1, 2. (a) Nkinyi akyakula Yehowa kibaadi na kya kukikitshika mu ano mafuku eetu? (b) Nkonko kinyi yatwaluula mu uno mwisambo? (Tala kifwatulo ki kumbangilo.)

YEHOWA bambile’shi: “Bantu ekumi ba mu bisamba abyakula ndimi ilekeene, abeelamika kwi mwina Yuuda umune, bakwate ku lwembe lwa kilamba kyaaye pa kumulungula’shi: ‘Atukyebe kwenda noobe, mwanda tubaapusha’shi: Efile Mukulu ee neenu.’” (Zakarii 8:23) “Mwina Yuuda” aleesha baaba bediibwe mwimu ku bukwashi bwa kikudi kiselele. Abebetamina dingi bu “Isaleele eEfile Mukulu.” (Beena-Galate 6:16) “Bantu ekumi” abaleesha baaba be na lukulupilo lwa kwikala na muwa wa looso pa nsenga. Abauku’shi Yehowa mmwelele kasaka ka bediibwe mwimu myabi na kupusha’shi nyi nkineemo kikata kya kulangwila naabo pamune.

² Nka bu mutemuki Zakarii, Yesu akula’shi bafubi b’Efile Mukulu be na kya kwikala mu buumune. Baadi muleeshe baaba abakulupila kwenda mwiyilu bu “lombe lupeela” na baaba be na lukulupilo lwa kushaala pa nsenga bu “ingi mikooko.” Anka Yesu bakwile’shi abadya kwikala booso bu “lombe lumunenka” na kulonda “mulami umune.” (Luuka 12:32; Yowano 10:16) Kubanga kasha kwekala bisaka bibidi, bangi be kwiyipusha’shi: (1) Abitungu ingi mikooko yiwukye mashina a bediibwe mwimu booso? (2) Bediibwe mwimu mbapwandikile kwimona naminyi? (3) Su muntu a mu kakongye keetu babanga kudya  mukate na kutoma nfinyo ku Kitentekyesho, abitungu kumumona naminyi? (4) Abitungu kwikalakasha su bungi bwa bantu abadi mukate na kutoma nfinyo ku Kitentekyesho abwende na kukaamina? Uno mwisambo awaluula ku ino nkonko.

3. Bwakinyi ta kwi mushindo wa kushinguula muntu akekala mu bantu 144 000?

³ Abitungu ingi mikooko yiwukye mashina a bediibwe mwimu booso bakii pa nsenga? Nya. Bwakinyi? Mwanda takwi mushindo wa’shi muntu su ngumune aukye na kushinkamisha kooso’shi mwediibwe mwimu kampanda akapete efuto dyaye. ^[1] (Tala mayi e ku nfudiilo.) Sunga byekala’shi Efile Mukulu mmwibetanyine bwa kwenda mwiyilu, abakapete efuto dyabo nka su babashaala na lulamato. Satana ashinguula byabya, na kwete kufuba na “batemuki ba-madimi” bwa kutompa ‘kwibapambula.’ (Mateo 24:24) Beena Kidishitu bediibwe mwimu ta mbalombeene kushinkamisha’shi abakapete efuto dyaabo su Yehowa akutwa kwibasangana na lulamato. Yehowa akebapa kitundwilo kya nfudiilo, sunga kitampi kya nfudiilo, kumpala kwa’shi bafwe sunga mafuku apeela kumpala kwa’shi “mpombo ikata” ibangye.​—Bifumbulwe 2:10; 7:3, 14.

4. Su ta kwi mushindo wa kuuka mashina a booso bediibwe mwimu bakii pa nsenga lelo uno, mushindo kinyi ulombeene ingi mikooko “kwenda” naabo?

⁴ Su ta kwi mushindo wa kuuka mashina a booso bediibwe mwimu bakii pa nsenga lelo uno, mushindo kinyi ulombeene ingi mikooko “kwenda” naabo? Bible akula’shi bantu ekumi “abeelamika kwi mwina Yuuda umune, bakwate ku lwembe lwa kilamba kyaaye pa kumulungula’shi: ‘Atukyebe kwenda noobe, mwanda tubaapusha’shi: Efile Mukulu ee neenu.’” Uno verse aleesha mwina Yuuda umune. Kadi bishima “noobe” na “neenu” abileesha bantu bebungi. Bino abipushisha’shi mwina Yuuda nta mpenda muntu umune nya kadi aleesha kasaka kooso ka bediibwe mwimu. Ingi mikooko ayiwuku uno mwanda, na bwakwete kufubila Yehowa pamune na kano kasaka. Ta be na lukalo lwa kuuka eshina dya muntu ooso e mu kano kasaka na kulonda ooso a kwabadi nya. Yesu nyi Mukunkushi eetu, na Bible etulungula’shi abitungu tumulonde nka penda aye.​—Mateo 23:10.

5. Nkudimushibwa kinyi akutungu’shi bediibwe mwimu banangusheene bikata, na bwakinyi?

⁵ Abitungu bediibwe mwimu banangusheene ngofu pabitale kuno kudimusha kwi mu 1 Beena-Kodinto 11:27-29. (Badika.) Mwediibwe mwimu mulombeene kudya mukate na kutoma nfinyo ya ku Kitentekyesho “pashii mwibilombeene” naminyi? Su ta mulame kipwano kibuwa na Yehowa na kukutwa lulamato kwadi, yaya nsaa su yawa muntu adya mukate na kutoma nfinyo, akutwa kwikala na kaneemo. (Beena-Ebreeyi 6:4-6; 10:26-29) Kuno kudimushibwa akutentekyesha bediibwe mwimu’shi abitungu bashale na lulamato bwa kupeta “bwedi bwitwitanyiin’Efile Mukulu mwiyilu munda mwa Yesu Kidishitu.”​—Beena-Fidipe 3:13-16.

6. Bediibwe mwimu mbapwandikiile kwimona naminyi?

⁶ Mpoolo balungwile beena Kidishitu bediibwe mwimu bino: “Ami mwina-lukano, neenulanga munda mwa Mwanaana’shi: Pwanyishaayi nshaaleelo eenu na lwitaanyino lwanudi bapete.” Be kwibikita naminyi? Mpoolo apatuula’shi: ‘Mu kwiyisha na kupopeela, pamune na lwishinko, efwileeneeyi lusa ku muntu na muntu, mu kifulo; etatshisheyi bwa kulama bumune bwa kikudi abwinubungu pamune mu butaale.’ (Beena-Efeeze 4:1-3) Kikudi kiselele kya Yehowa akikwasha bafubi baaye bwa kwikala beeyishe kushi kwikala na kwitatula. (Beena-Kolose 3:12) Nyi bwa kinyi, tabitungu bediibwe mwimu beekale abemono bu bakile bangi. Abauku’shi ta bi na  muulo kwi Yehowa bwa kupa bediibwe mwimu kikudi kiselele kukila bangi bafubi baaye nya. Akupu tabapusha’shi mbalombeene kupusha bya binyibinyi bya mu Bible kukila bangi nya. Ta mbalombeene dingi kulungula muntu’shi naaye namu mmwediibwe mwimu abitungu abangye kudya mukate na kutoma nfinyo ku Kitentekyesho. Anka, be na kwiyisha na mbeukye’shi nka Yehowa nabeene nyi mulombeene kwitanyina muntu bwa kwenda mwiyilu.

7, 8. Nkinyi kishii kilombeene kukulupila bediibwe mwimu na bwakinyi?

⁷ Sunga byekala’shi bediibwe mwimu abamonaa lwitamino lwa kwenda mwiyilu bu kineemo, ta bakulupilaa’shi bangi bebakitshine myanda mu mushindo wi pa bwao nya. (Beena-Efeeze 1:18, 19; badika Beena-Fidipe 2:2, 3.) Abauku dingi’shi apebeelaa Yehowa mwimu, taukishaa ungi muntu wawa mwanda nya. Byabya, mwediibwe mwimu ta mulombeene kukaanya su kwi muntu shakumiina’shi mmusangudibwe. Ashinguula abyamba Bible’shi tatwi balombeene kukumiina musango umune muntu akula’shi Efile Mukulu mumupe mudimo mu kipaso ki pabwakyo. (Bifumbulwe 2:2) Pa mwanda wa kupela’shi bantu tabakambanga kumupa kineemo kikilekile, ta bitungu’shi ekale alungula bantu bafumankana nabo bwa musango wa kumpala’shi mmwediibwe mwimu. Abimweneka’shi ta mupwandikiile kwakula wawa mwanda kwi muntu su ngumune. Tabitungu abalakane pabitale myanda ya kukaanya yakakitshi mwiyilu nya.​—1 Beena-Kodinto 1:28, 29; badika 1 Beena-Kodinto 4:6-8.

⁸ Tabitungu beena Kidishitu bediibwe mwimu bamone’shi abitungu kukisha nsaa nka penda na bangi bediibwe mwimu nya, mwanda su bakita byabya abeekala’nka bu kisaka kampanda kya maasha. Tabakimbaa bwa kwipeteena na bangi bediibwe mwimu bwabadya kwisamba pabitale bibabadi basangudiibwe sunga kwibunga mu kisaka bwa kulonga Bible. (Beena-Galate 1:15-17) Kakongye takabaadya kwikala mu buumune su bediibwe mwimu mbakite byabya. Babaadya kukita myanda ikutwene na kikudi kiselele kikwete kukwasha bafubi b’Efile Mukuklu bwabadya kwikala mu kufukama na mu buumune.​—Badika Beena-Looma 16:17, 18.

9. Bwakinyi abitungu wekale na budimu pabitale byomonaa baaba abadiyaa mukate na kutoma nfinyo mu Kitentekyesho? (Tala kashibo akamba’shi: “ Kifulo ‘taakikitaa kintu kii bubi.’”)

⁹ Abitungu wekale omono bediibwe mwimu naminyi? Yesu balungwile balongi baye’shi: “Anwe booso nwi baana-na-baana.” Aye nkukumbasha bino: “Ooso ekaamisha, ayishiibwa; na ooso eeyisha akaamishiibwa.” (Mateo 23:8-12) Byabya bi kwikala bibubi kwabila muntu bikishekishe, sunga ekala mukwabo na Kidishitu mwediibwe mwimu. Nsaa ayakula Bible pabitale bakulu, etukankamika bwa kwambula lukimiino lwabo anka tetulungula’shi twi balombeene kutuula muntu su ngumune bu nfumwetu nya. (Beena-Ebreeyi 13:7) Binyibinyi Bible akula’shi bangi be na “kineemo misusa ibidi.” Anka be nakyo mwanda “abakitshi kalolo mudimo” wabo na “abafwambuka ku mudimo wa bulungudi na wa bulambukishi,” ta mpa mwanda bediibwe mwimu nya. (1 Timotee 5:17) Su twapa bediibwe mwimu kineemo kikilekile na kwibatumbisha, twi balombeene kwibakalakasha. Sunga kwibatakula mu kwitatula. (Beena-Looma 12:3) Ta kwi su ngumune a kwatudi e kukumiina kukita kintu kilombeene kutwesha mwina Kidishitu mwediibwe mwimu mu kilema kikile bukata!​—Luuka 17:2.

10. Twi kuleesha kaneemo kwi beena Kidishitu bediibwe mwimu naminyi?

¹⁰ Twi balombeene kuleesha kaneemo kwi bediibwe mwimu na Yehowa naminyi? Tatwi balombeene kwibayipusha bibaabafikile bediibwe mwimu nya. Uno mmwanda utale muntu nabeene, watushii na matalwa a kuuka. (1 Beena-Tesalonika  4:11; 2 Beena-Tesalonika 3:11) Na dingi tatwelanga binangu’shi balume sunga bakashi baabo, baledi baabo, sunga bakwabo n’abo namu mbediibwe mwimu. Lukulupilo lwa kwenda mwiyilu tabelupyanaa mu kifuko nya. (1 Beena-Tesalonika 2:12) Abitungu tulekye kwela nkonko ilombeene kutapa bangi ku mashimba. Bu kileshesho, tatwi balombeene kwipusha mukashi a mwediibwe mwimu byapushaa pabitale mafuku akashaala pa nsenga bwa ikalaika kushii mulume aaye. Kya kumpala, abitungu tuukye’shi mu nsenga ipya, Yehowa ‘akekutshisha bii na muuwa byooso.’​—Misambo 145:16.

11. Su tubapele ‘kukaanya bangi bantu’ bikilekile atwikalwila atwe banabeene naminyi?

¹¹ Su twaleka kumona bediibwe mwimu bu bakile bangi bantu, atwikalwila atwe banabeene. Mu mushindo kinyi? Bible etulungula’shi nkulombeene kwikala “bakwetu ba-madimi” mu kakongye balombeene kwiamba’shi mbediibwe mwimu. (Beena-Galate 2:4, 5; 1 Yowano 2:19) Na dingi, bangi bediibwe mwimu mbalombeene kushimisha lulamato. (Mateo 25:10-12; 2 Mpyeele 2:20, 21) Byabya su tubapele ‘kukaanya bangi bantu’ bikilekile, tatukebalondo nya, byabekala bediibwe mwimu sunga bantu batwiuku kalolo abaapu kufubila Yehowa munda mwa mafuku ebungi. Byabya, sunga bashimisha lukumiino na kukatuka mu kakongye, tatukashimisha lukumiino lwetu mwi Yehowa na kuleka kumufubila nya.​—Yuude 16, Kilombeno kipya 2014.

12, 13. Bwakinyi tabi tungu kwikalakasha bwa bungi bwa bantu bakwete kudya mukate na kutoma nfinyo ku Kitentekyesho?

¹² Munda mwa bipwa bibungi, bungi bwa bantu abadi mukate na kutoma nfinyo ku Kitentekyesho bubaadi abwende na kupeela. Kadi mu bino bipwa bibashaala, bungi bwa’bo bukwete kwenda na kukaamina ku kipwa kyoso. Abitungu twikalakashe pabitale bungi bwabo su? Nya. Tutaleyi tuno tubingilo atulondo.

¹³ “Yehowa awuku bantu baaye.” (2 Timotee 2:19) Mu kwilekeena na Yehowa, bakwetu ababadikaa bungi bwa bantu abadi mukate na kutoma nfinyo ku Kitentekyesho tabauku muntu mwediibwe mwimu binyibinyi nya. Byabya mu bwabwa bungi mwi mpa na bantu abanangusheena’shi mbediibwe mwimu aku namu ta mbediibwe. Bu kileshesho, bangi ababangile kudya mukate na kutoma nfinyo kumpala, kunyima bayimika. Bangi mbalombeene kwikala na malaadi mu mitwe yabo na kumona’shi abakamunana na Kidishitu mwiyilu. Mu kwakula kwa kalolo, t’atuuku na kushinkamisha bungi bwa bediibwe mwimu bakii pa nsenga nya.

14. Bible akula kinyi pabitale bungi bwa bediibwe mwimu abakekala pa nsenga nsaa ayikabanga mpombo ikata?

¹⁴ Akwikala bediibwe mwimu mu bipindji bibungi bya nsenga apakafiki Yesu mu kwibaata bwa kwenda mwiyilu. Bible akula’shi Yesu “atumu miikeyilu yaaye na mpungi mukata, ku mpese inanka, dya kubangil’eyilu nyaa naa kwadidi difudiile, bwa kubunga basangulwe baaye.” (Mateo 24:31) Bible aleesha dingi’shi mu mafuku a ku nfudiilo, akukekala ndambo ya bediibwe mwimu bakii pa nsenga. (Bifumbulwe 12:17) Kadi ta muleeshe’shi abakekala bungi kinyi nsaa ayikabanga mpombo ikata nya.

15, 16. Abitungu tushinguule kinyi pabitale bantu 144 000 basangulwe na Yehowa?

 ¹⁵ Yehowa nyi atshibaa nsaa ya kusangula mwediibwe mwimu. (Beena-Looma 8:28-30) Yehowa babangile kusangula bediibwe mwimu kunyima kwa lusangukilo lwa Yesu. Abimweneka’shi mu siekele a kumpala, beena Kidishitu ba binyibinyi booso abaadi bediibwe mwimu. Kunyima kwa bipwa nkama, bebungi abaadi abeamba bu beena Kidishitu tababaadi abalondo Kidishitu binyibinyi nya. Sunga mbyabya, mu byabya bipwa, Yehowa baadi mwele kasaka kapeela ka beena Kidishitu ba binyibinyi mwimu. Babaadi nka bu blee ibaadi Yesu mwambe’shi ayikakulu munkatshi mwa lubishi lubi. (Mateo 13:24-30) Mu mafuku a ku nfudiilo, Yehowa kwete kusangula bantu abakekale munkatshi mwa bantu 144 000. ^[2] (Tala mayi e ku nfudiilo.) Byabya su Efile Mukulu aata kitshibilo kya kusangula bangi bantu ba munkatshi mwabo mafuku apeela kumpala kwa’shi nfudiilo ifikye, tatwi balombeene kwamba’shi balwisha nya. (Yeeshaya 45:9; Danyele 4:35; badika Beena-Looma 9:11, 16.) ^[3] (Tala mayi e ku nfudiilo.) Abitungu twikale badimukye tala twekala bu bafubi babaadi batopekye nfumwabo bwa bibaadi mufute bakwabo babaadi babangye kufuba ku nfudiilo kw’efuku.​—Badika Mateo 20:8-15.

¹⁶ Nta mbooso be na lukulupilo lwa kwenda mwiyilu beekale bu “mpika a kishima na mupatulukye.” nya. (Mateo 24:45-47) Nka bu mu siekele a kumpala, Yehowa na Yesu lelo uno bakwete kufuba na bantu bapeela bwa kudiisha, sunga kulongyesha bantu bebungi. Mu siekele a kumpala nka penda beena Kidishitu bediibwe mwimu bapeela nyi babaabadi bafube nabo bwa kufunda Bifundwe bya beena Kidishitu bya mu kiina Greke. Na dingi lelo uno, nka penda beena Kidishitu bediibwe mwimu bapeela nyi be na bushito bwa kupa bafubi b’Efile Mukulu “bya-kudya pa nguba atungiibwa.”

17. Mu uno mwisambo tubalongo kinyi?

¹⁷ Mu uno mwisambo tubalongo kinyi? Yehowa mmwate kitshibilo kya kupa bafubi baaye bebungi muwa wa ikalaika pa nsenga na kupa baaba abakamunana na Yesu muwa wa ikalaika mwiyilu. Yehowa akafutu bafubi baaye booso, “mwina Yuuda” na “Bantu ekumi,” na ebatekye booso bwabadya kutumikila miiya imune na kushaala na lulamato. Abitungu booso bekale na kwiyisha. Abitungu booso bamufubile pamune mu buumune. Na dingi abitungu booso betatshishe bwa kulama butaale mu kakongye. Bu bitatudi peepi na nfudiilo, tutungunukyeyi booso bwetu na kufubila Yehowa na kulonda Kidishitu bu lombe lumune.