1, 2. Bwakinyi Mpoolo baadi mutumine beena Ebreeyi mukanda?

MU KIPWA kya 61, tukongye twa mu Isaleele tubaadi mu butaale. Sunga mbibaadi Mpoolo mutumiibwa mu lukano ku Looma, baadi na lukulupilo lwa kutushiibwa mwanka. Timotee baadi amushindikila baadi kyakatuka mu kutushiibwa mu lukano, akupu booso abaadi abakulupila kwenda mu kutala bakwetu mu Yudea. (Beena-Ebreeyi 13:23) Munda mwa penda bipwa bitaano, beena Kidishitu abaadi bashaale mu Yudea, bikishekishe baaba abaadi mu Yeelusaleme, abaadi na kya kukita myanda bukidi. Bwakinyi? Mu mafuku ashaale, Yesu balungwile balondji baaye’shi nka bakyabamono basalayi abefunyisha Yeelusaleme, abitungu basuukye kushii kunyengakana.​—Luuka 21:20-24.

² Takubaadi kupwe kukila bipwa 28 kasha Yesu adimusha balondji baaye pabitale uno mwanda. Mu aa mafuku, beena Kidishitu ba mu Isaleele abaadi bashaale nka na lulamato mu kutompibwa na nkalakashi ibungi. (Beena-Ebreeyi 10:32-34) Kadi Mpoolo baadi na lukalo lwa kulumbuula binangu byabo ku myanda ibaadi na kya kukitshika mu mafuku aafiki. Abaadi peepi na kutompiibwa kukata bwa lukumiino lwabo. (Mateo 24:20, 21; Beena-Ebreeyi 12:4) Bibaadi abitungu’shi bashaale banyingiile na lukumiino lwi bukopo bwa kumona bya kutumikila mayi a Yesu a kusuuka, bwa kupaasha myuwa yabo.  (Badika Beena-Ebreeyi 10:36-39.) Nyi bwakinyi Yehowa baadi muyookyele Mpoolo bwadya kufundjila bakwabo mukanda. Wawa mukanda, abewitanyina binobino bu mukanda wa Beena-Ebreeyi, ubaadi ufundjibwe bwa kwibanyingisha bwa myanda ibaadi na kya kwibafikila.

3. Bwakinyi abitungu tutaluule myanda i mu mukanda wa Beena-Ebreeyi?

³ Bu byatudi bafubi b’Efile Mukulu, abitungu tutaluule myanda i mu mukanda wa Beena-Ebreeyi lelo uno. Bwakinyi? Mwanda twi mu nshaleelo e mumune na a beena Kidishitu abaadi mu Yudea. Twi mu “bipungo biibukopo,” na bangi ba kwatudi mbalame lukumino lwabo mu nkalakashi ibukopo sunga kubingwabingwa. (2 Timotee 3:1, 12) Kadi bebungi munkatshi mwetu be mu nshalelo a butaale na ta be mu kubingwabingwa nya. Byabya, nka bu beena Kidishitu ba mu mafuku a Mpoolo, abitungu twikale badimukye. Bwakinyi? Mwanda binobino atutwele mu kutompiibwa kukata kwa lukumiino lwetu!​—Badika Luuka 21:34-36.

4. Verse kinyi abadi basangule bwa kipwa kya 2016, bwakinyi uno verse mmulombanyine?

⁴ Nkinyi akiketukwasha bwa kwilumbuula ku myanda ayitutengyela kumpala? Mu mukanda wa Beena-Ebreeyi, Mpoolo baadi muteemune myanda ibungi ayiketukwasha bwa kunyingisha lukumiino lwetu. Wa kumpala nyi elango di na muulo dyatusangana mu mukanda wa Beena-Ebreeyi 13:1. Awitulungula’shi: “Ididîlai mu kwifulêna bu bâna na bâna.” Uno nyi verse abadi basangule bu kifundwe kyetu kya ku kipwa bwa kipwa kya 2016.

5. Kifulo kya bu bana na bana akileesha kinyi?

⁵ Kifulo kya bu bana na bana akileesha kinyi? Kishima kya mu kina Greke kya kala kibafundjile Mpoolo akileesha “kifulo kya bana ba muntu.” Kifulo kya bu bana na bana nyi kipwano kibukopo, ki pankatshi pa beena kifuko sunga ba kuuku ba kabu ka mwa. (Yowano 11:36) Byabya, tatwiamba bu bana ba muntu penda ku milomo nya. Twi bana ba muntu binyibinyi. (Mateo 23:8) Mpoolo akula’shi: “Bîkale’shi nwi bu bâna na bâna, nwifulêne kifulo kikata. Nwikale’nka anwinêmekyeshêna.” (Beena-Looma 12:10, EEM) Bino bishima abileesha bukata bwi kifulo kyetu kya bu bana na bana. Kino kifulo kya bu bana na bana, pamune na kifulo kimeene pa miya ya beena Kidishitu, akikwasha bafubi b’Efile Mukulu bwa kwikala mu bukuuku bwibukopo na kwikala mu buumune.

6. Beena Kidishitu ba binyibinyi abapushaa kishima kifulo kya bu bana na bana naminyi?

⁶ Kishima “kifulo kya bu bana na bana” ki misango ibungi mu bifundwe bya beena Kidishitu. Kwi beena Yuuda ba kala, kishima “mukwetu” misango ibungi kibaadi akileesha mwina kifuko na ingi nsaa muntu shi mwina kifuko. Anka takibaadi akileesha muntu shii mwina Yuuda nya. Byabya, bu byatudi beena Kidishitu, “mukwetu” mmwikale mwina Kidishitu a binyibinyi ooso yawa, sunga ekala a mwiumbo kinyi. (Beena-Looma 10:12) Yehowa mmwitulongyeshe bwatudya kwifuleena. (1 Beena-Tesalonika 4:9) Bwakinyi bi na muulo bwa’shi tuyididiile mu kwifuleena bu bana na bana?

7. (a) Nkabingilo kinyi kakata aketutakula bwa kwilesheena kifulo kya bu bana na bana? (b) Tuusha kangi kabingilo akaleesha muulo wa kunyingisha kifulo munkatshi mwetu.

⁷ Kabingilo kakata aketutakula bwa kuleesha kifulo kya bu bana na bana mmwanda’shi Yehowa etulungula bwa kwibikita. Tatwi balombeene kufula Yehowa su tatwi bafule bakwetu. (1 Yowano 4:7, 20, 21) Kangi kabingilo nka’shi twi na lukalo na bakwetu, bikishekishe patudi mu nkalakashi. Nsaa ibafundjile Mpoolo mukanda waye kwi beena Kidishitu beena Ebreeyi, baadi auku’shi mu mafuku apeela bangi ba kwabadi abalekye mashibo na bintu byaabo. Yesu baadi muleeshe’shi kino kipungo akikekala bukopo.  (Maako 13:14-18; Luuka 21:21-23) Byabya kumpala kwa’shi kyakya kipungo kifikye, bano beena Kidishitu abaadi na lukalo lwa kunyingisha kifulo munkatshi mwabo.—Beena-Looma 12:9.

8. Abitungu tukite kinyi kumpala kwa’shi mpombo ikata ibangye?

⁸ Mpombo ikata ishakwatshile bantu dingi ayifiki binobino. (Maako 13:19; Bifumbulwe 7:1-3) Abitungu tukookyele dino elango: “Endayi mwilo wande, twelayi mu mashibo enu, nwishitshile. Nufwame mpa na apakidi nsungu.” (Yeeshaya 26:20) Ano “mashibo” e bya kuleesha tukongye twetu. Mwanka nyi mwatulangwilaa Yehowa pamune na bakwetu. Byabya tabitungu twimeene nka penda mu kwibunga misusa yooso nya. Mpoolo baadi mutentekyeshe beena Kidishitu beena Ebreeyi bwabadya kwikala abekankamisheena bwa kwifuleena na kwikitshisheena myanda ibuwa. (Beena-Ebreeyi 10:24, 25) Abitungu tunyingishe kifulo kyetu kya bu bana na bana kubanga binobino mwanda kukita bino akuketukwasha bwa kunyingiila bitompwanga byooso byatudi balombeene kupeta mu mafuku e kumpala.

9. (a) Mmishindo kinyi yatudi nayo ya kwilesheena kifulo kya bu bana na bana lelo uno? (b) Tuusha bileshesho abileesha byatudi balombeene kuleesha bafubi ba Yehowa kifulo kya bu bana na bana.

⁹ Twi na mishindo ibungi yatudi balombeene kuleesha kifulo kya bu bana na bana mpaa na lelo kumpala kwa’shi mpombo ikata ibangye. Bakwetu bebungi bakwete kukyenga pa mwanda wa kutshinkatshinka kwa nsenga, mpeshi a kyeshi, bipapi na angi masaku aatukila ku bintu byabadi bapangye. Bangi bakwetu bakwete kunyingiila mu kubingwabigwa. (Mateo 24:6-9) Kwi nkalakashi ya myanda ya makuta efuku dyooso mwanda wa ndumbulwilo mukutwe kululama. (Bifumbulwe 6:5, 6) Byabya, nsaa ayipete bakwetu nkalakashi ibungi, atupete mishindo ya kwibaleesha byatudi bebafule. Sunga byekala’shi uno ndumbulwilo te na kifulo abitungu tuyididiile na kuleesha kifulo kya bu bana na bana. (Mateo 24:12) ^[1]​—Tala mayi e kunfudiilo.

10. Binobino atukyebe kutaluula kinyi?

¹⁰ Sunga twekala na myanda ayitukalakasha, twi kuyididiila na kuleesha kifulo kya bu bana na bana naminyi? Twi kushinkamisha naminyi’shi twi na kino kifulo kwi bakwetu? Kunyima kwa’ye kwakula’shi “Ididîlai mu kwifulêna bu bâna na bâna,” Mpoolo mutumibwa mmuleeshe mishindo ilekeene yatudya kwibikita. Tubandeyi kutaluula penda ino mishindo isamombo.

11, 12. Kupokyela bantu akupushiisha kinyi? (Tala kifwatulo ki ku mbangilo.)

¹¹ “Tanulubanga kupokyeela bantu.” (Badika Beena-Ebreeyi 13:2.) Nkinyi akipushisha kishima “kupokyeela bantu”? Kino kishima kya Mpoolo akipushisha “kuleesha bantu benyi kalolo.” Pangi kino kishima akitutentekyesha Abrahame na Loota. Bano bantu babidi abaleesheshe kalolo kwi bantu beenyi babashibaadi abauku. Kunyima Abrahame na Loota abaukile’shi baaba beenyi mba miikeyilu. (Kibangilo 18:2-5; 19:1-3) Bino bileshesho bibakwashishe beena Kidishitu beena Ebreeyi bwa kuleesha kifulo kya bu bana na bana p’abo kwikala abakukila beenyi.

¹² Twi kuleesha kalolo kwi bangi naminyi? Twi kwitamina bakwetu balume sunga bakashi ku nshibo yetu bwa kudya nabo pamune sunga bwa kwibanyingisha. Sunga byekala’shi tatuuku kalolo mukunkushi a kifunda kyetu na mukashi aaye, twi kwibeetamina ku nshibo yetu pabafiki kwitukunka mu kakongye. (3 Yowano 5-8) Tabitungu’shi tukimbe byakudya bibungi sunga kupaana makuta e bungi nya. Katupwito keetu nka kunyingisha bakwetu, kushii bwa kwibaleesha bintu byatudi nabyo. Akupu, tabitungu kwitanyina nka penda bantu be kwitwalwisha byatwibakitshiina mu kingi kipaso nya. (Luuka 10:42; 14:12-14) Mwanda wi na muulo ukata ngwa kupela kukutwa nsaa ya kuleesha kalolo kwi bangi!

13, 14. Twi kutungunuka na ‘kutentekyesha baaba be mu nkano’ naminyi?

¹³ “Tentekyeshai baba be mu nkano.” (Badika Beena-Ebreeyi 13:3, EEM.) Pano  Mpoolo akwila bakwetu be mu lukano mwanda wa lukumiino lwabo. Mpoolo atumbula beena kakongye mwanda babaadi “bafwambukye pamune na beena-lukano.” (Beena-Ebreeyi 10:34) Bangi bakwetu abakwashishe Mpoolo munda mwa bipwa binanka bibaadi mu lukano, kadi bangi babaadi bashaleele kula. Babaadya kukwasha Mpoolo naminyi? Abaadi na kya kutungunuka na kumwelela nteko kushii kukooka.​—Beena-Fidipe 1:12-14; Beena-Ebreeyi 13:18, 19.

¹⁴ Lelo uno, Batemwe ba Yehowa bebungi be mu nkano mwanda wa lukumiino lwabo. Bakwetu be naabo peepi be kwibakwasha na bintu. Kadi bebungi ba kwatudi be kula na baaba be mu lukano. Bwa kupela kwibayilwankana twi kwibakwasha naminyi? Kifulo kya bu bana na bana akitutakula bwa kwibelela nteko kushii kukooka. Bu kileshesho, twi balombeene kuteka bwa bakwetu balume na bakashi mpa na bana be mu lukano mu eumbo dya Érythrée pamune na mukwetu Paulos Eyassu, Isaac Mogos, na mukwetu Negede Teklemariam be mu lukano takudi bipwa bikile pa 20.

15. Twi kunemeka bulunda naminyi?

¹⁵ “Bantu booso banemekye bulunda.” (Badika Beena-Ebreeyi 13:4.) Twi balombeene dingi kuleesha kifulo kya bu bana na bana p’atwe kwikala na mwikeelo wibuwa. (1 Timotee 5:1, 2) Bu kileshesho, su twatambuka lusandji na mukwetu mulume sunga mukashi, atulwishiisha yaawa mukwetu mpa na beena kifuko kyaye. Atukalwisha lukulupilo lwi pankatshi peetu. (1 Beena-Tesalonika 4:3-8) Banda kwela binangu bilombeene kupusha mukashi su apusha’shi mulume aaye atalanga pornografi. E kupusha’shi mulume aaye amunemeka na kunemeka eyibakishi su?​—Mateo 5:28.

16. Kusangala na byatudi nabyo akwitukwasha bwa kuleesha kifulo kya bu bana na bana naminyi?

¹⁶ “Sepeelaayi na byanudi nabyo.” (Badika Beena-Ebreeyi 13:5.) Kukupupila mwi Yehowa akwitukwasha bwa kwikala na muloo bwa kusepeela na byatudi nabyo. Bino bi kwitukwasha bwa kuleesha kifulo kya bu bana na bana naminyi? Patudi na muloo, atwikala atutentekyesha’shi bakwetu be na muulo kukila bintu sunga makuta. (1 Timotee 6:6-8) Taatwikala atwididi  pabitale bakwetu sunga kwidila bwa nshaleelo eetu nya. Akupu, tatwikala na mukao sunga lwabi bwa bangi. Anka, patudi na muloo atwikala na kalolo.​—1 Timotee 6:17-19.

17. Kwikala “na kukankamana” akwitukwasha bwa kuleesha kifulo kya bu bana na bana naminyi?

¹⁷ Ikalai “na kukankamana.” (Badika Beena-Ebreeyi 13:6.) Kukulupila mwi Yehowa akwitunyingisha bwa kukambila bitompwanga bibukopo. Kwakwa kunyingishibwa akwitukwasha bwa kwikala na binangu bibuwa. Patudi na binangu bibuwa, twi kuleesha kifulo kya bu bana na bana p’atwe kunyingisha na kukankamika bakwetu. (1 Beena-Tesalonika 5:14, 15) Sunga mu mpombo ikata, twi balombeene kwikala banyingye mwanda atuuku’shi kipandjilo kyetu takidi peepi.​—Luuka 21:25-28.

18. Twi kunyingisha kifulo kyetu kya bu bana na bana kwi bakulu mu kakongye naminyi?

¹⁸ “Tentekyeshaayi bakunkushi beenu.” (Badika Beena-Ebreeyi 13:7, 17.) Bakulu ba mu kakongye keetu bakwete kufuba bikata na kukisha nsaa yaabo bwa kwitukwasha. Patunangusheena pabitale byooso byabakwete kukita, kifulo na lutumbu lwetu alunyiisha kutama. Tatukumanga kushimisha muloo wabo sunga kwibafitshisha munda pa mwanda wa bikitshiino byetu nya. Mu kwilekeena na byabya, tukumineeyi kwibakookyela n’eshimba dimune. Patukitshi byabya, atulombasha byabetutekye’shi: “Nwikale anwibanêmeka bikile bukata na kwibafula kifulo bikile bukata pa mwanda wa wawa mufubo wâbo.”​—1 Beena-Tesalonika 5:13, EEM.

19, 20. Twi kunyisha kutungunuka na kuleesha kifulo kya bu bana na bana naminyi?

¹⁹ Bafubi ba Yehowa abaukiibwa bwa kifulo kyabo kya bu bana na bana. Nyi bibaadi na mu mafuku a Mpoolo. Anka Mpoolo baadi munyingishe bakwetu bwabadya kuleesha kifulo mu ungi mushindo ukata. Bambile bwa: “Kuyididiila dimo kumpala.” (1 Beena-Tesalonika 4:9, 10) Eyendo, babaadi abayididiila misango yooso nka kumpala!

²⁰ Munda mwa kino kipwa, twikaleyi atunangusheena ku ino nkonko nsaa yooso yatutala kifundwe kya ku kipwa mu Nshibo yetu ya Bufumu: Nkwete kuyididiila na kupokyela beenyi su? Ne kukwasha bakwetu be mu lukano naminyi? Nkwete kunemeka mpàngo y’Efile Mukulu pabitale eyibakishi su? Nkinyi kilombeene kunkwasha bwa kwikala na muloo wa binyibinyi? Ne kunyiisha kukulupila mwi Yehowa naminyi? Ne kutungunuka na kukookyela baaba abetukunkusha naminyi? Su atwitatshisha bwa kulombasha ino myanda isamombo, kifundwe kya ku kipwa takikala penda bu mukanda wi ku lubumbo nya; akikala akitutentekyesha bwa kukookyela mayi abafundjile Mpoolo’shi: “Ididîlai mu kwifulêna bu bâna na bâna.”​—Beena-Ebreeyi 13:1, EEM.