1. Twi balombeene kupusha naminyi pabitale lukumiino lwetu?

BANTU booso ta be na lukumiino nya. (2 Beena-Tesalonika 3:2) Anka Yehowa apeyaa bantu abamulangwila lukumiino. (Beena-Looma 12:3; Beena-Ngalatea 5:22) Atutumbula Yehowa ngofu mwanda mmwitupe lukumiino!

2, 3. (a) Mmyabi kinyi yatupete su twi na lukumiino? (b) Nkonko kinyi yatukyebe kwaluula binobino?

² Yehowa balambwile Mwan’aye aadi mufule bwa’shi muntu ooso atuulu lukumiino mwi Yesu bamulekyele milwisho yaaye. Bino abipa bantu mushindo wa kwikala bakuuku ba Yehowa na kupeta muwa wa ikalaika. (Yowano 6:44, 65; Beena-Looma 6:23) Yehowa mmwituleeshe kalolo kakata! Sunga twekala bankitshishi ba milwisho na be mu kitungo kya lufu, Yehowa mmumone’shi twi na ngobesha ya kukita myanda ibuwa. (Misambo 103:10) Mmwitukwashe bwatudya kupusha mukandu wibuwa wa Yesu na mulambu waye. Pabatubangile kwikala na lukumiino mwi Yesu na kumulonda,  tubabangile kukulupila muwa wa ikalaika!​—Badika 1 Yowano 4:9, 10.

³ Mmyanda kinyi dingi yatudi balombeene kulonga pabitale lukumiino? Su tubauku nka penda myanda itukitshine Efile Mukulu na yakyebe nketukitshina kumpala, bino abileesha’shi twi na lukumiino su? Tubandeyi kutala ingi myanda ayitungu’shi tukite.

4. Nsaa yatudi na lukumiino, alwitutakula mu kukita kinyi?

⁴ Kwikala na lukumiino mwi Yehowa na mwi Yesu, ta mpenda kuuka myanda yabadi betukitshine na yabakyebe kwitkitshina nya. Anka, abitungu twikitshishe bwa kwikala na nshalelo mwipushene na byabetulongyesha. Na abitungu twikale na kisukusuku kya kukwasha bangi bwabadya kwibauka. Mpoolo mutumiibwa bambile’shi: “Su mukanwa moobe osokola (sunga kubwela)’shi Yesu Mmwanana, na su mwishimba dyobe okumina’shi Efile Mukulu mmumusangule ku bafwe, okapanda. Mwanda kukumiina mwishimba dyoobe akufisha ku bululame, dingi kubwela mukanwa moobe lwalwa lukumiino akufishanaa ku kipandjilo.”​—Beena-Looma 10:9, 10; 2 Beena-Kodinda 4:13.

5. Bwakinyi lukumiino lwi na muulo, na abitungu tukite kinyi bwa kwikala na lukumiino lwi bukopo? Tusha kileshesho.

⁵ Abimweneka patooka’shi, bwa kupeta muwa wa ikalaika mu ndumbulwilo mupya a Efile Mukulu, abitungu twikale na lukumiino na abitungu tulame lukumiino lwetu lunyingye. Lukumiino lwi nka bu mutshi. Abitungu’shi tuyididiile na kwela meema ku mutshi bwaudya kwikala utshimpukye na kuyididiila na kukula. Anka su tatwi bekwele meema ebungi aubanga kunyatshila na kuuma. Mu mushindo umune, abitungu tushinkamishe’shi lukumiino lwetu “ndunyingye” na’shi lukwete kutungunuka na “kutama.”​—Tite 2:2; 2 Beena-Tesalonika 1:3; Luka 22:32; Beena-Ebelu 3:12.

6. Mu mishindo kinyi ibidi mwabetulesha bi lukumiino mu mukanda wa Beena-Ebelu 11:1?

⁶ Mu mukanda wa Beena-Ebelu 11:1, Bible alesha mushindo wikale lukumiino. (Badika.) (1) Lukumino nyi “kishinkamisho kia bintu abikulupilwa.” Mu Bintu ‘byatukulupila’ mwi milayilo y’Efile Mukulu bwa mafuku aafiki. Bu kileshesho, twi bashinkamishe’shi abakakatusha buntomboshi booso na bakatule nsenga ipya. (2)  Lukumiino nyi “kuleshiibwa kwa patooka” sunga kushinkamisha binyibinyi, “biabia bishabimwekwa.” Atwiuku’shi Yehowa Efile Mukulu na Bufumu bwaye, Yesu Kidishitu, na ba mwikeeyilu, be kwanka, sunga tabamweneka. (Beena-Ebelu 11:3) Twi balombeene kulesha’shi twi na lukumiino mu milayilo y’Efile Mukulu na mu bintu bishabimweneka naminyi? Tukwete kuleesha bino mu nshalelo eetu, mu myanda yatwakula na yatukitshi.

7. Kilesheho kya Nowa akitukwasha bwatudya kupusha akilesha kwikala na lukumiino naminyi? (Tala kifwatulo ki kumbangilo.)

⁷ Lukumiino lwa Nowa alwitulongyesha kinyi? Mpoolo mutumiibwa bakwile’shi, “pakupwa kudimunwa n’Efile Mukulu bwa myanda yishibaadi yibande kumwekwa, batshinyine, ayibaka bwaato bwa kipandjilo kya nshibo yaye.” (Beena-Ebelu 11:7) Pa mwanda wa lukumiino lubaadi nalo mu myanda ibaabadi abamulungula kwi Yehowa, Nowa bayibakile bwaato bukata. Pangi bankugishanyi naye babadi abamwipusha bwakinyi baadi ayibaka bwato. Twi kwakula’shi Nowa tabaadi ashala mumiine nya. Bible amba’shi Nowa “balambukishanga bantu mwanda wa kululama.” (2 Mpyeele 2:5) Baadi alungula bantu’shi Efile Mukulu akyebe kunokyesha  mpeshi a kabutu bwa kubutula bantomboshi. Pangi baadi ebalungula ano mayi abaadi aakula Yehowa’shi: “Bwande’mi nfudiilo a bintu byooso baafiki! Mwanda bibaatwesha bantu bukitekite mu nsenga, ntandi pa kwibatuuta (sunga kwibabutula) pamune na nsenga ishima.” Na “Ami nakanokyesha mpeshi a kafwambu, ngi kwamba’shi meema pa nsenga, bwa kutuuta bipangwa byooso bii na muuwa muush’eyilu. Kyooso kii pa nsenga akikuulu eshimba.” Akupu Nowa baadi apatulwila bantu kyabadya kukita bwa’shi bakapande. Yehowa bamukamikile bino: abitungu ‘nutwele mu bwaato.’​—Kibangilo 6:13, 17, 18.

8. Shake akula kinyi pabitale lukumiino?

⁸ Shake bafundjile pabitale lukumiino. Bafundjile dingi kunyima kwa Mpoolo mutumibwa kufundjila Beena Ebelu. Aye nkwamba’shi: “Ndeeshe lukumiino loobe lushii na bikitshino, ami namu mmu bikitshino byande mwandeeshesha lukumiino lwande.” (Shake 2:18) Shake apatuula’shi bwa kwikala na lukumiino, tabitungu nka penda kukumiina nya. Mwanda na ba demo namu mbakumiine’ shi Efile Mukulu e kwanka, anka ta be na lukumiino mwi Yehowa nya. Kunundu kwa byabaya, mbeshikwene naye ngofu. (Shake 2:19, 20) Mu ungi ngakwilo, su muntu e na lukumiino,  abitungu asankishe Efile Mukulu pa kukita myanda i buwa sunga kikyebe ky’eshimba dyaye. Abrahame bakitshine bino. Shake bafundjile’shi: “Abrahame nsheetu, nta nku bikitshino kubayikeele mutundulwe bu mululame, pabadi mwan’aye Isaake pa kilambwilo su? Botundula’shi lukumiino lwaye lubafubanga pamune na bikitshino, na’shi bikitshino mbikumbashe lukumiino.” Shake ashinkamisha dingi’shi lukumiino lushi na bikitshino lwi bisumanga, pa kwamba’shi: “Byabidi’shi, mbidi ishii na muuwa ngifwe, mbyabidi dimo’shi: lukumiino lushii bikitshino ndufwe.”​—Shake 2:21-23, 26.

9, 10. Kwikala na lukumiino mwi Mwana akupushisha kinyi?

⁹ Kunyima kwa bipwa 30, Yowano bafundjile Evangile na ingi mikanda isatu. Nka bu bangi bafundji ba Bible, Yowano baadi mupushe akipatuula lukumiino. Misusa ibungi mu bifundwe byaye, Yowano mmufube na bishima bya kina Greke byabadi baluule ingi nsaa mu edimi dya Anglais bu “kwikala na lukumiino.”

¹⁰ Bu kileshesho, Yowano baadi mupatuule’shi: “Akumiina Mwana ee na muwa wa ikalaika; apele kukumiina Mwana taapete muuwa, anka nsungu y’Efile Mukulu ayishaala paadi.” (Yowano 3:36) Bwa kwikala na lukumiino mwi Mwana, abitungu tukookyele Yesu. Byabya, kubanga ku bifundwe bya Yowano, atusangana’shi Yesu baadi mwakule misango ibungi’shi bwa kupeta muwa wa ikalaika, abitungu twikale na lukumiino mwadi na mwi Nshaye.​—Yowano 3:16; 6:29, 40; 11:25, 26; 14:1, 12.

11. Twi kuleesha lutumbu kwi Yehowa p’atwe kuuka bya binyibinyi naminyi?

¹¹ Yehowa bafubiishe kikudi kyaye kiselele bwa kwitukwasha bwatudya kupusha bya binyibinyi pa bimutale na pabitale Mwan’aye na kwitukwasha bwatudya kwikala na lukumiino mwabadi. (Badika Luka 10:21.) Twi kuleesha lutumbu lwetu kwi Yehowa bwa byooso byadi mwitukitshine naminyi? Twi kukita bino pa kutungunuka na kumutumbula bu byadi mwitukwashe bwatudya kwikala mu kipwano naye ku bukwashi bwa Yesu, mwikale “nsulo ya lukumiino na elufishaa ku bupwidikye bwalo.” (Beena-Ebelu 12:2) Na dingi abitungu tuyididiile na kunyingisha lukumiino lwetu pa kwikala na kyubishi kya kwela nteko kwi Yehowa na kwilongyela Eyi dyaye.​—Beena-Efeso 6:18; 1 Mpyeele 2:2.

12. Su twi na lukumiino, abitungu tukite kinyi?

¹² Abitungu twikale atuleesha mu bikitshino byetu’shi twi na lukumiino lwi bukopo mu milayilo ya Yehowa. Bu kileshesho, tuyididiile na kulungula bantu pabitale Bufumu bw’Efile Mukulu na kwibakwasha bwabadya kufika balongi ba Yesu. Tuyididiile dingi na ‘kukitshina bantu booso myanda ibuwa, kibinkibi bakwetu mu lukumiino.’ (Beena-Ngalatea 6:10) Na twitatshishe nyi ngofu bwa “kufuula muntu a kala na bikitshino byaaye” mwanda tatukumiina kutadiila kintu su nkimune bwakidya kulwisha bukuuku bwetu na Yehowa.​—Beena-Kolose 3:5, 8-10.

13. Kwikala na “lukumiino mwi Efile Mukulu” kwi na muulo kinyi? Bible etupatulwila lukumiino naminyi, na bwakinyi?

¹³ Bible amba’shi: “Kushii lukumiino bibukopo kusangasha Efile Mukulu; mwanda abitungu’shi yawa efubwila kwi Efile Mukulu akumiine’shi e kudi na’shi aye ngi afutaa baaba abamukimbi.” (Beena-Ebelu 11:6) Bible etulongyesha dingi’shi kintu kya kumpala akitungu’shi beena Kidishitu ba binyibinyi bekale nakyo nyi “lukumiino mwi Efile Mukulu.” Mwanda alo nyi “kibangilo” kyetu. (Beena-Ebelu 6:1) Panundu pa lukumiino, abitungu twikale na ingi ngikashi i na muulo bwatudya  kwikala mu kipwano na Yehowa na kwikilama.​—Badika 2 Mpyeele 1:5-7; Yuude 20, 21.

14, 15. P’opwandikisha lukumiino na kifulo, lukumiino lwi na muulo wi naminyi?

¹⁴ Bafundji ba Bible mbateemune kishima lukumiino kukila ingi ngikashi yooso. Bino abileesha’shi lukumiino ngi eyikashi di na muulo ngofu aditungu twikale nadyo su?

¹⁵ Mpoolo baadi mupwandikishe lukumiino na kifulo. Bafundjile’shi: “Sunga nekala na lukumiino lukata, lwalwa alusemuna myengye, su ne mukutwe kifulo, ntshi kintu nya.” (1 Beena-Kodinda 13:2) Yesu bambile’shi “eyi dikile mayi ooso mu mukanda wa Miiya” nkufula Efile Mukulu. (Mateo 22:35-40) Kifulo akitukwasha bwatudya kwikala na ingi ngikashi ayisangasha Efile Mukulu. Bu kileshesho, Bible akula’shi kifulo “akikumiinaa byooso.” Byabya kifulo akiketukwasha bwa kukumiina, sunga kwikala na lukumiino, mu myanda yooso ayitulungula Efile Mukulu mu Bible.​—1 Beena-Kodinda 13:4, 7.

16, 17. Bible akula kinyi pabitale lukumiino na kifulo? Eyikashi kinyi dikile akwabo ku ino ibidi, na bwakinyi?

¹⁶ Lukumiino na kifulo byooso bibidi bi na muulo, na mu Bible mbakambe kwibifunda byooso pamune. Mpoolo baadi mukankamikye bakwabo bwabadya “kufwala ngabo ya lukumiino na kifulo.” (1 Beena-Tesalonika 5:8) Mpyeele bafundjile bino pa mwanda wa Yesu: “Aye anudi bafule kifulo, sunga tanwabandile kumumona; na nukwete kukumiina mwadi.” (1 Mpyeele 1:8) Shake bayipwishe bakwabo bediibwe mwimu’shi: “T’Efile Mukulu musangule bano bekale balanda ku meeso aa ba-pa nsenga bwa kwibeekasha bampeta mu lukumiino na bu bampyaanyi ba Bufumu bwadi mulee bano bamufule su?” (Shake 2:5) Yowano bafundjile’shi mwiya w’Efile Mukulu awamba’shi: “Tukumiine mwi Mwan’ê Yesu Kidishitu na kwifulêna kifulo bu bibetukamikile Kidishitu.”​—1 Yowano 3:23, EEM.

¹⁷ Anka Mpoolo bafundjile dingi’shi: “Byabya, binobino, bino bintu bisatu ngi abishadidiila: lukumiino, lukulupilo, na kifulo; anka kifulo nkikile bino byooso.” (1 Beena-Kodinda 13:13) Mu mafuku aafiki, tatukekala dingi na lukalo lwa kwikala na lukumiino mu milayilo y’Efile Mukulu itale nsenga ipya mwanda ayikekala ipwe kulombana. Atukekala na nshalelo ebuwa bukile abadi baleeshe mu Bible. Anka atukekala nka na lukalo lwa kufula Efile Mukulu na bantu. Byabya, kifulo kyetu bwabo akyende nka na kutama.

18, 19. Mbipeta kinyi bituukye pa mwanda wa’shi mwilo w’Efile Mukulu wi na lukumiino lelo uno? Nnayi mupwandikiile ntumbo bwa luno lukumiino?

¹⁸ Lelo uno bafubi ba Yehowa be na lukumiino mu Bufumu bw’Efile Mukulu na abebukwatshisheena. Na mbefulene munkatshi mwabo. Abakitshi bino mwanda mbatadile bwa’shi kikudi ky’Efile Mukulu kibakunkushe mu nshalelo aabo. (Beena-Ngalatea 5:22, 23) Mbipeta kinyi bituukye? Bakwetu balume na bakashi bakile pa midiyo mwanda mu nsenga ishima be mu butaale na mu buumune mu tukongye twabo. Abimweneka kalolo’shi lukumiino na kifulo ngikashi i na muulo ngofu.

¹⁹ Nka penda bukwashi bw’Efile Mukulu ngi bwitwikashe mu buno buumune. Aye ngi mulombeene ntumbo bwa buno buumune. (Yeeshaya 55:13) Twi na lutumbu lukata kwadi mwanda mmwitupe mushindo wa ‘kwitupaasha muyiile lukumiino.’ (Beena-Efeso 2:8) Yehowa kwete kutungunuka na kukwasha bangi bantu bwabadya kwikala na lukumiino. Kunfudiilo, nsenga yooso ishima ayikekala yuule na bantu bapwidikye, balulame, na be na muloo abakatumbisha Yehowa bwa ikalaika!