kiatudi nakio kia kufubila Efile Mukulu eetu mukata!