DIANA e na bipwa bikile pa 80. Mulume aye badi na mukumbo wabetamina bu Alzheimer na badi mu nshibo ya bantu banunu munda mwa bipwa kumpala kwa’shi afwe. Lufu lwa bana baye babidi lubadi alumukalakasha na badi anyingiila mukumbo wa kansere ka kwibele. Anka, nsaa i bena kakongye ka ba Diana abamumono ku Nshibo ya Bufumu sunga mu bulungudi, abamono’shi e nka na muloo.

John badi mukunkushi a kifunda munda mwa bipwa bikile pa 43. Badi mufule wawa mudimo ngofu—ubadi bu nshalelo aye! Anka, badi mwimikye kufuba mu mudimo wa kifunda bwa kwenda mu kutala mukwabo badi akumbu, na binobino kwete kufuba mu kakongye. Bantu babadi abauku John kala nsaa yabamumono ku kikongeno kya kifunda sunga kya mafuku asatu, abimweneka’shi ta mushintulukye nya. E nka na muloo.

Mbikunyi bikale Diana na John na muloo? Mushindo kinyi ukumbene bangi bakwete kukyenga ku mbidi na mu binangu kushala na muloo? Na mushindo kinyi ukumbene muntu shina dingi mashito abadi asangeela kwikala na muloo? Bible etupa mayi a binangu, amba’shi: “Mululame asangulukile mwi Yehowa.” (Misambo 64:10) Twi balombene kupusha uno mwanda wa binyibinyi nsaa yatutalula akipeyaa muntu muloo mwishimba na kishakimupeyaa wanka.

Ouku binyibinyi’shi, kwi bingi bintu abipeyaa bantu muloo. Banda kunangushena pabitale mulume na mukashi befulene abeyibakishena. Twi kwamba naminyi pabitale kutanda mwana sunga kupeta mashito kampanda mu ndumbulwilo? Bino bintu abipeyaa muntu muloo, mwanda yaya myanda ya mu nshalelo ayitukila kwi Yehowa. Aye nyi bapangile dibaka, kutusha mushindo wa kutanda bana, na kupa bantu midimo mu kakongye ka bena Kidishitu.—Kibangilo 2:18, 22; Misambo 127:3; 1 Timote 3:1.

Anka, ingi nsulo ya muloo ngya kapindji kapela. Mwanda wa malwa, nkwamba’shi mwina dibaka mukumbene kukutwa lulamato sunga kufwa. (Esekyele 24:18; Osea 3:1) Bangi bana mbalombene kupela kukokyela bebatande mpa n’Efile Mukulu pangi batushibwa na mu kakongye. Bana ba Samwele babadi bapele Yehowa, na bikitshino bya Daavide bibadi bimufwishile mpombo mu nshibo yaye. (1 Samwele  8:1-3; 2 Samwele 12:11) Ino myanda ayifwishaa twinyongoshi na nkalakashi. Tayitupeyaa muloo nya.

Bi mumune, mashito abetupeyaa mu ndumbulwilo a Efile Mukulu ngalombene kwimana, pangi mwanda wa kukumba, kifuko, sunga kungi kushintuluka kwa myanda mu ndumbulwilo. Bangi bapete kwakwa kushintuluka, abashinkamisha’shi mbashimishe muloo wabapetanga mu mudimo wabo.

Twi balombene kumona’shi ku lungi lupese ino nsulo ya muloo ina nfudiilo sunga’shi ngya kapindji kapela. Byabya, kwi ungi muloo, ulombene kwikala kwanka sunga apashintuluka myanda ya mu nshalelo su? Bino bibadi bifwile Osea, Esekyele, Samwele na Daavide abadi balame muloo wabo sunga pababadi kumpala kwa nkalakashi.

Yesu badi auku’shi muloo awikalaa kwanka. Pabadi mwiyilu kumpala kwa’shi afikye pa Nsenga, pakubadi nshalelo ebuwa badi ‘asangala efuku dyoso [kumpala kwa Yehowa].’ (Nkindji 8:30) Byabya pabadi pa nsenga kubadi nsaa ibadi afumankana na nkalakashi ibukopo. Sunga mbyabya, Yesu badi apete muloo mu kukita kwa akikyebe Nshaaye. (Yowano 4:34) Twi kwamba naminyi pabitale nsaa yaye ya nfudiilo ya makyenga? Atubadika’shi: “Bakuminyîne kwipaibwa ku [mutshi] kushi kupusha bufu mwanda wa mulô ubadi umutûdilwe kumpala.” (Beena-Ebelu 12:2) Twi na kyatudya kutalula tubingilo tubidi tubadi tutakule Yesu bwadya kwakula pabitale muloo wa binyibinyi.

Pabalukile balongi 70 kwi Yesu kunyima kwabo kukita bulungudi, babadi na muloo mwanda babakitshine midimo ibuwa, mpa na kubinga kwa ba demo. Akupu Yesu bebalungwile’shi: “Tanusangalanga pa mwanda wa’shi bikudi mbinukookyele, anka sepeelaayi bwa pee mashina eenu ngafundjibwe mwiyilu.” (Luka 10:1-9, 17, 20) Eyendo, kibadi na muulo ukata ngofu ta nkupeta mashito kampanda nya, nyi nkukuminyibwa na Yehowa. Badi mukumbene kutentekyesha balongi basha lulamato—akifwishaa muloo ukata.

Ungi mususa, Yesu badi esamba na kibumbu kya bantu. Mungi mukashi mwina Yuuda bakwile’shi nyinaye na uno mulongyeshi mukata, Yesu, e na kya kusanka pa kwikala na mwana e bino. Anka Yesu badi mumutopekye, amba’shi: ‘Leka! baa-sha muloo mbano abateemesha Eyi dy’Efile Mukulu naa abedilama.’ (Luka  11:27, 28) Kwikala muledi e na nfiedi nkwikale bu mwanda wibuwa; anka, kwikala mu kipwano na Yehowa pa mwanda wa kukookyela nyi nkabingilo kakata ka kwikala na muloo.

Eyendo, kukuminyibwa na Yehowa ngi kintu kimune akitupa muloo mwishimba. Bitompwanga, sunga bibubi, ta mbilombene kushimisha kuuka kwa uno mwanda nya. Anka, kwibinyingiila na kululama koso ngi kutshokola akupa muntu eshimba dibatame. (Beena-Looma 5:3-5) Dingi, Yehowa apeyaa bantu bakulupile mwadi kikudi kyaye. Na muloo nkimune kya ku kikuba kya kikudi. (Beena-Ngalatea 5:22) Bino abitukwasha bwa kupusha bwakinyi mukanda wa Misambo 64:10 awamba’shi: “Mululame asangulukile mwi Yehowa.”

Bino abipatula bwakinyi Diana na John, batutemunanga kunundu, babadi nka na muloo nsaa ibabadi abanyingiila nkalakashi. Diana amba’shi: “Ne mutule kifwamino kyande mwi Yehowa, abikitaa mwana na nshaaye.” Mushindo kinyi wapushaa’shi mbamukumine kwi Efile Mukulu? Akumbasha’shi: “Napusha’shi mmungyelele myabi pa kumpa mushindo wa kutungunuka na bulungudi nsaa yoso na muloo ku meso.” John, bu mukunkushi a mushale nka munyingye mu bulungudi kunyima kwa kuleka mudimo wa kukunkusha kifunda ubadi musangele, apatula kintu kimukwashe ngofu’shi: “Kubanga mu 1998 pababadi bantume bwa kwenda mu kulongyesha ku Kalasa kabetamina bu École de formation ministérielle nadi mwilongyele ngofu kukila binadi nelongyela kumpala.” Akula bwaye’ye nabene na mukashi aye’shi: “Mweneno etu oso pabitale kufubila Yehowa munda mwa bipwa bibungi mupunda bukome bwetu mmwitukwashe bwa kubofusha kushintula kwa nshalelo. Twi bebikite kushi kwinyongola.”

Bangi bebungi mbamone kulombana kwa mayi e mu Misambo 64:10. Banda kutala kileshesho kya ungi mulume na mukashi bafube ku Betele munda mwa bipwa bikile pa 30 mu États-Unis. Babadi bebatume bwa nkafuba bu ba mbala-mashinda ba nsaa yooso. Babadi bakumine, abamba’shi: “Muntu oso enyongolaa nsaa yashimisha kintu kyadi mufule,” abamba dingi’shi: “Twe mulombene kwinyongola bwa looso.” Babadi bepane mususa umune mu mudimo wa bulungudi na kakongye kabo. Uno mulume na mukashi abamba dingi’shi: “Tubadi bele nteko pabitale mwanda na mwanda ooso. P’atumono ngalulo ya ku nteko yetu abitunyingisha na kwitupa muloo. Mafuku apela kunyima kwa’twe kufika, bangi bena kakongye ababangile mudimo wa bu mbala-mashinda, na twi bapete mwabi wa kulonga Bible na bantu babidi bende kumpala.”

Eyendo’shi kwikala na muloo nsaa yoso ta mbibofule nya, na kwi nsaa ya muloo na ya malwa. Yehowa badi mufundishe mayi atusangana mu Misambo 64:10, ku bukwashi bwa kikudi kyaye. Sunga nsaa yatudi babofule ku mashimba, twi bakumbene kukulupila’shi baba abalesha’shi ‘mbalulame’ pa kushala na lulamato sunga myanda yashintuluka mu nshalelo ‘abasangulukila mwi Yehowa.’ Na dingi twi balombene kutengyela kulombana kwa mulayilo wa Yehowa wa “eyilu dipya na nsenga ipya.” Yaya nsaa kukutwa kwa kupwidika takukekala dingi kwanka. Bafubi b’Efile Mukulu boso abakapete “muloo na kusepeela bya looso” mu byabya byapanga na byatusha.—Yeeshaya 65:17, 18.

Banda kunangushena byabikekala: kwikala na mbidi ipwidikye na kubanga efuku dyooso na bukome bwibungi. Sunga tubadi batapikye ku mashimba ngofu kala, binangu byoso bya kaaka kenyongoshi t’abikala dingi kwanka. Atushinkamisha’shi “bantu taabatentekyesha dingi myanda ya-kala, taayiibafwila dimo ku mashimba nya.” Kilengyeleshi kya kusanguka kwa bafwe akikabungu bantu befulene. Bantu midiyo na midiyo abakapusha nka bibapushishe baledi ba ka nsongwakashi ka bipwa 12 kabababushishe kwi Yesu “bantu booso babakanyine bikata.” (Mako 5:42) Ku nfudilo a byoso, muntu oso e pa nsenga akekala “muntu mululame” mu kipaso kilombane na bwa looso ‘akasangulukila mwi Yehowa.’