Nshami John Mills baadi mubatshishibwe mu 1913, mu kibundji kya New York City pabaadi na bipwa 25. Mukwetu Russell nyi bakitshine mwisambo wa lubatshisho. Mafuku apeela kunyima, Nshami bayile ku Trinidad, kubaadi mukebakile Constance Farmer, mulongi a Bible sha kishima. Yaaya bakwashishe kuuku aaye William R. Brown bwa kulesha “Photo-Drame a Bupangi.” Abaadi bakite byabya mpa na pababatumine mukwetu William R. Brown mu Afrike a Kupona nguba mu 1923. Yaaya na Taabo, boso abaadi bedibwe mwimu, na abatungunukile na kufuba mu Trinidad.

Baledi betu abaadi betutande kitema, mwana a kumpala nyi Rutherford yawa baadi bu mukunkushi a Watch Tower Bible and Tract Society. Mwana a kabidi nnami, natandjikilwe mu 30/12/1922, bangudika eshina dya Clayton J. Woodworth, yawa batushile jurnale a L’Âge d’Or mu Anglais (abetamina lelo uno bu Réveillez-vous !). Baledi betu abaadi betulongyeshe kalasa, kadi abadi betunyingishe bwa kwata mpàngo ya mu kikudi. Taabo baadi na ngobesha ya kupushisha bantu Bifundwe, mwanda baadi na kinangu ki kasha. Yaaya baadi etulondela miisambo ya kala ya mu Bible, baadi akitshi ma jeste na mbidi yaye yoso bwa kwitulesha bibaadi myanda ikitshikye.

Kwitatshisha kwabo kubatushishe bipeta bibuwa. Basatu ba kwatudi’twe bana balume abayile ku Kalasa ka Gileade. Bakwetu bakashi basatu abaadi bafube bu ba mbala-mashinda mu Trinidad na mu Tobago munda mwa bipwa bibungi. Ku bukwashi bwa malongyesha na kileshesho kyabo kibuwa, baledi betu abaadi betukune mu “nshibo ya Yehowa.” Mayi aabo a kwitukankamika abaadi etukwashe bwa kushala na kutama “mu nshibo y’Efile Mukulu.”—Mis. 92:14.

Kwetu ku nshibo nyi kubabadi abalumbulwila mudimo wa bulungudi. Ba mbala-mashinda abaadi abebungila kwakwa na abaadi abesamba bwa mukwetu George, nsongwalume  misionere baadi mwende mu kutala tukongye twa ku Trinidad. Baledi bande namu abaadi abakula bwa mukwetu Browns baadi mu Afrike a kupona nguba aa mafuku. Bino byoso bibantakwile bwa kubanga kulungula mukandu wibuwa panaadi na bipwa ekumi.

Aa mafuku, jurnale yetu ibaadi ayakwila patoka madimi a bipwilo, lwabi lwa ba nsunga, na kutshiba kwa milomo mu myanda ya politike. Kadi, mu 1936, bakata ba bipwilo abashishikiile guvernere a mu Trinidad bwadya kukandika mikanda yoso ya Watch Tower. Atwe nkwiyifwamisha, kadi tubatungunukile nka na kufuba nayo mpa na pabayipwile. Tubaadi atutambuka na kulambukisha na ma plankarte, masaki a lwitamino, na ma nkinga. Pamune na myotoka i na bikolo ibaadi ayifiki ku kibundji kya Tunapuna, tubadi atwende na ku ma mbalo e kula a mu Trinidad. Bibaadi buwa byabya! Bino byoso bibaadi binyingishe bwa kubatshishibwa panaadi na bipwa 16.

Kifuko kyetu, na ino myanda yoso, bibantakwile bwa kusankila mudimo wa bu misionere. Naadi nka na malaka a kwenda bu misionere mpa na panayile ku Aruba kubaadi mukwetu Edmund W. Cummings mu 1944. Tubaadi na muloo wa kwibunga na bantu 10 ku Kitentekyesho mu 1945. Kipwa kibalondele, kakongye ka kumpala mu kyakya kisangi kabatukile.

Mafuku apeela kunyima, nalambukishe mwina mudimo nami Oris Williams mu mpukapuka. Oris nkubanga kwakwila myanda ibabadi bamulongyeshe mu kipwilo kibaadi. Mu kwenda na kulonga Bible, bakumiinyine abyamba Eyi dy’Efile Mukulu na aye nkubatshishibwa mu 5/1/1947. Kunyima tubaadi befulene na atwe nkwiyibakishena. Aye nkubanga kufuba bu mbala-mashinda mu mweshi w’Ekumi na wa kabidi 1950. Panebakiile Oris, nshalelo ande balumbulukile dingi.

Mu 1955 abetwitamiine ku kalasa ka Gileade. Patubaadi atwilumbuula bwa kwenda ku Gileade, ami na Oris tubalekyele midimo yetu, atwe nkuudisha nshibo na bingi bintu byetu, atwe nkwenda ku Aruba. Mu 29/7/1956, atwe nkupudisha mu kalasa ka 27 ka Gileade na abo nkwitutuma mu Nigeria.

P’abaadi atentekyesha, Oris baadi amba’shi: “Kikudi kya Yehowa nkilombene kukwasha muntu bwa kulumbuula mweneno aaye pabitale bipungo bibukopo na bya muloo bya mu mufubo wa bu misionere. Kushi bukwashi bwa mulume ande, ntshinadya kukumiina mudimo wa bu misionere nya. Nadya kwikala kwande ku nshibo, natanda bana. Nashintulwile binangu byande panamwene’shi, abitungu kulungula mukandu wibuwa kushii kunyengakana. Pabatupwile kalasa ka Gileade, naadi na muloo wa kufuba bu misionere. Pabatutwelele mu mashuwa a mema, Queen Mary, Worth Thornton, baadi afubu mu biro bya mukwetu Knorr, betwabikishe lwendo lwibuwa! Betulungwile’shi atukafubu ku Betele. Ami nkwamba’shi ‘Ah, nya!’ Ami nkwiyikisha. Kadi nashintulwile binangu byande mususa umune, ami nkufula Betele na kwakwa naadi na midimo ibungi. Umune wa ku midimo inaadi mufule kwanka nyi nkufuba bu muntu akukilaa bantu. Ne mufule bantu, na mu uno mudimo naadi nemonena ngofu na bakwetu ba mu Nigeria. Bangi abaadi abafiki na butshiafu, bakokye, na nsala, na nyota. Naadi na muloo wa kulombasha nkalo yabo pa kwibapa bya kudya na kwibanyingisha. Yoso mmidimo i selele ya Yehowa, na yaya midimo nyi ibaadi ayimpa muloo.” Eyendo mudimo ooso ubaadi awitukwasha bwa kwenda kumpala.

Pabatudi bebungye na kifuko kyetu mu 1961, mu Trinidad, mukwetu Brown betulondele myanda ibaadi mufumankane nayo mu Afrike. Ami nkwibalondela namu myanda ibatudi bafumankane nayo mu Nigeria. Mukwetu Brown nkunganya kiipa na kifulo kyoso na alungula Yaaya’shi: “Johnny, kasha toyile mu Afrike, kadi Woodworth tabemuyile!” Yaaya nkwamba’shi: “Ididila nka byabya Worth! Tungunuka!” Byabya bishima bya kunyingisha, abifiki kwi bafubi ba Yehowa banyingye mu kikudi, bibaadi binkwashe bwa kutamisha lukalo lwande lwa kulombasha mudimo wande kalolo.

Mu 1962, napetele dingi mwabi wa kwenda ku kalasa ka 37 ka Gileade, ka myeshi Ekumi. Mukwetu Wilfred Gooch na mukunkushi a komite a filiale a mu Nigeria, abatwelele mu kalasa ka 38 abo nkwibatuma mu Angleterre. Abo  nkuntuula bu mukunkushi a filiale a Nigeria. Bu binadi nalondo kileshesho kya mukwetu Brown, natambukile ngofu mu Nigeria bwa kuuka na kufula bakwetu ba mu Nigeria. Sunga’shi ta babaadi na bintu bibungi bi nabyo bantu be mu maumbo e na bupeta, muloo wabo na binangu bya kusanka penda na byabadi nabyo, bibaadi bileshe patoka’shi, tabitungu nka kwikala na makuta sunga bintu bya ku mbidi bibungi bwa kwikala na nshalelo a muloo nya. Pa ntala nshalelo aabo, bibaadi abinsankisha pa kwibamona na mankenda, na bafwale kalolo ku bisangilo. Pababadi abende ku bikongeno, bebungi abaadi abafiki mu myotoka ikata na mu ma bolekaja * (myotoka i mwasa mu mpese yabakitaa mu Nigeria). Ku ino myotoka abaadi bekufunde mayi abaadi aakanyisha. Abaadi bekufunde’shi: “Ekopola dimune dimune dya mema di kufwisha kalunga kashima ka mema.”

Aa mayi abaadi aakula ky’eyendo. Ka bukome kapela ka muntu ese ke na muulo; atwe tubalombeshe ketu. Mu 1974, Nigeria bekele eumbo dya kumpala dya ku maumbo e pasha pa États-Unis dibalombeshe balungudi 100 000. Mudimo ubaadi wende kumpala!

Mu kino kipungo kibaadi bantu bebungi abafiki mu ndumbulwilo, nyi mubabangile ngoshi ya bisamba ya mu Nigeria kubanga mu 1967 na mu 1970. Munda mwa myeshi, bakwetu ba ku Biafran, adyaa eshiya dya Mwela wa Niger abaadi bebatshibe na filiale. Bibaadi abitungu’shi twibatwadile bidibwa bya mu kikudi. Nka bu byatwibileshanga ku mbangilo, ku bukwashi bwa nteko na kukulupila mwi Yehowa, tubasabukile misusa ibungi.

Nkyatentekyeshaa yaya nyendo ya masaku ya kwabuka mwela wa Niger, kupanda ku basalayi abaadi na nsungu, maladi na ingi nkalakashi. Bibaadi bukopo bwa kufika kwi basalayi b’eumbo kadi bibaadi masaku kufika kwi basalayi ba ntomboshi abaadi bushiya bwa Biafran. Ungi mususa bufuku, nasabukile mbalo ayikidi Mwela wa Niger na mpumo, na ka bwato kabetamina bu canot kukatuka ku Asaba na ku Onitsha bwa nkanyingisha mukunkushi a kifunda ku Enugu. Lungi lwendo lubaadi lunyingishe bakulu ba ku Aba, abaadi mu mbalo ibabadi bakandjikye’shi tabakwimutembesha kaalo ku kyolwa. Ungi mususa, ku Port a Harcourt tubaadi batshibe bisangilo byetu bukidibukidi na luteko, pabaadi basalayi b’eumbo batuukye basalayi ba ntomboshi ba ku Biafran ngoshi.

Mu bino bisangilo, bibaadi na muulo bwa kushinkamiisha bakwetu’shi, Yehowa kwete kwibapasukila na kifulo kyoso, na kwibapa malango aatungu bwabadya kupela kutwelakana mu myanda ya ngoshi, na bwabadya kwikala mu buumune. Bakwetu ba mu Nigeria abaadi bobeshe kupela kutwelakana mu yaya ngoshi. Abaadi na kifulo kibaadi kitabukile mushikwa wa bisamba, na abaadi balame buumune bwa bwina Kidishitu. Nyi mwabi ukata wa kwikala nabo mu kyakya kipungo kya nkalakashi!

Mu 1969, mukwetu Milton G. Henschel baadi mukunkushi a Kikongeno kya Nsenga ishima kibaadi na mutwe wa mwanda awamba’shi: “Kufukama pa nsenga,” mu kipalwe kya mu Yankee, mu New York, nalongyele myanda ibungi kwadi bu binadi mukwashi aaye. Ino myanda neyilongyele pa nsaa ilombane mwanda, mu 1970 tubatwelele kingi Kikongeno kya Nsenga ishima mu Nigeria mu Lagos, kibaadi na mutwe wa mwanda awamba’shi: “Bantu baadi mukumiine.” Bu byakibadi kikitshikye nka mafuku apeela kunyima kwa ngoshi ya bisamba, tubaadi bekyobeshe penda ku bukwashi bwa Yehowa. Bibaadi mwanda wa kukaanya mwanda tubekikitshine mu ndimi 17, na bungi bwa bantu abemutwelele bubadi 121128. Mukwetu Knorr na Henschel na bangi benyi abafikile ku États-Unis na ku Angleterre, abamwene lumune lwa ku mbatshisho ikata ya bena Kidishitu kubanga mu Pantekote—bantu bapya 3 775! Kukwasha bwa kulumbuula kino kikongeno, kubaadi mudimo ukata kwandi. Bungi bwa balungudi bubaadi abwende na kufwima lubilo!

Munda mwa bipwa 30 binadi mukite, napetele mwabi wa kufuba ingi nsaa bu mukunkushi a kifunda mu Nigeria, na bu mukunkushi a zone mu Afrike a kupona nguba. Ba misionere abaadi na lutumbu lukata bwa kunyingishibwa kubabadi bapete ku muntu na muntu! Na tubaadi na muloo ukata wa kwibashinkamiisha’shi ta mbebalube nya. Uno mudimo ubankwashishe bwa kuuka’shi, kupasukila muntu pa bupenka,  kwi kumukwasha bwa kwenda kumpala, kulama bukome bwaye na buumune bwa ndumbulwilo a Yehowa.

Na bukwashi bwa Yehowa, tubapetele mushindo wa kukambila nkalakashi na mikumbo ibabadi bafwishe kwi ngoshi ya bisamba. Tubamwene myabi ya Yehowa. Oris bambile’shi:

“Mukumbo wa maladiya ubaadi witukwate misusa ibungi. Ungi mususa, Worth batwelele mu lupitalo mu Lagos mushimishe binangu. Abandungwile’shi tapanda, kadi aye nkupanda! Pabamwalukile binangu, badi mwisambe na munganga badi amulama pabitale Bufumu bw’Efile Mukulu. Kunyima, tubayile na Worth mu kutala yawa munganga, Nwambiwe bwa kutamisha lukalo lwaye lwa kupusha abyamba Bible. Badi mukumine bya binyibinyi na aye nkufika mukulu mu Aba. Nadi mufikye mu kukwasha bantu be bungi, mpa na ba mizilma ba kishima, bwabadya kufika bafubi ba Yehowa belambule. Kadi tubaadi na muloo ukata wa kuuka na kufula bantu ba mu Nigeria, bipikwa, na ludimi lwabo.”

Dingi dilongyesha ndino: Bwa kwenda kumpala mu mudimo wetu kwabene, tubaadi na kya kufula bakwetu boso sunga bekala na bipikwa bilekene na byetu.

Kunyima kwa kufuba ku Betele a mu Nigeria, mu 1987 tubapetele ungi mudimo upya wa kwenda bu ba misionere mu St. Lucia mu Caribbean, kisangi kibuwa bukile. Ubaadi mudimo wi buwa bukile, kadi ubaadi na yao nkalakashi. Mu kwilekena na mu Afrike mwabakumiina’shi mulume umune ebakile bakashi bebungi, kuno ku St. Lucia, mulume na mukashi be kushala bisumanga kushi kwiyibakishena muyile miiya. Bukome bw’Eyi dy’Efile Mukulu bubatakwile bangi balongi betu ba Bible bwabadya kushintuluka.

Bu bibaadi bukome bwetu abwende na kupeela mwanda wa kukula, Kasaka ka Bakunkushi Bakulu kabadi ketutume ku Biro byetu bikata bya nsenga ishima ku Brooklyn, mu New York, mu U.S.A., mu 2005. Natumbulaa Yehowa efuku dyoso bwa Oris. Bafwile mu 2015, napushaa bushiye ngofu. Baadi mwina mudimo nami mukata, mukashi sha kifulo na mufudiibwe. Naadi mumufule efuku dyoso munda mwa bipwa 68 bibatushala pamune mwiyibakishi. Tubamwene’shi bwa kwikala na muloo, mwiyibakishi na mu kakongye, abitungu kunemeka baba abakunkusha, kufwila bangi lusa, kwikala mwiyishe, na kulesha kikuba kya kikudi.

Pababadi abetulwishisha sunga kwitubofusha, tubaadi atutekye Yehowa bwa’shi etukwashe tutungunukye na kumufubila. Bu bibatudi atutungunuka na kushintuula mweneno a myanda, tubamwene’shi myanda yoso ibaadi ayende nka kalolo nsaa yoso—na myanda ikile buwa ikii kumpala!—Yesh. 60:17; 2 Kod. 13:11.

Mu Trinidad na mu Tobago, Yehowa baadi mwelele mufubo wa baledi bande na wa bangi myabi, mwanda muyile rapore ipya, takudi balungudi 9 892. Mu Aruba, bakwetu bebungi mbafube bwa kunyingisha kakongye kanaadi kumpala. Mu kyakya kisangi tamudi tukongye 14 atwende kumpala. Mu Nigeria, bungi bwa balungudi mbukamine bwafika 381 398. Na mu kisangi kya St. Lucia, mwi balungudi 783 bakwete kukwatshishena Bufumu bwa Yehowa.

Binobino ne mu bipwa 90. Mukanda wa Misambo 92:15 awakula bwa baaba bakunyibwe mu nshibo ya Yehowa’shi: ‘Sunga banunupa ngofu, abanyisha kupa bikuba, bashale babishi, basapile.’ Ne na lutumbu lukata bwa nshalelo anyikele naye mu mufubo wa Yehowa. Bupeta bwa kwikala mwina Kidishitu bunaadi mupete, mbunkwashe bwa kufubila Yehowa bikata. Mu kifulo kyaye, Yehowa mmunkwashe bwa ‘kumena mu kishikamino ky’Efile Mukulu [ande].’—Mis. 92:14.