Mu 2 Beena-Kodinda 12:2, 3, Mpoolo badi mwakwile ungi muntu badi “musemunyiibwe nyaa na kwiyilu dyaa-kasatu.” Badi nnanyi? Mpoolo pabadi mufundjile kakongye ka ku Kodinda, bashinkamishe’shi, Efile Mukulu badi afubu naye bu mutumibwa. (2 Beena-Kodinda 11:5, 23) Batemwine dingi “bimonwa na bifumbulwe bya Mwanana.” Mu uno mwisambo Mpoolo tabadi mutemune bangi bakwetu nya. Byabya, badi esambila aye nabene bu muntu badi mupete bimonwa na bifumbulwe.—2 Beena-Kodinda 12:1, 5.

Byabya Mpoolo nnaye baadi “musemunyiibwe nyaa na mu mpaladiiso.” (2 Beena-Kodinda 12:2-4) Atemuna mwaku “bifumbulwe,” bwa kulesha’shi babadi bamulungule myanda ayikakitshika mu mafuku e kumpala.

Nkinyi kibabamwene kwi Mpoolo bu “eyilu dya kasatu”?

Mu Bible, “eyilu” adilesha dino eyilu dyatumonaa na meso. (Kibangilo 11:4; 27:28; Mateo 6:26) Anka “eyilu” mbeditemune dingi bwa kulesha ungi mwanda. Ingi nsaa adilesha bukunkushi bwa bana ba bantu. (Ndanyele 4:20-22) Sunga kulesha bukunkushi bw’Efile Mukulu, ku bukwashi bwa Bufumu bw’Efile Mukulu.—Kibafumbwilwe 21:1.

Mpoolo bamwene “eyilu dya kasatu.” Badi akyebe kulesha kinyi? Ingi nsaa mu Bible abalukilaa mwanda misusa isatu bwa kwiushinkamisha. Abimweneka’shi Mpoolo pakwila “eyilu dya kasatu,” badi akwila bukunkushi bwi kunundu ngofu—Bufumu bwa Mesiya bwabakunkusha kwi Yesu Kidishitu na bantu 144 000. Anka bibafundjile Mpyeele mutumibwa, atutengyela “eyilu dipya” muyile mulayilo w’Efile Mukulu.—2 Mpyeele 3:13.

Twi balombene kwakula kinyi nsaa ayakula Mpoolo pabitale “mpaladiiso”?

Mwaku “mpaladiiso” ngulombene kulesha bintu bilekene: (1) Bwa kulesha mbalo ya kumpala ibabatudile muntu, “mpaladiiso” mmukumbene kulesha nsenga ayikekala Mpaladiiso mu mafuku e kumpala. (2) Mmulombene kulesha nshalelo a mu kikudi akekala naye bafubi b’Efile Mukulu mu nsenga ipya. (3) Dingi, mmukumbene kulesha nshalelo ebuwa mwiyilu, “mpaladiiso a Efile Mukulu” abadi baleshe mu Kibafumbwilwe 2:7.—Tala Kitenta kya Mulami, 15/7/2015, esk. 8. kik. 8.

Abimweneka kalolo’shi Mpoolo badi akwila mishindo yoso isatu i mu 2 Beena-Kodinda 12:4 nsaa yakwila myanda ibamwene.

Mu kikoso:

“Eyilu dya kasatu” di mu 2 Beena-Kodinda 12:2 nyi Mbufumu bwa Mesiya bwi ku masa a Yesu Kidishitu na bantu 144000, “eyilu dipya.”—2 Mpyeele 3:13.

Nyi “eyilu dya kasatu” mwanda Bufumu bwi kunundu kwa byoso, bukunkushi bukamine.

“Mpaladiiso” mubabadi “basemune” Mpoolo mu kimonwa mmutale (1) Mpaladiiso amweka na meso ekala pa nsenga, (2) mpaladiiso a mu kikudi akekala kwanka, ayikala mukata kukila mpaladiiso a mu kikudi e kwanka binobino, na (3) “mpaladiiso a Efile Mukulu” mwiyilu akekala kwanka pamune na nsenga ipya.

Byabya, ndumbulwilo mupya akabungu eyilu dipya na nsenga ipya. Ayikala mpango ipya, isangye mbulamatadi a Bufumu bwa mwiyilu na bantu abafubila Yehowa mu mpaladiiso pa nsenga.