1, 2. Mwanda wa Tony aulesha naminyi’shi mbibofule bwa kushintuula myanda mu nshalelo?

TONY mmukule kushi nshaye. Badi mulongi a ku kilongyelo kikata, anka tabadi atulu binangu byaye ku kalasa nya. Badi na lukalo lwa kutshibisha kalasa mwishinda kushi kupeta diplome. Mu dya mpooso, Tony badi ende mu kutala ma filme sunga kukisha nsaa na bakuku baye. Tabadi n’etombo sunga mu bupika bwa bintu abikolanaa, anka tabaadi na kepatshila mu muwa waye nya. Tabadi sunga akumina’shi Efile Mukulu ekwanka. Dingi efuku, Tony bafumankene na ba Temwe ba Yehowa, aye nkwibelesha mpaka yadi nayo pabitale Efile Mukulu. Babamupele broshire yetu ibidi bwashi abadikye—La vie a-t-elle été créée ? na Cinq questions à se poser sur l’origine de la vie.

² Ungi mususa ubafikile mu kutala Tony, binangu byaye bibashintulukile ngofu. Badi mubadikye ma broshire oso ngofu mu mushindo ubabadi batshobolokye. Tony bebalungwile’shi: “Efile Mukulu e kwanka.” Babangile kulonga Bible, na ku kapelakapela bashintulwile mweneno aye. Kumpala kwa’shi abangye kulonga Bible, Tony tabadi mulongi ebuwa ku kalasa nya, pababangile kulonga, bafikile umune a ku balongi bakile buwa ku kalasa kaabo! Mpa na mukata a kalasa bakanyine. Balungwile Tony’shi: “Boshintuluka ngofu mu bikitshino na mu mwikelo obe. Mpa mwanda okwete kwibunga na ba Temwe ba Yehowa su?” Tony bambile’shi nnabyo, na aye nkumulungula  myanda yadi mulongye. Bapwile kalasa kaye ku kilongyelo kikata na lelo uno taadi mbala-mashinda a myeshi yoso na mmufubi a midimo. Tony e na muloo ukata mwanda binobino bapete Nshaye a kifulo, Yehowa!—Misambo 68:5.

3. Yehowa apa ba nsongwa elango kinyi?

³ Mwanda wa Tony awitutentekyesha’shi Yehowa apasukilaa ba nsongwa. Akumina’shi wekale na nshalelo ebuwa na a muloo, nyi bwakinyi akupa elango dya’shi, “tentekyesha Mupangi ôbe [mukata] pokí nsongwalume.” (Mulungudi 12:1, EEM) Bino t’abikalaa bibofule nya, anka tabibukopo. We mulombene koobesha mu nshalelo obe ku bukwashi bw’Efile Mukulu pokii mukinga na p’okakulu. Bwa’shi tupushe uno mwanda kalolo, atukatalula kibadi kikwashe bena Isaleele bwa kupeta Nsenga ya Mulayilo na kibapele Daavide bukome bwa kutshokola Golyate.

4, 5. Ndilongyesha kinyi dikata dyatupete ku mushindo ubadi bena Isalele batshokole bena Kanana na mushindo ubadi Daavide mutshokole Golyate? (Tala kifwatulo ki ku mbangilo.)

⁴ Pabadi bena Isalele pepi na kutwela mu Nsenga ya Mulayilo, mmayi kinyi a kulonda abebapele Yehowa? Bebalungwile bwabadya kwikala basalayi bebuwa ngofu sunga kwibalongyesha bya kulwa ngoshi su? Nya! (Miiya Ikituulwe 28:1, 2) Bebalungwile bwabadya kumukokyela na kukulupila mwadi. (Yooshwa 1:7-9) Dino elango tadibadya kwikala na muulo ku meso a bantu nya, anka dibadi elango dikile buwa bwa bena Isalele. Bwa ungi mususa, Yehowa bakwashishe mwilo waye bwaudya kutshokola bena Kanana. (Yooshwa 24:11-13) Bwa kukokyela Efile Mukulu abitungu kwikala na lukumino, anka lukumino alukwashaa muntu bwa koobesha. Bibadi nka byabya mu mafuku a kala bi nka byabya mpa na lelo uno.

⁵ Golyate badi kilobo kya ngoshi. Badi bula bwa pepi na metre asatu, na badi mutwale bina ngoshi bi masaku. (1 Samwele 17:4-7) Daavide namu, badi na ndundo a tonyi na lukumino lwaye mwi Efile Mukulu. Muntu shi na lukumino mmukumbene kupwandikisha’shi Daavide badi mukutwe binangu pa kukimba kulwa na Golyate! Anka mu kwakula kwa kalolo Golyate nyi baadi mukutwe binangu.—1 Samwele 17:48-51.

6. Nkinyi kyatwisambila mu uno mwisambo?

⁶ Mu mwisambo ushale, tumwene bintu binanka bikumbene kwitwikasha na muloo wibungi na kwitukwasha bwa koobesha mu nshalelo etu. Tulongyele’shi bibuwa tulombashe nkalo yetu ya mu kikudi, twikale na ba kuuku bebuwa bafule Efile Mukulu, twate bipatshila bibuwa, na kwata bulungantu abwitupa Efile Mukulu na muulo. Mu uno mwisambo, atwisambila mishindo ibungi yatudi balombene kupeta bukwashi su tubakitshi bino bintu bibuwa. Bwa kwibikita, tubandeyi kutaluula angi mayi a kulonda e mu Misambo 16.

7. (a) Lesha abikalaa muntu mulamate ku myanda ya mu kikudi? (b) Nkinyi kibadi bu “bupyaanyi” bwa Daavide, na bino bibadi na bukitshishi kinyi kwadi?

⁷ Muntu mulamate ku myanda ya mu kikudi ekalaa na lukumino mwi Efile Mukulu na akimbaa bya kumona myanda abiyimono Efile Mukulu. Alekyelaa Yehowa bwa kukunkusha muwa waye na e na kitshibilo kya kumukokyela. (1 Beena-Kodinda 2:12, 13) Daavide nkileshesho kibuwa kya muntu mulamate ku myanda ya mu kikudi. Bayimbile’shi: ‘Yehowa mbupyaanyi bwande.’ (Misambo 16:5) Daavide badi na lutumbu bwa “bupyaanyi” bwaye, kipwano kyaye kikata n’Efile Mukulu, na badi mufwamine mwadi. (Misambo 16:1) Pa mwanda wa byabya, badi mukumbene kwamba’shi: “Kikudi kyande akisanguluka.” Takwi kintu kibadi kipe Daavide muloo ukata kukila kipwano kyaye na Yehowa!—Badika Misambo 16:9, 11.

8. Mbingi bintu kinyi bikumbene nkupa muloo mu nshalelo?

⁸ Bantu batule binangu byabo ku makuta sunga mu kukimba kwikala na muloo ta mbalombene kupeta muloo wi mumune na ubadi nao  Daavide nya. (1 Timote 6:9, 10) Ungi mukwetu a mu Canada bambile’shi: “Muloo wa kumpala tautukilaa ku kyatudi bakumbene kupeta mu nshalelo etu nya, anka autukila ku kyakya kyatupa yawa Etupeyaa bintu byoso bibuwa, Yehowa Efile Mukulu.” (Shake 1:17) Su bolesha lukumino lobe mwi Yehowa na kumufubila, wekala na nshalelo ebuwa na a muloo. Byabya, nkinyi kyodya kukita bwa kwikala na lukumino lwi bukopo? Abitungu wekale okisha nsaa pamune na Yehowa pa kubadika kwa Eyi dyaaye, kutala bintu bibuwa byadi mupangye, na kutula binangu ku ngikashi yaye, mpa na ku kifulo kyadi noobe.—Beena-Looma 1:20; 5:8.

9. Mmushindo kinyi odya kutadila Eyi dy’Efile Mukulu bwa’shi dikukunkushe?

⁹ Ingi nsaa Efile Mukulu etuleshaa kifulo kyaye nsaa y’etunyooko pakudi mushindo nka abikitaa nshe bana e na kifulo. Daavide badi mwate dino dinyooka na muulo aye nkwamba’shi: “Naatumbula Yehowa ampeeyaa binangu biibuuwa; sunga bufuku, eshimba dyande adibadiila kundimusha.” (Misambo 16:7) Daavide badi munangushene ku binangu by’Efile Mukulu aye nkwibikasha bu byaye. Badi mutadile binangu byaye bwa’shi bimukunkushe, nyi nkwamba’shi, badi mwibitadile bwashi bimushintuule bwadya kwikala muntu ebuwa. Su bokitshi byabya, kifulo kyobe bw’Efile Mukulu na lukalo lobe lwa kumusangasha alutama, na wekala mwina Kidishitu munyingye. Mungi mukwetu mukashi abetamina bu Christin amba’shi akimbulaa na kunangushena ku byabadika, apusha’shi Yehowa mmufundjishe bino bintu penda bwaye!

10. Myiile byatulongo mu Yeeshaya 26:3, kwikala na binangu bya mu kikudi akukukwasha naminyi?

¹⁰ Su we na binangu bya mu kikudi, okamono uno ndumbulwilo na myanda ayifiki kumpala abiyimonaa Efile Mukulu. Yehowa akupa kino kyukilo na na kapatupatu kakata. Bwakinyi? Akumina’shi oukye kyakya ki na muulo mu nshalelo, bwa kwata bitshibilo bibuwa, na kutengyela myanda ayifiki kumpala kushi kutshina! (Badika Yeeshaya 26:3.) Mungi mukwetu abetanyinaa bu Joshua, mushalele mu États-Unis, amba’shi su boshala pepi na Yehowa, okamono kalolo ki na muulo na kishi na muulo.

11. Mushindo kinyi ubadi Daavide musangule ba kuuku baye?

¹¹ Badika Misambo 16:3. Daavide badi auku bya kupeta ba kuuku be buwa. Bakuku babasangwile mbaba babadi bafule Yehowa, na bino bibamupele “muloo ukata.” Bayitamine bakuku baye bu “beselele” mwanda babadi abakimbi bya kulonda miiya i selele ya Yehowa. Ungi mufundji a misambo badi mupushe nka byabya pabitale kusangula bakuuku aye nkufunda’shi: “Nyi kuku a baba boso abakunêmekâ, bakwete abakôkyela makoma [mayi] ôbe.” (Misambo 119:63, EEM) Anka byatumwene mu mwisambo ushaale, nobe namu we mukumbene kupeta ba kuuku bebuwa munkatshi mwa baba bafule na kukokyela Yehowa. Eyendo’shi, twekala penda na ba kuuku balongo nobe nya.

12. Bwakinyi Daavide na Yonatane babadi ba kuuku bebuwa?

¹² Daavide tabadi musangule penda balongo naye bwashi bekale ba kuuku baye nya. We kutemuna mashina a ba kuuku ba Daavide ba p’eshimba su? Pangi we kutemuna Yonatane. Bu kuku bubadi pankatshi pa Daavide na Yonatane mbu kuku bumune bukile buwa bwatubadika mu Bible. Ouku’shi Yonatane badi mukulu a Daavide na bipwa 30? Byabya bwakinyi babadi na bu kuku bwi buwa? Bu kuuku bwabo bubadi bwimene pa lukumino lwabo mwi Efile Mukulu. Babadi abenemekyeshena na kusangeela ingi ngikashi ibuwa, bu kunying’eshimba abo boso abalesheshe kwakwa kunyinga kw’eshimba nsaa ibabalwile na beshikwanyi b’Efile Mukulu.—1 Samwele 13:3; 14:13; 17:48-50; 18:1.

13. We kupeta ba kuuku bebungi naminyi? Tusha kileshesho.

¹³ Anka bu Daavide na Yonatane, twi balombene kupeta “muloo ukata” nsaa yatudi bu kuku na bantu bafule Yehowa na be na lukumino  mwadi. Kiera, mufubile Efile Mukulu munda mwa bipwa bibungi amba’shi: “Ne mudye bu kuuku na bantu ba mu nsenga ishima, bantu batukile mu ma mbalo elekene be na bipikwa bilekene.” Su bokitshi byabya, okemwena mushindo awitubungu Bible na kikudi kiselele mu kifuko kya balangwidi ba mu nsenga ishima.

14. (a) We kwiatshila bipatshila bibuwa naminyi? (b) Bangi ba nsongwa abamba kinyi pabitale bipatshila byabo?

¹⁴ Badika Misambo 16:8. Bwa Daavide, kufubila Efile Mukulu kubadi bu kintu ki na muulo ukata. Su bwambula Daavide nsaa ywata bipatshila na kunangushenanga pabitale kyabakutekye kwi Yehowa, paapa nshalelo obe ekala a muloo. Mungi mukwetu abetamina bu Steven amba’shi: “Panfubu bwa kulombasha kepatshila, nekalombasha, akupu natala myanda inalumbuula, abimpeyaa muloo.” Mungi mukwetu nsongwa a mu Allemagne kwete kufubila mu dingi eumbo amba’shi: “Pankulu ntangalusha binangu kumongo bwa kutala nshalelo ande na kumona byoso byandi mukite bu penda bintale bupenka nya.” Opusha namu byabya su? Byabya, fuba na ngobesha na mayele odi nao bwa kutumbisha Efile Mukulu na kukwasha bangi bantu. (Beena-Ngalatea 6:10) Ata bipatshila mu mudimo wa Yehowa na omutekye akukwashe bwa kwibilombasha. We mukumbene kushinkamisha’shi aluula ku luteko lobe!—1 Yowano 3:22; 5:14, 15.

15. Mbingi bipatshila kinyi byodya kwiatshila? (Tala kashibo akamba’shi: “ Bingi bipatshila bya kwelela binangu.”)

¹⁵ Mbingi bipatshila kinyi byodya kwiatshila? Twi kwamba naminyi pabitale kutusha ngalulo mu bishima byobe’be nabene mu bisangilo? Bwakinyi twe kwiatshila namu kepatshila ka kwikala mbala-mashinda sunga kufuba ku Betele? We kutompa kulonga ludimi lupya bwashi ofube nalo mu bulungudi bwa mukandu wibuwa kwi bantu bebungi. Barak ungi mukwetu nsongwa e mu mudimo wa nsaa yoso amba’shi: “Kubukanga efuku dyoso bwa kupa Yehowa bukome bwande akumpeyaa muloo ushii ulombene kumpa ungi mudimo.”

16. Daavide badi apusha naminyi pabitale miiya ya Yehowa na mayi aaye a kulonda, na bwakinyi?

¹⁶ Badika Misambo 16:2, 4. Anka byatulongyele mu mwisambo ushale, nsaa yatudi na nshalelo alondo miiya y’Efile Mukulu na mayi aaye a kulonda, atwikala na bulungantu bwa binyibinyi. Atulongo bwa kufula  bibuwa na kushikwa bibubi. (Amose 5:15) Daavide bambile’shi Yehowa nyi “Nsulo ya buwa” bwaye. Buwa nyi nkwikala na mwikelo wibuwa. Yehowa ebuwa mu myanda yoso yakitshi, na kintu kyoso kibuwa kyatudi nakyo akifiki kwadi. Daavide bafubile ngofu bwa kwambula Efile Mukulu na kufula bintu byabadi bafule kwi Yehowa. Daavide balongyele dingi bya kushikwa byabya byabamono kwi Yehowa bu bibubi. Kimune kya ku byabya bintu nyi ndulangwilo lwa mankishi, lwikale kulangwila kwa muntu kampanda sunga kintu kampanda pamutwe pa kulangwila Yehowa. Lulangwilo lwa mankishi alulwishaa bantu na, alwata ntumbo ya kupa Yehowa alwiyipa ungi muntu sunga kingi kintu.—Yeeshaya 2:8, 9; Kibafumbwilwe 4:11.

17, 18. (a) Daavide bakwile kinyi pabitale bipeta bibubi abitukila mu lulangwilo lwa madimi? (b) Nkinyi akitakula bantu mu “kwifwimisha malwa”?

¹⁷ Mu mafuku a kala, lusandji lubadi munkatshi mwa lulangwilo lwi bubi. (Osea 4:13, 14) Bantu bebungi babadi bafule lulangwilo lwi bubi mwanda babadi bafule kukita myanda ibutete, kadi lwalwa lulangwilo lubebapele muloo su? Nya! Daavide bambile’shi baba abalangwila b’efile ba madimi “abefwimisha malwa.” Baba bantu babadi abalambula bana babo kwi b’efile ba madimi! (Yeeshaya 57:5) Yehowa badi mushikwe etombo dyabo. (Yeelemiya 7:31) Su bodi mu aa mafuku, bodya kwikala na lutumbu mwanda baledi bobe abalangwila Yehowa!

¹⁸ Lelo uno, bipwilo bya madimi bibungi bikwete kukumina kutambuka kwa lusandji, mpa na kwifikena pepi kwa mulume na mulume, mukashi na mukashi. Nshalelo a kukita myanda ibutete mmulombene kutakula bantu mu kwipusha’shi mbalungantu, anka mu kwakula kwa kalolo “abefwimisha malwa.” (1 Beena-Kodinda 6:18, 19) Bomono uno mwanda su? Byabya, anwe ba nsongwa, teemeshayi Nshenu e mwiyilu. Lesha’shi kukokyela Efile Mukulu kwi na muulo. Nangushena kalolo ku bipeta bibubi abitukila mu kukita myanda ibutete. Okamono’shi miloo ya kapindji kapela ayifwishaa masaku akile bungi. (Beena-Ngalatea 6:8) Joshua atutemunanga kumpala amba’shi: “Twi kufuba na bulungantu bwetu moso mwatukyebela, anka kwibufubisha bibubi takutwalaa muloo nya.”

19, 20. Mmyabi kinyi ayipete ba nsongwa be na lukumino mwi Yehowa na abamukokyela?

¹⁹ Yesu bakwile’shi: “Su nwalama bishima byande, nwi balondji bande eyendo, anuwuku binyibinyi, na binyibinyi abinwikasha bantu balungantu.” (Yowano 8:31, 32) Atutumbula Yehowa, mwanda twi batukye mu bupika bwa bipwilo bya madimi, kabulakanyi, na nkumino ya madimi. Mu mafuku e kumpala atutengyela kupeta “bulungantu na ntumbo bya baana b’Efile Mukulu.” (Beena-Looma 8:21) We mulombene kwikala mu bwabwa bulungantu binobino nsaa yolondo malongyesha a Kidishitu. Mu uno mushindo, “ouku bya binyibinyi” kushi penda nsaa yw’ebilongo kadi podi na nshalelo mwipushene nabyo!

²⁰ Anwe ba nsongwa, sangelayi bulungantu abwinupa Efile Mukulu. Ebufubisheyi kalolo. Abwinukwasha bwa kwata bitshibilo bibuwa binobino, na kwikala na nshalelo ebuwa mu mafuku e kumpala. Ungi mukwetu nsongwa amba’shi: “Kufubisha bulungantu kalolo pokii nsongwa akukakukwasha nsaa yokekala kumpala kwa bitshibilo bikata bya kwata, bu kukimba mudimo wibuwa, kusangula muntu akwiyibakishena naye sunga kubanda kushala bukupi.”

21. Mushindo kinyi odya kupeta “muwa wa binyibinyi”?

²¹ Mu uno ndumbulwilo ebubi, nshalelo abata kwi bantu bu ebuwa mmwipi. Takwi muntu auku abifiki maloba. (Shake 4:13, 14) Byabya kintu kikata kyodya kukita nyi nkwata bitshibilo abikakukwasha bwashi opete “muwa wa binyibinyi”—muwa wa ikalaika mu nsenga ipya y’Efile Mukulu ibuwa. (1 Timote 6:19) Yehowa tatakulaa muntu pa bukopo bwashi amufubile nya. Oso a kwatudi e na kitshibilo kya kwata pabitale kya kukita. Byabya, Yehowa ekale “bupyaanyi” bobe nsaa yw’etatshisha efuku dyoso bwa kwifubwila pepi naye, na kusangela “bintu bibuwa” byoso byakupa. (Misambo 103:5) Shinkamisha’shi Yehowa mmukumbene nkupa muloo wibungi na disanka dya looso!—Misambo 16:11.