Buakinyi bantu mbeshikuene?
Buakinyi mu nsenga ishima bantu mbeshikuene? Bua kuuka kabingilo, abitungu tupushe akipatuula mushikua, kitande mushikua munkatshi mua bantu, na biaukuete kupalakana.
Mushikua nkinyi?
Mushikua nyi nkupela kufula muntu sunga bantu kampanda muanda wa’shi we na mueneno e bubi pabibatale. Nguilekene na kufiitshila muntu munda bua kapindi kapeela.
AKITANDAA MUSHIKUA
Bantu ababangaa kushikua benabo bua tubingilo tui bungi. Misuusa i bungi mbalombene kushikua kisaka kampanda kia bantu, sunga biekala’shi baaba bantu ta mbakite muanda wi bubi. Bantu babadi bashikue abebamono bu be bubi, be na binangu bi bubi, sunga bashi na mushindo wa kushintuluka bafika bantu be buwa. Be kuibaata bu bashadile, bakumbeene kufuisha masaku, sunga bu nsulo ya bilumbu. Baaba be na mushikua pangi abaadi bamukitshine namu mianda y’etombo, ya kukutua kua kululama sunga binangu kampanda bishaale muadi abibuusha mushikua.
BIAUKUETE KUPALAKANA
Muntu mmulombene kushikua mungi aku namu kasha tamumuene. Bu kileshesho, bantu abekalaa na uno mueneno bua kisaka kampanda muanda wa’shi, biabia nyi biabebamonaa kui bantu babadi nabo peepi, sunga biabebamonaa kui bifuko biabo. Bino, nyi bilombene kupalakasha mushikua mui kisaka kia bantu.
P’atupusha mushindo wawambukilaa bantu, bino abituleesha buakinyi mushikua ngukuate bantu bakile bungi. Biabia bua kukambila mushikua, abitungu tushinguule nsulo yawo. Bible apatuula nsulo ya mushikua.
BIBLE APATUULA NSULO YA MUSHIKUA
MUSHIKUA TA NGUTUKILE KUI BANTU NYA. Ubabangile nsaa ibaadi muikeyilu muiyilu, atabetanyinaa bu Satana Diabulu mutombokiele Efile Mukulu. Diabulu ‘baadi ngipayishanyi kubanga ku kibangilo’ ki’etombo diaye. Bu biadi “mmwikale nshee madimi” atungunuka na kutakula bantu mu kuikala na mushikua n’etombo. (Yowano 8:44; 1 Yowano 3:11, 12) Bible alesha’shi e bubi, e na nsungu n’etombo dibukopo.—Yoobo 2:7; Kibangilo 12:9, 12, 17.
MBIBOFULE BUA BANTU BAKUTUE KUPUIDIKA KUIKALA NA MUSHIKUA. Adame mulume a kumpala, baadi mulonde Satana aye nkupona mu muluisho. Nyi buakinyi bantu mbapiane muluisho na kukutua kua kupuidika. (Bena-Looma 5:12) Kayina muana a kumpala a Adame, na mushikua ooso baadi muipee mukuabo Abele. (1 Yowano 3:12) Eyendo, bantu be bungi be na kifulo na lusa. Kadi pa muanda wa muluisho wabadi bapiane, be bungi bakuete kukimba penda buwa buabo, kuikala na luabi, na kuitatula—ngikashi ayitandaa mushikua.—2 Timote 3:1-5.
MUNTU SHII MUFULE BANTU BELEKENE NAAYE MBIBOFULE BUADIA KUIBASHIKUA. Ino nsenga yatudi bashaale ikuete kutakula bantu mu kuishikuena, mu kupela kuifuilena lusa, na mu kuikala na binangu bi bubi, na ngikashi i bubi. Bantu abashikuaa baaba belekene nabo, kuibelela binangu bi bubi, kuibaakula bi bubi, kuiboolomona, na kuluisha bintu bia bangi muanda “nsenga yoso yishima ngishaale muushi a matalwa a ntoomboshi” Satana Diabulu.—1 Yowano 5:19, Kilombeeno Kipya 2014.
Biabia, Bible tamupatuule penda kutuukile mushikua nya. Alesha dingi patooka mushindo wakuiupua.
