1, 2. (a) Patuula akipushisha lukindji lwa Yesu lwa mudimi a efuba dya nfinyo. (b) Mmushindo kinyi wi luno lukindji aluleesha ngikashi ya kalolo na bumuntu?

DINGI efuku ku namashika, mudimi a efuba dya nfinyo badi mwate bantu bakumufubila bwa’shi ebape bwedi. Aye nkwibalaa bungi bwa makuta a kwibapa, abo nkukumina. Anka bu bibadi yawa muntu sha efuba akyebe bafubi bebungi, baadi mwalukye misusa ibungi mu kukimba bafubi. Bebalayile efuto booso bwabo dyadi mulombeene kwibafuta. Ku nfudiilo kw’efuku bakongwele bano bantu bwadya kwibafuta fwalanga yabo. Na babaadi bafube efuku dishima na babafubile nsaa umune, baadi mwibape efuto di mumune. Kadi, bangi bantu abaabangile kwidiladila bw’efuto dimumune dibabadi bapete, anka yawa sh’efuba bayipwishe’shi: ‘Tanwibasankile dyadya efuto dinenupa su? Ntshi na matalwa a kufuta beena mudimo bande mwankumiina su? Nubekala na lwabi kumwanda nenulesha bu muntu?’​—Mateo 20:1-15.

² Mwisambo wa Yesu awitulongyesha mwanda wi na muulo pabitale “buntu sunga [kalolo]” ka Yehowa. ^[1] (Tala mayi e ku nfudiilo.) (Badika 2 Beena-Kodinda 6:1.) Mu mushindo kinyi? Bangi bantu be kwamba’shi yawa muntu baadi mufube efuku dishima baadi mulombeene makuta akile a benaaye. Kadi yawa muntu sha efuba baadi muleeshe bumuntu sunga kalolo kakata kwi bafubi babaadi bakite penda kipindji ky’efuku. Ungi muntu mulongye myanda ya mu Bible bakwile bino pabitale mwaku “buntu sunga [kalolo]” wi mu Bible:  “Uno mwaku auleesha kintu kya muulo kitupeebwe bisumanga sunga kya buntu kitupebwe pa lusa kishii kitulombeene.”

3, 4. Bwakinyi na, mushindo kinyi uleeshe Yehowa kalolo kaaye bwa bantu booso?

³ Bibile etulungula’shi buntu sunga kalolo kakata k’Efile Mukulu nyi “kipeebwa kya buntu.” (Beena-Efeso 3:7) Bu byatushii bya kukookyela Yehowa mu mushindo upwidikye, ta twi na matalwa a kupeta sunga kutambula kalolo k’Efile Mukulu nya. Anka, twi balombeene lufu. Nfumu Salomone bambile’shi: “Pano pa nsenga ta pe muntu mululame akitâ’nka penda bibuwa kushii kulwisha.” (Mulungudi 7:20) Kunyima, Mpoolo mutumiibwa bakwile’shi: “Booso mbakite milwisho, mbabulwe ntumbo y’Efile Mukulu,” na’shi: “Efuto dya milwisho ndufu.”​—Beena-Looma 3:23; 6:23a.

⁴ Pamwanda wa kifulo kya Yehowa bwa bantu, batumine “Mwan’aye eeleka” bwadya kwitufwila. Kino kikitshino nyi kileshesho kikata kya buntu sunga kalolo kakata kabadi betuleeshe. (Yowano 3:16) Mpoolo bambile’shi Yesu “mmufwadikwe lubango lwa ntumbo na kineemo ku mwanda wa lufu lubafwambukile nalo. Byabya, ku buntu bw’Efile Mukulu, mbwa muntu ooso bwadi mumone lufu.” (Beena-Ebelu 2:9) Eyendo, “kyabuntu kya lusa ky’Éfile Mukulu, nyi mmuwa wa looso mwi Kidishitu Yesu Mfumwetu.”​—Beena-Looma 6:23b.

5, 6. Mbipeta kinyi byatupete su tubekala abakunkushwa (a) na milwisho? (b) na buntu bw’Efile Mukulu?

⁵ Bwakinyi atukitaa milwisho na kufwa? Bible aleesha kalolo’shi “ku kito kya umune, lufu lubadiile bufumu.” Byabya twi bakutwe kupwidika na tukwete kufwa mwanda twi bana ba Adame. (Beena-Looma 5:12, 14, 17) Anka, twi na mushindo wa kupela kukunkushibwa sunga kumunyibwa na mulwisho. Twi kwibikita naminyi? Nsaa yatuleesha lukumiino mu mulambu wa nkuulo wa Kidishitu, atupete myabi ayituukila ku buntu sunga kalolo kakata ka Yehowa. Bible aleesha’shi: “Kwakwa kufiimine bito, kwakwa ngi kunyiishe kufiima buntu bw’Efile Mukulu, bwa’shi, bu bibaadi milwisho idye bufumu bwa kutwala lufu, byabya ku bululame, buntu bw’Efile abudi bufumu, bwa kutuusha muwa wa looso, pa kukiila kwi Yesu Kidishitu Nfumwetu.”​—Beena-Looma 5:20, 21.

⁶ Sunga twekala beena milwisho, tatulekanga bwa’shi milwisho idye bufumu mwatudi. Byabya nsaa yatukitshi mwanda wibubi, abitungu tutekye Yehowa lusa. Mpoolo betudimwishe’shi: “Milwisho tayikenumunu’nyi, mwanda t’anukunkushwa na ndambukisho ya Moyiise ooo, anka anukunkushwa na buntu [kalolo] bw’Efile Mukulu.” (Beena-Looma 6:14) Byabya, mushindo kinyi watudi balombeene kupeta myabi ku buntu sunga kalolo k’Efile Mukulu? Mpoolo bambile’shi: “Buntu bw’Efile mukulu . . . abwitulambukisha bwa kuleka bubi na lwabi lwa bintu bya pa nsenga, bwa’shi tushaale mu kino kipungo na kwiyeesha, bululame na kifulo kwi Efile Mukulu.”​—Tite 2:11, 12.

7, 8. Mwaku kalolo sunga buntu bwa Yehowa, “bwilekeene ku mifubo yaabo” auleesha kinyi? (Tala kifwatulo ki kumbangilo.)

⁷ Mpyeele mutumiibwa bafundile’shi: “Ekwasheneeyi, muntu ooso muyile kipeebwa kyadi mupete, ku muntu na muntu, bu balami bebuwa ba buntu [kalolo] bw’Efile Mukulu, bwilekeene ku mifubo yaabo.” (1 Mpyeele 4:10) Uno mwaku kalolo sunga buntu bwa Yehowa, “bwilekeene ku mifubo yaabo” auleesha kinyi? Auleesha’shi sunga twafumankana na nkalakashi kinyi mu muwa wetu, Yehowa aketupa kyooso kyatudi nakyo lukalo bwatudya kunyingiila. (1 Mpyeele 1:6) Aketupa nka kyakya kintu kyatudi nakyo lukalo bwa’shi tumone bya kukambila lukalakashi looso alwitukwata.

⁸ Yowano mutumiibwa bafundile’shi: “Atwe booso, twi batambule . . . buntu pa buntu sunga [kalolo pa kalolo Nwt].” (Yowano 1:16) Bu bikale Yehowa kwete kuleesha kalolo kaaye kakata  mu mishindo ilekeenelekeene, tukwete kupeta myabi ibungi. Mmyabi kinyi yatukwete kupeta?

9. Mmyabi kinyi yatupetela ku buntu bw’Efile Mukulu, na twi kumuleesha lutumbu naminyi?

⁹ Yehowa alekyelaa milwisho yetu. Twi na lutumbu lukata mwanda Yehowa kwete kulekyela milwisho yetu pa mwanda wa buntu sunga kalolo kaaye. Kadi bwa’shi etulekyeele abitungu twinyongole na kutungunuka na kulwa bwa kukambila binangu bya kukita uno mulwisho. (Badika 1 Yowano 1:8, 9.) Mpoolo baadi mupatulwile beena Kidishitu bediibwe mwimu ba mu mafuku aaye kipaso akilekyelaa Yehowa milwisho. Bambile’shi: “[Efile Mukulu] mmwitukaashe ku matalwa a mufito, aye nkwitutwesha mu Bufumu bwa Mwan’aye a kifulo; mwadi ngi mwatudi bapetele kipandjilo, na kulekyeelwa kwa milwisho.” (Beena-Kolose 1:13, 14) Twi na lutumbu lukata bwa lusa lw’Efile Mukulu na atukyebe kumutumbisha. Na dingi bu abitufwilaa Yehowa lusa ku milwisho yetu, twi balombeene kupeta ingi myabi ibungi ya kukaanya.

10. Nkinyi kyatudi bapete ku bukwashi bwa buntu bw’Efile Mukulu?

¹⁰ Twi balombeene kwikala mu butaale na mu kipwano n’Efile Mukulu. Twi bantu bakutwe kupwidika, nyi bwakinyi kubanga ku butandwa bwetu atwikalaa beshikwanyi n’Efile Mukulu. Kadi Mpoolo bambile’shi: “Patubaadi beshikwanyi b’Efile Mukulu, ê nabêne bâlwishe kipwano netu ku lufu lwa Mwan’ê.” (Beena-Looma 5:10, EEM) Ku bukwashi bwa nkuulo, twi balombeene kwikala dingi mu kipwano n’Efile Mukulu, nkwamba’shi, twi kwikala naye mu kipwano na kufika bakuuku baaye. Mpoolo bapatulwile uno mwanda na kipaso kyaudi wipusheene na buntu sunga kalolo kakata ka Yehowa nsaa ibalungwile bakwabo bediibwe mwimu’shi: “Byabya byatudi babingishibwe kwi lukumiino, twi mu kipwano n’Efile Mukulu pa kukiila kwi Nfumwetu Yesu Kidishitu, kwadi ngi kwatupetela mu lukumiino lwetu bwabwa buntu [kalolo], mwatudi banyingiile.” (Beena-Looma 5:1, 2) Twi na lutumbu lukata pa’twe kwikala mu bukuuku na mu butaale na Yehowa!

11. Mmushindo kinyi wikale bediibwe mwimu abatwala “ingi mikooko” ku bululame?

¹¹ Twi balombeene kwikala balulame ku meeso kw’Efile Mukulu. Mutemuki Ndanyele bafundile’shi mu mafuku a ku nfudiilo, “bantu ba kinangu” kwamba’shi bediibwe mwimu, abakalambukisha “bantu bebungi bululame.” (Badika Ndanyele 12:3.) Bediibwe mwimu bakwete kukita uno mudimo naminyi? Bakwete kulungula mukandu wibuwa na kulongyesha midiyo ya “ingi mikooko” miiya ya Yehowa. (Yowano 10:16) Abebakwasha bwa’shi bekale bantu balulame ku meeso kw’Efile Mukulu, na bino mbilombeene kukitshika nka penda ku bukwashi bwa kalolo kakata ka Yehowa. Mpoolo baadi mupatuule’shi: “Mbebabingishe buntu, ku kalolo kaaye [Efile Mukulu] muyiile kipandjilo kitutwadile Yesu Kidishitu.”​—Beena-Looma 3:23, 24.

12. Kwela nteko nkwikwateene na kalolo k’Efile Mukulu naminyi?

¹² Twi balombeene kwifubwila peepi n’Efile Mukulu mu luteko. Ku bukwashi bwa buntu sunga kalolo kaaye twi balombeene kwela nteko kwi Yehowa. Mpoolo baadi mwitanyine lupuna-nsulu lwa Yehowa bu “lupuna-nsulu lwa buntu” sunga lwa kalolo kakata, na etwitanyina bwatudya kwenda kwanka “na bulungantu bwa kwilubula.” (Beena-Ebelu 4:16a; Beena-Efeso 3:12, EEM) Twi balombeene kuteka Yehowa nsaa yooso yatukumiina kukiila mwi Yesu. Kino nyi nkineemo kikata kyatudi nakyo! Mpoolo bakwile’shi: “Pa lukulupilo lwetu mwadi twi na bulungantu bwa kwilubula kumpala kw’Efile Mukulu.”​—Beena-Efeso 3:12.

13. Buntu sunga kalolo k’Efile Mukulu mbilombeene ‘kwitukwasha apakumbana kipungo’ naminyi?

¹³ Twi kupeta bukwashi pa nsaa ikumbane. Mpoolo baadi mwitukankamikye bwatudya kwikala atutekye Yehowa nsaa yooso yatudi na lukalo lwa kumuteka, “bwa kupeta lusa na kalolo na kukwashibwa apakumbana kipungo.” (Beena-Ebelu 4:16b) Nsaa yooso yatudi na nkalakashi sunga myanda ibukopo mu muwa wetu, twi balombeee  kuteka Yehowa bwa’shi etukwashe. Na dingi alulaa ku nteko yetu sunga te mu kitungo kya kwiyaluula. Misusa ibungi afubaa na bakwetu bwa kwitukwasha. Yehowa alulaa nteko yetu “mu kipaso kyatudi balombeene kwamba na lwishinko looso’shi: ‘Yehowa byadi mukwashi ande; ntantshinyi kintu su nkimune. Kilombeene kunkitshina muntu nkinyi?’”​—Beena-Ebelu 13:6.

14. Mmyabi kinyi yatupete mu mashimba eetu ku bukwashi bwa kalolo k’Efile Mukulu?

¹⁴ Twi balombeene kunyingishibwa ku mashimba. Twi na mwabi ukata wa kunyingishibwa na Yehowa mu nsaa yooso yatudi na twinyongoshi. (Misambo 51:17) Nsaa ibaadi beena Kidishitu ba mu Tesalonika abakyengye pa mwanda wa kubingwabingwa, Mpoolo bebafundile’shi: “Nfumwetu Yesu Kidishitu nabeene n’Efile Mukulu Nshetu, aye mwitufule na mwitupe ku kalolo kaaye, kusambibwa kwa looso na lukulupilo lwa-kishima, benusambe, dingi benunyingishe.”(2 Beena-Tesalonika 2:16, 17.) Abitunyingisha ngofu pa kuuka’shi pa mwanda wa kalolo kaaye, Yehowa mmwitufule na kwete kwitupasukila!

15. Ku bukwashi bwa kalolo kakata k’Efile Mukulu, ndukulupilo kinyi lwatudi nalo?

¹⁵ Twi na lukulupilo lwa muwa wa ikalaika. Bu byatudi bantu abakitaa milwisho, ta twi bya kwikala na lukulupilo su ndumune su Yehowa ta mwitukwashe nya. (Badika Misambo 49:7, 8.) Kadi Yehowa mmwitupe lukulupilo lwibuwa bukile. Ndukulupilo kinyi? Yesu bambile’shi: “Akikyebe Nshami nyi nkino’shi ooso amono Mwana na amukumiina, apete muwa wa looso.” (Yowano 6:40) Byabya twi na lukulupilo lwa kwikala na muwa wa ikalaika ku bukwashi bwa buntu sunga kalolo kakata ka Yehowa. Mpoolo bambile’shi: “Bubeleesha buntu bw’Efile Mukulu abo bwikale nsulo a kipandjilo kya bantu booso.”​—Tite 2:11.

16. Bangi beena Kidishitu ba mu mafuku a batumibwa abafubile bibubi na buntu sunga kalolo k’Efile Mukulu naminyi?

¹⁶ Buntu sunga kalolo ka Yehowa aketupetesha myabi ibungi. Anka, tatwi balombeene kufuba nako bibubi pa kwikaata bu kabingilo ka kukita milwisho nya. Munkatshi mwa beena Kidishitu ba mu mafuku a batumiibwa, mubaadi bangi  bantu babaadi “abapatuula mukandu utale bumutu [kalolo k’] bw’Efile eetu bi bubi, mwanda wa kukyeba kwibingisha ku muwa wabo wa bukitekite.” (Yuude 4) Abimweneka’shi bano beena Kidishitu bakutwe lukumiino babaadi abeele meeshi’shi mbalombeene kwikala nka abakitshi milwisho, Yehowa namu ebafwilanga nka lusa misango yooso. Babaadi abakimbi na bya kukaka bangi bakwabo bwa’shi bekale abakitshi nabo milwisho yaabo. Lelo uno dingi, muntu ooso akitshi byabya kwete “kukaa kikudi kya buntu [kalolo kakata]” k’Efile Mukulu.​—Beena-Ebelu 10:29.

17. Elango kinyi dikata dibatushishe Mpyeele?

¹⁷ Satana kwete kubeleka bangi beena Kidishitu lelo uno pa kwibatakula mu kunangusheena’shi mbalombeene kukita milwisho na Yehowa ebafwila lusa nka musango umune. Eyendo Yehowa akuminaa kufwila bantu lusa abakitshi milwisho na abenyongola; anka etutekye bwa’shi twikale atulu bwa kukambila binangu bya kukita milwisho. Yehowa baadi muyookyele Mpyeele bwa kufunda’shi: “Bakuuku bande, mbaaba’nwe badimushwe: pasukaayi bwa kupela’shi tala benutweshakasha kwi bantu babi bapwe kupambuka, dingi tala nwakashimisha kukankamana kwenu. Anka nyingayi mu buntu na mu kuuka kwa Nfumwetu na mupaashi Yesu Kidishitu.”—2 Mpyeele 3:17, 18.

18. Pa mwanda wa buntu bwa Yehowa, mbushito kinyi bwatudi nabo?

¹⁸ Twi na lutumbu lwibungi bwa kalolo kakata ka Yehowa. Byabya abitungu tufube na kino kya buntu bwa kutumbisha Yehowa na kukwasha bangi. Kino nyi nkitungo kyatudi nakyo bwabo. Twi kufuba na bino bya buntu naminyi? Mpoolo bambile’shi: “Patwe kwikala na bya buntu bilekeene-lekeene, muyiile buntu bubabetupele, su mbutemuki, [tutemukyeyi] mupunda bukata bwa lukumino; su mufubo [twikale baneemene] ku mufubo, su ngyawa a kulambukisha epane ku lulambukisho; su ngyawa akankamika [epaane] mu kukankamika kwaye; . . . yawa asambaa be mu mpombo [ebikite] na muloo.” (Beena-Looma 12:6-8) Byabya pa mwanda wa buntu bwa Yehowa, twi na bushito bwa kwikitshisha ngofu mu bulungudi, mu kulongyesha bangi bantu Bible, mu kukankamika bakwetu balume na bakashi, na mu kufwila muntu ooso etulwishisha lusa.

19. Mbushito kinyi bwatudi nabo bwatukataluula mu mwisambo aulondo?

¹⁹ Bu byatudi bantu bediibwe mwabi pa mwanda wa kalolo ka Yehowa, abitungu kukita bukopo bwetu booso bwa ‘kwikala tumonyi twa mukandu wa buntu [kalolo] bw’Efile Mukulu.’ (Bikitshino 20:24) Atukataluula buno bushito bwatudi nabo mu mwisambo aulondo.