1, 2. (a) Nkinyi ki mu “kya buntu [ky’Efile Mukulu] ki bukata bushya kupwandjikishwa”? (b) Nkonko kinyi yatutaluula mu uno mwisambo?

YEHOWA mmwitupe kya buntu kikata akilesha kifulo pabaadi mutume Mwan’aye eeleka Yesu pano pa nsenga! (Yowano 3:16; 1 Yowano 4:9, 10) Mpoolo mutumiibwa aleesha kino kya buntu bu “ki bukata bushya kupwandjikishwa.” (2 Beena-Kodinto 9:15, EEM) Bwakinyi Mpoolo baakwile byabya?

² Mpoolo baadi auku’shi mulambu wa Yesu nyi wikale kishinkamiisho kya’shi milayilo yooso y’Efile Mukulu ayikalombana. (Badika 2 Beena-Kodinto 1:20.) Bino abileesha’shi mu kyakya “kya buntu [ky’Efile Mukulu] ki bukata bushya kupwandjikishwa” mwi mulambu wa Yesu na myanda yooso ibuwa na kifulo ki na bulamate akituleesha Yehowa. Kyakya kya buntu ki bukata bwatushi bya kupwandikisha kalolo. Twi kupusha naminyi bwa kino kya buntu? Kino kya buntu ki kwitutakula bwa kukita kinyi patwilumbuula  bwa Kitentekyesho kya lufu lwa Kidishitu akiikala mu dya Kasatu 23/3/2016?

3, 4. (a) We kupusha naminyi su muntu akupa kya buntu? (b) Kya buntu kikata ki kushintuula nshalelo oobe naminyi?

³ Atukumiinaa kya buntu su abetupa kyanka kwi muntu. Kadi akwikalaa bingi bya buntu bi na muulo ukata bilombeene kushintuula nshaleelo eetu. Bu kileshesho, banda kupwandikisha’shi bokitshi kibeshi. Pa mwanda wa byabya, abaakutshibila kibawo kya lufu. Musango umune, kubafiki muntu oshowuku bafiki bwadya kunyokiibwa pa mbalo yoobe. Akumiina kufwa pa mbalo yoobe! We kupusha naminyi bwa kyakya kya buntu?

⁴ Kyakya kya buntu kikata ki nkutakula bwa kushintuula nshalelo oobe. Akikutakula dingi bwa kwikala na kalolo na kifulo kwi bangi na kufwila muntu ooso shii mukuleeshe kalolo lusa. Mu mafuku oobe ooso a muwa, we kukumiina kuleesha’shi we na lutumbu lukata bwa bibaadi bilambule yawa muntu pa mwanda oobe.

5. Kya buntu kya nkuulo ky’Efile Mukulu ki bukata kukila bingi byooso naminyi?

⁵ Kya buntu ky’Efile Mukulu kya nkuulo ki na muulo ukata kukila kino kibatukatuka mu kuleesha. (1 Mpyeele 3:18) Banda kunangushena bwa uno mwanda: Bantu booso mbapyane mulwisho wa Adame, na kibawo bwa wawa mulwisho nyi ndufu. (Beena-Looma 5:12) Kifulo kya Yehowa kibaadi kimutakule bwa kutuma Yesu pa nsenga bwa kufwila bantu booso, mwanda “mbwa muntu ooso bwadi mumwene lufu.” (Beena-Ebreeyi 2:9) Akupu, mulambu wa Yesu auketukitshiina myanda ikile bungi! Aukatusha lufu bwa ikalaika. (Yeeshaya 25:7, 8; 1 Beena-Kodinto 15:22, 26) Bantu booso abaleesha lukumiino mwi Yesu abakashala mu butaale na muloo bwa ikalaika, byabekala mwiyilu bu ba nfumu na Kidishitu sunga bu beena Bufumu bw’Efile Mukulu pa nsenga. (Beena-Looma 6:23; Bifumbulwe 5:9, 10) Mmyabi kinyi dingi i mu kya buntu kya Yehowa?

6. (a) Mmyabi kinyi yokulupila ku bukwashi bwa kya buntu kya Yehowa? (b) Temuna bintu bisatu abitutakula kya buntu ky’Efile Mukulu mu kukita.

⁶ Bu byaidi kimune kya ku bya buntu by’Efile Mukulu, nsenga ayikafiki mpaladiiso, ba sha maladi abakapashibwa, bafwe abakasangudiibwa. (Yeeshaya 33:24; 35:5, 6; Yowano 5:28, 29) Twi bafule Yehowa na Mwana aaye bwa kya buntu “ki bukata bushya kupwandjikishwa” kyabadi betupe. Kino kya buntu ki kwitutakula bwa kukita kinyi? Akitutakula (1) bwa kwambula Yesu Kidishitu mu matabula aaye (2) kufula bakwetu balume na bakashi na (3) kufwila bangi lusa alukatukila mwishimba.

7, 8. Abitungu tukite kinyi bwa kya buntu ky’Efile Mukulu? Abitungu kitutakule mu kukita kinyi?

⁷ Kya kumpala, abitungu tufubishe muwa wetu bwa kupa Yesu kineemo. Mpoolo mutumiibwa bambile’shi: “Kifulo kya Kidishitu nkiitwanyiine.” (Badika 2 Beena-Kodinto 5:14, 15.) Mpoolo baadi auku’shi, su twakumiina kifulo kikata kya Yesu, akitwanyiina sunga kwitutakula bwa kufula na kupa Yesu kineemo. Patupusha kalolo bitukitshiine Yehowa, kifulo kyaye akitutakula bwa kwikala na nsheleelo aleesha’shi tukwete kuneemeka Yesu. Twi kwibikita naminyi?

⁸ Kifulo kya Yehowa akitutakula bwa kulonda kileshesho kya Yesu, kumulonda mu matabula aaye kalolo. (1 Mpyeele 2:21; 1 Yowano 2:6) Patukookyela Efile Mukulu na Kidishitu, atwibaleesha kifulo kyetu. Yesu bambile’shi:  “Yaawa alama miiya yande na kwiyifubila, yaawa ngi mumfule. Mumfule naamu, abamufulu kwi Nshami, n’ami naamufulu, neeleeshe kwadi.”​—Yowano 14:21; 1 Yowano 5:3.

9. Uno ndumbulwilo etutakula mu kukita kinyi?

⁹ Mu kino kipungo kya Kitentekyesho, bibuwa kunangusheena ngofu pabitale nshaleelo eetu. Abitungu kwiyipusha’shi: ‘Mu myanda kinyi mwandji mupwe kwambula Yesu? Mmyanda kinyi ayitungu kulumbuula?’ Bi na muulo kwiyela ino nkonko mwanda bantu ba uno ndumbulwilo abakumiina’shi twikale na shaleelo e mumune na aabo. (Beena-Looma 12:2) Su ta twi badimukye, twi balombeene kubanga kwambula bantu bende nkumo, bantu abashaa masha kampanda na balongyeshi ba mu uno ndumbulwilo. (Beena-Kolose 2:8; 1 Yowano 2:15-17) Twi kukambila ino myanda naminyi?

10. Nkonko kinyi yatudi balombeene kwiyipusha mu kino kipungo kya Kitentekyesho? Myaluulo yatupete i kwitutakula mu kukita kinyi? (Tala kifwatulo ki kumbangilo.)

¹⁰ Bibuwa kwata nsaa ya kutaluula nfwadilo eetu, ma filme atutalaa na ngono yatupushaa i mu ordinatere, mu telefone sunga mu tablete eetu. Eyele ino nkonko: ‘Su Yesu ekala panka, e kukalakashwa pa kumona byandji mufwale su?’ (Badika 1 Timotee 2:9, 10.) ‘Nfwadilo ande aleesha’shi ne mulongi a Kidishitu su? Yesu e kukumiina kutala ma filme antalaa? E kukumiina kupusha ngono yampushaa? Su Yesu anteka bwashi afube na telefone sunga tablete ande mund’amafuku e kukalakashwa na bintu byemumono? Bi kwikala bukopo kupatulwila Yesu kyosangeela maasha kampanda a ma video?’ Abitungu kifulo kyetu bwa Yehowa kitutakule bwa kukatusha kintu kyooso kishi kilombeene bwa mwina Kidishitu sunga kyekala na muulo kinyi. (Bikitshino 19:19, 20) Patulambula muwa wetu kwi Yehowa, atulaa bwa kwikala na nshalelo apa Yesu kineemo. Nyi bwakinyi tatwi balombeene kukita kintu su nkimune kilombeene kwitukutshishwa bwa kwambula Yesu.​—Mateo 5:29, 30; Beena-Fidipe 4:8.

11. (a) Kifulo kyetu bwa Yehowa na Yesu akitutakula ku kinyi? (b) Kifulo kyetu akitutakula bwa kukwasha bangi mu kakongye naminyi?

¹¹ Kifulo kyetu bwa Yesu akitutakulaa bwa kulungula mukandu wibuwa na kisumi. (Mateo 28:19, 20; Luuka 4:43) Mu kipungo kya Kitentekyesho, we kwilumbuula bwa kufuba mudimo wa bu mbala mashinda mukwashi a nsaa 30 sunga 50. Ungi mukashi kilele e na bipwa 84 amonanga’shi ta mulombeene kufuba bu mbala mshinda mwanda wa bipwa byaye na bukome bwaye bupeela. Kadi, ba mbala mashinda ba mu mbalo ibaadi mushale babaadi bakumiine kumukwasha. Abamupeele mushindo wadya kutambuka, abo nkusangula mbalo ibuwa yadya kulungula. Pa mwanda wa byabya, mukwetu baadi mulombashe kepatshila ka nsaa 30. We mulombeene kukwasha namu muntu mu kakongye keenu bwadya kufuba bu mbala mashinda mu mweshi wa Kasatu na wa Kananka su? Eyendo’shi ta muntu ooso e bya kufuba bu mbala mashinda, kadi twi balombeene kufubisha nsaa na bukome bwetu bwa kutamisha mudimo wa Yehowa. Su twakita byabya, atukaleesha’shi kifulo kya Yesu akitutakula nka bu Mpoolo. Kifulo ky’Efile Mukulu akitutakula dingi bwa kukita kinyi?

12. Kifulo ky’Efile Mukulu akitutakula mu kukita kinyi?

¹² Kya kabidi, abitungu kifulo ky’Efile Mukulu kitutakule bwa kufula bakwetu. Yowano mutumiibwa bafundile’shi: “Anwe bande ba kifulo kikata, su Efile Mukulu mmwitufule bino, twi na kya kwifuleena, atwe namu ku muntu na muntu.” (1 Yowano 4:7-11) Byabya, su atukumiina kifulo ky’Efile Mukulu, abitungu tufule  namu bakwetu. (1 Yowano 3:16) Twi kuleesha bakwetu kifulo naminyi?

13. Yesu mmwitulekyele kileshesho kinyi pabitale kufula bangi?

¹³ Kileshesho kya Yesu akileesha byatudi balombeene kufula bangi. Pabaadi pa nsenga, bakwashile bantu, bikishekishe babaadi na kwiyisha. Baadi mupaashe ba sha maladi, balemane, ba mpofu, ba nshikwe na tumaama. (Mateo 11:4, 5) Mu kwilekeena na bakunkushi ba bipwilo, Yesu baadi asangeela kulongyesha bantu babaadi abakumiina kuuka Efile Mukulu. (Yowano 7:49) Baadi mufule bantu babaadi na kwiyisha na kufuba ngofu bwa kwibakwasha.​—Mateo 20:28.

14. We mulombeene kulesha bakwetu kifulo naminyi?

¹⁴ Kipungo kya Kitentekyesho nkiikale dingi nsaa ibuwa kunangusheena mushindo wa kukwasha bakwetu mu kakongye bikishekishe bantu banunu. We mulombeene kwibatembela su? We bya kwibatwadila kya kudya, kwibakwasha na midimo ya mu nshibo, kwibasemuna bwa kwenda nabo mu bisangilo, sunga kwenda nabo mu bulungudi? (Badika Luuka 14:12-14.) Tutadileyi kifulo ky’Efile Mukulu kitutakule bwa kuleesha bakwetu kifulo!

15. Abitungu tushinguule kinyi?

¹⁵ Kya kasatu, kifulo kya Yehowa akitutakula bwa kufwila bakwetu lusa. Booso bwetu twi bapyane mpekato na lufu kwi Adame, nyi bwakinyi muntu su ngumune ta mulombeene kwamba’shi, “Ami ntshi na lukalo na nkuulo nya.” Sunga mufubi a Efile Mukulu e na lulamato lwi naminyi e nka na lukalo na kya buntu kya nkuulo. Ooso a kwatudi mmulekyeelwe ebaasa dikata! Bwakinyi bi na muulo kushinguula byabya? Lwaluulo atwilupete mu lumune lwa ku nkindji ya Yesu.

16, 17. (a) Lukindji lwa Yesu lwa nfumu na mpika’aye alwitulongyesha kinyi? (b) Kunyima kwa kutaluula lukindji lwa Yesu, bwata kitshibilo kinyi?

¹⁶ Yesu batushishe lukindji lwa ungi nfumu baadi mulekyeele mpika aaye ebaasa dikata dibaadi nadyo dya denyee 60 000 000. Kunyima, yawa mpika bapelele kulekyeela mpika naaye baadi na ebaasa dipeela dya penda denyee 100. Lusa lwa nfumu lubaadi na kya kutakula mpika aaye bwa kufwila mpika naaye lusa. Nfumu bafiitshile munda nsaa ibaadi mupushe’shi mpika aaye bapele kufwila mwin’aye e n’ebaasa dya tukuta tupeela lusa. Bambile’shi: “Mufubi eebubi’be! Naadi mukulekyele kishiyo kyoobe kyooso, mwanda boodi munsendeele. Obe naamu, toboody’a kufwila mwinoobe lusa, binaadi ami nabeene mukufwile lusa su?” (Mateo 18:23-35) Nka bu uno nfumu, Yehowa mmwitulekyele mabaasa eetu akata. Abitungu kifulo na lusa lwa Yehowa bitutakule mu kukita kinyi?

¹⁷ Bu byatukwete kwilumbuula bwa kitentekyesho kya lufu lwa Yesu, twi bya kwiyipusha’shi: ‘Kwi mukwetu mundwishishe su? Napusha bukopo bwa kumufwila lusa?’ Su mbyabya, ino nyi nsaa ibuwa kwambula Yehowa “sha-lusa.” (Neemi 9:17; Misambo 86:5) Su atusangeela  lusa lukata lwa Yehowa, atukaleesha bangi lusa na kwibafwila lusa alukatukila kwishimba. Su tatwi na kifulo na bakwetu na kwibafwila lusa, ta twi bya kutengyeela’shi Yehowa etufule na kwitufwila namu lusa nya. (Mateo 6:14, 15) Nsaa yatufwila bangi lusa, tabishintuula myanda bu’bo bashii betulwishishe nya, kadi abitukwasha bwa kukulupila myanda ibuwa mu mafuku aafiki.

18. Kifulo ky’Efile Mukulu kibakwashishe Lily bwa kufwila Carol lusa naminyi?

¹⁸ Mwanda wa kukutwa kupwidika mbilombeene kwikala bukopo bwa kufwila bakwetu lusa. (Badika Beena-Efeeze 4:32; Beena-Kolose 3:13, 14.) Ungi mukwetu mukashi abetamina bu Lily baadi mufumankane na mwanda wi bino. ^[1] (Tala mayi e ku nfudiilo.) Bakwashishe ungi mukwetu mukashi abetamina bu Carol. Bu kileshesho, baadi atambusha Carol kooso kubaadi akyebe kwenda, kumukwasha bwa kuula bintu bibaadi nabyo lukalo na kumukitshiina bingi bintu bi bungi. Sunga byekala’shi Lily bakitshiine byabya byooso, Carol baadi’nka na twipu nsaa yooso na ingi nsaa tabibaadi bibofule bwa kumukwasha nya. Kadi Lily baadi atala ngikashi ibuwa ya Carol na kumukwasha munda mwa bipwa bibungi na pababangile Carol kukumba ngofu na ku lufu. Sunga bibaadi bukopo bwa Lily kukwasha Carol, akula’shi: “Natengyela kumona Carol pa kasanguka. Nakumiina nkamumona pakeekala mupwidikye.” Eyendo, kifulo ky’Efile Mukulu kilombeene kwitutakula bwa kufwila bakwetu lusa na kutengyela kipungo akikekala bantu booso bapwidikye bwa ikalaika.

19. Kya buntu ky’Efile Mukulu ki “bukata bushya kupwandjikishwa” akikutakula ku kinyi?

¹⁹ Yehowa mmwitupe binyibinyi kya buntu ki “bukata bushya kupwandjikishwa.” Twikaleyi’nka atwikisangeela efuku dyooso! Kipungo kya Kitentekyesho nkiikale nsaa ibuwa ya kunangusheena ku byooso bitukitshiine Yehowa na Yesu. Byabya, tutadiileyi kifulo kyabo kitutakule bwa kwambula kalolo matabula a Yesu bwa kuleesha bakwetu kifulo na kwibafwila lusa alukatukila kwishimba.